Ix-​Xogħol taʼ Pijunier​—Użu Għaqli tal-​Ħin Tagħna!

¹ ‘Diġà għandi wisq x’nagħmel! Ikun tassew għaqli għalija jekk nibda x-​xogħol taʼ pijunier f’dan iż-​żmien?’ Hekk ħasbet waħda oħt waqt li kienet qed tismaʼ lil anzjan li kien pijunier jippreżenta parti fl-​assemblea tas-​circuit intitolata “Nibqgħu Għaddejjin bil-​Ministeru taʼ Pijunier.” Ħu żagħżugħ fl-​istess udjenza ħaseb, ‘Kif isib il-​ħin għax-​xogħol taʼ pijunier? Jien m’iniex anzjan, imma ħajti diġà mimlija daqs bajda bl-​attivitajiet!’

² Hekk kif l-​anzjan kompla jiddiskuti l-​barkiet tax-​xogħol taʼ pijunier, hu intervista lil diversi pijunieri mis-​circuit li tkellmu dwar l-​aġġustamenti li kellhom jagħmlu sabiex isiru pijunieri u kif Jehovah bierek bil-​kbir l-​isforzi tagħhom. Wieħed kien diżabilitat, waħda kellha s-​sieħeb mhux taʼ l-​istess twemmin, u wieħed kien ċeda karriera fid-​dinja imma setaʼ jaqlaʼ biżżejjed għall-​bżonnijiet bażiċi tiegħu. Malli semgħu kif dawn il-​pijunieri kienu qed jirnexxu bl-​għajnuna taʼ Jehovah, il-​ħu u l-​oħt fl-​udjenza bdew jeżaminaw mill-​ġdid il-​ħsieb u ċ-​ċirkustanzi tagħhom stess. Nistidnuk tagħmel hekk int ukoll, speċjalment peress li l-​ħtiġijiet imnaqqsin tas-​sigħat għall-​pijunieri issa jistgħu jintlaħqu minn iktar pubblikaturi taʼ l-​aħbar tajba.

³ Nafu li Jehovah huwa l-​Ħallieq u s-​Sovran Universali u li ħajjitna nafuha lilu. (Dan. 4:14 [4:​17, NW]; Atti 17:28) Jidher ċar għalina li Jehovah qed juża organizzazzjoni waħda biss. Aħna pprivileġġati li naqdu lealment magħha, billi nappoġġaw “l-​irsir leali u diskret” f’li nagħtu x-​xiehda tas-​Saltna qabel ma jasal it-​tmiem. (Mt. 24:​45, NW; 25:40; 1 Pt. 2:9) Hekk kif qegħdin ngħixu fix-​xifer taʼ “l-​aħħar tad-​dinja,” nirrealizzaw li ż-​żmien biex nippridkaw qed jiskadi. (2 Tim. 3:1) Sadanittant, għandna bżonn immantnu materjalment lill-​familji tagħna. (1 Tim. 5:8) Il-​paga taʼ dak li jkun qisha m’għadhiex isservi fit-​tul daqskemm kienet fl-​imgħoddi. Forsi saħħitna m’għadhiex dik li kienet. U onestament, aħna nixtiequ li jkollna ftit ħin u xi riżorsi biex nużawhom għalina nfusna. (Koħ. 3:​12, 13) Mela nistgħu niddubitaw jekk ikunx għaqli li nwieġbu għall-​istedina biex nagħmlu x-​xogħol taʼ pijunier.

⁴ Jiddependi minn kull wieħed u waħda minna biex neżaminaw iċ-​ċirkustanzi tagħna stess bil-​għaqal u biex niddeċiedu jekk nistgħux nagħmlu x-​xogħol taʼ pijunier. (Rum. 14:12; Gal. 6:5) Huwa inkuraġġanti li ninnotaw l-​għadd li qed jiżdied taʼ dawk li wieġbu għas-​sejħa biex jagħmlu x-​xogħol taʼ pijunier. Minkejja l-​pressjonijiet u l-​problemi taʼ dawn l-​aħħar jiem, ir-​rapport tas-​servizz ippubblikat fin-​1999 Yearbook juri li mas-​700,000 ruħ mill-​poplu taʼ Jehovah mad-​dinja kollha qed jibqgħu għaddejjin fil-​ministeru taʼ pijunier. Sew jekk jaqdu taħt kundizzjonijiet ekonomiċi diffiċli, jekk m’għandhomx trasport, jekk jesperjenzaw problemi taʼ saħħa, jew jekk jiltaqgħu maʼ diffikultajiet u tbatijiet oħrajn, dawn l-​aħwa m’humiex qed jgħejjew f’li jagħmlu dak li hu mill-​aħjar, u taʼ dan ħaqqhom prosit. (Gal. 6:9) Huma aċċettaw l-​offerta taʼ Jehovah biex iġarrbuh. (Mal. 3:10) Huma jħossu li x-​xogħol taʼ pijunier huwa użu għaqli ħafna tal-​ħin u r-​riżorsi limitati tagħhom u li Jehovah tassew berikhom talli għamlu l-​aġġustamenti meħtiġin biex jibdew ix-​xogħol taʼ pijunier u jibqgħu fih.

⁵ Il-​Pijunieri Qegħdin Jitbierku: Waħda oħt fil-​Kamerun li għandha tifla żgħira ħafna tispjega: “Minn mindu twieldet, lil binti dejjem ħadtha miegħi fil-​ministeru. Saħansitra qabel ma tgħallmet timxi, kont inġorrha fuq dahri, marbuta sew b’biċċa drapp. Għodwa waħda fil-​ministeru, waqaft ħdejn bejjiegħ fit-​triq. Binti telqet minn ħdejja u ħadet magħha koċċ rivisti mill-​basket tiegħi. Hi rħitilha ċeklem ċeklem lejn il-​bejjiegħ li kien hemm fil-​qrib. Għalkemm ma setgħetx tgħid wisq, hi ġibdet l-​attenzjoni taʼ waħda mara u ppreżentatilha rivista. Il-​mara baqgħet mistagħġba meta rat tifla daqstant żgħira tieħu sehem f’din l-​attività. Hi mill-​ewwel aċċettat ir-​rivista kif ukoll studju tal-​Bibbja fid-​dar!”

⁶ Bi tweġiba għas-​sejħa għal iktar pijunieri awżiljarji, wieħed anzjan u kap tal-​familja fiz-​Zambja li għandu impjieg sekulari full-time iddeċieda li jagħmel ix-​xogħol taʼ pijunier awżiljarju minkejja l-​iskeda tiegħu mimlija daqs bajda. Ried jagħti eżempju tajjeb lill-​kongregazzjoni u lill-​familja tiegħu. Ġieli kien jipparkja l-​karozza tiegħu mal-​ġenb tat-​triq u jdoqq l-​awdjokasett taʼ Is-​Sigriet Taʼ l-​Hena fil-​Familja u jistieden lil min ikun għaddej biex jiġi jismaʼ dak li jkun qed jinqara b’leħen għoli. B’dak il-​mod, irnexxielu jqassam 16-il ktieb Hena Fil-​Familja u 13-il ktieb Għarfien, u beda żewġ studji tal-​Bibbja.

⁷ Ġie nnotat ukoll spirtu mill-​aħjar taʼ pijunier fil-​pajjiż ġar taż-​Żimbabwe. Matul April 1998, kongregazzjoni waħda b’117-il pubblikatur irrapportat 70 pijunier awżiljarju u 9 regulari. Kongregazzjoni oħra b’94 pubblikatur kellha 58 pijunier awżiljarju jirrapportaw. Jerġaʼ waħda oħra, b’126 pubblikatur, irrapportat li 58 iddeċidew li jagħmlu x-​xogħol taʼ pijunier awżiljarju flimkien maʼ l-​4 pijunieri regulari. Is-​sena taʼ servizz li għaddiet kienet waħda li tispikka fiż-​Żimbabwe. Avolja l-​aħwa hemmhekk kienu mħabbtin ħafna bl-​affarijiet tal-​familja, bl-​attivitajiet tal-​kongregazzjoni, u bil-​bini tal-​fergħa, huma kkonċentraw fuq li jqattgħu l-​ħin tagħhom bil-​għaqal fil-​ministeru.

⁸ Il-​pijunieri jirrealizzaw illi biex jibdew ix-​xogħol taʼ pijunier u jipperseveraw fih ma jistgħux jiddependu fuq is-​setgħa tagħhom stess. Huma l-​ewwel uħud li jammettu li dak kollu li jistgħu jagħmlu jsir possibbli ‘bis-​setgħa li jagħtihom Alla.’ (1 Pt. 4:11) Il-​fidi tagħhom tippermettilhom ikomplu fil-​ministeru tagħhom minn jum għal jum. Minflok ma jfittxu l-​konvenjenza u l-​kumditajiet tagħhom stess, pijunieri taʼ suċċess jirrealizzaw li biex jibqgħu għaddejjin għandhom mnejn ikollhom jgħaddu minn “ħafna taħbit,” imma jirċievu ħafna barkiet bħala riżultat.​—1 Tess. 2:2.

⁹ L-​Eżempju taʼ Pawlu Jirrikjedi Minna li Nimitawh: Il-​Bibbja tiddokumenta dak li l-​appostlu Pawlu wettaq fil-​ministeru u l-​għajnuna mill-​aħjar li ta lil ħafna nies. Madankollu, jekk kien hemm xi ħadd li kien mgħobbi żżejjed, dan kien Pawlu. Hu ssaporta persekuzzjoni u tbatijiet fiżiċi sabiex jippriedka l-​aħbar tajba u jsaħħaħ lill-​kongregazzjonijiet. Kellu wkoll jittollera problema ħarxa f’dik li hi saħħa. (2 Kor. 11:​21-29; 12:​7-10) Kien iddeterminat li juża l-​ħin tiegħu bil-​għaqal. Hu rrikonoxxa li xogħlu kollu għamlu bl-​għajnuna taʼ Jehovah. (Flp. 4:13) Ħadd minn dawk li lilhom Pawlu għen ma kellu raġuni biex jikkonkludi li l-​ħin u l-​isforzi tiegħu fis-​servizz taʼ Jehovah kienu moħlijin jew setgħu jintużaw aħjar. Ħeqq, aħna llum għadna nibbenefikaw mill-​fatt li Pawlu uża ħinu bil-​għaqal! Kemm napprezzawh il-​parir ispirat tiegħu biex jgħinna nirranġaw il-​prijoritajiet tagħna u niggranfaw mal-​verità f’dawn iż-​żminijiet diffiċli!

¹⁰ Issa iktar minn qatt qabel, ‘iż-​żmien biex nippridkaw l-​aħbar tajba qsar.’ (1 Kor. 7:29; Mt. 24:14) Għalhekk, huwa xieraq li nistaqsu lilna nfusna, ‘Kieku ħajti kellha tintemm ħabta u sabta għada, nistaʼ llum ngħid lil Jehovah li wżajt il-​ħin tiegħi bil-​għaqal?’ (Ġak. 4:14) Għala ma tkellimx lil Jehovah fit-​talb issa, billi tiżgurah mix-​xewqa tiegħek li tuża ħinek bil-​għaqal bħala Xhud tiegħu? (Salm 90:12) Itlob għall-​għajnuna taʼ Jehovah biex tissimplifika ħajtek. Avolja għandek mnejn li qabel kont eskludejtu, jistaʼ jkun li issa qed issib li x-​xogħol taʼ pijunier hemm wisaʼ għalih f’ħajtek?

¹¹ Agħmel Kulma Tistaʼ fiċ-​Ċirkustanzi Tiegħek: Nistgħu nifhmu li minħabba ċ-​ċirkustanzi, mhux kulmin jixtieq jistaʼ jippjana li jagħmel 70 siegħa fix-​xahar biex jaqdi bħala pijunier regulari. Madankollu, ħafna pubblikaturi fil-​fatt jirranġaw biex jiddedikaw 50 siegħa fix-​xahar fil-​ministeru bħala pijunieri awżiljarji taʼ spiss kemm jistaʼ jkun jew kontinwament. Jekk iċ-​ċirkustanzi tiegħek huma tali li bħalissa ma tistax tagħmel ix-​xogħol taʼ pijunier awżiljarju jew regulari, qawwi qalbek. Kompli itlob li ċ-​ċirkustanzi tiegħek jinbidlu. Sadanittant, jekk sempliċement m’huwiex possibbli li jsiru xi aġġustamenti, ikseb faraġ milli tkun taf li Jehovah jieħu gost ħafna b’kulma tistaʼ tagħmel b’ruħek kollha fis-​servizz tiegħu. (Mt. 13:23) Hu jinnota li għandek waqfa soda fuq in-​naħa tiegħu u li qed tistinka kemm tiflaħ biex tkun pubblikatur leali li qatt ma jħalli xahar jgħaddi mingħajr ma jaħtaf opportunitajiet biex jagħti xiehda. Forsi tistaʼ tipprogressa billi ttejjeb l-​abbiltajiet tiegħek biex tagħti xiehda, billi taħdem biex issir tinqalaʼ bħala predikatur u għalliem taʼ l-​aħbar tajba.​—1 Tim. 4:16.

1² Peress li “Jum il-​Mulej, kbir u tal-​biżaʼ” huwa qrib ferm, għandna bżonn nużaw il-​ħin li fadal bil-​għaqal jekk irridu nispiċċaw ix-​xogħol li ġejna inkarigati nagħmlu. (Ġoel 3:4 [2:​31, NW]) Satana jaf li żmienu hu qasir, u bħal qatt qabel, qed jipprova kulma huwa fis-​setgħa tiegħu biex jikkomplikalna ħajjitna u jagħmilhielna diffiċli li nikkonċentraw fuq l-​affarijiet verament importanti. (Flp. 1:10; Apk. 12:12) Qatt tissottovaluta l-​interess li Alla għandu fik. Jehovah jistaʼ jgħinek tissimplifika ħajtek u tilħaq il-​potenzjal kollu tiegħek fil-​ministeru. (Salm 145:16) Bil-​ferħ, bosta qed isibu, meta jeżaminaw mill-​ġdid iċ-​ċirkustanzi tagħhom, li jistgħu jingħaqdu mal-​grupp taʼ pijunieri awżiljarji jew regulari. Tabilħaqq, il-​pijunieri jsibu sodisfazzjon immens f’li jużaw il-​ħin tagħhom bil-​għaqal. Se tkun int wieħed minnhom?