Ejja ‘Ngħidu li Għandna Ngħidu!’
1 Qatt iltqajt maʼ xi inkwilin li waqqaf il-preżentazzjoni tiegħek, li tkun ippreparajt bl-attenzjoni, bil-kliem: “Xi trid? Għid li għandek tgħid!” X’nistgħu nitgħallmu minn esperjenza bħal din?
2 Ħafna nies illum huma bla paċenzja. Iridu jkunu jafu min aħna u għala qegħdin hemm. Meta jiskopru li l-għan taż-żjara tagħna hu li niddiskutu l-Bibbja, għandhom mnejn isoddu widnejhom. Il-qari tal-Bibbja u l-konversazzjonijiet spiritwali m’humiex affarijiet importanti fil-ħajja taʼ ħafna nies. Kif nistgħu nikkonvinċu lil inkwilini bħal dawn li għandhom jieħdu ftit minuti biex jiddiskutu suġġett Bibliku magħna?
3 X’Inhu l-Iktar Effettiv: Is-sigriet hu li turi lill-inkwilin li l-Bibbja tipprovdi soluzzjonijiet prattiċi għall-problemi li jikkonċernawh u li tagħmel dan fi ftit kliem kemm jistaʼ jkun. L-iktar preżentazzjonijiet effettivi jinkludu mistoqsija speċifika mfassla biex iġġiegħel lill-inkwilin jaħseb, segwita minn skrittura li twieġeb dik il-mistoqsija. Għandek mnejn tieħu pjaċir tipprova xi wħud mis-suġġerimenti li ġejjin. Dawn huma mfasslin biex jgħinuna ‘ngħidu li għandna ngħidu’ malajr waqt li nqajmu l-interess taʼ l-inkwilin.
4 F’territorju fejn in-nies taʼ spiss jgħidu li m’humiex interessati, qajjem mistoqsija li tinvolvihom personalment:
◼ “Hekk kif nersqu lejn il-millennju li jmiss, tħossok int mimli tama jew mimli dubji? [Agħti ċans għal tweġiba.] Il-Bibbja bassret il-ġrajjiet inkwetanti li naraw illum kif ukoll ir-riżultat tagħhom.” Aqra t-2 Timotju 3:1, 2, 5 u Proverbji 2:21, 22.
◼ “F’dan il-pajjiż hawn tħassib kbir dwar il-kura tas-saħħa. Qatt kont taf li Alla jwegħedna li se jsolvi għal dejjem il-problemi kollha tas-saħħa?” Aqra Apokalissi 21:3, 4.
◼ “Kif taħseb li tibbenefika l-komunità tagħna kieku kulmin jgħix hawn japplika l-prinċipji tal-Bibbja?” Aqra Mattew 22:37-39.
5 Peress li l-inkarigu tagħna hu li nippridkaw l-aħbar tajba tas-Saltna, kulmeta jkun possibbli għandna niġbdu l-attenzjoni lejn dak li se twettaq is-Saltna. Tistaʼ tgħid:
◼ “Qatt kont taf li l-eqdem ktieb tad-dinja, il-Bibbja, bassar li se jkun hemm gvern wieħed għad-dinja kollha?” Aqra Danjel 2:44.
◼ “X’taħseb li jkunu l-kundizzjonijiet kieku Ġesù Kristu jaħkem id-dinja?” Aqra Salm 72:7, 8.
6 F’territorju fejn in-nies huma reliġjużi, tistaʼ tipprova waħda minn dawn l-introduzzjonijiet:
◼ “Ħafna nies ibatu minn diskriminazzjoni minħabba l-ġeneru, ir-reliġjon, u l-kulur tal-ġilda tagħhom. Kif taħseb li jħossu Alla dwar preġudizzju bħal dan?” Aqra Atti 10:34, 35.
◼ “Nafu li Ġesù Kristu għamel ħafna mirakli fi żmienu. Kieku tistaʼ tistaqsih biex jagħmel miraklu ieħor, liema jkun?” Aqra Salm 72:12-14, 16.
7 Jekk l-inkwilin ma jkunx irid jiftaħ il-bieb, tistaʼ tibda konversazzjoni billi tgħid:
◼ “Il-biċċa l-kbira tan-nies illum xebgħu jisimgħu dwar problemi. Iridu jisimgħu dwar soluzzjonijiet. Bla dubju li int bħalhom. Imma fejn nistgħu nsibu soluzzjonijiet veri għall-problemi tagħna?” Agħti ċans għal tweġiba. Aqra t-2 Timotju 3:16, 17.
8 Għax ma Tipprovax? Ħafna drabi kulma jkun hemm bżonn tkun mistoqsija sempliċi u konċiża biex tqajjem l-interess taʼ l-inkwilin. Waħda mara li qabel kienet topponi stiednet lil żewġt aħwa f’darha wara li waħda minnhom staqsiet il-mistoqsija: “Tistaʼ tidentifika s-Saltna li titlob għaliha fit-Talba tal-Missierna?” Il-mistoqsija tant qajmitilha kurżità lil dik il-mara, li aċċettat studju tal-Bibbja. Issa hi qaddejja dedikata taʼ Jehovah!
9 Meta tkun qed titkellem maʼ inkwilin, kun ġenwin bl-espressjonijiet tiegħek. Tkellem minn qalbek. In-nies iktar hemm ċans li jwieġbu favorevolment meta jkunu konvinti li aħna tassew interessati fihom.—Atti 2:46, 47.
10 Ix-xogħol taʼ l-ippridkar taʼ l-aħbar tajba huwa sfida llum. Xi inkwilini jissuspettaw f’min ma jafuhx. Oħrajn għandhom ħajjiet mimlijin daqs bajda u ma tantx għandhom ħin żejjed. Madankollu, nistgħu nkunu żguri li għad hemm ħafna wħud li jixirqilhom li jinstabu. (Mt. 10:11) L-isforzi tagħna biex infittxuhom x’aktarx li se jirnexxu iktar jekk inżommu l-preżentazzjonijiet tagħna qosra u ‘ngħidu li għandna ngħidu!’