Uża l-​Ġrajjiet Kurrenti biex Tqajjem l-​Interess

¹ Tixtieq li dejjem ikollok ħafna ideat tajbin li jżommu l-​ministeru tiegħek ħaj u jqajmu l-​interess tan-​nies fil-​messaġġ tal-​Bibbja? Mela ibda l-​konversazzjonijiet billi tuża dak li qed jiġri fid-​dinja u fil-​komunità tiegħek. Tistaʼ tirreferi għal xi ġrajjiet kurrenti lokali u nazzjonali jew xi ġrajjiet mill-​aħbarijiet internazzjonali. Dawn l-​affarijiet dejjem qed jinbidlu. (1 Kor. 7:31) Ikkunsidra dawn l-​eżempji li ġejjin.

² In-​nies jinteressawhom ħafna l-​problemi ekonomiċi u l-​għoli tal-​ħajja. B’hekk, tistaʼ tgħid:

◼ “Smajt fl-​aħbarijiet li l-​prezz [semmi prezz taʼ xi ħaġa] qed jerġaʼ jogħla?” Jew tistaʼ tikkummenta dwar in-​nuqqas taʼ xogħol jekk kien hemm xi kumpanija kbira li keċċiet ħafna ħaddiema. Skond kif trid tkompli bid-​diskussjoni, jew tistaqsi “Qatt ħsibt għala huwa tant diffiċli biex tlaħħaq mal-​ħajja?” inkella “Taħseb li dejjem se jkun diffiċli biex tipprovdi l-​għajxien?”

³ Rapporti taʼ vjolenza, bħal xi traġedji fil-​familji jew fost l-​istudenti taʼ l-​iskola, jipprovdu bażi għal diskussjoni oħra. Tistaʼ tistaqsi:

◼ “Qrajt fil-​gazzetta li [semmi t-​traġedja fil-​komunità]?” Imbagħad jew tistaqsi “X’taħseb li qed joħloq tant vjolenza fid-​dinja?” inkella “Taħseb li qatt ġej iż-​żmien meta nkunu nistgħu neħilsu mill-​biżaʼ?”

⁴ Aħbarijiet dwar għargħar qerrieda, terremoti, jew inkwiet ċivili f’postijiet differenti tad-​dinja wkoll joffru informazzjoni li tistaʼ tużaha biex tqajjem l-​interess. Per eżempju, tistaʼ tistaqsi:

◼ “Huwa Alla responsabbli għal [semmi xi diżastru naturali]?” Jew tistaʼ tirreferi għal xi inkwiet ċivili li nqalaʼ dan l-​aħħar u tgħid: “Jekk kulħadd irid il-​paċi, għala hija tant diffiċli biex tinkiseb?”

⁵ Oqgħod attent għall-​ġrajjiet kurrenti li tistaʼ tuża fl-​introduzzjoni tiegħek. Fil-​ktejjeb Kif Nibdew u Nkomplu Diskussjonijiet Fuq Il-​Bibbja, f’paġna 4, taħt “Ġrajjiet Kurrenti” tistaʼ ssib xi suġġerimenti t’għajnuna. Madankollu, evita li żżomm maʼ xi naħa jew oħra fi kwistjonijiet politiċi jew soċjali. Minflok, idderieġi l-​attenzjoni lejn l-​Iskrittura u s-​Saltna t’Alla bħala li hi l-​unika soluzzjoni dejjiema għall-​problemi taʼ l-​umanità.