Għin lil Oħrajn Jattendu għal-Laqgħat
1 “Il-ħbieb kollha li joqogħdu fil-qrib . . . li jixtiequ jattendu għal-laqgħat huma mistidnin mill-qalb biex jagħmlu dan.” Minn meta dan l-avviż deher, fil-ħarġa taʼ Zion’s Watch Tower taʼ Novembru taʼ l-1880, ix-Xhieda taʼ Jehovah stiednu bil-ħerqa lin-nies ħalli jingħaqdu magħhom biex jirċievu tagħlim mill-Bibbja. (Apk. 22:17) Dan huwa parti importanti ferm mill-qima vera.
2 Huwa Vitali li Tattendi: Meta nassoċjaw mal-kongregazzjoni se jkollna ħafna barkiet. Insiru nafu aħjar lil dak Alla meraviljuż tagħna, Jehovah. Fil-kongregazzjoni niltaqgħu flimkien biex niġu mgħallmin minn Jehovah. (Is. 54:13) L-organizzazzjoni tiegħu tħejjilna programm kontinwu taʼ tagħlim mill-Bibbja li jressaqna iktar viċin tiegħu. Dan jgħinna wkoll b’mod prattiku biex napplikaw ‘dak kollu li Alla jrid minna.’ (Atti 20:27; Lq. 12:42) Il-laqgħat jipprovdu taħriġ għal kull individwu biex jiżviluppa l-arti tat-tagħlim tal-Kelma t’Alla. Tfakkiriet mill-Iskrittura jgħinuna ngawdu relazzjonijiet tajbin maʼ oħrajn u maʼ Jehovah nnifsu. Assoċjazzjoni maʼ dawk li jħobbu ’l Alla se ssaħħaħ il-fidi tagħna.—Rum. 1:11, 12.
3 Stieden b’Mod Dirett: Mill-ewwel studju, stieden lil kull student tal-Bibbja biex jattendi għal-laqgħat. Agħtih volantin. Qajjimlu l-interess billi taqsam miegħu xi punt li lilek inkuraġġiek mill-aħħar laqgħa li attendejt. Ukoll għaddi miegħu xi ħaġa li se tiġi kunsidrata fil-laqgħa li jmiss. Spjegalu kif inhi s-Sala tas-Saltna, u kun ċert li hu jaf kif għandu jsibha.
4 Jekk student ma jattendix mill-ewwel, ibqaʼ stiednu. Ħu ftit minuti kull ġimgħa biex turih kif taħdem l-organizzazzjoni tagħna. Uża l-browxer Jehovah’s Witnesses—Who Are They? What Do They Believe? u l-vidjo Jehovah’s Witnesses—The Organization Behind the Name biex tgħinu jsir jaf min aħna u xi jkun hemm fil-laqgħat tagħna. Ħu miegħek pubblikaturi oħrajn biex l-istudent isir jafhom. Fit-talba irringrazzja lil Jehovah taʼ l-organizzazzjoni u semmi l-bżonn li l-istudent jassoċja magħha.
5 Toqgħodx lura milli tgħin lil uħud interessati ġodda biex jiltaqgħu magħna. Hekk kif l-apprezzament tagħhom lejn Jehovah jibda jikber, huma se jitqanqlu biex jibdew japplikaw dak li jitgħallmu u jsiru parti mill-organizzazzjoni magħquda t’Alla.—1 Kor. 14:25.