Nidderieġu Lill-​Istudenti Lejn L-​Organizzazzjoni Li Hemm Wara Isimna

¹ “Dan huwa messaġġ li jingħad f’iktar minn 200 lingwa. Huwa messaġġ mismugħ f’iktar minn 210 pajjiżi. Huwa messaġġ mgħoddi personalment kulfejn jistgħu jinstabu n-​nies. Huwa kollu kemm hu parti mill-​akbar kampanja taʼ ppridkar li qatt rat id-​dinja, messaġġ li jgħaqqad lil miljuni fuq l-​art kollha. Ix-​Xhieda taʼ Jehovah ilhom organizzati biex iwettqu dan ix-​xogħol għal iktar minn mitt sena!”

² Hekk jibda r-​rakkont tal-​vidjo Jehovah’s Witnesses​—The Organization Behind the Name. Dan ikompli billi jwieġeb il-​mistoqsijiet: Min huma verament ix-​Xhieda taʼ Jehovah? L-​attività tagħhom kif inhi organizzata? Iddireġuta? Iffinanzjata? Dan jimpressjona lill-​ispettaturi bil-​fatt li “x-​Xhieda taʼ Jehovah tad-​dinja kollha ġew imħarrġin bħala organizzazzjoni biex jgħinu lill-​ġirien tagħhom ħalli jibnu fidi fil-​Bibbja,” u jinkuraġġihom biex jaraw għalihom infushom l-​organizzazzjoni li hemm wara isimna. Wara li rat dan il-​vidjo, waħda mara li kienet qiegħda tistudja nfaqgħet tibki bil-​ferħ u bl-​apprezzament u qalet: “Kif jistaʼ xi ħadd ma jindunax li din hija l-​organizzazzjoni taʼ dak Alla veru, Jehovah?”​—Qabbel 1 Korintin 14:​24, 25.

³ Waħda mara kienet studjat il-​Bibbja għal ħafna żmien b’waqfiet minn darba għall-​oħra, imma ma setgħetx taċċetta l-​fatt li t-​Trinità hi duttrina falza. Imbagħad hi u żewġha ġew murijin il-​vidjo tagħna. Baqgħu impressjonati ħafna bil-​preżentazzjoni u dik il-​lejla stess reġgħu rawh darb’oħra. Fl-​istudju tagħhom li kien imiss, il-​mara esprimiet ix-​xewqa tagħha li ssir Xhud. Qalet li kienet qagħdet tikkonċentra fuq it-​twemmin tagħha fit-​Trinità u kienet naqset li tħares lejn l-​organizzazzjoni tagħna u n-​nies taʼ ġo fiha. Mill-​vidjo rrealizzat li kienet sabet l-​organizzazzjoni vera t’Alla. Hi riedet tibda tippriedka minn dar għal dar dak in-​nhar stess. Wara li spjegawlha x’inhuma l-​passi neċessarji li wieħed irid jieħu biex isir pubblikatur mhux mgħammed, qalet: “Mela ejja ħalli nibdew nirsistu.” Irriżenjat mill-​knisja tagħha, bdiet taħdem fl-​attività tas-​servizz taʼ l-​għalqa, u saret esperta kif tispjega li t-​Trinità m’hijiex minnha.

⁴ Hija xi ħaġa magħrufa sew li studenti tal-​Bibbja jagħmlu progress spiritwali aħjar u jikbru lejn il-​maturità iktar malajr meta dawn jagħrfu l-​organizzazzjoni taʼ Jehovah u jissieħbu magħha. B’mod sinjifikanti, wara li t-​3,000 ruħ tgħammdu f’Pentekoste, huma “baqgħu jagħtu lilhom infushom għat-​tagħlim taʼ l-​appostli u għas-​sħubija flimkien.” (Atti 2:​42, ntt.) Huwa essenzjali li ngħinu lill-​istudenti biex jagħmlu l-​istess ħaġa llum. Kif nistgħu nagħmlu dan?

⁵ Erfaʼ R-​Responsabbiltà: Kull wieħed li jagħmel dixxipli jrid jirrealizza li hija r-​responsabbiltà tiegħu li jidderieġi lill-​istudent tal-​Bibbja lejn l-​organizzazzjoni t’Alla. (1 Tim. 4:​16) Kull sessjoni taʼ studju għandha titqies bħala l-​pass li jmiss lejn dak il-​jum sabiħ meta l-​wieħed ġdid se jissimbolizza d-​dedikazzjoni tiegħu lejn Jehovah bil-​magħmudija fl-​ilma. Waħda mill-​mistoqsijiet li dan se jiġi mistoqsi matul iċ-​ċerimonja tal-​magħmudija hija: “Tifhem int li d-​dedikazzjoni u l-​magħmudija tiegħek jidentifikawk bħala wieħed mix-​Xhieda taʼ Jehovah fi sħubija maʼ l-​organizzazzjoni t’Alla ddireġuta mill-​ispirtu tiegħu?” B’hekk, huwa importanti li jirrealizza li ma jistax jaqdi ’l Alla mingħajr ma jissieħeb b’mod attiv mal-​vera kongregazzjoni Kristjana.​—Matt. 24:​45-​47; Ġwn. 6:​68; 2 Kor. 5:​20.

⁶ Kompli eduka lill-​istudent dwar il-​kongregazzjoni lokali u l-​organizzazzjoni internazzjonali li hemm wara x-​Xhieda taʼ Jehovah. Agħmel dan f’kull sessjoni taʼ l-​istudju tal-​Bibbja, billi tibda minn dik taʼ l-​ewwel. Mill-​bidunett, stieden lill-​istudent għal-​laqgħat, u ibqaʼ stiednu.​—Riv. 22:​17.

⁷ Uża L-​Għodod Li Huma Pprovduti: L-​aqwa pubblikazzjonijiet li għandna biex nużawhom f’li nikkonduċu studji tal-​Bibbja huma l-​bro­chure Alla X’Jirrikjedi Minna? u l-​ktieb Għarfien Li Jwassal Għall-​Ħajja Taʼ Dejjem. It-​tnejn li huma jenfasizzaw il-​bżonn tas-​sħubija mal-​kongregazzjoni. It-​tmiem taʼ lezzjoni 5 tal-​brochure X’Jirrikjedi jgħid: “Jeħtieġ li tkompli titgħallem dwar Jehovah u tobdi l-​ħtiġijiet tiegħu. Li tattendi l-​laqgħat fis-​Sala tas-​Saltna lokali tax-​Xhieda taʼ Jehovah se jgħinek ­tagħmel hekk.” Il-​ktieb Għarfien jinkuraġġixxi lill-​istudent darba wara l-​oħra biex jissieħeb fil-​laqgħat. Kapitlu 5, paragrafu 22, jagħti din l-​istedina: “Ix-​Xhieda taʼ Jehovah . . . kordjalment iħeġġuk li taqsam magħhom f’li tqim lil Alla ‘bl-​ispirtu u l-​verità.’ (Ġwann 4:​24)” Kapitlu 12, paragrafu 16, jgħid: “Hekk kif tkompli dan l-​istudju u tagħmilha drawwa li tattendi l-​laqgħat tax-​Xhieda taʼ Jehovah, il-​fidi tiegħek se tiġi ffortifikata saħansitra iktar.” Kapitlu 16, paragrafu 20, jgħid: “Agħmilha d-​drawwa tiegħek li tattendi l-​laqgħat tax-​Xhieda taʼ Jehovah.” Ikompli jgħid: “Dan se jgħinek tifhem u mbagħad tapplika l-​għarfien dwar Alla f’ħajtek u se jġiblek l-​hena. Li tkun parti mill-​fratellanza Kristjana mad-​dinja kollha se jgħinek tibqaʼ qrib taʼ Jehovah.” Kapitlu 17 jiddiskuti bir-​reqqa kif wieħed isib sigurtà vera fost il-​poplu t’Alla. Hekk kif nistudjaw m’oħrajn, hija r-​responsabbiltà tagħna li nenfasizzaw dawn is-​siltiet mill-​materjal.

⁸ Il-​brochure Jehovah’s Witnesses​—Unitedly ­Doing God’s Will Worldwide huwa biċċa għodda mill-​aħjar li tħejja biex individwi jsiru midħla taʼ l-​unika organizzazzjoni viżibbli li Jehovah qiegħed juża llum biex iwettaq ir-​rieda tiegħu. L-​informazzjoni dettaljata li fih dwar il-​ministeru, il-​laqgħat, u l-​organizzazzjoni tagħna se tinkuraġġixxi lill-​qarrej biex jissieħeb magħna f’li jqim lil Alla. Ladarba jiġi stabbilit studju tal-​Bibbja, huwa rrikmandat li nagħtu kopja taʼ dan il-​brochure lill-​istudent biex jaqrah waħdu. M’hemmx għalfejn li nistudjawh miegħu bħalma kien isir fil-​passat.

⁹ Xi wħud mill-​vidjos li pproduċiet is-​Soċjetà huma għodod mill-​aqwa biex jidderieġu lill-​istudenti lejn l-​organizzazzjoni li hemm wara isimna. Ikun tajjeb jekk ikunu jistgħu jaraw (1) The New World Society in Action, reviżjoni tal-​film taʼ l-​1954 li wera ċar l-​ispirtu seren, effiċjenti, u taʼ mħabba li bih tiffunzjona l-​organizzazzjoni taʼ Jehovah; (2) United by Di­vine Teaching, li jeżamina l-​unità paċifika li ntweriet fil-​konvenzjonijiet internazzjonali tagħna fl-​Ewropa tal-​Lvant, fl-​Amerka t’Isfel, fl-​Afrika, u fl-​Asja; (3) To the Ends of the Earth, li fakkar il-​50 anniversarju tal-​Watchtower Bible School of Gilead u juri l-​effett li kellhom il-​missjunarji fuq ix-​xogħol taʼ l-​ippridkar madwar id-​dinja; (4) Jehovah’s Wit­nesses Stand Firm Against Nazi As­sault, li jirrakkonta l-​istorja eċċitanti tal-​kuraġġ u t-​trijonf li wrew ix-​Xhieda waqt li ffaċċjaw il-​persekuzzjoni brutali taʼ Hitler; u, m’għandniex xi ngħidu, (5) Jehovah’s Witnesses​—The Organization Behind the Name.

¹⁰ Qiegħed Miri Progressivi Rigward Il-​Laqgħat: Irid jiġi spjegat lill-​istudenti li aħna għandna bżonn kemm tat-​taħriġ privat li hu pprovdut fl-​għamla taʼ studju tal-​Bibbja fid-​dar u kemm tad-​diskussjonijiet f’forma taʼ klassi li jkollna fil-​laqgħat tal-​kongregazzjoni. (Ġwn. 6:​45) Wieħed ġdid jeħtieġ li jipprogressa ugwalment fil-​fehma tiegħu kemm taʼ l-​Iskrittura u kemm taʼ l-​organizzazzjoni. Għal dan l-​għan, m’hemmx aħjar milli nattendu l-​laqgħat. (Ebr. 10:​23-​25) Ibda stieden lill-​individwu għal-​laqgħat tal-​kongregazzjoni mill-​ewwel. Xi wħud ġodda li juru interess jibdew jattendu l-​laqgħat saħansitra qabel ma jkollhom studju tal-​Bibbja regulari fid-​dar. M’għandniex xi ngħidu, irridu nħallu eżempju tajjeb aħna stess billi nattendu regolarment.​—Luqa 6:​40; Flp. 3:​17.

¹¹ Offri biżżejjed informazzjoni dwar il-​laqgħat u dwar kif dawn jitmexxew sabiex l-​istudent iħossu komdu meta jattendi l-​ewwel laqgħa tiegħu. Peress li xi nies iħossuhom skomdi ħafna meta jkunu sejrin f’xi postijiet ġodda għall-​ewwel darba, jistaʼ jkun taʼ vantaġġ li takkumpanja lill-​istudent għas-​Sala tas-​Saltna meta jattendi laqgħa għall-​ewwel darba. Hu se jħossu iktar komdu jekk tkun miegħu hekk kif jiltaqaʼ maʼ membri tal-​kongregazzjoni. Fuq kollox, ilqaʼ tajjeb lill-​viżitatur tiegħek, billi ġġagħlu jħossu milqugħ u komdu.​—Matt. 7:​12; Flp. 2:​1-4.

¹² Inkuraġġixxi lill-​istudent biex maʼ l-​ewwel opportunità jattendi xi jum t’assemblea speċjali, assemblea tas-​circuit, jew konvenzjoni distrettwali. Forsi int tistaʼ tinkludih fl-​arranġamenti tiegħek tat-​trasport.

¹³ Nissel Apprezzament Li Jiġi Mill-​Qalb: Il-​ktieb Organized to Accomplish Our Ministry, paġna 92, jispjega: “Jekk l-​apprezzament profond tiegħek stess lejn l-​organizzazzjoni taʼ Jehovah huwa rifless fil-​konversazzjonijiet tiegħek maʼ nies li juru interess, se jkun iktar faċli għalihom li jikbru fl-​apprezzament u se jqanqalhom biex jimxu iktar ’il quddiem f’li jsiru jafu lil Jehovah.” Tkellem dejjem b’mod pożittiv, u qatt negattiv, dwar il-​kongregazzjoni lokali tiegħek. (Salm 84:​10; 133:​1, 3b) Fit-​talb tiegħek li toffri waqt l-​istudju tal-​Bibbja, semmi l-​kongregazzjoni u l-​bżonn taʼ l-​istudent li jissieħeb regolarment magħha.​—Efe. 1:​15-​17.

¹⁴ Aħna ċertament li rridu li wħud ġodda jiżviluppaw apprezzament li ġej mill-​qalb għas-​sħubija pjaċevoli u s-​sigurtà spiritwali li nsibu fost il-​poplu t’Alla. (1 Tim. 3:​15; 1 Piet. 2:​17; 5:9) Bħala Xhieda taʼ Jehovah, ejjew nagħmlu dak kollu li nistgħu biex nidderieġu lil studenti tal-​Kelma t’Alla lejn l-​organizzazzjoni li hemm wara isimna.

[Kumment f’paġna 3]

L-​istudenti jagħmlu progress spiritwali iktar mgħaġġel meta jaraw l-​organizzazzjoni għalihom infushom

[Kumment f’paġna 4]

Iddumx ma tistieden lill-​istudenti biex jattendu l-​laqgħat