Toqgħodx Lura!
1 Meta nibdew illestu biex immorru nippridkaw minn bieb għal bieb, l-akbar sfida li jistaʼ jkollna hija li noħorġu mill-bieb tagħna stess. Li nħossuna li m’aħniex tajbin biżżejjed jistaʼ jżommna lura milli noħorġu u nitkellmu l-verità mal-“bnedmin kollha.” (1 Tim. 2:4) Iżda m’għandniex noqogħdu naħsbuha darbtejn biex nippridkaw l-aħbar tajba. Għala le?
2 Huwa l-Messaġġ taʼ Jehovah: Jehovah wasslilna l-kelma tiegħu permezz tal-Bibbja. Meta nieħdu dan il-messaġġ lil oħrajn, aħna qed ngħaddulhom ħsibijietu, mhux ħsibijietna. (Rum. 10:13-15) Meta xi wħud jirrifjutaw li jisimgħu l-messaġġ tas-Saltna, huma jkunu tassew qed jirrifjutaw lil Jehovah. Madankollu, aħna ma naqtgħux qalbna. Għandna l-fiduċja li dan il-messaġġ, se jqanqal b’mod pożittiv il-qlub taʼ dawk li jixtiequ jaraw bidla fis-sitwazzjonijiet tad-dinja u huma konxji tal-bżonn spiritwali tagħhom.—Eżek. 9:4; Mt. 5:3, 6.
3 Jehovah Jiġbed lin-Nies: Xi ħadd li ma riedx jismagħna fil-passat jistaʼ jkun li issa huwa iktar lest li jismaʼ għax forsi ċ-ċirkustanzi tiegħu nbidlu u l-kundizzjoni taʼ qalbu tkun irtabet. Jistaʼ jkun li issa Jehovah juri rieda tajba lejh u ‘jiġbdu.’ (Ġw. 6:44, 65) Meta dan jiġri, aħna rridu nkunu lesti biex nintużaw minn Jehovah u nħallu lill-anġli jiggwidawna sabiex insibu wħud bħal dawn.—Apk. 14:6.
4 Alla Jagħtina l-Ispirtu Tiegħu: L-ispirtu qaddis jagħtina l-kapaċità biex nitkellmu “bil-qlubija bl-awtorità taʼ Jehovah.” (Atti 14:1-3, New World Translation) Meta nżommu f’moħħna li għandna dan l-appoġġ tant qawwi fil-ministeru tagħna, mhux se noqogħdu lura milli nitkellmu fuq il-verità mal-ġirien, maʼ sħabna tax-xogħol, maʼ sħabna tal-klassi, maʼ qrabatna, jew maʼ nies taʼ edukazzjoni għolja jew sinjuri.
5 Ġesù Għallimna Kif: Ġesù kien juża mistoqsijiet li jġagħluk taħseb, tixbihat realistiċi, u raġunar mill-Iskrittura. Hu kien jispjega l-verità b’mod li jiġbdek, sempliċi, u mill-qalb. Dawn għadhom l-aħjar metodi li jistgħu jintużaw illum. (1 Kor. 4:17) Iċ-ċirkustanzi taʼ fejn nippridkaw jistgħu jkunu differenti minn xulxin, iżda l-messaġġ qawwi tas-Saltna jibqaʼ l-istess.
6 Aħna privileġġati li qed nintużaw minn Jehovah biex ngħinu lin-nies b’mod speċjali li jsalvalhom ħajjithom. Mela ejja ma noqogħdux lura! Jalla nkunu kuraġġużi u nħallu lil Jehovah “jiftħilna l-bieb għall-kelma” sabiex aħna nkunu nistgħu nitkellmu dwar l-aħbar tajba m’oħrajn.—Kol. 4:2-4.