Inkunu Modesti fl-​Ilbies u d-​Dehra

¹ “L-​irġiel kollha, anki t-​tfal subien żgħar, jilbsu l-​ingravata. In-​nisa u l-​bniet kollha, kemm l-​adolexxenti u kemm iż-​żgħar, jilbsu libsa jew dublett. Ma tara lil ħadd b’xi par jeans jew bl-​għonq tal-​qmis miftuħ. Kulħadd wiċċu jixgħel bil-​ferħ hawnhekk.” Hekk qal rapport fl-​aħbarijiet. X’tip taʼ folla kien qed jiddeskrivi? Xi laqgħa politika? Xi avveniment sportiv? Kunċert tal-​mużika rock? Xejn minn dan! Kien qed jiddeskrivi grupp t’aħwa f’konvenzjoni distrettwali kbira s-​sajf li għadda.

² F’belt oħra fejn saret il-​konvenzjoni, ġurnalist iddeskriva folla taʼ Xhieda b’dan il-​mod: “L-​irġiel kollha kienu nodfa, bil-​libsa u l-​ingravata. In-​nisa lebsin modest iżda eleganti.” Osservatur ieħor, uffiċjal tas-​sigurtà, stqarr: “Intom nies b’manjieri tajbin, turu rispett, nodfa, u puliti. Dak li qed nara hu sabiħ wisq. F’din id-​dinja maħmuġa, irnexxielkom tneħħu l-​ħmieġ!” X’naqra rakkomandazzjoni tajba għan-​nom tagħna! M’aħniex grati li n-​nies jistgħu jitkellmu daqshekk tajjeb dwar il-​fratellanza tagħna? M’għandniex xi ngħidu, dawk kollha li kienu fil-​folla kkontribwew għal dawn ir-​rapporti tajbin minħabba d-​dehra eżemplari tagħhom.

³ Madwar id-​dinja sirna magħrufin għall-​fatt li aħna differenti b’mod ċar fid-​dehra tagħna. (Mal. 3:18) Għala? Għaliex aħna nimxu skond it-​twissija Skritturali li tgħidilna biex “[niżżejnu] bi lbies xieraq, bil-​modestja u bl-​għaqal, . . . kif jixraq lil [dawk] li jridu jkunu twajbin.”—1 Tim. 2:​9, 10.

⁴ X’Turi Int bl-​Ilbies u d-​Dehra Tiegħek? L-​ilbies li nilbsu u l-​mod kif nilbsuh jgħid xi ħaġa ċerta dwarna—x’nemmnu, x’attitudni għandna, u x’inhuma l-​intenzjonijiet tagħna. L-​istil li nagħżlu juri min aħna u x’nirrappreżentaw. Qatt m’għandna ninkuraġġixxu ħsibijiet baxxi u kondotta li tingħoġob min-​nies tad-​dinja. Dak li jikkonċernana m’huwiex kemm ċertu stil hu verament tal-​moda iżda kemm huwa xieraq għal xi ħadd li jistqarr li hu ministru t’Alla. (Rum. 12:2) Minflok ma nagħżlu dehra li turi spirtu indipendenti jew tissuġġerixxi stil taʼ ħajja immorali, irridu nuru li aħna verament nigglorifikaw ’l Alla.—1 Pt. 2:12.

⁵ Kultant, xi ħadd li jkun ġdid, bla esperjenza, jew dgħajjef spiritwalment jistaʼ jaċċetta dak kollu li tinkuraġġixxi d-​dinja fl-​ilbies u d-​dehra mingħajr ma l-​ewwel jikkunsidra kif dan jirrifletti fuq Jehovah u l-​organizzazzjoni tiegħu. Ilkoll kemm aħna nistgħu neżaminaw lilna nfusna sew biex naraw jekk ġejniex influwenzati mill-​ħsibijiet tad-​dinja. Nistgħu nitkellmu maʼ xi ħadd mill-​aħwa rispettat u matur spiritwalment biex nitolbuh jgħidilna x’jaħseb sinċerament dwar l-​istil taʼ l-​ilbies u d-​dehra tagħna u mbagħad inqisu bis-​serjetà s-​suġġerimenti li jagħtina.

⁶ Xi wħud mill-​ewwel jaqblu li għandhom joqogħdu attenti dwar il-​mod kif jilbsu meta jattendu l-​konvenzjoni. Iżda mbagħad ibaxxu dan il-​livell waqt ir-​rikreazzjoni wara s-​sessjonijiet. Żomm il-​livelli għoljin li jixirqu lill-​ministri Kristjani. (2 Kor. 6:​3, 4) Kulfejn immorru fil-​pubbliku, il-​badge tal-​konvenzjoni flimkien maʼ l-​ilbies u d-​dehra xierqa tagħna se tidentifikana bħala Xhieda taʼ Jehovah. Għalhekk, l-​ilbies tagħna għandu jkun dejjem pulit u modest, li jindika li m’aħna l-​ebda parti mid-​dinja.—Ġw. 15:19.

⁷ Din is-​sena, ejja nagħmlu dak kollu li nistgħu fil-​Konvenzjoni Distrettwali “Proklamaturi Żelużi tas-​Saltna” biex nagħtu prova li aħna “poplu mqaddes lill-​Mulej, Alla [tagħna].” L-​impressjoni tajba li tiġi minn dan se żżid mal-​“foħrija, isem u ġieħ” taʼ Jehovah.—Dt. 26:​19, Saydon.

[Kaxxa f’paġna 5]

Kif Tigglorifika lil Jehovah:

■ Ilbes b’tali mod li jixraq lil ministru t’Alla.

■ Evita stili taʼ lbies li juru l-​ispirtu tad-​dinja.

■ Uri l-​modestja, li tirrifletti moħħ f’loku.