Meta Niżirgħu Ħafna Naqilgħu Barkiet Għonja

¹ Ilkoll kemm aħna nħarsu ’l quddiem lejn it-​twettiq tal-​wegħdi grandjużi li jinsabu fil-​Kelma t’Alla. Anki issa, Jehovah qed jagħti ħafna barkiet li jagħmlulna ħajjitna iktar pjaċevoli. Madankollu, kemm nibbenefikaw personalment minnhom jiddependi ħafna minn kemm ikun kbir l-​isforz li nagħmlu. Bħalma poġġieha l-​appostlu Pawlu, “min jiżraʼ ħafna, jaħsad ħafna.” (2 Kor. 9:6) Ikkunsidra żewġ aspetti fejn japplika dan il-​prinċipju.

² Il-​Ministeru Persunali Tagħna: Niġu premjati bil-​kbir talli naqsmu l-​aħbar tajba man-​nies kulmeta nkunu nistgħu nagħtu xiehda. (Prov. 3:​27, 28) Bosta huma dawk li jiżirgħu ħafna billi jżidu s-​sehem tagħhom fil-​ministeru, inkluż li jaqdu bħala pijunieri awżiljarji jew regulari, u lil dawn l-​uħud taʼ min ifaħħarhom. Ilkoll kemm aħna nistgħu niżirgħu ħafna billi nitqanqlu mill-​kuxjenza tagħna biex immorru lura ħalli nikkultivaw l-​interess kollu li nsibu u noffru studju tal-​Bibbja kulmeta tiġina l-​opportunità. (Rum. 12:11) Meta naħdmu iebes b’dan il-​mod se jkollna esperjenzi inkuraġġanti u iżjed ferħ fil-​ministeru tagħna.

³ Nappoġġaw l-​Interessi tas-​Saltna: Il-​kumment li għamel Pawlu dwar li ‘niżirgħu ħafna’ għandu x’jaqsam maʼ l-​għoti materjali. (2 Kor. 9:​6, 7, 11, 13) Illum, hemm ħafna x’nistgħu nagħmlu b’mod fiżiku u materjali biex nappoġġaw l-​interessi tas-​Saltna. Nistgħu ngħinu fil-​bini tas-​Swali tas-​Saltna u s-​Swali taʼ l-​Assembleat. Nistgħu wkoll noffru ruħna biex nagħtu sehemna f’li nżommu dawn iċ-​ċentri taʼ qima nodfa u f’kundizzjoni tajba. Iżjed minn hekk, nistgħu nikkontribwixxu b’mod finanzjarju kemm għall-​ispejjeż tal-​kongregazzjoni lokali kif ukoll għall-​ippridkar tas-​Saltna u x-​xogħol taʼ li nagħmlu dixxipli madwar id-​dinja. Hekk kif ilkoll kemm aħna nagħtu s-​sehem tagħna, kemm nifirħu meta naraw il-​barka abbundanti taʼ Jehovah fuq ix-​xogħol li qabbadna nagħmlu hu stess!—Mal. 3:10; Lq. 6:38.

⁴ Il-​Kelma t’Alla tħeġġiġna biex ‘nagħmlu l-​ġid, nistagħnew b’opri tajba, inkunu ġenerużi u naqsmu maʼ oħrajn.’ Hekk kif nagħtu kas din it-​twissija, aħna ngawdu barkiet għonja minn issa. Fl-​istess waqt, ‘inkunu qegħdin naħżnu għalina nfusna teżor sabiħ għal li ġej, u l-​ħajja vera’ li ġejja.—1 Tim. 6:​18, 19.