Kun Kuntent b’Dak li Għandek

¹ L-​Iskrittura twissina biex nipprovdu materjalment għal dawk taʼ darna, iżda dan m’għandux isir il-​mira prinċipali f’ħajjitna. L-​affarijiet spiritwali għandhom jiġu l-​ewwel. (Mt. 6:33; 1 Tim. 5:8) Li nsibu l-​bilanċ xieraq huwa taʼ sfida f’dan iż-​“żmien iebes.” (2 Tim. 3:1) X’se jgħinna nagħmlu dan?

² Adotta l-​Ħarsa tal-​Bibbja: Il-​Kelma t’Alla twissina li l-​ġiri wara l-​għana jistaʼ jġib rovina spiritwali. (Koħ. 5:9 [5:​10, New World Translation]; Mt. 13:22; 1 Tim. 6:​9, 10) F’dan il-​perijodu kruċjali, ikun diżastruż jekk xi ħadd minna tant isir moħħu biss fix-​xogħol sekulari jew fit-​tħassib finanzjarju li jasal biex iwarrab fil-​ġenb l-​attivitajiet spiritwali—il-​laqgħat, l-​istudju, u s-​servizz—u jagħtihom it-​tieni post f’ħajtu. (Lq. 21:​34-36) B’kuntrast maʼ dan, il-​Bibbja tagħti l-​parir: “Sakemm għandna x’nieklu u x’nilbsu, dan għandu jkun biżżejjed għalina.”—1 Tim. 6:​7, 8.

³ Dan ma jfissirx li l-​Kristjani jeħtieġ li jgħixu fil-​faqar li jġibuh b’idejhom stess. Iżda jgħinna nagħrfu x’inhuma verament il-​bżonnijiet materjali tagħna—l-​ikel, l-​ilbies, u l-​kenn li jkunu suffiċjenti għall-​pajjiż fejn ngħixu. Jekk għandna l-​bżonnijiet tal-​ħajja, m’għandniex nibqgħu nfittxu li niksbu livell ogħla t’għajxien. Meta nkunu qed naħsbu biex nixtru xi ħaġa jew inżidu x-​xogħol tagħna, nagħmlu tajjeb li nistaqsu lilna nfusna, ‘Huwa dan verament neċessarju?’ Meta nagħmlu hekk se niġu megħjunin nagħtu kas il-​parir ispirat: “Tkunux mogħtija għar-​regħba tal-​flus; kunu kuntenti b’dak li għandkom.”—Lhud 13:5.

⁴ Jekk nafdaw f’Jehovah, hu se jberikna. (Prov. 3:​5, 6) Għalkemm irridu naħdmu iebes biex niksbu l-​bżonnijiet taʼ kuljum, aħna ma niċċentrawx ħajjitna fuq dawn l-​affarijiet. Sew jekk għandna ftit jew ħafna, aħna nistrieħu fuq Jehovah biex jissodisfa l-​bżonnijiet tagħna. (Flp. 4:​11-13) B’riżultat taʼ dan, ingawdu kuntentizza li ġejja minn Alla flimkien maʼ ħafna barkiet oħra.

⁵ Imita l-​Fidi t’Oħrajn: Omm waħedha li kienet qed trabbi lil bintha fit-​triq tal-​verità ssimplifikat ħajjitha bil-​mod il-​mod. Għalkemm kienet tgawdi l-​kumditajiet taʼ darha, marret tgħix f’dar iżgħar u iktar tard f’appartament. Dan ippermettielha tnaqqas is-​sigħat tax-​xogħol sekulari tagħha sabiex tkun tistaʼ tiddedika iktar ħin għall-​ministeru. Wara li bintha kibret u żżewġet, l-​omm irtirat mix-​xogħol qabel iż-​żmien, avolja dan kien ifisser li d-​dħul finanzjarju tagħha kien se jerġaʼ jonqos. Oħtna issa ilha sebaʼ snin taqdi bħala pijuniera regulari u ma jiddispjaċiha xejn għas-​sagrifiċċji materjali li għamlet biex tpoġġi l-​interessi tas-​Saltna l-​ewwel f’ħajjitha.

⁶ Ħu anzjan u martu qdew bħala pijunieri għal ħafna snin filwaqt li rabbew lit-​tliet uliedhom. Bħala familja, tgħallmu jkunu kuntenti f’li jissodisfaw il-​bżonnijiet tagħhom minflok ma jpaxxu x-​xewqat tagħhom. Il-​ħu jikkummenta: “Kellna ngħixu b’mod iktar sempliċi. Għalkemm għaddejna minn żminijiet diffiċli, Jehovah dejjem ipprovdielna dak li kellna bżonn. . . . Meta nara lill-​familja tiegħi tpoġġi l-​interessi spiritwali l-​ewwel b’dan il-​mod, inħoss li kollox qiegħed kif suppost, u nħossni sodisfatt.” Martu żżid tgħid: “Meta nara [lil żewġi] okkupat bl-​affarijiet spiritwali, inħoss fija kuntentizza profonda.” It-​tfal ukoll jinsabu kuntenti li l-​ġenituri tagħhom iddeċidew li jaqdu lil Jehovah full-time.

⁷ Għal dawk kollha li jagħżlu ħajja bħal din taʼ devozzjoni lejn Alla minflok il-​ġiri wara l-​affarijiet materjali, il-​Bibbja twiegħed barkiet għonja kemm issa kif ukoll fil-​ħajja li ġejja.—1 Tim. 4:8.