Ngħixu fi Qbil mad-Dedikazzjoni Tagħna
1 Kemm jekk tgħammidt reċentement u kemm jekk tgħammidt għaxriet taʼ snin ilu, int x’aktarx li tiftakar dik il-ġrajja importanti f’ħajtek. Il-magħmudija tagħna m’hijiex it-tmiem imma, għal kuntrarju, hija l-bidu taʼ ħajja taʼ servizz dedikat li jistaʼ jibqaʼ għal dejjem. (1 Ġw. 2:17) X’inhu involut f’li ngħixu fi qbil mad-dedikazzjoni tagħna?
2 Segwi l-Eżempju taʼ Kristù: Hekk kif tgħammed, Ġesù ‘beda l-ministeru tiegħu,’ ixandar “l-Evanġelju tas-Saltna taʼ Alla.” (Lq. 3:23; 4:43) Bl-istess mod, hekk kif issimbolizzajna d-dedikazzjoni tagħna lil Jehovah bil-magħmudija, aħna sirna ministri ordnati taʼ l-aħbar tajba. Għalkemm jeħtieġ ħafna ħin u sforz biex niksbu l-bżonnijiet materjali tal-ħajja, il-vokazzjoni, jew ix-xogħol ewlieni, tagħna hija l-ministeru Kristjan. (Mt. 6:33) Minflok ma jissieltu biex jiksbu għana jew fama, dawk li huma dedikati lil Alla jfittxu li jagħtu ‘ġieħ lill-ministeru tagħhom,’ bħalma għamel l-appostlu Pawlu. (Rum. 11:13) Tgħożż int il-privileġġ li taqdi lil Jehovah u tagħmel int l-aħjar li tistaʼ?
3 Bħal fil-każ taʼ Ġesù, aħna għandna ‘nieqfu lix-xitan.’ (Ġak. 4:7) Satana ttanta lil Ġesù eżatt malli Hu tgħammed, u qed jimmira li jagħmel l-istess illum lill-qaddejja dedikati taʼ Jehovah. (Lq. 4:1-13) Minħabba li ninsabu mdawrin bid-dinja taʼ Satana, aħna għandna nuru l-kontroll fuqna nfusna, filwaqt li nevitaw dak kollu li jniġġes lil moħħna jew iħassrilna lil qalbna. (Prov. 4:23; Mt. 5:29, 30) Il-Kristjani huma mwissijin li ‘ma jistgħux jaqsmu fil-Mejda tal-Mulej u fil-mejda tad-demonji.’ (1 Kor. 10:21) Dan jirrikjedi li nħarsu lilna nfusna mid-divertiment mhux xieraq, mis-sħubija ħażina, u mill-perikli taʼ l-Internet. Jeħtieġ ukoll li nevitaw materjal apostat. Il-fatt li nkunu għassa għal dawn l-affarijiet u għal tattiċi oħra taʼ Satana se jgħinna ngħixu fi qbil mad-dedikazzjoni tagħna.
4 Uża l-Provvedimenti t’Alla: Sabiex jgħinna ngħixu fi qbil mad-dedikazzjoni tagħna, Jehovah ipprovdielna għajnuna permezz tal-Kelma tiegħu u tal-kongregazzjoni Kristjana. Agħmel il-qari tal-Bibbja u t-talb lil Jehovah parti mir-rutina tiegħek taʼ kuljum. (Ġoż. 1:8; 1 Tess. 5:17) Tgħaxxaq bil-laqgħat tal-kongregazzjoni. (Salm 122:1) Issieħeb maʼ dawk li jibżgħu minn Jehovah u jżommu l-ordnijiet tiegħu.—Salm 119:63.
5 Permezz t’appoġġ divin, int tistaʼ tgħix fi qbil mad-dedikazzjoni tiegħek lil Jehovah u ssib il-ferħ f’li taqdih għal dejjem.—Salm 22:27, 28 (22:26, 27, New World Translation); Flp. 4:13.