Ibbenefika mill-​Istudju tal-​Ktieb Ersaq Qrib Lejn Jehovah

¹ Fil-​Konvenzjoni Distrettwali “Proklamaturi Żelużi tas-​Saltna” fraħna ħafna meta rċivejna l-​ktieb Ersaq Qrib Lejn Jehovah. Ħafna qraw il-​ktieb mill-​ewwel. Bla dubju, ħafna oħrajn tqanqlu biex jagħmlu dan minħabba l-​iskrittura tas-​sena taʼ l-​2003: “Ersqu lejn Alla, u hu jersaq lejkom.”—Ġak. 4:8.

² F’Marzu se nibdew nikkunsidraw Ersaq Qrib Lejn Jehovah fl-​Istudju tal-​Ktieb tal-​Kongregazzjoni. Kif nistgħu nibbenefikaw kemm nifilħu mill-​istudju? Il-​preparazzjoni hija essenzjali. Kull kapitlu se jiġi diskuss f’ġimagħtejn u kull ġimgħa tistaʼ tgħid se nistudjaw ftit paragrafi. Dan se jħalli biżżejjed ħin biex tkun tistaʼ tagħti kummenti mill-​qalb ibbażati fuq l-​istudju u l-​meditazzjoni tiegħek fuq il-​materjal. Iktar minn hekk, matul il-​ġimgħat li fihom se nkunu qed nirrivedu l-​aħħar parti tal-​kapitlu, se jiġu kunsidrati inqas paragrafi ħalli jkun hemm biżżejjed ħin biex jintuża aspett speċjali tal-​ktieb.

³ Minn kapitlu 2 ’il quddiem tistaʼ ssib il-​kaxxa “Mistoqsijiet għall-​Meditazzjoni” li se tidher ħdejn it-​tmiem taʼ kull kapitlu. Wara li jikkunsidra l-​aħħar paragrafu fil-​kapitlu, l-​indokratur taʼ l-​istudju tal-​ktieb se jara li l-​grupp jiddiskuti l-​kaxxa. Hu se jħeġġeġ lill-​membri tal-​grupp biex jesprimu lilhom infushom, billi joħroġ il-​punti tajbin tal-​meditazzjoni tagħhom fuq l-​Iskrittura. (Prov. 20:5) Barra l-​mistoqsijiet provduti fil-​kaxxa, xi drabi jistaʼ jqajjem mistoqsijiet bħal dawn: “Din l-​informazzjoni x’tgħidlek dwar Jehovah? Kif teffettwalek ħajtek? Kif tistaʼ tużaha biex tgħin lil ħaddieħor?” Il-​mira tiegħu se tkun li jieħu kummenti mill-​qalb, mhux biex jittestja lill-​grupp dwar dettalji relattivament żgħar.

⁴ Il-​ktieb Ersaq Qrib Lejn Jehovah huwa uniku. Għalkemm il-​pubblikazzjonijiet kollha taʼ l-​“ilsir leali u diskret” jigglorifikaw lil Jehovah, dan il-​ktieb huwa dedikat kompletament għal diskussjoni dwar il-​kwalitajiet taʼ Jehovah. (Mt. 24:​45-47, NW) X’opportunità taʼ l-​għaġeb hemm tistenniena! Se nibbenefikaw bil-​kbir minn studju fil-​fond dwar il-​personalità taʼ Jehovah. Jalla l-​istudju jgħinna biex iressaqna eqreb lejn Missierna tas-​sema, u jalla nsiru iktar effettivi biex ngħinu lil oħrajn ħalli jagħmlu l-​istess.