Dehra Persunali Safja u taʼ Min Ifaħħarha

1 “Ix-​Xhieda taʼ Jehovah huma l-​aħjar nies! In-​nies tagħkom għandhom qalbhom tajba u jilbsu modest, u huma juru rispett profond.” Hekk qal rappreżentant taʼ lukanda dwar l-​aħwa li attendew konvenzjoni distrettwali s-​sena l-​oħra. F’konvenzjoni oħra, waħda li taħdem ġo lukanda qalet: “Jidher ċar li n-​nies tagħkom jilbsu għal Alla.” Iva, id-​delegati tal-​konvenzjoni jiġu notati minn oħrajn. Għalhekk, irridu nilbsu “kif jixraq lill-​Evanġelju,” u ħafna drabi dan iqanqal lil dawk li m’humiex Xhieda jikkumplimentawna u jagħmilha ovvja li aħna l-​ministri t’Alla. (Flp. 1:27) Hekk kif nippreparaw għall-​konvenzjoni, huwa xieraq li naħsbu bil-​quddiem kif se tkun id-​dehra tagħna.

2 “L-​għerf li ġej mis-​sema . . . safi,” kiteb id-​dixxiplu Ġakbu. (Ġak. 3:17) Għandu mnejn ikun taʼ sfida li nuru s-​safa fl-​apparenza tagħna. Id-​dinja immorali taʼ Satana tinfluwenza lin-​nies sabiex jadottaw stili immodesti, senswali, u strambi li m’humiex xierqa. (1 Ġw. 2:​15-17) Għalhekk, meta nieħdu deċiżjonijiet rigward l-​ilbies u d-​dehra tagħna, irridu nagħtu kas it-​twissija tal-​Bibbja sabiex “inwarrbu l-​ħażen u l-​ġibdiet tad-​dinja biex ngħixu [“b’moħħ f’loku,” NW] . . . f’dan iż-​żmien.” (Titu 2:12) Qatt ma rridu nfixklu lil oħrajn bid-​dehra tagħna, kemm jekk dawn ikunu ħutna, impjegati taʼ xi lukanda jew restorant, jew osservaturi oħrajn.—1 Kor. 10:​32, 33.

3 Ilbies Modest u Xieraq: Meta tkun qed tipprepara għall-​konvenzjoni, staqsi lilek innifsek: ‘Huwa l-​ilbies tiegħi modest, jew qed jiġbed wisq attenzjoni lejja nnifsi? Juri rispett għas-​sentimenti t’oħrajn? Huma l-​flokkijiet tiegħi skullati jew qosra? Huma l-​ilbiesi tiegħi trasparenti jew inkaxxati? Huwa l-​ilbies tiegħi nadif u mingħajr xi rwejjaħ li jdejqu lil ħaddieħor? X’ħin inkun qed nirrilassa wara l-​konvenzjoni, se jkolli jien dehra pulita u nadifa li turi li jien ministru Kristjan, jew l-​ilbies tiegħi se jkun traskurat, każwali żżejjed, esaġerat f’dik li hi moda, u mhux xieraq għal delegati taʼ konvenzjoni li jkunu lebsin il-​badge? Il-​mod kif inkun liebsa se jġagħalni nħossni imbarazzata biex nagħti xiehda waqt il-​ħin tar-​rikreazzjoni?’—Rum. 15:​2, 3; 1 Tim. 2:9.

4 Aħna nibbenefikaw mill-​osservazzjonijiet taʼ Kristjani maturi. In-​nisa għandhom jistaqsu lil żwieġhom dwar kif ilbieshom għandu mnejn jidher f’għajnejn oħrajn. Ġenituri li jibżgħu minn Alla jistgħu jgħinu lil uliedhom li huma adoloxxenti f’dan ir-​rigward. Iktar minn hekk, in-​nisa akbar spiritwali jistgħu “jdarru n-​nisa żgħażagħ . . . ikunu [“moħħhom f’loku,” NW] [u] safja” fid-​dehra tagħhom “ħalli l-​kelma taʼ Alla ma titkasbarx.” (Titu 2:​3-5) Il-​pubblikazzjonijiet tagħna jipprovdu għajnuna permezz taʼ l-​istampi li juru lbies modest u xieraq.

5 Inġibu Tifħir lil Jehovah: Il-​konvenzjonijiet distrettwali jipprovdu opportunità eċċellenti għalina lkoll sabiex infaħħru lil Jehovah, u mhux biss għal dawk li jkollhom sehem fil-​programm. M’għandniex xi ngħidu, il-​kliem u l-​kondotta Kristjana tagħna se jonorawh. Imma l-​ewwel ħaġa li ħafna osservaturi jinnotaw dwarna hi l-​ilbies u d-​dehra tagħna. Jalla lkoll kemm aħna nġibu tifħir lil Jehovah bid-​dehra safja u taʼ min ifaħħarha tagħna.—Salm 148:​12, 13.

[Mistoqsijiet taʼ Studju]

1. Meta nkunu qed nippreparaw għall-​konvenzjoni, għala għandna nikkunsidraw bil-​quddiem kif se tkun id-​dehra tagħna?

2. Għala hija sfida li jkollna lbies u dehra safjin?

3. Liema mistoqsijiet se jgħinuna neżaminaw id-​dehra persunali tagħna?

4. Oħrajn kif jistgħu jgħinuna biex ikollna dehra safja?

5. Kif nistgħu lkoll kemm aħna nġibu tifħir lil Jehovah matul il-​konvenzjoni? (km-E 4/04)

[Kaxxa f’paġna 4]

Għajnuna Sabiex Ikollna Dehra taʼ Min Ifaħħarha

◼ Il-Kelma t’Alla

◼ Eżami tagħna nfusna

◼ L-osservazzjonijet t’oħrajn

◼ Il-pubblikazzjonijiet Kristjani