Imita l-Ġustizzja taʼ Jehovah
1 “Il-Mulej iħobb il-ħaqq.” (Salm 37:28, Saydon) Għalhekk, għalkemm iddikjara li din id-dinja inġusta se tinqered, hu għamel arranġamenti sabiex l-ewwel tingħata twissija. (Mk. 13:10) Dan jagħti l-opportunità lin-nies biex jindmu u jsalvaw. (2 Pt. 3:9) Nagħmlu aħna ħilitna kollha biex nimitaw il-ġustizzja taʼ Jehovah? Meta naraw il-miżerja u s-sofferenza li tinsab fihom il-familja umana, inħossuna aħna mqanqlin biex naqsmu t-tama tas-Saltna m’oħrajn? (Prov. 3:27) L-imħabba għall-ġustizzja se ġġagħalna jkollna sehem attiv fl-ippridkar.
2 Ippriedka Mingħajr Parzjalità: Meta nħabbru l-iskop t’Alla lil kulħadd mingħajr parzjalità, inkunu qed ‘nagħmlu dak li hu ġust.’ (Mik. 6:8) Irridu nirreżistu l-inklinazzjoni imperfetta li naqbdu u niġġudikaw lil ħaddieħor minn dak li jidher minn barra. (Ġak. 2:1-4, 9) Jehovah “irid li l-bnedmin kollha jsalvaw u jaslu biex jagħrfu l-verità.” (1 Tim. 2:4) Il-verità tal-kelma t’Alla tistaʼ ġġiegħel lin-nies jagħmlu bidliet kbar. (Lhud 4:12) Jekk napprezzaw dan il-fatt inkunu nistgħu navviċinaw individwi b’fiduċja, anki dawk l-uħud li fil-passat għandhom mnejn ma ridux jisimgħu.
3 Waħda oħt kienet xi ftit imbeżżgħa minħabba x-xeħta li kellu wieħed raġel li spiss kien imur jixtri mill-ħanut fejn kienet taħdem. Minkejja dan, meta ġietha l-opportunità xierqa, hi pprovat tagħtih xiehda dwar il-Ġenna mwiegħda minn Alla. B’mod żorr hu weġibha li ma kienx jemmen fil-ħrejjef u li hu kien hippie u kien jieħu d-drogi. Imma hi ma qatgħetx qalbha. Darba minnhom hu staqsieha x’kienet taħseb dwar ix-xagħar twil li kellu, u hi bit-tattika spjegatlu dak li tgħid il-Bibbja dwar dan. (1 Kor. 11:14) B’sorpriża kbira għaliha, l-għada ġie bid-daqna mqaxxra u b’xagħru maqtugħ! Hu talab studju tal-Bibbja, u l-oħt irranġat biex wieħed ħu jibda jistudja miegħu, u dan ir-raġel kompla jagħmel progress u wasal għad-dedikazzjoni u l-magħmudija. Bħal dan ir-raġel, ħafna li jaqdu lil Jehovah illum huma grati għall-imparzjalità u l-isforzi persistenti li wrew dawk l-uħud li wasslulhom il-messaġġ tas-Saltna.
4 Jehovah dalwaqt se jneħħi l-inġustizzja minn fuq wiċċ l-art. (2 Pt. 3:10, 13) Fiż-żmien limitat li fadal, jalla nimitaw il-ġustizzja taʼ Jehovah billi nagħtu opportunità lil kulħadd sabiex ikun jistaʼ jaħrab il-qerda li ġejja fuq din id-dinja inġusta taʼ Satana.—1 Ġw. 2:17.