Skeda tal-​Familja—Laqgħat tal-​Kongregazzjoni

¹ Jekk int ġenitur Kristjan, int trid li wliedek jikbru bħala wħud li jħobbu u jaqdu lil Ġeħova u, fl-​aħħar mill-​aħħar, jiksbu l-​ħajja taʼ dejjem fid-​dinja l-​ġdida mwiegħda minn Alla. Kif tistaʼ tgħinhom jagħmlu l-​qima taʼ Ġeħova l-​ewwel post f’ħajjithom? Il-​mod ewlieni hu bl-​eżempju tiegħek. (Prov. 20:7) Meta ftakret fl-​eżempju t’ommha li kienet Xhud, waħda oħt qalet: “Qatt ma konna niddubitaw jekk hux se mmorru għal-​laqgħat jew le.” Dan ħalla effett dejjiemi fuqha.

² Tifhem il-​familja tiegħek l-​iskop tal-​laqgħat tal-​kongregazzjoni? It-​tagħlim li nirċievu f’dawn il-​laqgħat jagħtina s-​saħħa biex nibqgħu nagħmlu r-​rieda t’Alla, u s-​sħubija li ngawdu maʼ ħutna hija sors taʼ inkuraġġiment imprezzabbli. (Is. 54:13; Rum. 1:​11, 12) Però, l-​iskop primarju taʼ dawn il-​laqgħat hu li jitlaʼ tifħir għand Ġeħova minn fost il-​“ġemgħat.” (Salm 26:12) Il-​laqgħat Kristjani jagħtuna l-​opportunità biex nuru mħabbitna lil Ġeħova u biex inqimuh.

³ “Oqogħdu Attenti bis-​Sħiħ”: L-​apprezzament għall-​iskop sagru tal-​laqgħat tagħna se jqanqalna ‘noqogħdu attenti bis-​sħiħ’ li ma niżviluppawx bil-​mod il-​mod id-​drawwa li nitilfu l-​laqgħat minħabba affarijiet li huma inqas importanti. (Efes. 5:​15, 16; Ebr. 10:​24, 25) Meta tagħmel l-​iskeda għall-​familja tiegħek, għandek mnejn tibda billi timmarka l-​ħinijiet għal-​laqgħat tal-​kongregazzjoni. Imbagħad, oqgħod attent li ma tħallix attivitajiet oħra jiħdulhom posthom. Kun ċert li l-​attendenza għall-​laqgħat tkun prijorità għall-​familja tiegħek.

⁴ Ma nħossuniex imqanqlin meta naqraw dwar ħutna li jegħlbu l-​ostakli sabiex jattendu l-​laqgħat u l-​assembleat? Għalkemm iċ-​ċirkustanzi tiegħek jistgħu jkunu inqas drammatiċi, probabbilment int ukoll tiffaċċja l-​isfidi. Satana dejjem qed jagħmilha iktar diffiċli għall-​poplu t’Alla biex iqim lil Ġeħova. Però, ibqaʼ ċert li wliedek żgur se jinnotaw l-​isforz b’determinazzjoni li l-​familja qed tagħmel biex tattendi l-​laqgħat tal-​kongregazzjoni. Tabilħaqq, jekk tagħmel hekk, tistaʼ tagħtihom għotja spiritwali li ma se jinsewha qatt.