Kif Nistgħu Ngħinu?
1 Ix-Xhieda taʼ Ġeħova spiss iqajmu l-mistoqsija “Kif nistgħu ngħinu?” meta jisimgħu li seħħ xi diżastru f’xi parti tad-dinja. Bħalma juri r-rakkont f’Atti 11:27-30, il-Kristjani fl-ewwel seklu pprovdew għajnuna lill-aħwa li kienu jgħixu fil-Lhudija minħabba l-ġuħ li kien hemm.
2 Fiż-żminijiet moderni, ir-regolamenti legali taʼ l-organizzazzjoni tagħna ppermettew li l-flus jintużaw għal attivitajiet taʼ karità u biex tiġi provduta għajnuna umanitarja lil dawk li jbatu minħabba diżastri naturali jew kaġunati mill-bniedem u jgħinu wkoll fi żminijiet oħra taʼ bżonn.
3 Per eżempju, is-sena l-oħra ħafna aħwa kkontribwew biex jgħinu lil dawk li ġew effettwati mid-diżastru tat-tsunami fl-Asja t’Isfel. Ġie apprezzat ferm il-mod kif dawn irreaġixxew minn qalbhom billi bagħtu donazzjonijiet lill-fondi taʼ l-organizzazzjoni biex tagħti l-għajnuna. Madankollu, meta d-donazzjonijiet jingħataw speċifikament għal ċertu diżastru, f’xi pajjiżi l-liġi titlob li l-fondi jintużaw biss kif ikun speċifikat minn min ikun tahom u jridu jintużaw f’ċertu perijodu taʼ żmien, anki jekk l-aħwa jkunu rċivew biżżejjed għajnuna lokalment.
4 Għalhekk, huwa rikkmandat li d-donazzjonijiet għall-għajnuna umanitarja u fid-diżastri jingħataw għax-xogħol madwar id-dinja. Dan il-fond jintuża kemm għall-għajnuna fid-diżastri kif ukoll għall-avanz tal-bżonnijiet spiritwali tal-fratellanza Kristjana. Jekk, għal xi raġuni, il-persuna tixtieq tagħti għajnuna permezz taʼ donazzjoni apparti mill-kontribuzzjonijiet għax-xogħol madwar id-dinja, din se tkun aċċettata xorta waħda u se tintuża kulfejn ikun hemm il-bżonn t’għajnuna f’xi diżastru. Però, se jkun apprezzat jekk dawn id-donazzjonijiet isiru mingħajr restrizzjonijiet dwar fejn u kif jistgħu jintużaw il-fondi.
5 Meta aħna nagħtu d-donazzjonijiet tagħna primarjament għax-xogħol madwar id-dinja, ikun hemm iktar fondi disponibbli biex jintużaw b’konnessjoni maʼ l-aspetti kollha tax-xogħol tas-Saltna minflok ma jinżammu biss għall-għajnuna f’xi diżastru li jistaʼ jinqalaʼ fil-futur. Dan hu fi qbil mal-ħsieb t’Efesin 4:16, li aħna naħdmu flimkien sabiex nagħtu dak li hemm bżonn “għat-tkabbir tal-ġisem biex jibni lilu nnifsu fl-imħabba.”