Ibqgħu Stennew lil Ġeħova

1. X’inhi t-​tema tal-​konvenzjoni, u għala hija f’waqtha?

¹ “Ġeħova hu Alla taʼ ġudizzju,” kiteb Isaija. “Henjin huma dawk kollha li jibqgħu jistennewh.” (Is. 30:18b, NW) Fil-​Bibbja nsibu ħafna rakkonti fejn Alla esegwixxa ġudizzju fuq l-​għedewwa tiegħu u ġab ħelsien lill-​qaddejja leali tiegħu. Dawn ir-​rakkonti x’lezzjonijiet jistgħu jgħallmuhom lill-​aduraturi taʼ Ġeħova llum? X’nistgħu nagħmlu issa biex inkunu lesti għall-​“Jum il-​Mulej, kbir u tal-​biżaʼ”? (Ġoel 3:​4, 5 [2:​31, 32, NW]) Il-​Konvenzjoni Distrettwali li se jkollna bit-​tema “Il-​Ħelsien fil-​Qrib!” se tgħinna biex nimmeditaw sew fuq dawn il-​mistoqsijiet u nagħmlu eżami tagħna nfusna. Se tgħinna wkoll biex nibqgħu nistennew lil Ġeħova.

2. Kif nistgħu nuru apprezzament għall-​konvenzjoni distrettwali tagħna?

² Għamilt int arranġamenti biex tibbenefika mit-​tlett ijiem sħaħ tal-​konvenzjoni? Per eżempju, mort int fuq min qed iħaddmek sabiex titolbu l-​leave ħalli tattendi? Tistenniex li se tieħu l-​leave mingħajr ma tagħmel sforz. Itlob dwar dan, u mbagħad kellem lill-​imgħallem tiegħek. (Neħ. 2:​4, 5) Bl-​istess mod, m’għandniex inħallu għall-​aħħar biex nagħmlu l-​arranġamenti maʼ min se nivvjaġġaw, u affarijiet oħra taʼ bżonn. Meta nippjanaw tajjeb bil-​quddiem inkunu qed nuru l-​apprezzament profond tagħna għall-​mejda spiritwali taʼ Ġeħova. L-​anzjani għandhom ikunu lesti li jgħinu lil dawk fil-​bżonn billi jassistuhom fl-​arranġamenti għall-​konvenzjoni, speċjalment lil dawk avanzati fl-​età fil-​kongregazzjoni.​—Gal. 6:​10.

3. Liema kwalitajiet għandhom jidhru fost il-​poplu taʼ Ġeħova fil-​viċinanzi taʼ fejn tkun qed issir il-​konvenzjoni?

³ Kondotta mill-​Aħjar Tonora lil Alla: Meta ninġabru bħala grupp kbir fil-​konvenzjonijiet, il-​kondotta mill-​aħjar tagħna sservi bħala xiehda lill-​komunità. Għalhekk, x’inhu mistenni minna? Meta aħna nkunu f’lukandi, restoranti, u postijiet oħrajn taʼ kummerċ fil-​viċinanzi taʼ fejn tkun qed issir il-​konvenzjoni, dawk li se nittrattaw magħhom għandhom iħossuhom kuntenti bil-​kwalitajiet Kristjani tagħna, bħas-​sabar fit-​tul, il-​ħlewwa, ir-​rażna, u r-​raġunevolezza. (Gal. 5:​22, 23; Flp. 4:5) Ilkoll kemm aħna għandna nuru l-​kwalità taʼ l-​imħabba li “ma ġġibx ruħha b’mod indeċenti, ma tfittixx l-​interessi tagħha, ma tiġix provokata.” Anki jekk iqumu xi diffikultajiet jew inkonvenjenzi, aħna rridu ‘nagħmlu kollox għall-​glorja t’Alla.’​—1 Kor. 10:31; 13:5.

4. Kif jistgħu l-​ġenituri jgħinu lil uliedhom iġibu ruħhom b’mod li jġib tifħir lil Ġeħova?

⁴ Wara konvenzjoni waħda, maniġer taʼ lukanda kien tant impressjonat bil-​kondotta u bl-​apparenza taż-​żgħażagħ tagħna li esprima x-​xewqa li “dejjem jixtieq li jkollu x-​Xhieda taʼ Ġeħova bħala mistidnin fil-​lukanda tiegħu.” Kemm iġibilna ferħ dan! Ġenituri, dan hu grazzi għat-​taħriġ u s-​superviżjoni tagħkom. Jekk tkunu qed toqogħdu f’xi lukanda, ma jkunx għaqli min-​naħa tal-​ġenituri li jħallu lil uliedhom fil-​kamra mingħajr superviżjoni. It-​tfal għandhom dejjem ikunu taħt superviżjoni tajba. (Prov. 29:15) Jalla l-​kondotta tajba tagħhom iġġib tifħir lil Ġeħova u tferraħlu qalbu!​—Prov. 27:11.

5. Kif nistgħu aħna nonoraw lil Ġeħova bl-​ilbies u d-​dehra tagħna?

⁵ Ilbies u Dehra Modesta: Kull wieħed minna jistaʼ jikkontribwixxi biex tingħata impressjoni tajba matul il-​konvenzjoni billi jevita xi stil taʼ lbies u dehra li huma taʼ moda stramba, estremi, immodesti, jew każwali żżejjed. Dan japplika wkoll meta nkunu qed nivvjaġġaw lejn il-​konvenzjoni jew sejrin lura d-​dar, kif ukoll meta nkunu qed inħejju s-​sala tal-​konvenzjoni, u meta nattendu għas-​sessjonijiet. Bħala qaddejja t’Alla, l-​ewwel ħaġa li tikkonċernana hija l-​isem u r-​reputazzjoni taʼ Ġeħova, mhux il-​preferenzi jew il-​kumditajiet persunali tagħna. Il-​kapijiet tal-​familja għandhom ir-​responsabbiltà li jagħmlu żgur li d-​dehra tal-​familja tagħhom tirrifletti l-​modestja u l-​moħħ f’loku l-​ħin kollu.​—1 Tim. 2:9.

6. Għala għandna nżommu l-​istess dinjità fl-​apparenza tagħna waqt il-​ħin tal-​mistrieħ bħalma nżommu matul is-​sessjonijiet tal-​konvenzjoni?

⁶ Bl-​istess mod huwa importanti li nżommu d-​dinjità fl-​apparenza tagħna waqt il-​ħin tal-​mistrieħ, kemm fil-​lukandi, fil-​ħwienet, u fir-​restoranti. Ikun xieraq li nibqgħu bl-​ilbies tal-​konvenzjoni jekk inkunu se mmorru nieklu xi mkien wara s-​sessjonijiet. Meta nilbsu l-​badge tal-​konvenzjoni se noħolqu opportunitajiet biex nagħtu xiehda informali.​—2 Kor. 6:​3, 4.

7. Kif nistgħu aħna nikkontribwixxu għall-​ordni u għall-​ferħ tal-​konvenzjoni?

⁷ Isaija ħabbar: “Ġeħova se jibqaʼ jistenna biex jurikom favur, u għalhekk se jqum biex jurikom ħniena.” (Is. 30:18a, NW) Il-​gratitudni lejn il-​ħniena taʼ Ġeħova u l-​imħabba mhix mistħoqqa tiegħu għandha tqanqalna biex nonorawh bil-​kondotta u d-​dehra hekk kif ninġabru flimkien għall-​konvenzjonijiet tagħna. Jalla l-​Konvenzjoni Distrettwali “Il-​Ħelsien fil-​Qrib!” tigglorifika lil Alla tagħna u tgħinna nibqgħu nistennewh!