Konvenzjonijiet Distrettwali—Żmien Għal Qima Ferriħija

¹ Ġużeppi, Marija, uliedhom, u oħrajn regolarment kienu jitilgħu Ġerusalemm biex jattendu l-​festi annwali. F’dawn l-​okkażjonijiet, huma u aduraturi oħrajn kienu jħallu warajhom il-​problemi taʼ kuljum u jiffokaw fuq l-​aspetti spiritwali l-​iktar importanti taʼ ħajjithom. Il-​festi kienu jagħtuhom ħin biex jirriflettu u jitkellmu dwar it-​tjubija taʼ Ġeħova u biex jikkunsidraw il-​Liġi tiegħu. Il-​konvenzjonijiet distrettwali tagħna li ġejjin se jagħtuna opportunitajiet simili biex nagħtu qima ferriħija lil Ġeħova.

² Hemm Bżonn taʼ Preparazzjoni: Minn Nazaret, il-​familja taʼ Ġesù kellha tagħmel vjaġġ taʼ 200 kilometru bil-​mixi biex tmur u tiġi. Għalkemm ma nafux kemm kellu ħutu Ġesù, nistgħu nimmaġinaw l-​ippjanar u l-​isforz li kienu meħtiġin minn Ġużeppi u Marija. Għamilt il-​preparazzjonijiet neċessarji biex tattendi t-​tlett ijiem sħaħ tal-​konvenzjoni distrettwali li ġejja? Dan jistaʼ jirrikjedi li tieħu l-​leave jew li titkellem mal-​imgħallem tiegħek biex ma tmurx xogħol f’dawk il-​ġranet jew li titkellem mal-​għalliema taʼ wliedek biex ma jattendux l-​iskola. Ibbukkjajt lukanda jekk hemm il-​ħtieġa? Tistaʼ tieħu l-​inizjattiva biex tgħin lil xi ħadd fil-​kongregazzjoni bi bżonnijiet speċjali ħalli jattendi l-​konvenzjoni?—1 Ġw. 3:17, 18.

³ Sħubija li Tibni: X’opportunità pprovdew il-​festi Lhud għal sħubija li tibni ma’ aduraturi oħrajn! Il-​membri tal-​familja taʼ Ġesù mingħajr ebda dubju kienu jħarsu ’l quddiem biex jingħaqdu maʼ ħbieb antiki. Kienu jgawdu wkoll opportunitajiet biex jagħmlu ħbieb ġodda fost il-​ħafna Lhud u proseliti li kienu jkunu preżenti jew li kienu jivvjaġġaw lejn Ġerusalemm u lura.

⁴ Raġuni waħda għala l-​ilsir leali u għaqli jagħmel arranġamenti biex ningħaqdu flimkien ħalli nisimgħu taħditiet fil-​konvenzjonijiet distrettwali minflok ma jagħtina l-​istess informazzjoni bil-​kitba hi sabiex inkunu nistgħu ninkuraġġixxu lil xulxin. (Ebr. 10:24, 25) Għalhekk, ippjana biex tasal kmieni għall-​konvenzjoni kuljum biex tgawdi sħubija maʼ oħrajn qabel ma ċ-​chairman tas-​sessjoni jintroduċi l-​intervall mużikali, u b’hekk jindika li sar il-​ħin biex noqogħdu bilqiegħda. Il-​fratellanza Kristjana magħquda tagħna hi rigal mingħand Ġeħova li lkoll għandna napprezzawh.—Mik. 2:12.

⁵ Żmien Biex Nitgħallmu: Minn età żgħira, Ġesù ħa vantaġġ mill-​festi biex jitgħallem dwar Missieru tas-​sema. (Lq. 2:41-​49) X’se jgħin lilna u lill-​familji tagħna biex nibbenefikaw bis-​sħiħ minn dak li se jiġi preżentat? Matul is-​sessjonijiet, ibqaʼ bilqiegħda u evita li titkellem bla bżonn. Tħallix il-​mobile, il-​pager, jew apparat simili tiegħek ifixkel lilek jew lil oħrajn. Żomm għajnejk fuq il-​kelliemi u ħu noti qosra. Oqogħdu bilqiegħda bħala familja biex tkunu ċerti li wliedkom qed jisimgħu wkoll. Filgħaxija ħudu ftit ħin biex tiddiskutu flimkien il-​punti li għoġbukom.

⁶ L-​Ilbies u d-​Dehra: Negozjanti barranin li kienu qed jivvjaġġaw fit-​triq setgħu jagħrfu faċilment lill-​familja taʼ Ġesù u lil aduraturi Lhud oħrajn li kienu qed jivvjaġġaw lejn il-​festi u lura minħabba l-​frenża fit-​truf taʼ lbieshom u l-​lazz blu ’l fuq mill-​frenża. (Num. 15:37-​41) Għalkemm il-​Kristjani ma jilbsux ħwejjeġ speċjali, aħna magħrufin li nilbsu b’mod modest u li nkunu puliti u nodfa. Għandna nagħtu attenzjoni partikulari għad-​dehra tagħna meta nivvjaġġaw lejn il-​konvenzjoni u lura u waqt li nkunu fil-​post tal-​konvenzjoni. Anki jekk inbiddlu l-​ħwejjeġ wara l-​programm, għandna nżommu dehra dinjituża u nilbsu l-​badge tal-​konvenzjoni. B’dan il-​mod se nidhru differenti minn dawk li mhumiex Xhieda u nagħtu impressjoni tajba lil dawk li josservawna.

⁷ Volontieri Meħtiġin: Hemm bżonn taʼ ħafna ħaddiema sabiex il-​konvenzjoni timxi ħarir. Tistaʼ tgħin bħala volontier? (Salm 110:3) Ix-​xogħol li jsir fil-​konvenzjonijiet hu parti mis-​servizz sagru tagħna u jagħti xhieda mill-​aħjar. Il-​maniġer taʼ faċilità waħda tal-​konvenzjoni tant baqaʼ impressjonat bil-​volontieri li naddfu l-​bini li kiteb dan: “Nixtieq nirringrazzjakom għall-​iktar ġrajja tal-​għaġeb li qatt esperjenzajt. Dejjem smajt li x-​Xhieda taʼ Ġeħova huma nies speċjali u fl-​industrija tagħna ilhom ħafna bir-​reputazzjoni li dejjem iħallu l-​faċilità iktar nadifa milli jsibuha. Intom u l-​organizzazzjoni tagħkom għamiltu din il-​faċilità post aħjar għall-​komunità, u dan għamiltuh bl-​iktar grupp taʼ nies grazzjużi li qatt kellna l-​pjaċir li nsiru nafu.”

⁸ Opportunitajiet Biex Nagħtu Xhieda: Ħafna fl-​inħawi fejn se tinżamm il-​konvenzjoni se jinnotaw viżitaturi lebsin sew u puliti u lebsin badges tal-​konvenzjoni. Dan jistaʼ jqajjem il-​kurżità tagħhom u jipprovdilna opportunitajiet biex ngħidulhom dwar il-​konvenzjoni. Wara l-​programm, tifel taʼ erbaʼ snin ħa miegħu f’restorant il-​kopja tiegħu tal-​pubblikazzjoni li kienet għadha kif ħarġet u wrieha lil dik li qdiethom. Dan ta opportunità lill-​ġenituri tat-​tifel biex jistiednu lill-​mara għall-​konvenzjoni.

⁹ Il-​festi tal-​qedem kienu okkażjonijiet taʼ ferħ li l-​Lhud li riedu jitgħallmu iktar dwar Ġeħova kienu jħarsu ’l quddiem għalihom. (Dt. 16:15) Il-​familja taʼ Ġesù kienu henjin li jagħmlu kwalunkwe sagrifiċċju biex jattendu u jibbenefikaw bis-​sħiħ. Aħna għandna apprezzament simili għall-​konvenzjonijiet distrettwali tagħna, u nqisuhom bħala għotja mingħand Missierna tas-​sema kollu mħabba. (Ġak. 1:17) Issa hu ż-​żmien biex nippreparaw għal din l-​opportunità annwali biex nagħtu qima ferriħija lil Ġeħova!

[Mistoqsijiet taʼ Studju]

1. Il-​festi tal-​Israelin kif kienu simili għall-​konvenzjonijiet distrettwali taʼ żmienna?

2. X’għandna nagħmlu biex nippreparaw għall-​konvenzjoni distrettwali li ġejja?

3. Il-​festi tal-​Israelin kif ipprovdew opportunitajiet għal sħubija li tibni?

4. Kif nistgħu nuru li napprezzaw il-​fratellanza Kristjana magħquda tagħna?

5. X’se jgħinna nibbenefikaw bis-​sħiħ mill-​programm?

6. X’għandna nżommu f’moħħna rigward l-​ilbies u d-​dehra tagħna?

7. Għala għandna nikkunsidraw li nkunu volontieri fil-​konvenzjoni?

8. Liema opportunitajiet biex nagħtu xhieda se jkun hemm fil-​post tal-​konvenzjoni?

9. Kif nistgħu nimitaw l-​apprezzament tal-​familja taʼ Ġesù għall-​provvedimenti spiritwali taʼ Ġeħova?

[Kaxxa f’paġna 6, 7]

Tfakkiriet għall-​Konvenzjoni Distrettwali

◼ Ħinijiet tal-​Programm: Il-​programm se jibda fid-​9:20 a.m. t-​tlett ijiem kollha. Il-​bibien se jinfetħu fit-​8:00 a.m. Meta titħabbar il-​mużika tal-​bidu, ilkoll kemm aħna għandna nsibu postna sabiex il-​programm ikun jistaʼ jibda b’mod dinjituż. Il-​Ġimgħa u s-​Sibt il-​programm se jispiċċa fil-​4:55 p.m. u l-​Ħadd fl-​3:40 p.m.

◼ Postijiet: Il-​postijiet jistgħu jintrefgħu biss għal dawk li jivvjaġġaw miegħek fl-​istess karozza jew jgħixu miegħek fl-​istess dar, kif ukoll għal dawk li bħalissa qed tikkonduċi studju tal-​Bibbja magħhom.—1 Kor. 13:5.

◼ Donazzjonijiet: Nistgħu nuru l-​apprezzament tagħna għall-​arranġamenti tal-​konvenzjoni billi nagħtu kontribuzzjonijiet volontarji għax-​xogħol taʼ madwar id-​dinja fis-​Sala tas-​Saltna tagħna jew fil-​konvenzjoni. Kwalunkwe ċekk li jingħata b’kontribuzzjoni fil-​konvenzjoni għandu jintgħamel pagabbli lil “I.B.S.A. (Malta).”

◼ Aċċidenti u Emerġenzi: Servizzi li jieħdu ħsieb l-​emerġenza jirċievu ħafna telefonati fuq affarijiet żgħar. Jekk tinqalaʼ xi emerġenza medika fil-​post tal-​konvenzjoni, jekk jogħġbok ikkuntattja lil attendant fil-​qrib, li se javża mill-​ewwel lid-​Dipartiment tal-​Ewwel Għajnuna sabiex dawk fostna li huma kwalifikati biex jagħtu l-​ewwel għajnuna jkunu jistgħu jiddeċiedu kemm hi gravi s-​sitwazzjoni u jagħtu l-​assistenza tagħhom. Jekk ikun hemm bżonn, dawk li jagħtu l-​ewwel għajnuna se jċemplu 112.

◼ Żraben: Kull sena jseħħu għadd taʼ inċidenti konnessi maż-​żraben. Ikun aħjar li nagħżlu żraben modesti li jiġuna sew u li jippermettulna nimxu bis-​sigurtà fit-​taraġ, fuq l-​ispralli tal-​ħadid, u affarijiet bħal dawn.

◼ Rekording: Apparat li jirrekordja m’għandux jitqabbad mas-​sistema tal-​elettriku jew tas-​sawnd tal-​faċilità u jistaʼ jintuża biss b’tali mod li ma jtellifx lil oħrajn.

◼ Puxċers: Il-​puxċers m’għandhomx jinġiebu fil-​post tal-​konvenzjoni. Madankollu, jistgħu jinġiebu siġġijiet tat-​tfal li jipprovdu sigurtà (child-​safety seats) u li għandhom jitpoġġew b’attenzjoni fuq siġġu ħdejn il-​ġenituri.

◼ Fwejjaħ: Ħafna konvenzjonijiet qed isiru f’postijiet magħluqin fejn niddependu minn ventilazzjoni mekkanika. Għalhekk, inkunu qed nuru qalb tajba min-​naħa tagħna jekk nillimitaw l-​użu taʼ fwejjaħ qawwijin li jistgħu jikkaġunaw irritazzjoni lil dawk li jbatu bi problemi respiratorji jew problemi relatati.—1 Kor. 10:24.

◼ Formoli Follow-​Up: Formola Please Follow Up (S-​43) għandha tintuża biex tiġi provduta informazzjoni dwar kull min juri interess minħabba li nagħtuh xhieda informali matul il-​konvenzjoni. Il-​pubblikaturi għandhom iġibu formola jew tnejn tal-​follow-​up meta jmorru l-​konvenzjoni. Il-​formoli mimlijin jistgħu jingħataw lis-​segretarju tal-​kongregazzjoni tiegħek wara l-​konvenzjoni.—Ara l-​Ministeru tas-​Saltna taʼ Novembru 2009, p. 4.

◼ Restoranti: Onora isem Ġeħova bl-​imġiba mill-​aqwa tiegħek fir-​restoranti. F’Malta normalment jitħallew tips taʼ 15 fil-​mija, jiddependi mis-​servizz.

◼ Servizz taʼ Volontieri: Il-​ferħ li niksbu milli nattendu l-​konvenzjoni jkun saħansitra akbar jekk noffru li nkunu volontieri biex ngħinu fix-​xogħol li jkun hemm bżonn. (Atti 20:35) Kull min jixtieq jagħmel dan għandu jmur fid-​Dipartiment tas-​Servizz tal-​Volontieri fil-​konvenzjoni. Tfal taħt is-​16-​il sena wkoll jistgħu jagħtu kontribut mill-​aħjar billi jaħdmu taħt is-​superviżjoni taʼ ġenitur jew min jieħu ħsiebhom jew adult ieħor bl-​approvazzjoni taʼ xi ħadd minnhom.