Tixtieq Iktar Studji tal-​Bibbja?

Jekk int bħalissa qiegħed tikkonduċi xi studju tal-​Bibbja, għala ma tistaqsix lill-​istudent jekk għandux xi ħbieb, qraba, jew uħud oħra li jafhom u li kieku jieħdu pjaċir isiru jafu x’tgħallem il-​Bibbja? Spiss jissemmew xi ftit individwi. Bil-​kunsens taʼ l-​istudent, int tistaʼ ssemmi ismu meta żżur lil dawn l-​individwi biex toffrilhom studju tal-​Bibbja. Int tistaʼ tgħid, “[Isem l-​istudent] qed jieħu pjaċir jistudja l-​Bibbja, u ħaseb li int ukoll forsi tixtieq tibbenefika minn programm taʼ studju tal-​Bibbja li noffru bla ħlas.” Imbagħad, fil-​qosor uri kif tikkonduċi l-​istudju billi tuża l-​ktieb X’Tgħallem il-​Bibbja?

Jekk int għandek xi student li qed jagħmel progress ġmielu, ikun tajjeb li tinkuraġġih kif isir studju maʼ xi ħbieb u membri tal-​familja li forsi juru interess. Jistaʼ wkoll jistidinhom biex ikunu preżenti waqt l-​istudju tiegħu. Jekk dan ma jkunx konvenjenti, jistaʼ jirranġa biex int tkun tistaʼ tiltaqaʼ magħhom u turihom kif isir l-​arranġament taʼ l-​istudju. Meta tagħmel hekk se tkun qiegħed tinkuraġġixxi lill-​istudent biex jibda jaqsam l-​għarfien tal-​Bibbja tiegħu maʼ ħaddieħor.

Dawk li tkun qed tagħmlilhom żjajjar lura regolarment jistgħu wkoll jipprovdulek xi ismijiet t’oħrajn, anki jekk huma stess għadhom ma aċċettawx studju tal-​Bibbja regulari. Meta toffrilhom kopja tal-​ktieb X’Tgħallem il-​Bibbja?, tistaʼ sempliċement tistaqsi, “Taf lil xi ħaddieħor li jieħu pjaċir b’kopja taʼ din il-​pubblikazzjoni?”

Minħabba l-​urġenza taż-​żminijiet, aħna rridu nużaw kull mezz possibbli biex ngħinu lin-​nies jisimgħu u jaċċettaw l-​aħbar tajba. Qiegħed tistaqsi int għal ismijiet taʼ wħud li forsi jixtiequ studju tal-​Bibbja?