Ibni Apprezzament għall-​Kwalitajiet bla Paragun taʼ Ġeħova

¹ Fil-​ministeru tagħna, aħna nagħmlu iktar milli ngħallmu lil oħrajn veritajiet bażiċi minn fuq il-​Bibbja. Aħna ngħinu lin-​nies isiru jafu lil Ġeħova bħala persuna u jibnu apprezzament għall-​kwalitajiet bla paragun tiegħu. Meta wħud taʼ qalb onesta jitgħallmu l-​verità dwar Alla, tant jiġu effettwati li jiġu mqanqlin jagħmlu bidliet f’ħajjithom sabiex ‘jimxu kif jixraq lil Ġeħova bl-​għan li jogħġbuh għalkollox.’​—Kol. 1:​9, 10; 3:​9, 10.

² L-​Għajnuna Ġdida Tagħna għall-​Istudji: Mill-​bidu tiegħu, il-​ktieb Il-​Bibbja X’Tgħallem? jiġbed l-​attenzjoni lejn il-​kwalitajiet taʼ Ġeħova. L-​ewwel kapitlu jwieġeb il-​mistoqsijiet: Alla verament jimpurtah minnek?, Alla x’tip taʼ persuna hu?, u Huwa possibbli li tersaq qrib lejn Alla? L-​istess kapitlu jenfasizza wkoll il-​qdusija taʼ Ġeħova (par. 10), il-​ġustizzja u l-​mogħdrija tiegħu (par. 11), l-​imħabba tiegħu (par. 13), il-​qawwa tiegħu (par. 16), u l-​ħniena, il-​fatt li hu lest li jaħfer, il-​paċenzja, u l-​lealtà tiegħu (par. 19). Paragrafu 20 jiġbor kollox flimkien billi jgħid: “Iktar ma titgħallem dwar Ġeħova, iktar se jsir reali għalik, u iktar se jkollok raġun tħobbu u tħossok qrib tiegħu.”

³ Kif nistgħu nużaw il-​ktieb Il-​Bibbja X’Tgħallem? biex ngħinu lill-​istudenti tal-​Bibbja jersqu qrib lejn Ġeħova? Wara li nikkunsidraw paragrafu li jenfasizza waħda mill-​kwalitajiet t’Alla, nistgħu nistaqsu lill-​istudent, “Dan x’jurik dwar Ġeħova bħala persuna?” jew “Dan kif juri l-​interess li Alla għandu fik personalment?” Jekk kultant żmien nużaw dawn il-​mistoqsijiet waqt l-​istudju, se ngħallmu lill-​istudenti tagħna kif jimmeditaw fuq dak li qed jitgħallmu u se ngħinuhom ikabbru l-​apprezzament tagħhom għall-​kwalitajiet bla paragun taʼ Ġeħova.

⁴ Uża l-​Kaxxa tar-​Reviżjoni: Fit-​tmiem taʼ kull kapitlu, stieden lill-​istudent biex jikkummenta fi kliemu fuq kull punt li hemm fil-​kaxxa “Dak li Tgħallem il-​Bibbja.” Idderieġi l-​attenzjoni lejn l-​iskritturi ċitati. Biex tinkuraġġixxi lill-​istudent jesprimi dak li hemm f’qalbu, forsi kultant tistaʼ tistaqsih, “Kif tħossok dwar dak li tgħallem il-​Bibbja dwar dan il-​punt?” Billi tagħmel dan, mhux biss tkun qed tenfasizza l-​punti prinċipali tal-​kapitlu, imma wkoll se tifhem sew dak li verament jemmen l-​istudent. Dan se jgħin lill-​istudent biex jibda jiżviluppa relazzjoni maʼ Ġeħova.