Imita lil Kristu fil-​Ministeru Tiegħek

¹ Ġesù ħallielna l-​eżempju biex insegwuh fil-​ministeru tagħna. L-​imħabba profonda tiegħu lejn Alla u lejn in-​nies kienet murija f’ħafna okkażjonijiet u b’diversi modi. Hu għallem il-​verità lil uħud ġwejdin u għamel atti taʼ qalb tajba bl-​imħabba għal dawk li kienu mnikktin u magħkusin.​—Mt. 9:​35.

² L-​Eżempju u t-​Tagħlim taʼ Ġesù: Ġesù ma involviex ruħu fi kwistjonijiet politiċi jew f’sempliċi sforzi umanitarji sabiex tibbenefika minnhom il-​komunità, u għalhekk ma ġiex aljenat. Lanqas ma ħalla kwalunkwe attività oħra b’intenzjoni tajba taljenah jew tiġi qabel ix-​xogħol primarju tiegħu. (Luqa 8:1) Hu ffoka fuq li jippriedka l-​aħbar tajba tas-​Saltna t’Alla bħala l-​unika soluzzjoni permanenti għall-​problemi taʼ l-​umanità. Ġesù kellu xogħol importanti x’jagħmel u ħin limitat biex iwettqu. Meta n-​nies f’Kafarnahum riedu li Ġesù jibqaʼ hemmhekk, hu qal lid-​dixxipli tiegħu: “Ejja mmorru xi mkien ieħor . . . sabiex inkun nistaʼ nippriedka hemmhekk ukoll, għax għalhekk ħriġt.”​—Mk. 1:​38.

³ Wara li ħarreġ lid-​dixxipli tiegħu, Ġesù bagħathom jippridkaw b’dawn l-​istruzzjonijiet speċifiċi: “Ippridkaw u għidu, ‘Qorbot is-​saltna tas-​smewwiet.’” (Mt. 10:7) Hu għallem lis-​segwaċi tiegħu li l-​interessi tas-​Saltna għandu jkollhom l-​ewwel post f’ħajjithom. (Mt. 6:​33) L-​aħħar kliem li Ġesù qal lid-​dixxipli tiegħu qabel ma telaʼ s-​sema wera biċ-​ċar x’kellhom jagħmlu. Hu qal: “Għalhekk, morru u agħmlu dixxipli min-​nies tal-​ġnus kollha.”​—Mt. 28:19.

⁴ L-​Importanza tas-​Saltna: Is-​suġġett prinċipali tad-​diskussjonijiet taʼ Ġesù kien is-​Saltna t’Alla, u hu ħeġġeġ lid-​dixxipli tiegħu biex isegwu l-​eżempju tiegħu. L-​isforzi tal-​bnedmin sabiex isolvu l-​problemi taʼ l-​umanità ma jistgħux jirnexxu. (Ġer. 10:23) Is-​Saltna t’Alla biss se tqaddes l-​isem t’Alla u tipprovdi serħan permanenti għall-​umanità. (Mt. 6:​9, 10) Il-​fatt li tgħallem il-​veritajiet tas-​Saltna lin-​nies li “ssibhom jitniehdu u jitbikkew minħabba l-​qżiżijiet kollha li jsiru” jgħinhom jgħixu ħajja ferħana u taʼ suċċess issa u għall-​futur ikollhom tama soda taʼ min joqgħod fuqha.​—Eżek. 9:4.

⁵ Ġesù għad għandu rwol attiv fl-​ippridkar taʼ l-​aħbar tajba tas-​Saltna t’Alla, u hu jassigurana li qed jappoġġana. (Mt. 28:20) Il-​ministeru tagħna sa liema punt jaqbel maʼ l-​eżempju li ħallielna Ġesù? (1 Pt. 2:​21) F’dawn l-​aħħar jiem importanti ħafna, jalla nagħmlu ħilitna kollha sabiex inżommu mill-​qrib maʼ l-​eżempju li ħalla Ġesù fil-​ministeru!