Tinsiex lil Dawk li Huma Inattivi
1. Għala għandna nirsistu biex ninkuraġġixxu lil dawk li saru inattivi?
1 Taf lil xi ħadd li sar inattiv? Forsi waqaf milli jissieħeb mal-kongregazzjoni u nġarr mal-kurrent. Għandek mnejn ikkuntattjajt lil dan l-individwu waqt li kont qed tieħu sehem fil-ministeru minn dar għal dar. Irridu nżommu f’moħħna li dan l-individwu għadu ħuna spiritwali. Aħna rridu nuru li għadna nħobbuh u rridu ngħinuh jerġaʼ jiġi lura fil-kongregazzjoni u għand ‘ir-ragħaj u l-indokratur taʼ ruħna.’—1 Pt. 2:25.
2. Kif nistgħu noffru inkuraġġiment lil xi ħadd inattiv?
2 Uri Interess: Permezz taʼ telefonata jew żjara qasira nistgħu nassiguraw lil dak li sar inattiv li aħna ma nsejniehx. X’nistgħu ngħidu? Nistgħu nkunu taʼ inkuraġġiment billi sempliċement ngħidu lill-individwu li konna qed naħsbu fih. Żomm il-konversazzjoni pjaċevoli u inkuraġġanti. (Flp. 4:8) Nistgħu nsemmu xi punt li ħadna pjaċir nisimgħuh f’xi laqgħa reċenti. Nistgħu nistidnuh ukoll jattendi l-laqgħa jew l-assemblea li jkun imiss u noffru li nerfgħulu post jew li ngħaddu għalih.
3. Waħda oħt kif reġgħet saret attiva?
3 Oħt li kienet ilha inattiva għal iktar minn 20 sena ġiet kuntattjata fit-territorju. Għalkemm ma kinitx lesta li taċċetta studju tal-Bibbja, l-oħt li sabitha baqgħet iżżurha, billi kienet tiħdilha lħarġiet kurrenti tar-rivisti. Wara l-konvenzjoni distrettwali, il-pubblikatriċi ddiskutiet xi punti prinċipali mill-konvenzjoni maʼ l-oħt inattiva, u maż-żmien din reġgħet saret attiva.
4. Kif għandna nittrattaw lil xi ħadd li jerġaʼ jibda jissieħeb billi jattendi l-laqgħat?
4 Meta Xi Ħadd Jiġi Lura: Meta ħu inattiv jerġaʼ jibda jiġi l-laqgħat, kif għandna nittrattawh? Sewwa, Ġesù kif ittrattahom lid-dixxipli tiegħu wara li kienu abbandunawh għal ftit? Hu bi mħabba rrefera għalihom bħala ‘ħutu’ u wera fiduċja fihom. Saħansitra tahom inkarigu importanti. (Mt. 28:10, 18, 19) Ftit wara, huma kellhom ħafna x’jagħmlu f’li jiddikjaraw l-aħbar tajba “bla heda.”—Atti 5:42.
5. Semmi sitwazzjonijiet fejn għandna nitkellmu maʼ l-anzjani rigward xi ħadd li hu inattiv.
5 Qabel ma noffru li nistudjaw il-Bibbja maʼ xi ħadd li sar inattiv jew qabel ma nistiednu lil xi ħu li kien ilu inattiv għal żmien twil sabiex jiġi magħna fil-ministeru, għandna nistaqsu lill-anzjani għad-direzzjoni. Jekk niltaqgħu maʼ xi pubblikatur inattiv fit-territorju, għandna ninformaw lill-anzjani sabiex ikunu jistgħu joffrulu l-għajnuna meħtieġa.
6. Liema ferħ nistgħu nesperjenzaw meta ngħinu lil dawk li huma inattivi?
6 Bħalma turi ċar il-Bibbja, dawk biss li jiġru t-tiġrija sa l-aħħar se jsalvaw. (Mt. 24:13) Għalhekk, innota lil dawk li jistgħu jkunu ġew imfixklin jew inġarru mal-kurrent. Jekk bil-paċenzja nirriflettu l-imħabba taʼ Ġeħova billi nuru interess sinċier f’uħud bħal dawn, aħna nistgħu nesperjenzaw il-ferħ li narawhom jerġgħu jibdew jaqdu fis-servizz sagru magħna.—Lq. 15:4-10.