Programm Ġdid għall-Assemblea tas-Circuit
Ġeħova jistħoqqlu li jiġi glorifikat. Kif nigglorifikawh lil Ġeħova? Liema sfidi qed jiffaċċjaw xi wħud rigward dan? Liema barkiet għandhom dawk li jigglorifikaw lil Alla issa? Il-programm taʼ l-assemblea tas-circuit għas-sena taʼ servizz 2008 se jipprovdi tweġibiet sodisfaċenti għal dawn il-mistoqsijiet. It-tema se tkun “Agħmel Kollox għall-Glorja t’Alla.” (1 Kor. 10:31) Ikkunsidra x’hemm lest għalina fil-jumejn li ġejjin taʼ istruzzjoni spiritwali abbundanti.
L-indokratur tad-distrett se jitkellem dwar is-suġġetti “Għala Nagħtu Glorja lil Alla?” u “Kun Eżemplari f’li Tilħaq l-Ħtiġijiet t’Alla.” Hu se jagħti t-taħdita pubblika, “Min Huma n-Nies li Jigglorifikaw lil Alla?,” u t-taħdita taʼ l-għeluq, “Magħqudin Nigglorifikaw lil Alla Madwar id-Dinja.” Hu se jmexxi wkoll l-Iskola tal-Ministeru Teokratiku. L-indokratur tas-circuit se jitkellem dwar it-temi “Tgħaxxaq Hekk Kif Tirrifletti l-Glorja t’Alla,” “Nagħtu l-Attenzjoni għall-Ħtiġijiet tas-Circuit,” u “Ibqaʼ ‘Stabbilit Sew fil-Verità,’” li hi bbażata fuq it-2 Pietru 1:12. Barra minn hekk, se nitgħallmu kif “Il-Ministeru taʼ Pijunier Jigglorifika lil Alla.” It-taħdita “Nigglorifikaw lil Alla fl-Aspetti Kollha taʼ Ħajjitna,” li hija l-ewwel waħda miż-żewġ serje taʼ taħditiet li jqanqlu l-ħsieb, se teżamina s-sinifikat profond tal-kliem ispirat misjub fl-1 Korintin 10:31. Is-serje taʼ taħditiet “Nagħtu Servizz Sagru biex Infaħħru lil Ġeħova” se tittratta dwar diversi aspetti tal-qima tagħna. Il-Ħadd se jkollna s-sommarju tat-Torri taʼ l-Għassa u d-diskussjoni taʼ l-iskrittura tal-jum. Se jkun hemm ukoll opportunità għall-magħmudija.
Il-biċċa l-kbira mill-bnedmin jirrifjutaw li jieħdu għarfien dwar Alla. Ħafna huma aljenati wisq bi pjanijiet umani biex joqogħdu jaħsbu dwar il-kobor taʼ Ġeħova. (Ġw. 5:44) Imma aħna konvinti dwar kemm hu taʼ valur li nqattgħu ħin biex nikkunsidraw kif ‘Nagħmlu Kollox għall-Glorja t’Alla.’ Ippjana biex tkun preżenti u tibbenefika bis-sħiħ mill-erbaʼ sessjonijiet kollha.