Offri Tama lill-Foqra
1 Ġesù ħa interess speċjali f’dawk li kienu foqra. Kien hemm okkażjonijiet meta hu mirakolożament ipprovda għajnuna materjali u fejjaq lill-morda, imma hu kien jiffoka fuq ix-xandir taʼ “l-aħbar tajba” lill-foqra. (Mt. 11:5) Illum, il-ministeru Kristjan għadu taʼ benefiċċju kemm għall-foqra kif ukoll għal oħrajn.—Mt. 24:14; 28:19, 20.
2 Tama Vera: Il-ministri tal-Kristjaneżmu taʼ spiss iwiegħdu lill-foqra li se jistagħnew jekk jagħtu b’mod ġeneruż lill-knisja. Madankollu, il-Bibbja tgħallem li s-Saltna t’Alla biss se ttemm il-faqar u ssolvi l-problemi kollha tal-bnedmin. (Salm 9:19 [Salm 9:18, New World Translation]; Salm 145:16; Is. 65:21-23) Meta nuru lill-foqra dak li tgħallem verament il-Bibbja, aħna nkunu qed nagħtuhom tama u ngħinuhom jissodisfaw il-bżonn spiritwali tagħhom.—Mt. 5:3.
3 Il-Fariżej taʼ żmien Ġesù kienu jistmerruhom lill-foqra, billi b’disprezz kienu jsejħulhom amħaarets, jew “nies tal-pajjiż.” Madankollu, Ġesù kien iqis “demmhom,” jew ħajjithom, bħala “għażiż.” (Salm 72:13, 14) Aħna nistgħu nimitaw lil Ġesù u nuru ‘ħniena’ maʼ wħud foqra bħal dawn billi nuru qalb tajba u nieħdu interess persunali fihom u fil-problemi tagħhom. (Prov. 14:31) Aħna qatt ma rridu nċekknu lin-nies li jgħixu f’akkwati foqra jew nuru nuqqas taʼ ħeġġa biex nagħtuhom xiehda. Ħafna li qed iwieġbu għall-messaġġ tas-Saltna huma nies foqra.
4 Għinhom Issa: Meta ngħallmu l-prinċipji Bibliċi lil uħud foqra fit-territorju nkunu qed ngħinuhom ukoll biex inaqqsu l-effetti tal-faqar minn issa. Per eżempju, il-Bibbja tikkundanna s-sokor, il-logħob taʼ l-ażżard, l-għażż, l-użu tat-tabakk, u prattiċi oħrajn li jwasslu għall-faqar. (Prov. 6:10, 11; 23:21; 2 Kor. 7:1; Efes. 5:5) L-Iskrittura tinkuraġġixxi l-onestà u li naħdmu ‘b’ruħna kollha,’ kwalitajiet li jkunu mixtiqin fil-ħaddiema. (Kol. 3:22, 23; Ebr. 13:18) Fil-fatt, fi stħarriġ wieħed, il-biċċa l-kbira taʼ l-imgħallmin stmaw l-onestà u l-integrità bħala kwalitajiet li jiġbduhom l-iktar meta jkunu qed ifittxu biex iħaddmu n-nies.
5 Ġeħova jimpurtah mit-tbatija tal-foqra. Ġesù Kristu dalwaqt se jeħles “lill-fqir li jsejjaħlu.” (Salm 72:12) Sadanittant, aħna għandna l-privileġġ li nfarrġu lil oħrajn, inkluż lill-foqra, bil-messaġġ taʼ tama mill-Bibbja.