Kaxxa għall-​Mistoqsija

◼Huwa xieraq li jitwaħħal l-​indirizz persunali taʼ l-​e-mail tagħna mal-​letteratura li nqassmu?

Xi pubblikaturi stampaw jew waħħlu xi stiker bl-​indirizz persunali taʼ l-​e-mail tagħhom fuq ir-​rivisti jew il-​fuljetti li ħallew maʼ ħaddieħor. B’hekk, dawk li jaċċettaw il-​letteratura jkunu jistgħu jikkuntattjaw lill-​pubblikatur għal iktar informazzjoni. Sforzi bħal dawn biex jiġu megħjunin uħud interessati jsiru b’intenzjoni tajba. Madankollu, il-​Web site uffiċjali tagħna diġà tinsab indikata fuq in-​naħa taʼ wara tar-​rivisti u l-​fuljetti. Għaldaqstant, l-​aħjar huwa li ma nwaħħlux l-​indirizz persunali taʼ l-​e-mail fuq il-​letteratura.

Jekk xi pubblikatur jixtieq jipprovdi informazzjoni lin-​nies fit-​territorju fuq biċċa karta separata biex jiġi kuntattjat, speċjalment meta jagħmel żjajjar lura, din hija deċiżjoni persunali. Aħna għandna nieħdu l-​inizjattiva biex nagħmlu żjajjar lura lil dawk li huma interessati minflok ma sempliċement inħallu f’idejhom biex jikkuntattjawna għal iktar informazzjoni. Interess persunali ġenwin jistaʼ jintwera aħjar meta titkellem mal-​persuna wiċċ imbwiċċ.