Evita li Tiġri Wara “Ħwejjeġ Fiergħa”

¹ Mezz popolari taʼ komunikazzjoni llum huwa l-​E-mail. Għalkemm jistaʼ jkun xieraq li taqsam ħsibijiet u esperjenzi persunali maʼ tal-​familja u mal-​ħbieb b’dan il-​mod, liema “ħwejjeġ fiergħa” jistgħu jiġu assoċjati maʼ l-​użu bla limitu taʼ l-​E-mail?​—Prov. 12:11.

² Twissijiet Rigward l-​E-mail: X’uħud isostnu li jħossuhom iktar qrib taʼ l-​organizzazzjoni taʼ Jehovah meta jirċievu dik li skond huma hi informazzjoni ġdida permezz taʼ l-​E-mail. Dan għandu mnejn jinkludi esperjenzi, noti dwar avvenimenti f’Betel, rapporti dwar diżastri jew persekuzzjoni, u saħansitra informazzjoni kunfidenzjali li tkun ħarġet fl-​Iskejjel tal-​Ministeru tas-​Saltna. Oħrajn milli jidher huma ħerqanin iżżejjed biex jibagħtu messaġġi bħal dawn, bit-​tama li jkunu minn taʼ l-​ewwel biex jiżvelaw din l-​informazzjoni lil ħbiebhom.

³ Kultant, xi informazzjoni u esperjenzi ma jkunux eżatti jew ikunu esaġerati. Jew inkella minħabba l-​isforzi taʼ x’uħud biex ikunu sensazzjonali, dawn taw impressjoni żbaljata. Dawk li jkollhom sebaʼ mitt sena biex jiżvelaw affarijiet bħal dawn taʼ spiss ma jkunux jafu l-​fatti kollha. (Prov. 29:20) F’ċerti każi, anki meta storja tkun diffiċli biex temminha, xorta tinxtered għall-​kurżità. Rapporti bħal dawn li ma jkunux eżatti u li jistgħu jfixklu lil oħrajn m’humiex ħlief “ħwejjeġ fiergħa” li ma jinkuraġġux devozzjoni ġenwina lejn Alla.​—1 Tim. 4:​6, 7.

⁴ Jekk tibgħat informazzjoni u din tirriżulta li m’hijiex eżatta, xi ftit jew wisq int tkun responsabbli għall-​inkwiet jew il-​konfużjoni li tistaʼ tinħoloq. Meta David irċieva rapport esaġerat li wliedu kollha kienu ġew maqtula, hu “ċarrat ilbiesu” bin-​niket li ħass. Madankollu, fir-​realtà, tifel wieħed biss kien mietlu. Dan biss kien diġà taʼ niket, aħseb u ara din l-​esaġerazzjoni kemm ikkaġunatlu iktar niket lil David. (2 Sam. 13:​30-​33) Żgur li ma rridux nagħmlu xi ħaġa li tistaʼ tfixkel jew tiskuraġġixxi lill-​aħwa.

⁵ Il-​Mezz taʼ Komunikazzjoni Maħtur minn Alla: Żomm f’moħħok li Missierna tas-​sema ħatar mezz taʼ komunikazzjoni, “l-​ilsir leali u diskret.” Dan “l-​ilsir” għandu r-​responsabbiltà li jiddetermina liema informazzjoni għandha tkun disponibbli għal dawk taʼ dar il-​fidi, kif ukoll iż-​“żmien xieraq” li fih għandha titqassam. Dan l-​ikel spiritwali huwa disponibbli biss permezz taʼ l-​organizzazzjoni teokratika. Għandna dejjem infittxu l-​informazzjoni taʼ min joqgħod fuqha mingħand il-​mezz taʼ komunikazzjoni maħtur minn Alla, u mhux mingħand in-​numru kbir taʼ nies li jużaw l-​Internet.​—Mt. 24:​45, NW.

⁶ Il-​Web Sites taʼ l-​Internet: Aħna għandna Web site taʼ lInternet uffiċjali: www.watchtower.org. Din il-​Web site hija biżżejjed biex twassal l-​informazzjoni lill-​pubbliku. M’hemm ebda bżonn għal xi individwu, kumitat, jew kongregazzjoni biex jagħmlu Web page dwar ix-​Xhieda taʼ Jehovah. Xi wħud saħansitra kkopjaw il-​kontenut tal-​pubblikazzjonijiet bl-​iskritturi u referenzi dettaljati kollha u saħansitra offrew kopji tal-​materjal tal-​konvenzjoni fuq bażi taʼ donazzjoni. Kemm jekk isirx profitt jew le, li wieħed jipproduċi u jqassam il-​pubblikazzjonijiet tax-​Xhieda taʼ Jehovah permezz taʼ dokument elettroniku hija vjolazzjoni tad-​drittijiet taʼ l-​awtur. Filwaqt li x’uħud jistgħu jqisu dan bħala servizz għall-​aħwa, dan m’huwiex approvat u m’għandux ikompli jsir.

⁷ Jekk nuru l-​għaqal u lgħerf meta nużaw il-​komunikazzjoni elettronika nistgħu nibqgħu ċerti li mħuħna se jimtlew “b’kull ġid prezzjuż u sabiħ.”​—Prov. 24:​4, Karm Żammit.