Jum Speċjali Biex Noffru Studji tal-​Bibbja

¹ Minn Jannar, kull kongregazzjoni se tibda tagħżel tmiem il-​ġimgħa wieħed kull xahar, forsi l-​ewwel wieħed, biex tikkonċentra fuq li toffri studji tal-​Bibbja. Dan għandu jkun Sibt jew Ħadd, skond xi jkun l-​aħjar lokalment. Dakinhar, jekk l-​inkwilini jirrifjutaw din l-​offerta, il-​pubblikaturi xorta jistgħu joffru l-​ktieb Il-​Bibbja X’Tgħallem? jew iħallu l-​aħħar rivisti. L-​anzjani u l-​qaddejja ministerjali kollha għandhom jirranġaw biex ikollhom sehem sħiħ f’din l-​attività u biex jassistu lill-​pubblikaturi ħalli jibdew studji tal-​Bibbja.

² Il-​Kumitat tas-​Servizz tal-​Kongregazzjoni se jiddetermina liema jum fi tmiem il-​ġimgħa se jitħalla biex noffru studji tal-​Bibbja. Minn żmien għal żmien, għandhom jingħataw tfakkiriet biex il-​pubblikaturi jkunu jistgħu jippreparaw u jagħmlu sforz speċjali ħalli joffru studji tal-​Bibbja minn dar għal dar u meta jżuru lil dawk li jkunu wrew interess.

³ Kif Tipprepara: Nistgħu nsibu suġġerimenti dwar kif nibdew studji tal-​Bibbja fl-​insert tal-​Ministeru tas-​Saltna taʼ Jannar 2006 u fil-​ktieb Reasoning paġna 12. Xi wħud jistgħu jagħżlu li jużaw fuljett, bħal Tixtieq Tkun Taf il-​Verità? Ukoll, Il-​Ministeru tas-​Saltna t’Awissu 2007 f’paġna 3 tagħti suġġerimenti dwar kif nibdew studji tal-​Bibbja meta nżuru lil dawk li jkunu aċċettaw ir-​rivisti. L-​anzjani u l-​qaddejja ministerjali se jiġu inkarigati biex jikkonduċu laqgħa qasira għas-​servizz taʼ l-​għalqa taʼ xi 10 sa 15-il minuta, li matulha għandu jiġi diskuss jew muri suġġeriment prattiku jew tnejn dwar kif nibdew studji tal-​Bibbja.

⁴ M’għandniex xi ngħidu, mhux kulħadd se jaċċetta studju tal-​Bibbja jew ikompli l-​istudju tiegħu għal perijodu twil. Dan m’għandux iżommna lura, ladarba Ġeħova hu li jiġbed lil uħud bħal nagħaġ lejn l-​organizzazzjoni tiegħu. (Ġw. 6:44) Ir-​responsabbiltà tagħna m’hijiex biss li niżirgħu ż-​żerriegħa tal-​verità imma wkoll li nikkultivawha u nsaqqu dik li tagħmel l-​għeruq, u dan jinkludi li nistudjaw il-​Bibbja maʼ wħud li għandhom attitudni xierqa. Meta nagħmlu hekk, aħna jkollna l-​privileġġ li nkunu ħaddiema sħab m’Alla.—1 Kor. 3:9.