Se Tingħata Xhieda Qawwija
1. Minbarra t-taħdita, x’hemm iktar li jistaʼ jimpressjona lill-viżitaturi fit-Tifkira? Spjega.
1 Meta? Fil-lejla tat-Tifkira. Sar ħafna sforz biex nistiednu lin-nies ħalli jattendu magħna. Dak li l-viżitaturi jisimgħu mhuwiex l-unika ħaġa li tistaʼ timpressjonahom. Wara li attendiet it-Tifkira, mara b’mod speċifiku kkummentat fuq dak li rat—il-fatt li kulħadd kien dħuli u li l-bini kien wieħed nadif u mill-isbaħ, mibni u miżmum tajjeb minn volontieri. Għalhekk, ilkoll kemm aħna, mhux biss il-kelliemi, għandna sehem f’li nagħtu xhieda f’din l-okkażjoni l-iktar importanti tas-sena.—Efes. 4:16.
2. Kull wieħed u waħda minna kif jistaʼ jagħti xhieda lill-viżitaturi?
2 Ilqaʼ lill-Viżitaturi mill-Qalb: Tbissima mill-qalb flimkien maʼ tislima dħulija se jagħtu xhieda lill-viżitaturi. (Ġw. 13:35) Anke jekk ma tistax titkellem maʼ kulħadd, xorta waħda tistaʼ tintroduċi lilek innifsek b’mod dħuli man-nies li huma ħdejk. (Ebr. 13:1, 2) Oqgħod għassa għal dawk il-viżitaturi li jidhru li ma jafu ’l ħadd. X’aktarx irċivew invit matul il-kampanja. Tistaʼ tistaqsihom, “Din l-ewwel darba li attendejt?” Stidinhom joqogħdu bilqiegħda ħdejk, u offri li twieġeb kwalunkwe mistoqsija li jaf ikollhom. Jekk il-kongregazzjoni tiegħek ikollha titlaq malajr ħalli oħra tkun tistaʼ tuża s-sala, int tistaʼ tgħid: “Nixtieq inkun naf x’deherlek mill-programm. Nistgħu nerġgħu niltaqgħu?”
3. Kif nistgħu nagħtu merħba lil dawk inattivi?
3 Agħti Merħba lil Dawk Inattivi: X’aktarx xi pubblikaturi inattivi se jattendu, inkluż xi wħud li jissieħbu mal-kongregazzjoni darba biss kull sena fit-Tifkira. Agħtihom merħba, u urihom li int ġenwinament ferħan li qed tarahom. (Rum. 15:7) L-anzjani jistgħu jgħaddulhom id-dar ftit żmien wara biex iħeġġuhom jibqgħu jissieħbu mal-kongregazzjoni. Hija x-xewqa tagħna li ħafna minn dawk li jattendu jiġu mqanqlin ifaħħru lil Alla, mhux biss minħabba dak li jisimgħu imma wkoll ‘minħabba l-għemejjel tajbin tagħna li jaraw b’għajnejhom stess.’—1 Pt. 2:12.