Roddu Ħajr lil Ġeħova għall-​Qalb Tajba bl-​Imħabba Tiegħu

Il-​Mewt taʼ Kristu Se Tiġi Kommemorata fl-​24 taʼ Marzu

1. Ġeħova kif uriena qalb tajba bl-​imħabba?

¹ Is-​salmista stqarr: “Ħa jroddu ħajr lill-​Mulej għal tjubitu [“għall-​qalb tajba bl-​imħabba tiegħu,” New World Translation], għall-​għeġubijiet tiegħu mal-​bnedmin.” (Salm 107:8) Il-​qalb tajba bl-​imħabba t’Alla hija iktar minn sempliċement sentiment teneru li hu jħoss għall-​poplu tiegħu. Dan jidher ċar fl-​espressjonijiet ispirati taʼ tifħir: “Tjubitek [jew, il-​qalb tajba bl-​imħabba tiegħek], Mulej, tweżinni.” (Salm 94:18) X’turija straordinarja taʼ qalb tajba bl-​imħabba wera Ġeħova meta ta lil ibnu l-​waħdieni għalina!​—1 Ġw. 4:​9, 10.

2. Kif nistgħu rroddu ħajr lil Ġeħova?

² Hekk kif toqrob it-​tifkira tal-​mewt taʼ Kristu, kif nistgħu rroddu ħajr lil Alla li jurina “qalb tajba bl-​imħabba”? (Salm 59:​17, NW) Ilkoll kemm aħna għandna nkunu rridu nwarrbu ftit ħin biex nimmeditaw fuq l-​aħħar jiem taʼ Ġesù fuq l-​art. (Salm 143:5) Ikun taʼ benefiċċju wkoll jekk insegwu l-​iskeda speċjali għall-​qari tal-​Bibbja għat-​Tifkira li hemm fil-​ktejjeb Neżaminaw l-​Iskrittura Kuljum​—2005, u, jekk inhu possibbli, anki naqraw u nagħmlu ftit riċerka mill-​kapitli 112-​16 fil-​ktieb L-​Aqwa Bniedem flimkien maʼ pubblikazzjonijiet oħra bbażati fuq il-​Bibbja. Immedita dwar is-​siltiet li taqra, u kun medhi fihom. (1 Tim. 4:​15) Riflessjoni bit-​talb fuq il-​Kelma t’Alla mhux biss issaħħaħ lil qalbna imma tesprimi wkoll l-​imħabba tagħna għal Ġeħova.​—Mt. 22:37.

3, 4. (a) Kif nistgħu nimitaw l-​ispirtu taʼ ħutna fil-​Liberja? (b) Lil min bi ħsiebek tistieden għat-​Tifkira?

³ Ħeġġeġ lill-​Oħrajn biex Iroddu Ħajr lil Alla: Is-​sena l-​oħra 16,760,607 attendew it-​Tifkira mad-​dinja kollha. F’raħal fil-​Liberja, l-​aħwa kitbu ittra lill-​kap tal-​belt biex jinformawh dwar l-​intenzjoni tagħhom li josservaw l-​Ikla taʼ fil-​Għaxija tal-​Mulej fil-​belt tiegħu. Il-​kap ta l-​permess tiegħu lill-​aħwa biex jużaw il-​grawnd lokali tal-​futbol għall-​avveniment u għamel avviż dwar it-​Tifkira mal-​belt kollha, waqt li stieden lin-​nies biex jattendu. Għalkemm kien hemm biss ħames pubblikaturi f’dan ir-​raħal, l-​attendenza għat-​Tifkira kienet taʼ 636 ruħ!

⁴ Bl-​istess mod, aħna rridu ngħinu kemm jistaʼ jkun nies biex jingħaqdu magħna għall-​osservanza tat-​Tifkira. Għala ma tagħmilx lista taʼ dawk li tixtieq tistieden? L-​istampi fil-​paġni taʼ wara taʼ Stenbaħ! tat-​8 taʼ Marzu u t-​Torri taʼ l-​Għassa tal-​15 taʼ Marzu jestendu stedina għat-​Tifkira. Jistgħu jintużaw ukoll l-​inviti tat-​Tifkira li jiġu stampati. Ittajpja jew ikteb pulit il-​ħin u l-​post tat-​Tifkira fuq l-​invit, u ħalli wieħed maʼ kull individwu li tistieden. Hekk kif joqrob l-​24 taʼ Marzu, erġaʼ għaddilhom biex tfakkarhom u tagħmel l-​aħħar arranġamenti magħhom.

5. Kif nistgħu ninkuraġġixxu lill-​istudenti tal-​Bibbja biex jattendu?

⁵ Kif nistgħu ngħinu lill-​istudenti tal-​Bibbja li għadhom mhux qed jiġu l-​laqgħat biex jattendu u jibbenefikaw bis-​sħiħ minn dan l-​avveniment? Qattaʼ ftit minuti waqt kull studju biex tibni l-​apprezzament għall-​importanza taʼ l-​osservanza. Tistaʼ ssib materjal eċċellenti fit-​Torri taʼ l-​Għassa tal-​15 taʼ Marzu, 2004, paġni 3-7, u fil-​ktieb Reasoning, paġni 266-9.

6. Għala huwa importanti li nilqgħu lill-​viżitaturi fit-​Tifkira?

⁶ Ilqaʼ lill-​Viżitaturi: Fit-​Tifkira, kellem lill-​viżitaturi u agħtihom merħba. (Rum. 12:13) Agħmel mezz li toqgħod bil-​qiegħda ħdejn dawk li tkun stidint, u ara li jkollhom Bibbja u ktieb taʼ l-​għanjiet. Għandna nieħdu l-​inizjattiva speċjalment biex nagħtu merħba mill-​qalb lil ħutna li huma inattivi u li għamlu sforz biex jattendu. L-​interess kollu mħabba tagħna jistaʼ jgħinhom jerġgħu jibdew jassoċjaw regolarment mal-​kongregazzjoni. (Lq. 15:​3-7) F’din l-​okkażjoni tant sagra, jalla nagħmlu dak kollu li nistgħu biex ninkuraġġixxu lill-​oħrajn ħalli jingħaqdu magħna f’radd il-​ħajr lil Ġeħova għall-​“qalb tajba bl-​imħabba taʼ l-​għaġeb” tiegħu.​—Salm 31:​21, NW.