“Ħobbu l-Mulej, Ħbieb Tiegħu Kollha”
Il-Mewt taʼ Ġesù li Se Tiġi Mfakkra fl-4 t’April
1 Snin ilu, meta l-Ukraina kienet taħt il-ħakma Komunista, l-awtoritajiet kienu joqogħdu għassa għall-aħwa—speċjalment meta kienet toqrob il-ġurnata taʼ l-Ikla taʼ fil-Għaxija tal-Mulej—għax kienu jittamaw li jiskopru fejn kienu jiltaqgħu. Din dejjem kienet problema minħabba li l-awtoritajiet kienu jafu bejn wieħed u ieħor id-data tal-kommemorazzjoni. L-aħwa x’setgħu jagħmlu? Id-dar taʼ waħda oħt kellha kantina mgħarrqa. Ladarba l-awtoritajiet ma kinux jistennew li jkun hemm min jiltaqaʼ hemm, l-aħwa bnew pjattaforma fuq l-ilma li kien jilħaq l-irkoppa. Għalkemm kellhom joqogħdu bil-qiegħda mrekknin fuq il-pjattaforma taħt saqaf baxx, ħadd ma fixkilhom hekk kif il-kongregazzjoni kollha ċċelebrat it-Tifkira bil-ferħ.
2 Id-determinazzjoni taʼ ħutna mill-Ukraina biex jobdu l-kmand li jfakkru l-mewt taʼ Ġesù kienet turija meraviljuża taʼ l-imħabba tagħhom għal Alla. (Lq. 22:19; 1 Ġw. 5:3) Kulmeta niffaċċjaw xi ostakli fil-ħajja tagħna nistgħu niksbu inkuraġġiment minn eżempji bħal dawn u nkunu determinati li nkunu preżenti biex nosservaw l-Ikla taʼ fil-Għaxija tal-Mulej fl-4 t’April. Billi nagħmlu dan, se nuru li nħossuna bħas-salmista li kanta: “Ħobbu l-Mulej, ħbieb tiegħu kollha.”—Salm 31:24 (31:23, New World Translation).
3 Għin lil Oħrajn Jikbru fl-Imħabba għal Alla: L-imħabba għal Alla tqanqalna wkoll biex nistiednu oħrajn ħalli josservaw il-kommemorazzjoni magħna. L-insert fil-Ministeru tas-Saltna taʼ Frar inkuraġġixxa lil kull wieħed minna biex nagħmlu lista taʼ dawk li bi ħsiebna nistiednu għat-Tifkira. Qiegħed int tkompli tistieden lil dawk li għandek imniżżlin fil-lista tiegħek? Ħu l-ħin biex tispjegalhom is-sinifikat taʼ l-okkażjoni. Erġaʼ fakkarhom bil-ħlewwa kollha fil-ġurnata u l-ħin tat-Tifkira, u jekk ikun hemm bżonn offrilhom biex twassalhom għax dan għandu mnejn jinkuraġġihom biex jattendu.
4 Meta tattendi l-osservanza, agħmel sforz speċjali biex tilqaʼ lil dawk li aċċettaw l-istedina tagħna, u għinhom ħalli jħossuhom komdi. Kif tistaʼ tgħinhom jikbru fl-imħabba tagħhom għal Jehovah? Kun lest li twieġeb il-mistoqsijiet li jistaʼ jkollhom. Kun preparat biex toffri studju tal-Bibbja jekk ikun xieraq. Stidinhom biex jattendu l-laqgħat tagħna tal-kongregazzjoni taʼ kull ġimgħa. B’mod speċjali l-anzjani jkunu jixtiequ jagħtu attenzjoni lil Kristjani inattivi li jkunu preżenti. Jistgħu jagħmlu arranġamenti biex iżuru lil uħud bħal dawn u jinkuraġġuhom jerġgħu jibdew l-attività tagħhom, forsi billi jkomplu jiżviluppaw xi ideat preżentati fit-taħdita tat-Tifkira.—Rum. 5:6-8.
5 Inkabbru l-Imħabba Tagħna Stess għal Jehovah: Meta nirriflettu fuq l-għotja tal-fidwa nkunu nistgħu nkabbru l-imħabba tagħna għal Jehovah u għal Ibnu. (2 Kor. 5:14, 15) Waħda li ilha tattendi għat-Tifkira għal ħafna żmien qalet: “Aħna nħarsu ’l quddiem għat-Tifkira. Kull sena ssir iktar speċjali għalina. Xi 20 sena ilu, niftakarni bil-wieqfa fis-sala mortwarja nħares lejn l-għażiż missieri u nħoss apprezzament mill-fond taʼ qalbi iktar minn qatt qabel għall-fidwa. Qabel, din kienet biss suġġett li kont naf dwaru. Kont naf l-iskritturi kollha u anki nispjegahom! Imma kien biss meta ħassejt ir-realtà kiefra tal-mewt li qalbi tant ferħet minħabba dak li se jsir għalina permezz taʼ dik il-fidwa tant prezzjuża.”—Ġw. 5:28, 29.
6 Hekk kif toqrob id-data taʼ l-osservanza taʼ din is-sena, ħu l-ħin biex tipprepara lil qalbek għal din l-okkażjoni. (2 Kron. 19:3) Immedita fuq il-qari tal-Bibbja speċjali għat-Tifkira, li jidher fil-ktejjeb Neżaminaw l-Iskrittura Kuljum—2004 u l-kalendarju tax-Xhieda taʼ Jehovah għall-2004. Hemm min jieħu pjaċir jirrivedi kapitli 112-16 tal-ktieb L-Aqwa Bniedem waqt l-istudju tal-familja. Xi wħud jagħmlu iktar riċerki billi jużaw għajnuniet oħrajn għall-istudju provduti permezz tal-klassi taʼ l-ilsir leali u diskret. (Mt. 24:45-47) Ilkoll kemm aħna nistgħu nitolbu minn qalbna dwar l-għotja tal-fidwa. (Salm 50:14, 23) Iva, matul dan iż-żmien tat-Tifkira, jalla nirriflettu kontinwament fuq l-imħabba taʼ Jehovah għalina u nfittxu modi kif nuru l-imħabba tagħna għalih.—Mk. 12:30; 1 Ġw. 4:10.