“Ibqgħu Agħmlu Dan b’Tifkira Tiegħi”
Il-Mewt taʼ Ġesù Se Tiġi Kommemorata fit-2 t’April
1. Għala t-2 t’April, 2007, hija data importanti?
1 Fit-2 t’April, 2007, miljuni taʼ nies madwar id-dinja se jiltaqgħu biex jikkommemoraw il-mewta taʼ sagrifiċċju taʼ Ġesù. Ġesù miet minħabba li ddefenda s-sovranità taʼ Missieru tas-sema, billi ta prova li kienet akkuża falza li għamel Satana x-Xitan meta stqarr li l-bnedmin jaqdu lil Alla biss minħabba motivi egoistiċi. (Ġob 2:1-5) L-Ikla taʼ fil-Għaxija tal-Mulej tfakkarna wkoll li permezz tal-mewt tiegħu bħala bniedem perfett u mingħajr dnub, Ġesù ‘ta ruħu b’fidwa għal ħafna.’ (Mt. 20:28) Għalhekk, Ġesù kkmanda lid-dixxipli tiegħu: “Ibqgħu agħmlu dan b’tifkira tiegħi.” (Luqa 22:19) Qanqlek l-apprezzament għal dan ir-rigal prezzjuż mingħand Alla biex tibda tagħmel it-tħejjijiet ħalli tikkommemora dan l-att taʼ mħabba li ma bħalu?—Ġw. 3:16.
2. Kif nistgħu nħejju qalbna għat-Tifkira?
2 Ħejji Qalbek: Billi nikkunsidraw jum b’jum il-ġrajjiet li seħħew matul l-aħħar ftit jiem tal-ħajja umana taʼ Ġesù, aħna nistgħu nħejju qalbna għal din l-osservanza tat-Tifkira. (Esd. 7:10, Saydon) Sabiex jgħinna nagħmlu dan, nistgħu nsibu skeda għall-qari tal-Bibbja speċjali fil-ktejjeb Neżaminaw l-Iskrittura Kuljum—2007 u fuq it-2007 Calendar. Dan il-qari fl-iskeda jaqbel ħafna mal-jiem taʼ kif seħħew il-ġrajjiet li għandhom x’jaqsmu mal-mewt taʼ Ġesù skond il-kalendarju li nużaw illum. Il-jiem u d-dati li huma msemmijin fir-rakkonti Bibliċi huma bbażati fuq il-kalendarju Lhudi, jiġifieri, jum li jibda minn inżul ix-xemx sa nżul ix-xemx. Din id-differenza ġiet kunsidrata u l-iskeda għall-qari tal-Bibbja għat-Tifkira hija fi qbil magħha. Jekk nirrivedu informazzjoni bħal din u nimmeditaw bit-talb dwar l-imħabba kbira t’Alla niġu megħjunin nibbenefikaw bis-sħiħ mill-osservanza tat-Tifkira.
3. Kif nistgħu ngħinu lill-uħud interessati u lil dawk inattivi jibbenefikaw mit-Tifkira?
3 Stieden lil Oħrajn biex Jattendu: L-insert fil-Ministeru tas-Saltna taʼ Frar ħabbar kampanja speċjali biex nistiednu lin-nies għal din il-ġrajja importanti. Għamilt arranġamenti biex ikollok sehem sħiħ f’din il-kampanja? Għamilt lista taʼ wħud li tixtieq tistieden, u bdejt tikkuntattjahom? Ippjana biex tasal kmieni biżżejjed fil-lejla tat-Tifkira sabiex tilqaʼ lil dawk li tkun stidint kif ukoll lil uħud interessati oħrajn. Forsi tkun trid tpoġġi bil-qiegħda ħdejhom, u kun ċert li jkollhom Bibbja u ktieb taʼ l-għanjiet. Introduċiehom m’oħrajn fil-kongregazzjoni. Wara l-programm ħu l-ħin biex twieġeb il-mistoqsijiet li jkollhom. Stidinhom biex jattendu għat-taħdita pubblika speċjali li se tingħata fil-15 t’April. B’mod speċjali, l-anzjani jridu jkunu ċerti li jistiednu għat-Tifkira u għat-taħdita speċjali lil dawk li kienu jissieħbu mal-kongregazzjoni imma li saru inattivi.
4. Kif nistgħu ngħinu lin-nies biex jibqgħu jagħmlu progress spiritwali wara l-osservanza tat-Tifkira?
4 Għin lill-Uħud Interessati Ġodda u Wħud Inattivi biex Jagħmlu Progress: Il-kelliemi tat-Tifkira se jispjega fil-qosor li aħna noffru studji tal-Bibbja fid-djar bla ħlas u jinkuraġġixxi lill-uħud interessati ġodda biex jibqgħu jitgħallmu dwar Ġeħova. Tistaʼ tuża l-kummenti tiegħu bħala bażi biex toffri iktar għajnuna spiritwali lil dawk li stidint. Jekk fil-preżent mhux qed jistudjaw il-Bibbja, kun ċert li tmur iżżurhom wara t-Tifkira u wrihom kif isir studju tal-Bibbja bla ħlas. Sabiex jagħmlu progress spiritwali, se jkollhom bżonn ukoll jattendu l-laqgħat tal-kongregazzjoni. (Ebr. 10:24, 25) B’dan f’moħħok, inkuraġġihom biex jibdew jattendu regolarment. L-anzjani għandhom jagħmlu arranġament biex iżuru lill-Kristjani inattivi li attendew it-Tifkira u jgħinuhom biex jikkunsidraw iktar dak li ġie preżentat fit-taħdita. Dan jistaʼ jinkuraġġihom biex jerġgħu jsiru attivi fil-kongregazzjoni.
5. Kif nistgħu nibbenefikaw billi nosservaw it-Tifkira?
5 L-osservanza tat-Tifkira tipprovdi opportunità biex nimmeditaw bis-serjetà dwar x’għamlu Ġeħova u Ġesù għalina. Meditazzjoni bħal din tkabbrilna mħabbitna għalihom u teffettwa l-kondotta tagħna. (2 Kor. 5:14, 15; 1 Ġw. 4:11) Issa huwa ż-żmien li nibdew nippreparaw lilna nfusna u lill-uħud interessati għal din l-okkażjoni importanti li matulha ‘nxandru l-mewt tal-Mulej.’—1 Kor. 11:26.