“Ħa Jkun li Trid Int”
1. X’inhi t-tema tal-programm tal-jum t’assemblea speċjali għas-sena taʼ servizz 2012, u għala hu xieraq li nikkunsidraw dan is-suġġett?
1 Aħna ġejna maħluqin minħabba r-rieda taʼ Ġeħova. (Riv. 4:11) B’hekk, ikun impossibbli li nwettqu l-iskop tal-eżistenza tagħna mingħajr ma nitgħallmu u nagħmlu r-rieda t’Alla. Dan mhuwiex faċli daqskemm forsi naħsbu, għax irridu niġġieldu tendenza ġewwinija biex nagħmlu “dak li jridu l-laħam u l-ħsibijiet” jew biex nagħmlu “r-rieda tal-ġnus.” (Efes. 2:3; 1 Pt. 4:3; 2 Pt. 2:10) Mingħajr l-għajnuna t’Alla, saħansitra nirriskjaw li nkunu ‘maqbudin [mix-Xitan] biex nagħmlu r-rieda tiegħu.’ (2 Tim. 2:26) Il-programm tal-jum t’assemblea speċjali għas-sena taʼ servizz 2012 se jgħin lil kull wieħed minna biex jaħdem fi qbil maʼ waħda mit-tliet rikjesti prinċipali li għallimna Ġesù biex nitolbu għalihom, jiġifieri, “ħa jkun li trid int.”—Mt. 6:9, 10.
2. Liema mistoqsijiet se jitwieġbu matul il-programm?
2 Mistoqsijiet li Se Jitwieġbu: Hekk kif tismaʼ l-programm, fittex għat-tweġibiet għal dawn il-mistoqsijiet: X’hemm importanti daqs li nisimgħu l-Kelma t’Alla? Kif nistgħu nkomplu nagħrfu x’inhi r-rieda t’Alla għalina? Għala għandna bżonn inkunu lesti ngħinu lil kull xorta taʼ nies? Kif nistgħu nsibu ħajja produttiva u sodisfaċenti? Żgħażagħ, x’għandkom turuh lil Ġeħova? Liema barkiet jiġu jekk nagħmlu r-rieda t’Alla? Għala hu urġenti li nibnu u ninkuraġġixxu lil oħrajn?
3. Kif nistgħu nibbenefikaw bis-sħiħ minn dan il-provvediment spiritwali?
3 Kun ċert li tattendi u li toqgħod attent ħafna għall-programm. Rappreżentant minn Betel jew indokratur li jivvjaġġa x’aktarx li se jkun preżenti bħala kelliemi minn barra. Qabel u wara l-programm, ħossok komdu biex tmur titkellem miegħu u maʼ martu, jekk ikun miżżewweġ. Meta tmur lura d-dar, issirx “wieħed li jismaʼ u jinsa,” imma rrivedi l-programm mal-familja u ddiskutu kif tistgħu taħdmu fi qbil mar-rieda t’Alla iktar bis-sħiħ.—Ġak. 1:25.
4. Għala hu importanti li nagħmlu r-rieda t’Alla l-prijorità tagħna?
4 Dalwaqt, dawk li qed isusu wara x-xewqat tagħhom stess u li jirrifjutaw li jissottomettu ruħhom lejn ir-rieda taʼ Ġeħova se jinqerdu. (1 Ġw. 2:17) Għaldaqstant, aħna grati li Ġeħova pprepara din l-informazzjoni f’waqtha biex tgħinna nagħmlu r-rieda t’Alla l-prijorità tagħna!