Iżżommx Lura
1. X’hemm bżonn biex tagħti xhieda fl-iskola, u għala?
1 Ġieli żammejt lura milli tagħti xhieda fl-iskola minħabba li bżajt li se tiġi mwaqqaʼ għaċ-ċajt? Żgur li teħtieġ il-kuraġġ biex tibda konversazzjoni, speċjalment jekk tistħi. X’se jgħinek?
2. Kif nistgħu nużaw l-għaqal meta nagħtu xhieda fl-iskola?
2 Uża l-Għaqal: Għalkemm b’mod xieraq l-iskola tistaʼ titqies bħala t-territorju persunali tiegħek, ftakar li mhux mistenni minnek li tibda konversazzjonijiet spiritwali maʼ kulħadd bħal meta tkun qed tipprietka minn dar għal dar. Uża l-għaqal biex tiddeċiedi meta titkellem. (Ekk. 3:1, 7) Is-suġġett taʼ diskussjoni fil-klassi jew xi inkarigu tal-iskola għandu mnejn jagħtik opportunità biex tesprimi l-fidi tiegħek. Jew student sieħbek forsi jistaqsik għala ma tiħux sehem f’ċerti attivitajiet. Xi Kristjani informaw lill-għalliema tagħhom fil-bidu tas-sena skolastika li huma Xhieda taʼ Ġeħova u taw lill-għalliema letteratura li tispjega t-twemmin tagħna. Oħrajn ħallew xi letteratura fuq id-desk tagħhom sabiex sħabhom tal-iskola jistaqsuhom dwarha.
3. Kif tistaʼ tipprepara biex tagħti xhieda fl-iskola?
3 Kun Preparat: Jekk tipprepara, se tħossok iktar kunfidenti. (1 Pt. 3:15) Għalhekk, ipprova aħseb minn qabel dwar mistoqsijiet li jistgħu jistaqsuk, u aħseb dwar kif tistaʼ twieġeb. (Prov. 15:28) Jekk inhu possibbli, l-iskola ħalli l-Bibbja tiegħek u ftit pubblikazzjonijiet, bħall-ktieb Reasoning, il-kotba Iż-Żgħażagħ Jistaqsu, u xi letteratura dwar il-ħolqien, sabiex tkun tistaʼ tużahom meta jkollok bżonn. Staqsi lill-ġenituri tiegħek biex jinkludu sessjonijiet taʼ prattika matul il-qima tal-familja.
4. Għala għandek tkompli tagħti xhieda l-iskola?
4 Kun Pożittiv: Tassumix li sħabek tal-iskola dejjem se jwaqqgħuk għaċ-ċajt meta ssemmi l-verità. X’aktarx li xi wħud se jammirawk għall-kuraġġ tiegħek u għandhom mnejn saħansitra jagħtu widen. Taqtax qalbek jekk ħadd ma jwieġeb favorevolment. Ġeħova se jieħu pjaċir li pprovajt. (Ebr. 13:15, 16) Kompli itolbu biex jgħinek ‘tibqaʼ titkellem bil-qlubija kollha.’ (Atti 4:29; 2 Tim. 1:7, 8) Min jaf kemm tkun ferħan meta xi ħadd jagħti widen! Dan l-individwu għandu mnejn jingħaqad miegħek f’li taqdi lil Ġeħova.