Uża l-​Websajt Tagħna Biex Tgħallem lil Uliedek

1. X’inhi l-​mira tas-​sezzjoni “Tfal” fil-​Websajt tagħna?

¹ Il-​Websajt tagħna, jw.org/mt, hi disinjata biex tolqot lil nies taʼ kull età. Is-​sezzjoni tal-​Websajt bit-​titlu “Tfal” (ikklikkja fuq Tagħlim tal-​Bibbja > Tfal) tgħin lit-​tfal żgħar u l-​ġenituri tagħhom biex jersqu qrib taʼ xulxin u taʼ Ġeħova. (Dt. 6:6, 7) Kif tistaʼ tuża din is-​sezzjoni biex tgħallem lil uliedek?

2. Kif tistaʼ tagħżel materjal xieraq għall-​età taʼ wliedek biex tistudja magħhom?

² Kun Lest li Tadatta: It-​tfal kollha għandhom il-​bżonnijiet partikulari tagħhom. (1 Kor. 13:11) Allura, kif tistaʼ tagħżel materjal xieraq għall-​età taʼ wliedek biex tistudja magħhom? Staqsi lilek innifsek: ‘X’se jinteressa lil uliedi? Kemm se jifhmu? Kemm se jirnexxilhom idumu attenti?’ Mat-​tfal li għandhom tliet snin jew inqas, tistaʼ tiddiskuti l-​istejjer li ssib fis-​sezzjoni “Nitgħallem mill-​Bibbja.” Familji oħrajn jieħdu pjaċir bl-​istejjer tal-​Bibbja li jinsabu fis-​sezzjoni “Għallem lil Uliedek.” Ukoll ikkunsidra s-​suġġerimenti li ġejjin.

3. Il-​ġenituri kif jistgħu jużaw b’mod effettiv l-​istejjer u l-​attivitajiet li jinsabu fis-​sezzjoni “Proġetti għall-​Qima tal-​Familja”?

³ Proġetti għall-​Qima tal-​Familja: Dawn il-​proġetti huma għodda biex tgħin lill-​kapijiet tal-​familja jistudjaw maʼ wliedhom. Biex issir taf kif tuża l-​istejjer u l-​attivitajiet, agħfas il-​buttuna biex tiddawnlowdja u aqra l-​“Gwida għall-​Ġenituri” għal kull proġett. Uża l-​attivitajiet bl-​istampi, bħall-​paġni biex jiġu mpinġijin bil-​kulur, sabiex tgħallem tfal iżgħar. Għin lil tfal akbar ilestu l-​attivitajiet għall-​istudju. L-​attivitajiet kollha f’kull proġett huma relatati mal-​istess storja jew lezzjoni tal-​Bibbja, u għalhekk it-​tfal taʼ kull età jistgħu jieħdu sehem fl-​istess proġett għall-​qima tal-​familja.

4. X’tistaʼ ssib fis-​sezzjoni “Sir Ħabib taʼ Ġeħova”?

⁴ Sir Ħabib taʼ Ġeħova: Il-​vidjows, l-​għanjiet, u l-​attivitajiet f’din is-​sezzjoni tal-​Websajt tagħna jgħinu lill-​ġenituri biex inaqqxu l-​Kelma t’Alla fit-​tfal ċkejknin tagħhom. (Dt. 31:12) Kull vidjow tal-​kartun qasir jgħallem lezzjoni importanti. Attivitajiet bħal fittex u sib jenfasizzaw dawn il-​lezzjonijiet. Ladarba t-​tfal iħobbu jkantaw—u l-​għanjiet jgħinu lit-​tfal jiftakru dak li tgħallmu—għanjiet tas-​Saltna u għanjiet miktubin apposta għalihom jittellgħu regolarment fuq il-​Websajt.

5. Il-​ġenituri għala għandhom jitolbu lil Ġeħova biex jgħinhom jgħallmu l-​verità lil uliedhom?

⁵ Ġenituri, Ġeħova jridkom tirnexxu bħala ommijiet u missirijiet. Għalhekk, itolbuh biex jgħinkom tgħallmu lil uliedkom il-​verità. (Mħ. 13:8) Bl-​għajnuna taʼ Ġeħova, tistgħu tħarrġu lil uliedkom biex isiru ‘għorrief għas-​salvazzjoni permezz tal-​fidi fi Kristu Ġesù.’—2 Tim. 3:15; Prov. 4:1-​4.