Ħu Bħala Mudell lill-Profeti—Ħosea
1. Liema mistoqsija għandek mnejn staqsejt lilek innifsek?
1 ‘Jien liema sagrifiċċji lest li nagħmel għal Ġeħova?’ Għandek mnejn staqsejt lilek innifsek din il-mistoqsija meta kont qed timmedita fuq kemm Alla juri qalb tajba u ħniena. (Salm 103:2-4; 116:12) Ħosea minn qalbu għamel dak li Ġeħova kkmandah jagħmel, avolja dan kien jinvolvi sagrifiċċju persunali. Kif nistgħu nimitaw lil Ħosea?
2. Kif nistgħu nimitaw l-eżempju mill-aħjar taʼ Ħosea li ma qatax qalbu fl-ippritkar?
2 Ipprietka fi Żmien taʼ Inkwiet: Il-messaġġ taʼ Ħosea kien indirizzat primarjament lis-saltna taʼ Iżrael b’għaxar tribujiet, fejn il-qima vera kienet kważi spiċċat għalkollox. Is-Sultan Ġerobogħam II għamel dak li hu ħażin f’għajnejn Ġeħova u żamm il-qima tal-għoġol li kien bdieha Ġerobogħam I. (2 Slat. 14:23, 24) Is-slaten li ġew wara komplew jgħarrqu l-ispiritwalità tas-saltna b’għaxar tribujiet sakemm fl-aħħar inqerdet fis-sena 740 Q.E.K. Però, minkejja li l-qima falza kienet qed tiżdied, Ħosea qeda lealment bħala profeta minn tal-inqas għal 59 sena. Determinati aħna bl-istess mod biex nippritkaw sena wara l-oħra, anki meta niffaċċjaw apatija jew oppożizzjoni?—2 Tim. 4:2.
3. Il-ħajja taʼ Ħosea kif uriet il-ħniena taʼ Ġeħova?
3 Iffoka fuq il-Ħniena taʼ Ġeħova: Ġeħova qal lil Ħosea biex jiżżewweġ “mara li se tiżni.” (Ħos. 1:2) Għalkemm martu, Gomer, wilditlu iben, milli jidher iktar tard wildet żewġt itfal mhux minn taʼ Ħosea. Il-fatt li Ħosea kien lest li jaħfer lil martu wera l-ħniena kbira taʼ Ġeħova lejn Iżrael diżubbidjenti meta nidmu. (Ħos. 3:1; Rum. 9:22-26) Lesti aħna nwarrbu preferenzi persunali sabiex inxandru l-ħniena taʼ Ġeħova lin-nies taʼ kull xorta?—1 Kor. 9:19-23.
4. Liema huma xi sagrifiċċji li għandna mnejn nagħmlu għal Ġeħova?
4 Xi qaddejja taʼ Ġeħova ssagrifikaw karrieri li jrendu ħafna biex jiddedikaw iktar ħin għall-ministeru. Oħrajn baqgħu ma żżewġux jew mingħajr tfal biex jagħmlu iktar fis-servizz taʼ Ġeħova. Meta nimmeditaw dwar il-ħajja taʼ Ħosea, għandna mnejn naħsbu bejnna u bejn ruħna, ‘Jien qatt ma jirnexxili nagħmel bħalu.’ Madankollu, hekk kif jikber l-apprezzament tagħna għall-qalb tajba mhix mistħoqqa taʼ Ġeħova u nistrieħu fuq l-ispirtu qaddis tiegħu għas-saħħa, nistgħu nintużaw minnu b’modi li qatt ma ħsibna li kienu possibbli, eżatt bħalma ntuża Ħosea.—Mt. 19:26; Flp. 2:13.