Laqgħat għas-servizz tal-għalqa li jwettqu x-xogħol tagħhom

1. Xi skop għandha l-​laqgħa għas-​servizz tal-​għalqa?

¹ F’okkażjoni minnhom, Ġesù ltaqaʼ maʼ 70 mid-​dixxipli tiegħu qabel ma marru għal kampanja tal-​ippritkar. (Lq. 10:1-​11) Hu inkuraġġiehom billi fakkarhom li mhux se jkunu waħedhom u li kienu qed jiġu ggwidati minn “Sid il-​ħsad,” Ġeħova. Barra minn hekk, hu tahom l-​istruzzjonijiet li bihom ramahom biex jagħmlu x-​xogħol, u organizzahom “tnejn tnejn.” Illum, il-​laqgħat li jkollna qabel ma mmorru fil-​ministeru għandhom skop simili—biex jinkuraġġuna, jarmawna, u jorganizzawna.

2. Il-​laqgħa għas-​servizz tal-​għalqa kemm għandha tkun twila?

² Bħalissa, il-​laqgħa għas-​servizz tal-​għalqa ddum bejn 10 minuti u 15-​il minuta. Dan kien jinvolvi li jiġu organizzati l-​gruppi, li jiġi assenjat it-​territorju, u li tingħad talba. Issa dan se jinbidel. Minn April, laqgħa għas-​servizz tal-​għalqa għandha ddum bejn ħames u sebaʼ minuti. Madankollu, meta l-​laqgħa għas-​servizz issir wara l-​laqgħa tal-​kongregazzjoni, għandha ssir f’inqas ħin, ladarba dawk fl-​attendenza jkunu diġà bbenefikaw minn diskussjoni Skritturali. Minħabba li se jkun hemm laqgħat għas-​servizz tal-​għalqa iqsar, dan se jippermettilna nqattgħu iktar ħin fil-​ministeru. Apparti minn hekk, jekk pijunieri jew pubblikaturi jkunu bdew jippritkaw qabel il-​laqgħa għas-​servizz tal-​għalqa, ikollhom bżonn li jieqfu biss għal waqfa qasira mill-​ippritkar.

3. Il-​laqgħat għas-​servizz tal-​għalqa kif jistgħu jiġu organizzati b’tali mod li jkunu t’għajnuna kemm jistaʼ jkun għall-​pubblikaturi?

³ Il-​laqgħat għas-​servizz tal-​għalqa għandhom jiġu organizzati b’tali mod li jkunu t’għajnuna kemm jistaʼ jkun għall-​pubblikaturi. F’ħafna kongregazzjonijiet hu iktar taʼ vantaġġ għal gruppi tas-​servizz tal-​għalqa li jiltaqgħu separatament milli jiltaqgħu flimkien f’post wieħed. Dan jistaʼ jagħmilha iktar faċli għall-​pubblikaturi biex dak li jkun jasal għal-​laqgħa għas-​servizz tal-​għalqa u forsi anki għat-​territorju. Il-​pubblikaturi jistgħu jiġu organizzati malajr, u għandu mnejn ikun eħfef għall-​indokraturi tal-​gruppi biex jagħtu attenzjoni sew lil dawk fil-​grupp tagħhom. Il-​ġemgħa tal-​anzjani jistgħu jikkunsidraw iċ-​ċirkustanzi lokali u jaraw x’inhu l-​aħjar. Qabel ma l-​laqgħa tispiċċa b’talba qasira, kulħadd għandu jkun jaf fejn u maʼ min se jaħdem.

4. Il-​laqgħat għas-​servizz tal-​għalqa għala għandhom jitqiesu importanti daqs il-​laqgħat l-​oħra tal-​kongregazzjoni?

⁴ Importanti daqs il-​laqgħat l-​oħra tal-​kongregazzjoni: Minħabba li l-​laqgħat għas-​servizz tal-​għalqa jsiru għal benefiċċju taʼ dawk li jkunu ħerġin fil-​ministeru, għandu mnejn li ma jkunx hemm il-​membri tal-​kongregazzjoni kollha. Madankollu, dan ma jfissirx li għandhom jittieħdu ħafif ħafif jew jitqiesu mhux importanti daqs il-​laqgħat l-​oħra tal-​kongregazzjoni. Bħal-​laqgħat kollha tagħna, il-​laqgħat għas-​servizz tal-​għalqa huma provvediment minn Ġeħova biex inqanqlu lil xulxin għall-​imħabba u l-​għemejjel tajbin. (Ebr. 10:24, 25) Għaldaqstant, il-​ħu li jikkonduċi għandu jkun preparat sew ħalli d-​diskussjoni tonora lil Ġeħova u ħalli dawk fl-​udjenza jibbenefikaw. Jekk ikun prattiku, il-​pubblikaturi li jkunu se joħorġu fil-​ministeru għandhom jagħmlu sforz biex jattendu.

5. (a) X’inhu l-​irwol tal-​indokratur tas-​servizz f’li jagħmel arranġamenti għal-​laqgħat għas-​servizz tal-​għalqa? (b) Oħt kif għandha tikkonduċi laqgħa għas-​servizz tal-​għalqa?

⁵ Preparazzjoni mill-​ħu li jikkonduċi l-​laqgħa: Sabiex xi ħadd ikun preparat sew biex jagħmel il-​parti tiegħu f’laqgħa, ikollu bżonn jirċievi l-​inkarigu minn qabel. Dan japplika wkoll għal-​laqgħat għas-​servizz tal-​għalqa. Ovvjament, meta l-​gruppi għas-​servizz tal-​għalqa jiltaqgħu separatament, l-​indokraturi tal-​gruppi jew l-​assistenti tagħhom jikkonduċu l-​laqgħa għall-​grupp tagħhom. Madankollu, meta l-​gruppi kollha tal-​kongregazzjoni jiltaqgħu flimkien għal-​laqgħa għas-​servizz tal-​għalqa, l-​indokratur tas-​servizz għandu jassenja lil xi ħadd biex jikkonduċi. Xi indokraturi tas-​servizz jagħtu skeda lill-​aħwa kollha li jikkonduċu l-​laqgħa u jħalli kopja tal-​iskeda mwaħħla man-​notice board. L-​indokratur tas-​servizz għandu juża l-​għaqal meta jassenja lill-​aħwa li jikkonduċu l-​laqgħa. Jistaʼ jagħmel dan billi jżomm f’moħħu li l-​kwalità taʼ dawn il-​laqgħat tiddependi wkoll mill-​abbiltà taʼ kemm jaf jgħallem u jorganizza dak li jikkonduċi l-​laqgħa. Jekk m’hemm ebda anzjan, qaddej ministerjali, jew ħu mgħammed li jikkwalifika biex jiġi assenjat f’xi ġranet partikulari, l-​indokratur tas-​servizz għandu jassenja oħt mgħammda kapaċi biex tikkonduċi.—Ara l-​artiklu “Meta oħt ikollha tikkonduċi.”

6. Għala hu importanti li min hu inkarigat jipprepara sew?

⁶ Meta nirċievu inkarigu fl-​Iskola tal-​Ministeru Teokratiku jew fil-​Laqgħa tas-​Servizz, aħna niħduh bis-​serjetà u nippreparaw sew. Huma biss ftit minna li nħallu sakemm inkunu sejrin għal-​laqgħa biex nibdew naħsbu dwar dak li se ngħidu. Bl-​istess mod, sabiex l-​inkarigu għal laqgħa għas-​servizz tal-​għalqa jsir sew, m’għandniex inħalluh għall-​aħħar minuta. Issa li l-​laqgħa għas-​servizz tal-​għalqa se tkun iqsar, preparazzjoni tajba hi importanti iktar mis-​soltu biex il-​laqgħa tkun taʼ ġid u tispiċċa fil-​ħin. Preparazzjoni tajba tinkludi wkoll li jinkiseb biżżejjed territorju bil-​quddiem.

7. X’inhuma xi affarijiet li l-​ħu li jikkonduċi jistaʼ jiddiskuti?

⁷ Dak li jistaʼ jiġi diskuss: Ladarba ċ-​ċirkustanzi jvarjaw minn territorju għal ieħor, l-​ilsir leali ma jagħtix outline għal kull laqgħa għas-​servizz tal-​għalqa. Il-​kaxxa “Matul il-​laqgħa għas-​servizz tal-​għalqa, tistaʼ tikkunsidra” tagħti xi suġġerimenti. Normalment, il-​laqgħa tkun f’forma taʼ diskussjoni. Kultant, tistaʼ ssir turija ppreparata sew jew jintwera vidjow addattat mill-​Websajt jw.org. Meta jipprepara għal-​laqgħa għas-​servizz tal-​għalqa, il-​ħu li jikkonduċi għandu jaħseb dwar x’se jinkuraġġixxi u kif se jarma lil dawk li ħerġin fil-​ministeru dakinhar.

8. X’tistaʼ tkun l-​aħjar ħaġa biex tiġi diskussa matul il-​laqgħat għas-​servizz tal-​għalqa nhar taʼ Sibt u Ħadd?

⁸ Pereżempju nhar taʼ Sibt, il-​maġġorparti tal-​pubblikaturi joffru It-​Torri tal-​Għassa u Stenbaħ! Ħafna minn dawk li joħorġu fil-​ministeru nhar taʼ Sibt ma joħorġux matul il-​ġimgħa, allura għandhom mnejn isibuha diffiċli biex jiftakru l-​preżentazzjoni li jkunu pprattikaw matul il-​lejla tal-​Qima Bħala Familja. Għaldaqstant, għandu mnejn ikun aħjar għal ħu li jkun qed jikkonduċi li jirrivedi wieħed mill-​eżempji taʼ preżentazzjonijiet mill-​aħħar paġna tal-​Ministeru tas-​Saltna. Għażliet oħra jinkludu li jiddiskuti kif l-​aħwa jistgħu jsemmu aħbar, ġrajja, jew festa lokali fi preżentazzjoni għal rivista. Inkella jistaʼ jiddiskuti x’jistaʼ jingħad lill-​inkwilin biex ikun jaf x’se jiġi diskuss fiż-​żjara li jkun imiss f’każ li jaċċetta r-​rivisti. Jekk xi wħud fil-​laqgħa għas-​servizz tal-​għalqa diġà jkunu qed joffru r-​rivisti taʼ dak ix-​xahar, il-​ħu li jkun qed jikkonduċi jistaʼ jsaqsihom biex jagħtu s-​suġġerimenti tagħhom fil-​qosor jew biex jirrakkontaw esperjenzi li jinkuraġġixxu. Nhar taʼ Ħadd, il-​ħu li jikkonduċi jistaʼ jagħżel li jagħmel xi ħaġa simili bl-​offerta tax-​xahar. Pubblikazzjonijiet għall-​istudju, bħall-​browxers Aħbar Tajba u Ismaʼ Minn Alla u l-​ktieb Il-​Bibbja X’Tgħallem? jistgħu jiġu offruti fi kwalunkwe ġurnata, u allura l-​ħu li jikkonduċi f’laqgħa għas-​servizz jistaʼ (ikompli f’paġna 9) jikkunsidra fil-​qosor kif waħda minn dawn il-​pubblikazzjonijiet tistaʼ tiġi offruta.

9. X’jistaʼ jiġi diskuss fi tmiem il-​ġimgħa waqt kampanja speċjali?

⁹ Jekk il-​kongregazzjoni tkun qed tieħu sehem f’kampanja speċjali fi tmiem il-​ġimgħa, dak li jikkonduċi jistaʼ jikkunsidra kif jistgħu jiġu offruti r-​rivisti kurrenti flimkien mal-​invit jew il-​fuljett, jew jistaʼ jagħżel li jiddiskuti x’jistaʼ jsir jekk l-​inkwilin juri interess. Għażla oħra tistaʼ tkun li jirrakkonta esperjenza li tenfasizza l-​valur taʼ kampanji bħal dawn.

10, 11. Il-​preparazzjoni mill-​pubblikaturi għala hi importanti biex il-​laqgħa għas-​servizz tal-​għalqa tkun taʼ suċċess?

¹⁰ Preparazzjoni mill-​pubblikaturi: Anki l-​pubblikaturi għandhom sehem f’li jagħmlu l-​laqgħa għas-​servizz tal-​għalqa waħda taʼ suċċess. Billi jippreparaw bil-​quddiem għas-​servizz, forsi matul il-​qima bħala familja, huma jkollhom xi ħaġa x’jirrakkontaw lil pubblikaturi oħra. Preparazzjoni tajba tinkludi wkoll li jkollhom ammont taʼ rivisti u letteratura qabel jaslu l-​laqgħa għas-​servizz tal-​għalqa ħalli kulħadd ikun jistaʼ jitlaq għat-​territorju mingħajr telf taʼ żmien.

¹¹ Huwa importanti wkoll li nippjanaw li naslu għal-​laqgħa għas-​servizz tal-​għalqa ftit minuti qabel tibda. Naturalment, għandna nagħmlu sforz li nkunu fil-​ħin għal-​laqgħat kollha tal-​kongregazzjoni. Madankollu, jistaʼ jkun taʼ tfixkil kbir meta naslu tard għal-​laqgħa għas-​servizz tal-​għalqa. Kif? Il-​ħu li jkun qed jieħu t-​tmexxija jikkunsidra diversi fatturi qabel ma jorganizza l-​grupp. Jekk ikun hemm ftit pubblikaturi, għandu mnejn jibgħat lil kulħadd f’territorju li diġà jkun inbeda. Jekk xi wħud ikunu mxewha għal-​laqgħa għas-​servizz tal-​għalqa u t-​territorju jkun ’il bogħod, għandu mnejn jassenja lil dawn il-​pubblikaturi maʼ dawk li jkollhom karozza. Jekk it-​territorju fih żona magħrufa għall-​kriminalità, għandu mnejn jassenja aħwa rġiel biex jaħdmu maʼ jew viċin gruppi t’aħwa nisa. Pubblikaturi b’saħħa batuta għandhom mnejn jiġu assenjati biex jagħmlu toroq li jkunu bla tlajjaʼ u nżul jew li għandhom djar bi ftit taraġ. Pubblikaturi iktar ġodda jistgħu jiġu assenjati m’oħrajn t’iktar esperjenza. Imma, jekk xi pubblikaturi jiġu tard, l-​arranġamenti spiss ikollhom jitbiddlu jew isiru mill-​ġdid minħabba fihom. Ovvjament, għandu mnejn li kultant ikollna raġuni valida għala naslu tard. Madankollu, jekk ikollna d-​drawwa li nkunu tard, ikun tajjeb li nsaqsu lilna nfusna jekk hux minħabba nuqqas t’apprezzament għal-​laqgħat għas-​servizz tal-​għalqa jew hux minħabba li nonqsu li norganizzaw l-​affarijiet personali tagħna bil-​quddiem.

12. Jekk normalment tagħmel l-​arranġamenti tiegħek tas-​servizz, x’tistaʼ tikkunsidra?

¹² Il-​pubblikaturi li jiltaqgħu għas-​servizz jistgħu jagħżlu li jagħmlu l-​arranġamenti tagħhom stess qabel ma tibda l-​laqgħa jew jitolbu li xi ħadd jiġi assenjat magħhom. Jekk normalment tagħmel l-​arranġamenti tiegħek, tistaʼ ‘twessaʼ qalbek’ billi taħdem maʼ pubblikaturi differenti minflok taħdem mal-​istess erbat iħbieb kull darba? (2 Kor. 6:11-​13) Tistaʼ kultant tirranġa biex taħdem maʼ pubblikatur iktar ġdid biex tgħinu jtejjeb l-​abbiltà tat-​tagħlim tiegħu? (1 Kor. 10:24; 1 Tim. 4:13, 15) Ismaʼ sew kull istruzzjoni li tkun qed tingħatalek, inkluż minn fejn se tibda tipprietka. Meta tispiċċa l-​laqgħa, evita li tbiddel l-​arranġamenti u mur fit-​territorju mill-​ewwel.

13. Jekk dawk kollha involuti jkunu attenti u jagħmlu l-​parti tagħhom, il-​laqgħat għas-​servizz tal-​għalqa kif se jkunu taʼ benefiċċju għalina?

¹³ Wara l-​ippritkar, is-​70 li Ġesù organizza għall-​ministeru “ġew lura ferħanin.” (Lq. 10:17) Bla dubju, il-​fatt li Ġesù ltaqaʼ magħhom u kellimhom qabel marru jippritkaw għenhom biex ikunu taʼ suċċess. Illum, il-​laqgħat għas-​servizz tal-​għalqa jistgħu jħallu effett simili. Jekk dawk kollha involuti jkunu attenti u jagħmlu l-​parti tagħhom, il-​laqgħat għas-​servizz tal-​għalqa se jinkuraġġuna, jarmawna, u jorganizzawna biex inwettqu x-​xogħol tagħna taʼ li nagħtu “xiehda lill-​ġnus kollha.”—Mt. 24:14.