Kaxxa għall-Mistoqsija
◼ Liema informazzjoni għandha tingħata fil-laqgħat għas-servizz taʼ l-għalqa?
L-iskop tal-laqgħat għas-servizz taʼ l-għalqa huwa li dawn jgħinuna nikkonċentraw fuq l-attività li tkun ġejja—il-ministeru. Għalhekk, dak li jikkonduċi għandu jkun preparat sew u lest li jgħaddi maʼ dawk preżenti xi ħaġa taʼ inkuraġġiment, speċifika, u prattika. Jekk l-iskrittura tal-jum ikollha x’taqsam direttament maʼ l-attività taʼ l-ippridkar, tistaʼ tinqara u tiġi diskussa fil-qosor. Madankollu, il-laqgħa għandha l-ewwelnett tikkonċentra fuq ix-xogħol li se jkun se jsir ftit wara. Għandha tgħin lil dawk kollha li se jmorru jagħtu xiehda biex ikunu preparati aħjar ħalli jaqdu sew il-ministeru dakinhar.—2 Tim. 4:5.
Punti li jistgħu jiġu applikati mill-Ministeru tas-Saltna jistgħu jiġu diskussi biex jiġbdu l-attenzjoni taʼ kulħadd lejn l-offerta kurrenti u kif din tistaʼ tkun preżentata. Fil-Ġurnata tar-Rivisti tistaʼ tintwera preżentazzjoni minn “X’Nistgħu Ngħidu dwar ir-Rivisti.” Għal kampanji oħrajn, tistaʼ tinġibed l-attenzjoni lejn introduzzjoni jew tnejn mill-ktieb Kif Nibdew u Nkomplu Diskussjonijiet Fuq Il-Bibbja li huma addattati għat-territorju lokali. Tistaʼ ssir diskussjoni jew turija dwar aspett wieħed tal-ministeru, bħal per eżempju kif tintuża l-Bibbja fil-bieb, x’għandu jingħad lil xi ħadd li jkun irid iwaqqaf il-konversazzjoni, kif jiġi offrut studju tal-Bibbja, jew kif issir żjara lura fejn jinstab l-interess.
Il-laqgħat għas-servizz m’għandhomx idumu iktar minn 10 sa 15-il minuta, u dan il-ħin għandu jinkludi l-arranġament tal-gruppi, it-tqassim tat-territorju, u talba. Meta jsir il-ħin li jkunu jistgħu jitilqu, dawk kollha li jkunu preżenti għandhom ikunu jafu maʼ min u fejn se jaħdmu, u għandhom imorru għal fuq it-territorju fil-pront. Minħabba li l-laqgħa hija qasira, huwa importanti li kulħadd jasal fil-ħin. Meta l-laqgħa għas-servizz issir eżatt wara xi laqgħa tal-kongregazzjoni, bħal per eżempju wara l-istudju tat-Torri taʼ l-Għassa, din għandha tkun iqsar. M’hemmx għalfejn tiġi diskussa l-iskrittura tal-jum, peress li l-aħwa jkunu għadhom kif gawdew diskussjoni Skritturali mill-aqwa.
Aħwa rġiel mgħammdin kwalifikati għandhom jingħataw l-inkarigu minn qabel sabiex jikkonduċu kull laqgħa għas-servizz. Jekk ma jkun hemm ħadd disponibbli biex imexxi l-laqgħa f’ġurnata partikulari, l-anzjani għandhom jagħżlu aħwa nisa mgħammdin li jistgħu jagħmlu dan meta jkun hemm bżonn. Filwaqt li tibqaʼ bil-qiegħda, l-oħt tistaʼ tagħti bidu għal diskussjoni bejn il-grupp dwar l-iskrittura tal-jum jew punti oħra li għandhom x’jaqsmu mas-servizz taʼ l-għalqa, u għandha żżomm il-kummenti tagħha fil-qosor. Għandha tilbes għata fuq rasha.
Il-laqgħat għas-servizz taʼ l-għalqa huma opportunitajiet mill-aqwa biex niġu inkuraġġiti u nkunu mgħammrin sabiex nagħtu sehemna fil-ministeru. Iktar ma jkun preparat dak li jikkonduċi, iktar se jibbenefika kulħadd.