Għallem bil-browxer Aħbar Tajba
1. Il-browxer Aħbar Tajba kif ġie ddisinjat?
1 Bħalma ġie diskuss fil-ħarġa taʼ Lulju tal-Ministeru tas-Saltna, għodda importanti fil-kaxxa tal-għodda tagħna hu l-browxer Aħbar Tajba Mingħand Alla! Hemm xi skritturi li mhumiex kwotati. Dan sar ħalli l-inkwilini jkunu jistgħu jieħdu pjaċir jitgħallmu direttament mill-Bibbja nfisha. Għalkemm ħafna mill-pubblikazzjonijiet tagħna għall-istudju huma miktubin b’tali mod li l-qarrej jistaʼ jitgħallem waħdu, dan il-browxer ġie ddisinjat b’tali mod biex ikun hemm diskussjoni maʼ għalliem. Għaldaqstant, meta noffruh, għandna nipprovaw nuru kif isir l-istudju ħalli l-inkwilin ikun jistaʼ jara kemm ikun eċċitanti li jitgħallem l-aħbar tajba mill-Bibbja.—Mt. 13:44.
2. Kif nistgħu nużaw il-browxer Aħbar Tajba fl-ewwel żjara?
2 Fl-ewwel żjara: Forsi tistaʼ tgħid: “Qed inżur in-nies għax huma kkonċernati dwar il-futur tal-bniedem. Taħseb li xi darba l-kundizzjonijiet se jmorru għall-aħjar? [Agħti ċans għal tweġiba.] Il-Bibbja fiha aħbar tajba li tistaʼ ttina tama. Hawnhekk se ssib xi mistoqsijiet li l-Bibbja twieġeb.” Agħti l-browxer lill-inkwilin, u stiednu jagħżel mistoqsija mill-qoxra taʼ wara. Imbagħad uri kif isir l-istudju permezz tal-ewwel paragrafu tal-lezzjoni. Għażla oħra hi li ssaqsi l-inkwilin mistoqsija li tqajjem interess ibbażata fuq lezzjoni li tagħżel int, u mbagħad uri kif il-browxer jistaʼ jgħinu jsib it-tweġiba tal-Bibbja. Jekk dik il-lezzjoni għandha vidjow li jaqbel għal magħha fuq il-jw.org, xi pubblikaturi juru dan il-vidjow matul il-preżentazzjoni tagħhom.
3. Spjega kif tistaʼ tikkonduċi studju billi tuża l-browxer Aħbar Tajba.
3 Kif tikkonduċi studju: (1) Aqra l-mistoqsija printjata b’tipa grassa biex tgħin lill-inkwilin jiffoka fuq il-punt prinċipali. (2) Aqra l-paragrafu li jkun imiss. (3) Aqra l-iskritturi li qegħdin fil-korsiv, u uża mistoqsijiet bit-tattika biex tgħin lill-inkwilin jifhem kif l-iskritturi jwieġbu l-mistoqsija. (4) Jekk ikun hemm paragrafu ieħor taħt il-mistoqsija, irripeti t-tieni u t-tielet pass. Jekk hemm vidjow li jaqbel mal-mistoqsija u għadek ma wrejtux lill-inkwilin, agħmel dan f’xi ħin waqt id-diskussjoni. (5) Fl-aħħar, itlob lill-inkwilin biex iwieġeb il-mistoqsija b’tipa grassa ħalli tagħmel ċert li l-inkwilin ikun fehem.
4. X’se jgħinna nużaw din l-għodda prezzjuża bis-sengħa?
4 Sir familjari maʼ din l-għodda prezzjuża. Użaha f’kull okkażjoni addattata. Qabel kull studju, aħseb dwar l-istudent u l-aħjar mod kif tistaʼ tirraġuna miegħu, billi tuża l-iskritturi tal-lezzjoni. (Prov. 15:28; Atti 17:2, 3) Hekk kif tikseb l-esperjenza u ssir tas-sengħa, jistaʼ jkun li tibda tqis dan il-browxer bħala wieħed mill-għodod favoriti tiegħek biex tużah ħalli tgħallem lin-nies il-verità!