Kif Tuża Aħbar Tajba Mingħand Alla!

Browxer Ġdid Disinjat Biex Jgħinna Nagħmlu Żjajjar Lura u Nibdew Studji tal-​Bibbja

1. Liema browxer ġdid li ħareġ fil-​Konvenzjoni Distrettwali “Ħares lil Qalbek!” hu disinjat biex jgħinna nagħmlu żjajjar lura u nibdew studji tal-​Bibbja?

¹ Matul il-​Konvenzjoni Distrettwali “Ħares lil Qalbek!” konna eċċitati meta rċivejna browxer ġdid li se jgħinna nagħmlu żjajjar lura u nibdew studji tal-​Bibbja. Aħbar Tajba Mingħand Alla! jieħu post il-​browxer X’Jirrikjedi. Imma bħal dan il-​browxer, il-​lezzjonijiet huma qosra. Dan se jgħinna nużaw il-​browxer b’mod effettiv biex nibdew studji tal-​Bibbja fuq l-​għatba tal-​bieb. Madanakollu, filwaqt li l-​browxer X’Jirrikjedi kien jiddiskuti l-​ħtiġijiet li huma mistennijin mill-​Kristjani u li jistgħu jkunu taʼ sfida biex jaċċettawhom studenti ġodda, dan il-​browxer ġdid jiffoka fuq l-​aħbar tajba li nsibu fil-​Bibbja.—Atti 15:35.

2. Għala ġie disinjat il-​browxer Aħbar Tajba?

² Għala ġie disinjat? Aħwa minn madwar id-​dinja ilhom jitolbu għal xi ħaġa sempliċi li tattira lin-​nies lejn il-​verità u li twassal għall-​ktieb Il-​Bibbja X’Tgħallem?, l-​għodda primarja tagħna għall-​istudji tal-​Bibbja. Nies li jżommu lura meta jaraw ktieb sikwit ikunu iktar lesti li jistudjaw il-​Bibbja permezz taʼ browxer. Minbarra dan, hu eħfef li tittraduċi browxer f’għadd kbir taʼ lingwi.

3. Dan il-​browxer kif inhu differenti minn pubblikazzjonijiet oħra li jintużaw għal studju?

³ Kif Ġie Disinjat: Ħafna mill-​pubblikazzjonijiet tagħna li jintużaw għall-​istudju huma miktubin b’tali mod li wieħed ikun jistaʼ jaqrahom u jifhimhom anke mingħajr għajnuna. Din il-​pubblikazzjoni hi differenti. Inkitbet bħala gwida biex isir studju tal-​Bibbja minn għalliem. Għalhekk, meta toffri l-​browxer lil xi ħadd, ikun aħjar li tiddiskuti xi żewġ paragrafi. Il-​paragrafi huma qosra, u allura jistgħu jiġu kunsidrati fuq l-​għatba tal-​bieb jew fuq il-​post tax-​xogħol taʼ dak li jkun. Filwaqt li hu tajjeb li tibda mill-​1 lezzjoni, tistaʼ tibda l-​istudju kważi minn kwalunkwe lezzjoni tal-​browxer.

4. Il-​browxer kif jgħinna ngħallmu direttament mill-​Bibbja?

⁴ F’ħafna mill-​pubblikazzjonijiet tagħna, it-​tweġibiet għall-​mistoqsijiet stampati jinsabu fil-​paragrafi. Madanakollu, f’din il-​pubblikazzjoni, it-​tweġibiet jinsabu l-​aktar fil-​Bibbja. Il-​biċċa l-​kbira min-​nies jippreferu jitgħallmu mill-​Bibbja milli mil-​letteratura tagħna. Għaldaqstant, hemm tassew ftit skritturi kwotati. Dawn għandhom jinqraw mill-​Bibbja stess. Dan jgħin lill-​istudenti jirrealizzaw li dak li qed jitgħallmu ġej minn Alla.—Is. 54:13.

5. Għala hu importanti li l-​għalliem ikun preparat sew għal kull studju?

⁵ Il-​browxer ma jispjegax l-​iskritturi kollha. Għala? Hu disinjat biex iħeġġeġ lill-​istudent jistaqsi mistoqsijiet u jħalli lill-​għalliem juża l-​abbiltà tiegħu li jgħallem. Għalhekk, hu importanti li tkun preparat sew għal kull studju. Kelma taʼ twissija: Titkellimx wisq. Hi l-​għaxqa tagħna li nispjegaw l-​Iskrittura. Imma spiss nagħmlu iktar ġid meta nistiednu lill-​istudent jispjega x’jaħseb li tkun tfisser l-​iskrittura. Jekk nużaw il-​mistoqsijiet bit-​tattika nistgħu ngħinuh jifhem xi tfisser kull skrittura.—Atti 17:2.

6. Kif nistgħu nużaw il-​browxer: (a) meta n-​nies ikunu xettiċi dwar Alla u l-​Bibbja? (b) fil-​ministeru minn dar għal dar? (ċ) biex nibdew studji tal-​Bibbja bil-​metodu dirett? (d) meta nagħmlu żjajjar lura?

⁶ Bħal pubblikazzjonijiet oħra li nużaw għall-​istudji, dan il-​browxer tistaʼ toffrih meta trid, tkun xi tkun l-​offerta tax-​xahar. Ħafna se jieħdu pjaċir joffruh billi jużaw il-​metodu dirett biex jibdew studji tal-​Bibbja fuq l-​għatba tal-​bieb. Minbarra hekk, kif issemma fil-​konvenzjoni distrettwali, jekk nużawh meta nerġgħu nżuru lil dawk li jkunu wrew interess “żgur li se jagħmel ix-​xogħol taż-​żjajjar lura interessanti!”—Ara l-​kaxxi f’paġni 5-​7.

7. Kif tistaʼ tikkonduċi studju tal-​Bibbja permezz tal-​browxer?

⁷ Kif Tikkonduċi l-​Istudju: Nistgħu nibdew id-​diskussjoni billi naqraw il-​mistoqsija b’tipa grassa li għandha numru ħdejha. Imbagħad aqra l-​paragrafu u l-​iskrittura/i bil-​korsiv. Uża mistoqsijiet bit-​tattika biex tgħin lill-​inkwilin jifhem xi jfissru l-​iskritturi. Imbagħad, qabel ma tgħaddi għas-​sezzjoni li jkun imiss, itlob lill-​inkwilin iwieġeb il-​mistoqsijiet b’tipa grassa ħalli tkun ċert li qed jifhem. Matul l-​ewwel ftit żjajjar, x’aktarx li jkun aħjar jekk tiddiskuti mistoqsija waħda biss. Maż-​żmien, forsi jkun possibbli li ttawwal id-​diskussjonijiet ħalli tkopri lezzjoni sħiħa.

8. Kif għandna nintroduċu l-​iskritturi, u għala?

⁸ L-​iskritturi ċitati li qabilhom hemm il-​kelma “aqra” huma dawk li jwieġbu bl-​aħjar mod il-​mistoqsija b’tipa grassa. Meta tintroduċi skrittura, tgħidx, “l-​appostlu Pawlu kiteb” jew, “Ara x’bassar Ġeremija.” Jekk nagħmlu hekk, l-​inkwilin forsi jaħseb li qed naqraw il-​kliem taʼ sempliċi bnedmin. Ikun aħjar li tgħid, “Il-​Kelma t’Alla tgħid” jew, “Ara x’bassret il-​Bibbja.”

9. Għandna naqraw l-​iskritturi ċitati kollha?

⁹ Għandna aħna naqraw l-​iskritturi ċitati kollha jew dawk biss li għandhom miktub “aqra” qabilhom? Imxi skont iċ-​ċirkustanzi. L-​iskritturi kollha qegħdin hemm għal raġuni. Kull skrittura fiha informazzjoni li hi taʼ min jiddiskutiha. Imma f’xi każi, minħabba l-​interess, l-​abbiltà tal-​qari, kif ukoll l-​ammont taʼ ħin li għandu disponibbli l-​istudent, ikollna naqraw biss l-​iskritturi li għandhom miktub “aqra” qabilhom.

10. Meta nistgħu naqilbu għall-​ktieb Il-​Bibbja X’Tgħallem?

¹⁰ Meta Għandek Taqleb għall-​Ktieb Il-​Bibbja X’Tgħallem?: Wara diversi diskussjonijiet u la nkunu qbadna rutina tajba, nistgħu jew naqilbu għall-​ktieb Il-​Bibbja X’Tgħallem? jew inkella nkomplu bil-​browxer Aħbar Tajba sakemm inlestuh. Il-​pubblikaturi jistgħu jużaw l-​għaqal biex jiddeċiedu meta għandhom jaqilbu għall-​ktieb. Meta naqilbu għall-​ktieb Il-​Bibbja X’Tgħallem?, bilfors irridu nibdew mill-​bidu? M’hemm l-​ebda regola dwar dan. Kull persuna hi differenti. Imma, il-​maġġoranza tal-​istudenti se jibbenefikaw jekk jerġgħu jgħaddu l-​istess suġġett b’iktar dettall fil-​ktieb Il-​Bibbja X’Tgħallem?

11. Għala għandna nużaw tajjeb dan il-​browxer ġdid?

¹¹ F’dinja fejn rari tismaʼ aħbar tajba, aħna għandna l-​privileġġ li niddikjaraw l-​aqwa aħbar possibbli—li s-​Saltna t’Alla bħalissa qed taħkem u li dalwaqt se ġġib dinja ġdida fejn jgħammar is-​sewwa! (Mt. 24:14; 2 Pt. 3:13) Aħna fiduċjużi li ħafna minn dawk li jisimgħu dan il-​messaġġ se jidwu dan il-​kliem imnebbaħ: “Kemm huma sbieħ fuq il-​muntanji saqajn dak li qed iġib aħbar tajba, dak li qed ixandar il-​paċi, dak li qed iġib aħbar tajba taʼ xi ħaġa aħjar, dak li qed ixandar is-​salvazzjoni, dak li qed jgħid lil Sijon: ‘Alla tiegħek sar sultan!’” (Is. 52:7) Ejja nużaw dan il-​browxer ġdid biex inwasslu l-​aħbar tajba mingħand Alla lil dawk bl-​għatx fit-​territorju tagħna!

[Kaxxa f’paġna 5]

Meta n-​Nies Ikunu Xettiċi Dwar Alla u l-​Bibbja:

● F’xi nħawi, il-​pubblikaturi sabu li meta jgħidu “Alla” jew “Bibbja,” in-​nies jaqtgħulhom il-​konversazzjoni. F’dan il-​każ, fl-​ewwel żjara jistaʼ jkun aħjar jekk tiddiskuti suġġetti li n-​nies fl-​inħawi jkunu konċernati dwarhom, bħal pereżempju, il-​bżonn li kulħadd ikollu impjieg, fejn tistaʼ ssib għajnuna prattika għall-​familji, u x’hemm lest għalina fil-​futur. Forsi nistgħu nintroduċu l-​browxer Aħbar Tajba wara li nkunu tkellimna mal-​inkwilin diversi drabi ħalli nikkunsidraw kif nafu li Alla jeżisti u għala l-​Bibbja hi taʼ min joqgħod fuqha.

[Kaxxa f’paġna 6]

Meta Mmorru Minn Dar Għal Dar:

● “Illum ġejt biex nurik kemm hu faċli li ssir taf x’inhu l-​iskop t’Alla għall-​futur tal-​umanità. Ġieli ħsibt dwar jekk Alla qatt hux se jeħlisna mit-​tbatija? [Agħti ċans għal tweġiba.] Dan il-​browxer juri fejn tistaʼ ssib it-​tweġiba għal din il-​mistoqsija fil-​Bibbja. [Agħtih browxer, u aqra l-​ewwel paragrafu fl-​1 lezzjoni, kif ukoll Ġeremija 29:11.] Minn dan li qrajna, jidher raġunevoli għalik li Alla jixtieq li jkollna futur aħjar? [Agħti ċans għal tweġiba.] Jekk trid, tistaʼ żżomm din il-​kopja. Id-​darba li jmiss, nistgħu nikkunsidraw it-​tieni paragrafu biex insibu t-​tweġiba tal-​Bibbja għal din il-​mistoqsija, ‘Alla kif se jeħles lill-​umanità minn dak li jikkaġuna t-​tbatija?’” Jekk jidher li l-​inkwilin għandu iktar ħin fl-​ewwel żjara, forsi tistaʼ taqra u tiddiskuti t-​tieni paragrafu u t-​tliet skritturi li hemm miegħu. Ftiehem biex terġaʼ tgħaddi ħalli tiddiskutu t-​tieni mistoqsija f’dik il-​lezzjoni.

● “Ħafna nies iħobbu jitolbu, speċjalment meta jkunu għaddejjin minn xi problemi. Inti ġieli titlob? [Agħti ċans għal tweġiba.] Taħseb li Alla jismaʼ kull tip taʼ talb, jew taħseb li hemm xi talb li ma jogħġbux? [Agħti ċans għal tweġiba.] Għandi browxer hawnhekk li juri kif issib it-​tweġiba tal-​Bibbja għal dawn il-​mistoqsijiet. [Agħtih kopja, u kkunsidraw flimkien l-​ewwel paragrafu f’lezzjoni 12 u l-​iskritturi li għandhom miktub “aqra.”] Mhijiex xi ħaġa meraviljuża li Alla lest li jagħtina widen? Imma biex nibbenefikaw bis-​sħiħ mit-​talb, jeħtieġ li nkunu nafu lil Alla sew. [Dur lejn it-​2 lezzjoni, u urih is-​sottitli.] Jekk trid, nistaʼ nħallilek dan il-​browxer, u darb’oħra nistgħu naqraw it-​tweġibiet tal-​Bibbja għal dawn il-​mistoqsijiet affaxxinanti.”

● “Jien qiegħed hawnhekk għax in-​nies huma konċernati dwar x’qed jiġri fid-​dinja. Taħseb li xi darba l-​affarijiet għad jitjiebu? [Agħti ċans għal tweġiba.] Ħafna nies jibqgħu sorpriżi meta jitgħallmu li l-​Bibbja fiha aħbar tajba li toffrilna tama. Dawn huma ftit mill-​mistoqsijiet li l-​Bibbja twieġeb.” Agħtih browxer, u stiednu jagħżel mistoqsija li tinteressah l-​iktar mill-​qoxra taʼ wara. Imbagħad sib il-​lezzjoni, u uri kif isir studju. Irranġa biex terġaʼ żżuru ħalli tikkunsidraw il-​mistoqsija li jmiss f’dik il-​lezzjoni.

[Kaxxa f’paġna 7]

Ipprova l-​Metodu Dirett:

● “Qed inżurek biex ngħidlek dwar kors ġdid taʼ studju tal-​Bibbja. Dan il-​browxer għandu 15-​il lezzjoni li juru fejn tistaʼ ssib tweġibiet fil-​Bibbja tiegħek għal mistoqsijiet vitali. [Urih il-​qoxra taʼ quddiem u taʼ wara.] Ġieli pprovajt tifhem il-​Bibbja? [Agħti ċans għal tweġiba.] Ħa nurik kemm huma ħfief il-​lezzjonijiet. [Iddiskuti l-​ewwel paragrafu tat-​tielet mistoqsija f’lezzjoni 3, u aqra Rivelazzjoni 21:4, 5. Jekk jippermetti l-​ħin, iddiskuti l-​paragrafu u l-​iskritturi li jkollhom “aqra” quddiemhom li jmiss.] Jekk trid, nistaʼ nħallilek dan il-​browxer. Nissuġġerixxu li tipprova dan l-​istudju tal-​Bibbja mqar darba. Jekk tieħu gost tistaʼ tkompli bl-​istudju. Id-​darba li jmiss nistgħu niddiskutu l-​ewwel lezzjoni. Innota li fiha paġna waħda biss.”

[Kaxxa f’paġna 7]

Offrih fi Żjara Lura:

● Meta nerġgħu nżuru lil xi ħadd li jkun wera interess, nistgħu ngħidu: “Qed nieħu pjaċir nerġaʼ narak. Ġibtlek dan il-​browxer li jagħti t-​tweġiba tal-​Bibbja għal ħafna mistoqsijiet interessanti. [Agħtih browxer, u stiednu jħares lejn il-​qoxra taʼ wara.] Liema minn dawn is-​suġġetti jinteressak l-​iktar? [Agħti ċans għal tweġiba. Imbagħad sib il-​lezzjoni li jagħżel.] Ħa nurik kif tistaʼ tuża dan il-​browxer biex issib it-​tweġiba tal-​Bibbja.” Uri kif isir studju billi tiddiskuti xi żewġ paragrafi u l-​iskritturi li għandhom “aqra” quddiemhom. Għadek kif bdejt studju tal-​Bibbja! Ħalli l-​browxer mal-​inkwilin, u rranġa biex terġaʼ żżuru. Meta tlesti l-​lezzjoni, tistaʼ tiddiskuti lezzjoni oħra magħżula mill-​inkwilin jew inkella tistaʼ tibda mill-​bidu tal-​browxer.