Intejbu l-abbiltajiet tagħna fil-ministeru—Nibdew konversazzjonijiet li jistgħu jwasslu biex nagħtu xhieda

Ġesù setaʼ jagħti xhieda informali lil mara Samaritana għax hu beda konversazzjoni magħha. Aħna kif nistgħu ntejbu l-​abbiltà tagħna f’li nibdew konversazzjonijiet maʼ nies li ma nafuhomx?

• Kun dħuli u tkellem man-​nies. Għalkemm kien għajjien, Ġesù beda konversazzjoni billi sempliċiment talabha ttih jixrob. Mela int tistaʼ tibda billi ssellem lil dak li jkun u mbagħad forsi tgħid xi ħaġa fuq it-​temp jew xi ħaġa fuq ġrajja kurrenti. Ftakar, l-​ewwel mira tiegħek hi li sempliċiment tibda konversazzjoni, allura tkellem fuq kwalunkwe suġġett li taħseb li ħa jinteressa lill-​persuna. Jekk ma tkomplix miegħek, ma tkun tlift xejn. Erġaʼ pprova maʼ xi ħadd ieħor. Itlob lil Ġeħova għall-​kuraġġ.—Ne 2:4; At 4:29.

• Oqgħod attent għal opportunità biex tintroduċi l-​aħbar tajba, imma tgħaġġilx biex tidħol fuq is-​suġġett. Ħalli l-​konversazzjoni tkompli b’mod naturali. Jekk ma tagħmilx hekk, jistaʼ jkun li l-​persuna ma tħosshiex komda u ma tkomplix titkellem miegħek. Tiddiżappuntax ruħek jekk il-​konversazzjoni tieqaf qabel ma tkun tajt xhieda. Jekk il-​ħsieb li tintroduċi l-​aħbar tajba jbeżżgħek, ipprova ibda konversazzjonijiet mingħajr ma jkollok f’moħħok il-​mira taʼ li tagħti xhieda. [Uri u ddiskuti l-​1 vidjow.]

• Ipprova oħloq opportunità biex tagħti xhieda billi tgħid xi ħaġa mill-​qalb dwar il-​fidi tiegħek li tistaʼ ġġiegħel lill-​persuna titolbok spjegazzjoni. Ġesù qal affarijiet li qajmu l-​interess, u l-​mara bdiet tistaqsi l-​mistoqsijiet. Meta eventwalment tkellem dwar l-​aħbar tajba, hu kien sempliċiment qed iwiġbilha l-​mistoqsijiet tagħha. [Uri u ddiskuti t-​2 vidjow, u wara uri u ddiskuti t-​3 vidjow.]