X’Inhu Tajjeb u Ħażin: Deċiżjoni li Għandek Tieħu
Kif nagħżlu li ngħixu ħajjitna se jeffettwa jekk inkunux ferħanin jew le. Alla Ġeħova jafu dan, u għalhekk iridna nobdu dak li tgħid il-Bibbja.
Ġeħova jridna nkunu ferħanin u jkollna l-paċi f’ħajjitna.
“Jien, Ġeħova, jien Alla tiegħek, li ngħallmek għall-ġid tiegħek, li mmexxik fit-triq li għandek timxi. O li kieku fil-fatt tagħti kas il-kmandamenti tiegħi! Imbagħad il-paċi tiegħek tkun bħal xmara, u s-sewwa tiegħek bħall-mewġ tal-baħar.”—Isaija 48:17, 18.
Bħala l-Ħallieq tagħna, Alla jaf l-aħjar mod kif nistgħu ngħixu ħajjitna. Hu jridna nobdu l-gwida li jagħtina għax se jkun għall-ġid tagħna. Meta nobdu dak li jgħidilna hu, mhux se niddubitaw jekk ħadniex deċiżjoni tajba. Aħna dejjem se nagħżlu li nagħmlu dak li hu tajjeb, u b’hekk se nkunu ferħanin u jkollna l-paċi.
Ġeħova qatt ma jgħidilna biex nagħmlu xi ħaġa li ma nistgħux nagħmlu.
“Dan il-kmandament li qed nikkmandak illum la hu diffiċli wisq għalik, u lanqas mhu ’l bogħod minnek.”—Dewteronomju 30:11.
Biex ngħixu ħajjitna kif irid Alla, jaf ikollna bżonn inbiddlu l-mod kif naħsbu u naġixxu. Imma Ġeħova mhux qed jitlob ħafna minna. Bħala l-Ħallieq tagħna hu jaf x’kapaċi nagħmlu u meta nsiru nafuh se naraw li “l-kmandamenti tiegħu m’humiex tqal.”—1 Ġwanni 5:3.
Ġeħova jwiegħed li se jgħin lil dawk li jagħżlu li jgħixu ħajjithom kif jixtieq hu.
“Jien, Ġeħova Alla tiegħek, qed naqbdek minn idek il-leminija u ngħidlek, ‘Tibżax. Jien stess ngħinek.’”—Isaija 41:13.
Aħna nistgħu ngħixu ħajja li togħġob lil Alla. Hu jgħinna nagħmlu dan permezz tal-Kelma tiegħu, il-Bibbja, li tinkuraġġina u tagħtina tama għall-futur.
Miljuni taʼ nies minn madwar id-dinja sabu li ħajjithom marret għall-aħjar meta bdew jgħixu skont dak li tgħid il-Bibbja. Titħajjar titgħallem iktar dwar il-pariri tajbin li nsibu fil-Bibbja? Tistaʼ tagħmel dan permezz tal-browxer Għix Ħajja Ferħana għal Dejjem! Dan hu bbażat fuq il-Bibbja u tistaʼ ssibu b’xejn fuq jw.org. Fih se ssib dawn il-lezzjonijiet:
Kif Tistaʼ Tgħinek il-Bibbja?
Il-Bibbja Twegħedna Futur Sabiħ
Taʼ Min Joqgħod Fuqha l-Bibbja?
Meta tfittex sew fil-Kelma t’Alla, il-Bibbja, se tiskopri li din għadha tgħodd għal żmienna. Il-Bibbja hi ‘dejjem taʼ min joqgħod fuqha, issa u għal dejjem.’ (Salm 111:8) Meta ngħixu ħajjitna kif irid Alla se ngawdu l-isbaħ ħajja. Però, Alla mhux se jisforzana. (Dewteronomju 30:19, 20; Ġożwè 24:15) Din hi għażla li kull wieħed u waħda minna jrid jagħmel.