Tinsiex Titlob għal Oħrajn

1. Kif nafu li t-talb tagħna hu importanti għal Ġeħova?

IT-TALB hu rigal tal-għaġeb. Aħseb ftit: Ġeħova lill-anġli tahom ċerti inkarigi. (Slm. 91:11) Anki lil Ibnu tah inkarigi importanti ħafna. (Mat. 28:18) Imma xi ngħidu għal min jismaʼ t-talb? Dan l-inkarigu tah lil xi ħadd? Le. Hu għażel li jieħu ħsieb it-talb hu. Ġeħova, bħala “Semmiegħ it-talb,” jismaʼ t-talb persunali tagħna.—Slm. 65:2.

2. L-appostlu Pawlu b’liema modi hu taʼ eżempju għalina fit-talb?

² Għalkemm nistgħu nitolbu lil Ġeħova dwar dak kollu li nkunu għaddejjin minnu, għandna wkoll nitolbu għal oħrajn. L-appostlu Pawlu hekk għamel. Pereżempju, lill-kongregazzjoni taʼ Efesu kitbilha: “Jien inkompli nsemmikom fit-talb tiegħi.” (Efes. 1:16) Pawlu anki talab għal aħwa b’mod individwali. Pereżempju, lil Timotju qallu: “Jien grat lejn Alla, . . . dejjem niftakar fik meta nitlob lil Alla bil-ħniena lejl u nhar.” (2 Tim. 1:3) Pawlu kellu l-problemi persunali tiegħu dwar xiex jitlob. (2 Kor. 11:23; 12:​7, 8) Imma xorta ħa l-ħin biex jitlob għal oħrajn.

3. Għala jistaʼ jkun ninsew nitolbu għal oħrajn?

³ Ġieli jistaʼ jkun ninsew nitolbu għal oħrajn. Għala? Oħt jisimha Sabrinaa ssemmi raġuni waħda. Hi tgħid: “Il-ħajja vera saret mgħaġġla. Ġieli tant inkunu aljenati fuq il-problemi tagħna li nitolbu biss dwarna nfusna.” Tinnota li ġieli jiġrilek hekk? Jekk iva, dan l-artiklu se jgħinek. L-ewwel, se jispjega għala hu importanti li nitolbu għal oħrajn u t-tieni, se jsemmi xi suġġerimenti taʼ kif nistgħu nitolbu għal oħrajn.

GĦALA GĦANDNA NITOLBU GĦAL OĦRAJN?

4-5. Li nitolbu għal oħrajn kif “hu t’għajnuna kbira”? (Ġakbu 5:16)

⁴ Li nitolbu għal oħrajn “hu t’għajnuna kbira.” (Aqra Ġakbu 5:16.) Meta nitolbu għal oħrajn, vera nistgħu nagħmlu differenza? Iva nistgħu. Ġesù, peress li kien jaf li l-appostlu Pietru daqt kien se jgħid li ma jafux, qallu: “Jien tlabt bil-ħniena għalik ħalli ma titlifx il-fidi tiegħek.” (Luqa 22:32) Anki Pawlu kien jaf li t-talb jistaʼ jagħmel differenza. Meta kien il-ħabs b’mod inġust f’Ruma, hu kiteb lil Filemon: “Qed nittama li permezz tat-talb tagħkom niġi meħlus u nkun nistaʼ niġi ħdejkom.” (Flm. 22; ara n-nota taʼ studju bl-Ingliż “for I am hoping that through your prayers.”) U hekk ġara! Ftit wara, Pawlu nħeles mill-ħabs u setaʼ jerġaʼ jipprietka.

⁵ Ovvjament, dan ma jfissirx li bit-talb tagħna aħna se nisforzaw lil Ġeħova. Imma meta nitolbuh, Ġeħova jinnota kif inħossuna dwar dak li qed nitolbu dwaru, u ġieli jagħżel li jwieġeb it-talb tagħna. Li nafu dan jistaʼ jġegħelna nitolbu mill-qalb lil Ġeħova dwar is-sitwazzjoni u nkunu ċerti li hu se jieħu ħsiebha bl-aħjar mod possibbli.—Slm. 37:5; ara t-​2 Korintin 1:11 u n-noti taʼ studju bl-Ingliż.

6. Meta nitolbu għal oħrajn kif niġu effettwati? (1 Pietru 3:8)

⁶ Li nitolbu għal oħrajn jgħinna nitgħallmu ‘nħennu ħafna.’ (Aqra 1 Pietru 3:8.) Persuna li tħenn tinnota t-tbatija taʼ persuna oħra u tkun trid tagħmel xi ħaġa biex tgħinha. (Mrk. 1:​40, 41) Anzjan jismu Michael jgħid: “Meta nitlob għal oħrajn dwar dak li jkollhom bżonn, nifhem iktar id-diffikultajiet li jkunu għaddejjin minnhom u dan iġegħelni nħobbhom iktar. Jgħinni wkoll inħossni iktar qrib tagħhom, avolja huma ġieli ma jindunawx.” Anzjan ieħor jismu Richard isemmi benefiċċju ieħor. Hu jgħid: “Meta nitolbu għal xi ħadd, niġu iktar immotivati biex ngħinuh. Meta ngħinu b’mod prattiku lill-persuna li nkunu tlabna lil Ġeħova għaliha, inkunu sa ċertu punt qed ngħinu biex titwieġeb it-talba tagħna.”

7. Li nitolbu għal oħrajn kif jistaʼ jgħinna ma niffokawx fuq il-problemi tagħna biss? (Filippin 2:​3, 4) (Ara wkoll l-istampi.)

⁷ Li nitolbu għal oħrajn jgħinna naraw il-problemi tagħna minn lenti differenti. (Aqra Filippin 2:​3, 4.) Peress li ngħixu f’dinja kkontrollata mix-Xitan, ilkoll kemm aħna niffaċċjaw xi sfidi. (1 Ġw. 5:19; Riv. 12:12) Meta niħduha drawwa nitolbu għal oħrajn, jgħinna niftakru li “l-aħwa kollha madwar id-dinja għaddejjin mill-istess tbatijiet” bħal tagħna. (1 Pt. 5:9) Oħt pijuniera jisimha Katherine tgħid: “Li nitlob għal oħrajn ifakkarni li mhux jien biss għaddejja mill-problemi. Dan jgħinni ma niffokax iżżejjed fuq il-problemi tiegħi.”

LIL MIN NISTGĦU NSEMMU FIT-TALB

8. Għal min nistgħu nitolbu?

⁸ Għal min nistgħu nitolbu? Nistgħu nitolbu għal uħud b’sitwazzjonijiet differenti. Pereżempju, nistgħu nitolbu għal dawk li huma morda, għat-tfal u żgħażagħ li jiġu mwaqqgħin għaċ-ċajt jew ikollhom il-pressjoni fl-iskola, jew għal uħud li qed jikbru fl-età. Nistgħu nitolbu wkoll għal aħwa li qed jiffaċċjaw oppożizzjoni minn tal-familja jew mill-gvernijiet. (Mat. 10:​18, 36; Atti 12:5) Xi aħwa kellhom jitilqu mid-djar tagħhom minħabba problemi politiċi fejn jgħixu. Oħrajn qed ibatu minħabba diżastri naturali. Forsi ma nafux b’mod persunali lil dawn l-aħwa. Imma meta nitolbu għalihom, inkunu qed nuru li nobdu l-kmand taʼ Ġesù: “Ħobbu lil xulxin.”—Ġw. 13:34.

9. Għala għandna nitolbu għall-aħwa li qed jieħdu t-tmexxija fl-organizzazzjoni taʼ Ġeħova u għan-nisa tagħhom?

⁹ Aħna nistgħu nitolbu wkoll għall-aħwa li qed jieħdu t-tmexxija fl-organizzazzjoni taʼ Ġeħova. Dawn jinkludu l-Ġemgħa li Tiggverna u l-ajjutanti tagħha, il-Kumitati tal-Fergħa, l-overseers f’Betel, l-indokraturi li jżuru l-kongregazzjonijiet, l-anzjani tal-kongregazzjoni, u l-qaddejja ministerjali. Ħafna minn dawn l-aħwa qed jiffaċċjaw problemi persunali waqt li qed jaħdmu iebes għalina. (2 Kor. 12:15) Pereżempju, indokratur li jżur il-kongregazzjonijiet jismu Mark jgħid: “Waħda mill-isfidi li nsib vera diffiċli hi li ngħix ’il bogħod mill-ġenituri tiegħi li huma kbar fl-età. It-tnejn għandhom problemi taʼ saħħa. Għalkemm oħti u żewġha jieħdu ħsiebhom sew, vera nkun imdejjaq li ma nistax nagħmel kemm nixtieq għalihom.” Kemm jekk nafu minn xiex għaddejjin dawn l-aħwa beżlin u kemm jekk le, għandna nitolbu għalihom. (1 Tes. 5:​12, 13) Għandna nitolbu wkoll għan-nisa tagħhom, li dejjem jissapportjaw lir-raġel tagħhom biex ikun jistaʼ jkompli jagħmel l-inkarigu tiegħu.

10-11. Ġeħova jieħu pjaċir b’talb ġenerali? Spjega.

¹⁰ Bħalma ddiskutejna, spiss aħna nitolbu għal uħud differenti. Pereżempju, mingħajr ma jkollna xi ħadd partikulari f’moħħna, aħna jaf nitolbu lil Ġeħova biex jgħin lil dawk li qegħdin il-ħabs jew lil dawk li tilfu lil xi ħadd fil-mewt. Anzjan jismu Donald jgħid, “Tant hawn aħwa li qed jissaportu provi differenti li ġieli ngħidu talba ġenerali ħalli nitolbu għal dawk kollha li qed ibatu.”

¹¹ Ġeħova jieħu pjaċir b’talb bħal dan? Iva! Wara kollox, aħna ma nafux eżatt x’għandu bżonn kull ħu jew oħt. Allura jkun xieraq li nitolbu għal uħud b’ċirkustanzi differenti. (Ġw. 17:20; Efes. 6:18) Dan it-tip taʼ talb juri bil-provi li ‘nħobbu lill-aħwa kollha.’—1 Pt. 2:17.

KIF TISTAʼ TITLOB GĦAL UĦUD B’MOD INDIVIDWALI

12. Li tosserva, kif se jgħinek titlob iktar b’mod speċifiku?

¹² Osserva. Apparti li nitolbu għal uħud b’ċirkustanzi differenti, għandna anki nitolbu għal uħud individwali b’isimhom. Hemm xi ħadd fil-kongregazzjoni tiegħek li qed ibati minn marda serja? Hemm xi żagħżugħ jew żagħżugħa li hi skuraġġita minħabba li t-tfal tal-iskola qed jipprovaw iġegħluha tagħmel xi ħaġa ħażina? Hemm xi ġenitur waħdu li qed jipprova jiddixxiplina u jittrennja lit-tfal tiegħu “bħalma jrid Ġeħova”? (Efes. 6:4) Meta tosserva, int se tifhem u tħobb iktar lil oħrajn u dan se jġiegħlek tkun trid titlob għalihom.b—Rum. 12:15.

13. Kif nistgħu nitolbu għall-aħwa li qatt ma ltqajna magħhom?

¹³ Itlob għal oħrajn b’isimhom. Nistgħu nagħmlu dan anki għal aħwa li qatt ma ltqajna magħhom. Pereżempju, aħseb dwar l-aħwa li qegħdin fil-ħabs f’pajjiżi bħall-Krimea, l-Eritrea, ir-Russja, u Singapore. Fuq jw.org, tistaʼ ssib l-ismijiet taʼ dawk li qegħdin fil-ħabs.c Indokratur li jżur il-kongregazzjonijiet jismu Brian qal: “Jien sibt li meta nikteb l-isem taʼ ħu jew oħt li qiegħda l-ħabs u mbagħad nipprattika kif ngħidu, jgħinni biex meta nkun qed ngħid talba persunali niftakar biex nitlob għaliha.”

14-15. Kif nistgħu nitolbu għal affarijiet speċifiċi?

¹⁴ Itlob għal affarijiet speċifiċi. Michael, li ssemma qabel, jgħid: “Meta naqra minn fuq jw.org dwar aħwa li qegħdin il-ħabs, nipprova nimmaġina kif inħossni kieku kont fis-sitwazzjoni tagħhom. Kieku jien żgur li ninkwieta dwar il-mara tiegħi u nkun irrid nara li ma jonqosha xejn. Allura meta nitlob għall-aħwa miżżewġin li qegħdin il-ħabs, insemmi affarijiet speċifiċi.”—Lhud 13:​3, ntt.

¹⁵ Jekk nipprovaw nimmaġinaw kif tkun il-ġurnata tal-aħwa li qegħdin il-ħabs, se nsibu affarijiet oħra li nistgħu nsemmu b’mod speċifiku fit-talb tagħna. Pereżempju, nistgħu nitolbu biex il-gwardjani jkunu qalbhom tajba magħhom u biex dawk f’pożizzjoni t’awtorità jħallu lill-aħwa jqimu lil Ġeħova fil-ħabs. (1 Tim. 2:​1, 2, ntt.) Nistgħu nitolbu biex l-aħwa tal-kongregazzjoni tagħhom ikunu inkuraġġiti bl-eżempju taʼ lealtà li l-ħu jew l-oħt qed turi. Nistgħu nitolbu wkoll biex nies li mhumiex xhieda jinnotaw il-kondotta tagħhom u jkunu jridu jisimgħu l-messaġġ tagħna. (1 Pt. 2:12) Nistgħu nagħmlu xi ħaġa simili meta nitolbu għal aħwa li qed jissaportu provi oħra. Billi nosservaw, nitolbu għal oħrajn b’isimhom, u nitolbu għal affarijiet speċifiċi, nistgħu nuru li għandna “iktar imħabba lejn xulxin.”—1 Tes. 3:12.

KIF IKOLLNA ĦARSA REALISTIKA META NITOLBU

16. Kif jistaʼ jkollna ħarsa realistika lejn it-talb tagħna? (Mattew 6:8)

¹⁶ Bħalma rajna, it-talb tagħna jistaʼ jagħmel differenza fis-sitwazzjoni taʼ xi ħadd. Imma jrid ikollna ħarsa realistika lejn it-talb. Irridu niftakru li Ġeħova diġà jaf bis-sitwazzjoni u m’għandux bżonn il-parir tagħna kif jieħu ħsieb din is-sitwazzjoni. Ġeħova jaf x’għandhom bżonn il-qaddejja tiegħu qabel ma nitolbu għalihom. (Aqra Mattew 6:8.) Allura, għala għandna nitolbu għal oħrajn? Apparti għar-raġunijiet li diġà semmejna f’dan l-artiklu, dan hu mod kif nuru kemm jimpurtana minnhom. L-imħabba ġġegħelna nitolbu għal xulxin. U Ġeħova jieħu pjaċir jara lill-qaddejja tiegħu jimitaw l-imħabba tiegħu.

17-18. It-talb li ngħidu għall-aħwa maʼ xiex nistgħu nqabbluh?

¹⁷ Anki jekk it-talb tagħna ma jbiddilx is-sitwazzjoni taʼ xi ħadd, it-talb juri kemm inħobbu lil ħutna, u Ġeħova jinnotah dan. Biex inġibu eżempju: Immaġina familja b’żewġt itfal żgħar, tifel u tifla. It-tifel qiegħed fis-sodda marid. Oħtu tgħid lil missierha: “Pa, jekk jogħġbok għin lil ħija għax vera ma jiflaħx!” Il-missier diġà qed jieħu ħsieb is-sitwazzjoni, hu jħobbu lit-tifel u qed jieħu ħsiebu sew. Imma min jaf kemm jieħu pjaċir li t-tifla tant tħobb lil ħuha li qed titolbu bil-ħniena biex jgħinu.

¹⁸ Bl-istess mod Ġeħova jixtieq li nħobbu lil xulxin u nitolbu għal xulxin. Meta nagħmlu hekk, inkunu qed nuruh li ma jimpurtaniex biss dwarna nfusna imma li vera nħobbu lil ħutna. Ġeħova jinnotah dan. (2 Tes. 1:3; Lhud 6:10) Ukoll, bħalma ddiskutejna, it-talb tagħna jistaʼ jbiddel is-sitwazzjoni taʼ xi ħadd. Mela ejja nagħmlu dak kollu li nistgħu biex niftakru nitolbu għal xulxin.