Mistoqsijiet mill-Qarrejja
X’inhu l-“ħsieb” li Ġeħova se jdaħħal f’moħħ il-mexxejja tad-dinja dalwaqt?
Dwar kif se jibda ż-żmien taʼ tbatija kbira, Rivelazzjoni 17:16, 17 jgħid: “L-għaxart iqrun u l-bhima salvaġġa li rajt, se jobogħdu l-prostituta, jiħdulha kulma għandha, ineżżgħuha, jiklulha laħamha, u jaħarquha għalkollox bin-nar. Għax Alla daħħlilhom f’moħħhom biex jagħmlu dak li jrid hu, jiġifieri li jagħmlu skont l-istess ħsieb li kellhom, billi jagħtu s-saltna tagħhom lill-bhima salvaġġa.” Fil-passat, il-pubblikazzjonijiet tagħna qalu li l-“ħsieb” li Ġeħova se jdaħħal f’moħħ il-mexxejja tad-dinja hu li jeqirdu r-reliġjon falza.
Però, hemm bżonn li ssir bidla f’kif nifhmu dawn il-versi. Il-“ħsieb” li Ġeħova se jdaħħal f’moħħ il-mexxejja tad-dinja hu li “jagħtu s-saltna tagħhom lill-bhima salvaġġa.” Biex nifhmu kif se jiġri dan, se nwieġbu l-mistoqsijiet li ġejjin.
Il-profezija lil min qed issemmi? “Il-prostituta,” li tissejjaħ ukoll “Babilonja l-Kbira,” tirrappreżenta r-reliġjonijiet foloz kollha tad-dinja. Il-“bhima salvaġġa li l-kulur tagħha kien aħmar jgħajjat” tirrappreżenta lill-Ġnus Magħquda. Din l-organizzazzjoni bdiet fl-1919, bl-isem Lega tan-Nazzjonijiet, bl-iskop li żżomm il-paċi mad-dinja kollha. (Riv. 17:3-5) “L-għaxart iqrun” jirrappreżentaw il-gvernijiet kollha li jissapportjaw lill-bhima salvaġġa.
X’inhi r-relazzjoni taʼ bejn il-prostituta u l-bhima salvaġġa li l-kulur tagħha kien aħmar jgħajjat? Il-prostituta qiegħda “bilqiegħda fuq” il-bhima salvaġġa. Dan ifisser li tissapportjaha u tipprova tikkontrollaha.
X’ħa jiġrilha l-prostituta? Il-bhima salvaġġa u l-għaxart iqrun “se jobogħdu l-prostituta,” tant li se jiħdulha kulma għandha u se juru lil kulħadd kemm hi kattiva. U mbagħad se jeqirduha, eżatt bħalma qal li se jiġrilha Ġeħova. (Riv. 17:1; 18:8) Dan hu kif se jinqerdu r-reliġjonijiet foloz kollha. Però, qabel jiġri dan, Ġeħova se jġiegħel lill-mexxejja tad-dinja jagħmlu xi ħaġa li qatt ma għamlu qabel.
Ġeħova x’se jġegħelhom jagħmlu lill-mexxejja tad-dinja? Hu se jġiegħel lill-mexxejja tad-dinja “jagħmlu dak li jrid hu,” jiġifieri “se jagħtu l-qawwa u l-awtorità tagħhom lill-bhima salvaġġa [li l-kulur tagħha kien aħmar jgħajjat]”—il-Ġnus Magħquda. (Riv. 17:13) Aħseb dwar xi jfisser dan. Dan ifisser li mhux se tkun l-idea tal-mexxejja li jagħtu l-qawwa u l-awtorità tagħhom lill-bhima salvaġġa. Il-profezija turi li Alla stess se jġegħelhom jagħmlu dan. (Prov. 21:1; ara l-prinċipju f’Isaija 44:28.) Din il-bidla mhux se tiġri bil-mod. Din il-bidla se tiġri f’daqqa. Imbagħad il-bhima salvaġġa se tagħmel dak li jrid Ġeħova billi teqred kompletament lir-reliġjonijiet foloz kollha.
X’għandna nistennew li se jiġri fil-futur? M’għandniex nistennew li naraw rapporti fuq l-aħbarijiet li l-gvernijiet bil-mod il-mod qed jissapportjaw iktar lill-Ġnus Magħquda. Minflok, għandna nistennew li f’daqqa waħda Ġeħova se jġiegħel lill-mexxejja tad-dinja kollha jagħtu l-qawwa tagħhom lill-Ġnus Magħquda. Meta dan jiġri, se nkunu nafu li ż-żmien taʼ tbatija kbira dalwaqt se jibda. Sadanittant, ejja “nibqgħu mqajmin u f’sensina” għax dalwaqt ġejjin bidliet f’daqqa!—1 Tes. 5:6.