Ittra Mingħand il-​Ġemgħa li Tiggverna

Hekk kif deħlin fl-​ewwel snin tas-​seklu 21, nieħdu pjaċir niktbu lilkom, “is-​sħubija kollha kemm hi taʼ l-​aħwa” madwar id-​dinja, u nfaħħrukom għax-​xogħol iebes li tagħmlu. (1 Pt. 2:​17, NW) Kważi 2,000 sena ilu, Ġesù staqsa: “Bin il-​bniedem se jsib il-​fidi fuq l-​art meta jiġi?” (Lq. 18:8) L-​attività żeluża tagħkom matul is-​sena taʼ servizz li għaddiet twieġeb il-​mistoqsija taʼ Ġesù b’għajta qawwija fl-​affermattiv! Xi wħud minnkom qlajtu tgħajjir u ġejtu mwaqqgħin għaċ-​ċajt minħabba l-​fidi tagħkom. F’ħafna postijiet, tissaportu meta tiffaċċjaw gwerer, diżastri, mard, jew ġuħ. (Lq. 21:​10, 11) Grazzi għaż-​żelu tagħkom biex tagħmlu xogħlijiet tajbin, Ġesù għadu jistaʼ “jsib il-​fidi fuq l-​art.” Żgur li hemm il-​ferħ fis-​sema minħabba f’dan!

Nafu li m’huwiex faċli li wieħed jissaporti. Ikkunsidraw il-​provi li jgħaddu minnhom ħutna f’pajjiż wieħed fl-​Asja tal-​punent. Il-​vjolenza kontra x-​Xhieda taʼ Jehovah hija kważi xi ħaġa taʼ rutina f’dan il-​pajjiż. Dan l-​aħħar, il-​pulizija ħarbtu assemblea li kienet għaddejja fil-​paċi b’xi 700 ruħ fl-​attendenza. Elf u tliet mija oħra ma setgħux jattendu minħabba li ġew imwaqqfin fit-​toroq huma u sejrin. Marmalja taʼ nies b’wiċċhom mgħotti, xi wħud minnhom pulizija, attakkaw il-​post taʼ l-​assemblea, sawtu lil ħafna mid-​delegati, u taw in-​nar ’il-post li kien se jintuża għall-​assemblea. Drabi oħra, estremisti reliġjużi sawtu lil ħutna b’mod krudil permezz taʼ bsaten mimlijin imsiemer.

Attakki bħal dawn jaħsduna iżda ma jissorprenduniex. L-​appostlu Pawlu kien ispirat biex jikteb: “Dawk li jridu jgħixu ħajja tajba fi Kristu Ġesù lkoll jgħaddu mill-​persekuzzjoni.” (2 Tim. 3:12) Fl-​ewwel seklu, il-​Kristjani ssaportew persekuzzjoni verbali u fiżika, u xi wħud ġew saħansitra maqtulin. (Atti 5:40; 12:2; 16:​22-24; 19:9) L-​istess ġara fis-​seklu 20, u bla ebda dubju hekk se jkompli jiġri fis-​seklu 21. Xorta waħda, Jehovah jgħidilna: “Ebda arma magħmula kontrik ma tiswa.” (Is. 54:17) X’assiguranza meraviljuża hi din! Tabilħaqq, tant aħna prezzjużi għal Jehovah li permezz tal-​profeta tiegħu Żakkarija, hu qal: “Min imiss lilkom imiss il-​mimmi taʼ [għajnejja].” (Żak. 2:12 [2:​8, NW]) L-​għedewwa taʼ l-​adoraturi taʼ Jehovah m’għandhom l-​ebda ċans li jkollhom rebħa finali. Il-​qima pura se tittrijonfa!

Per eżempju, fil-​pajjiż li ssemma qabel, ix-​Xhieda taʼ Jehovah gawdew żewġ qċaċet ġodda fin-​numru taʼ pubblikaturi matul is-​sena taʼ servizz 2001. Iva, ħutna hawnhekk qed jipperseveraw minkejja d-​diffikultajiet, bħalma qed jagħmlu l-​aħwa maʼ kullimkien. Matul is-​sena taʼ servizz li għaddiet, madwar id-​dinja tgħammdu 5,066 ruħ kull ġimgħa bħala simbolu tad-​dedikazzjoni tagħhom lil Jehovah. Issa dawn l-​uħud ġodda huma determinati, flimkien magħna lkoll, li ‘jieqfu sħaħ u b’konvinzjoni soda fir-​rieda kollha t’Alla.’—Kol. 4:​12, NW.

Ikkunsidraw ukoll, xi żviluppi li seħħew dan l-​aħħar fil-​Greċja. Minkejja snin t’oppożizzjoni qawwija mill-​Knisja Ortodossa Griega, ix-​Xhieda taʼ Jehovah issa huma magħrufin mill-​gvern bħala “reliġjon rikonoxxuta.” Id-​dokument li jagħti dan ir-​rikonoxximent ikompli jgħid li l-​kumpless tal-​Betel fil-​Greċja hu “post sagru u konsagrat, iddedikat għall-​qima t’Alla.” Aħna ferħanin ngħidulkom ukoll li matul is-​sena taʼ servizz li għaddiet, il-​qrati għaddew deċiżjonijiet legali favorevoli li jeffettwaw il-​qima tagħna fil-​Bulgarija, il-​Ġappun, il-​Ġermanja, l-​Istati Uniti, il-​Kanada, ir-​Rumanija, u r-​Russja. Kemm nirringrazzjaw lil Jehovah talli żamm il-​bieb taʼ l-​attività miftuħ f’dawn il-​pajjiżi!

Filwaqt li nikkunsidraw kif Jehovah jappoġġa lin-​nies tiegħu matul dawn l-​aħħar żminijiet, naraw kemm hu l-​aqwa Ħabib li qatt jistaʼ jkollna. Nitgħaxxqu bir-​relazzjoni tagħna miegħu, għax nafu li hu jħobbna, jgħallimna, u jikkoreġina. Iva, il-​provi tal-​fidi se jibqgħu jiġu kontrina. Iżda fidi li ma titħarrikx f’Jehovah se tgħinna nibqgħu għaddejjin. Ġakbu kiteb: “Ħuti, għoddu kollox b’ferħ meta tħabbtu wiċċkom maʼ kull xorta taʼ tiġrib, għax għandkom tkunu tafu li t-​tiġrib tal-​fidi tagħkom inissel is-​sabar.” (Ġak. 1:​2, 3) Iktar minn hekk, is-​sabar juri l-​imħabba tagħna għal Jehovah, u dan iġibilna ferħ kbir! Għeżież aħwa, kunu ċerti li Jehovah se jgħin lil kull wieħed u waħda minna. Jekk nibqgħu leali, bla dubju hu se jgħinna nidħlu fid-​dinja l-​ġdida. Hu jridna nirnexxu.

Għalhekk,  inħeġġukom ħutna rġiel u nisa, kbar u żgħar, biex iżżommu sew f’moħħkom il-​barkiet meraviljużi li hemm quddiemna. Jalla l-​attitudni tagħna tkun bħal dik taʼ l-​appostlu Pawlu, li kiteb: “Jiena għadni persważ li t-​tbatijiet taʼ issa ma għandhom xejn x’jaqsmu mal-​glorja li għad trid tidher fina.” (Rum. 8:18) Strieħu fuq Jehovah meta tiffaċċjaw kwalunkwe tip taʼ sitwazzjoni diffiċli. Issaportu, u irrifjutaw li taqtgħu qalbkom. Qatt u qatt m’hu se jiddispjaċikom talli tagħmlu hekk. Il-​Kelma t’Alla tiżgurana: “Il-​ġust jgħix bil-​fedeltà tiegħu.”—Ħab. 2:4.

Ħutkom,

Il-​Ġemgħa li Tiggverna tax-​Xhieda taʼ Jehovah