Il-​Ħajja Qatt Se Terġaʼ Lura għan-​Normal? Il-​Bibbja Kif Tistaʼ Tgħinna f’Dinja li Nbidlet bil-​Pandemija?

“Ilkoll kemm aħna rridu li nerġgħu ngħixu ħajja normali.”—Angela Merkel, kanċillier Ġermaniż.

Il-​pandemija tal-​COVID-​19 qed tkompli teffettwa lin-​nies madwar id-​dinja, allura jistaʼ jkun li int taqbel mal-​kliem tagħha. Imma x’inhi ħajja “normali”? In-​nies għal xiex qed iħarsu ‘l quddiem?

• Li l-​ħajja terġaʼ tiġi kif kienet qabel il-​pandemija. Xi wħud jixtiequ li jerġgħu jibdew iqattgħu iktar ħin mal-​ħbieb, u jkunu jistgħu jgħannquhom. Jixtiequ wkoll jerġgħu jibdew isiefru. Bħalma qal Dr. Anthony Faucia, in-​nies iħossu illi li “jerġgħu lura għan-​normal” ifisser li jmorru “r-​restoranti, it-​teatri, u affarijiet bħal dawn.”

• Li l-​ħajja titjieb. Xi wħud iħossu li issa huwa ċ-​ċans li jgħixu ħajja aħjar milli kienu qabel. Iħossu li ċerti affarijiet iridu jinbidlu, bħal xogħol li jieħu wisq ħin u enerġija, inġustizzja soċjali, u l-​fatt li iktar u iktar nies qed ibatu minn mard mentali. Klaus Schwab, il-​fundatur tal-​World Economic Forum, jgħid li “l-​pandemija qed ittina opportunità unika biex naħsbu fuq kif inhi ħajjitna, kif nixtiquha tkun, u mbagħad naraw x’nistgħu nbiddlu.”

Għal xi wħud, il-​pandemija tant effettwathom ħażin li jħossu li l-​ħajja qatt ma tistaʼ terġaʼ tiġi normali kif kienet qabel. Pereżempju, xi nies tilfu x-​xogħol, tilfu d-​dar, mardu, jew agħar minn hekk, mitulhom il-​maħbubin tagħhom.

M’hemmx dubju, ħadd ma jaf eżatt kif se tkun il-​ħajja meta tispiċċa l-​pandemija. (Ekkleżjasti 9:11) Madankollu, il-​Bibbja tistaʼ tgħinna biex inkunu realistiċi dwar il-​futur u nkampaw maʼ dak kollu li jistaʼ jiġri. Iktar minn hekk, il-​Bibbja titkellem dwar futur li nistgħu nkunu ċerti minnu, u li forsi int qatt ma ħsibt dwaru.

Kif inħarsu lejn il-​pandemija tal-​COVID-​19

Ħafna snin ilu, il-​Bibbja bassret li matul il-​“konklużjoni tas-​sistema” kellu jkun hawn “mard li jittieħed” mad-​dinja kollha. (Luqa 21:11; Mattew 24:3) Jekk inżommu dan f’moħħna meta naħsbu dwar il-​COVID-​19, se nħarsu lejn din il-​pandemija bħala waħda mill-​ġrajjiet importanti li l-​Bibbja qalet li kellhom jiġru, inkluż il-​gwerer, terremoti kbar, u nuqqas t’ikel.

Dan kif jistaʼ jgħinna: Għalkemm is-​sitwazzjoni tal-​pandemija tistaʼ tmur għall-​aħjar, il-​Bibbja twissi li aħna qegħdin ngħixu fi “żminijiet kritiċi li diffiċli biex issib tarfhom.” (2 Timotju 3:1) Dan jistaʼ jgħinna biex inkunu realistiċi dwar il-​ħajja f’dan iż-​żmien diffiċli.

Il-​Bibbja tgħidilna x’inhi l-​ħarsa t-​tajba: Il-​ħajja qed issir iktar u iktar diffiċli, u d-​dinja tagħna dalwaqt se tgħaddi minn bidla kbira. X’se tkun din il-​bidla?

Futur aħjar minn dak li qed tistenna

Il-​Bibbja ma bassritx biss il-​problemi serji li qed naraw bħalissa, imma tgħid ukoll li dalwaqt se jkun hawn żmien aħjar. Titkellem dwar futur li se jkun ħafna aħjar minn dak li l-​gvernijiet jistgħu qatt jittamaw li jġibu, futur li Alla biss jistaʼ jġib. “U jixxottalhom kull demgħa minn għajnejhom, u ma jkunx hemm iżjed mewt, u la niket u la għajat u lanqas uġigħ. L-​affarijiet taʼ qabel ikunu spiċċaw.”—Rivelazzjoni 21:4.

Alla Ġeħovab jwiegħed: “Ara! Qed nagħmel kollox ġdid.” (Rivelazzjoni 21:5) Hu se jsolvi l-​problemi tad-​dinja, inkluż dawk li ġabet il-​pandemija. Hu se jagħmel dan li ġej:

• Kulħadd se jkollu saħħa fiżika u mentali perfetta, mingħajr mard u mewt.—Isaija 25:8; 33:24.

• Kulħadd se jkollu xogħol li jieħu pjaċir jagħmlu, u mhux xogħol stressanti li jħallik bla saħħa.—Isaija 65:22, 23.

• Kulħadd se jkollu biżżejjed x’jiekol u mhux se jkun hawn iktar faqar.—Salm 72:12, 13; 145:16.

• In-​nies se jfiqu mill-​uġigħ emozzjonali, u se jkollhom ukoll it-​tama li jerġgħu jaraw il-​maħbubin li mietu.—Isaija 65:17; Atti 24:15.

Dan kif jistaʼ jgħinna: Il-​Bibbja tgħid: “Din it-​tama li għandna hi bħal ankra għal ruħna.” (Ebrej 6:19) It-​tama li se jiġi żmien aħjar tistaʼ tgħinna nibqgħu kalmi. Tistaʼ tgħinna nkampaw mas-​sitwazzjonijiet diffiċli li għaddejjin minnhom, innaqqsu l-​ansjetà, u nibqgħu kalmi u ferħanin.

Imma tistaʼ verament temmnu dak li twiegħed il-​Bibbja? Ara l-​artiklu bl-​Ingliż “The Bible—A Reliable Source of Truth.”

Prinċipji tal-​Bibbja li se jgħinuna nkampaw mal-​bidliet li ġabet il-​pandemija

• Qis il-​ħajja taʼ valur

  Skrittura: “L-​għerf iżomm ħaj lil sidu.”—Ekkleżjasti 7:12.

  Xi jfisser għalik: Ħu deċiżjonijiet tajbin ħalli timrad inqas. Ara x’inhi s-​sitwazzjoni fejn toqgħod. Ara x’inhuma r-​regolamenti mill-​awtoritajiet tas-​saħħa, x’inhi r-​rata tal-​infezzjonijiet, u kemm hemm nies mill-​popolazzjoni li ħadu l-​vaċċin.

• Oqgħod attent

  Skrittura: “L-​għaref jibżaʼ u jwarrab mill-​ħażen, imma l-​istupidu jirrabja u jafda fih innifsu.”—Proverbji 14:16.

  Xi jfisser għalik: Ibqaʼ ħu prekawzjonijiet biex tipproteġi saħħtek. L-​esperti jaħsbu li l-​coronavirus se jibqaʼ jeżisti għal żmien twil.

• Imxi fuq informazzjoni korretta

  Skrittura: “Kulmin hu bla esperjenza jafda f’kull kelma li jismaʼ, imma min hu prudenti jqis il-​passi tiegħu.”—Proverbji 14:15.

  Xi jfisser għalik: Agħżel sew liema pariri se timxi fuqhom. L-​għażla tiegħek tagħmel differenza, għax jekk tieħu deċiżjonijiet ibbażati fuq informazzjoni żbaljata, tistaʼ tagħmel ħsara lil saħħtek.

• Ibqaʼ pożittiv

  Skrittura: “Tgħidx: ‘Kif inhi li l-​jiem taʼ qabel kienu aħjar minn dawn?ʼ għax ma jkunx għaqli li tistaqsi dan.”—Ekkleżjasti 7:10.

  Xi jfisser għalik: Kun determinat li tgħix bl-​aħjar mod li tistaʼ fis-​sitwazzjoni li qiegħed. Evita li toqgħod taħseb li l-​ħajja qabel il-​pandemija kienet perfetta, u tibqax taħseb fuq dawk l-​affarijiet li ma rnexxilekx tagħmel minħabba l-​pandemija.

• Uri rispett lejn oħrajn

  Skrittura: “Onoraw lil kull xorta taʼ bnedmin.”—1 Pietru 2:17.

  Xi jfisser għalik: In-​nies irreaġixxew b’modi differenti għall-​pandemija u l-​konsegwenzi li ġabet. Irrispetta l-​opinjoni tagħhom, imma ibqaʼ żomm mad-​deċiżjonijiet tajbin li tkun għamilt. Uri konsiderazzjoni għal dawk li ma ħadux il-​vaċċin, dawk imdaħħlin fiż-​żmien, u dawk li għandhom problemi kbar taʼ saħħa.

• Kun paċenzjuż

  Skrittura: “L-​imħabba tistabar fit-​tul u qalbha tajba.”—1 Korintin 13:4.

  Xi jfisser għalik: Kun qalbek tajba maʼ dawk li jħossuhom inkwetati biex jerġgħu jagħmlu xi affarijiet li kienu jagħmlu qabel il-​pandemija. Meta jibdew jonqsu r-​restrizzjonijiet u tkun qed tippjana biex tieħu sehem f’xi attivitajiet, kun paċenzjuż.

Kif il-​Bibbja qed tgħin lin-​nies ikampaw mal-​pandemija

Ix-​Xhieda taʼ Ġeħova jsibu faraġ fil-​wegħdi tal-​Bibbja dwar futur aħjar, u dan jgħinhom biex ma jaħsbux biss fuq il-​pandemija. Huma jgħinu wkoll lil xulxin billi jobdu l-​kmand tal-​Bibbja biex jiltaqgħu regolarment għall-​qima. (Ebrej 10:24, 25) Kulħadd huwa mistieden biex jattendi l-​laqgħat tax-​Xhieda taʼ Ġeħova, li waqt il-​pandemija qed isiru b’mod virtwali.

Oħrajn jaqblu li sabuha t’għajnuna li matul dan iż-​żmien diffiċli, jiltaqgħu għall-​qima max-​Xhieda taʼ Ġeħova. Pereżempju, waħda mara li mardet bil-​COVID-​19 aċċettat stedina biex tidħol f’laqgħa virtwali tax-​Xhieda taʼ Ġeħova. Dawn il-​laqgħat għenuha emozzjonalment minkejja l-​problemi taʼ saħħa li baqaʼ jkollha minħabba l-​virus. Hi qalet: “Inħossni parti minn din il-​familja. Il-​qari tal-​Bibbja jagħtini ċertu kalma u paċi tal-​moħħ. Jgħinni niffoka fuq it-​tama li għandi għall-​futur minflok fuq il-​problemi tiegħi. Grazzi talli għentuni nagħmel dak li minn dejjem xtaqt, li nersaq qrib lejn Alla.”