It-Tajjeb Imdawwar bil-Ħażin
FID-DINJA taʼ llum, donnu li ftit nies huma lesti li jagħtu minnhom infushom. Però, xi wħud għadhom jixtiequ jbiddlu s-sitwazzjoni—billi jagħmlu l-ġid lil ħaddieħor b’xi mod. Kull sena, għadd kbir taʼ nies jagħtu biljuni taʼ liri lil dawk li jarawhom bħala organizzazzjonijiet taʼ karità li jagħmlu l-ġid. Per eżempju, fil-Britannja d-donazzjonijiet għall-karità laħqu quċċata taʼ 13-il biljun dollaru Amerikan fl-2002. Mill-1999, għaxar filantropi ġenerużi taw jew wiegħdu li jagħtu iktar minn 38 biljun dollaru Amerikan biex jgħinu lil min hu fil-bżonn.
Xi ftit mill-affarijiet tajbin li twettqu mill-ħaddiema tal-karità jinkludu l-ħlas tal-kontijiet mediċi għall-familji bi qligħ baxx, it-taħriġ u l-gwida għat-tfal b’ġenitur wieħed, il-provvediment taʼ fondi għall-programmi tat-tilqim f’pajjiżi li qed jiżviluppaw, jagħtu lit-tfal l-ewwel ktieb tagħhom, jipprovdu annimali għat-tnissil lill-bdiewa f’pajjiżi foqra, u jwasslu l-provvedimenti biex jgħinu lill-vittmi tad-diżastri naturali.
Il-fatti li għadna kif semmejna juru li l-bnedmin huma kapaċi jagħmlu l-ġid lil oħrajn. B’dispjaċir, però, hemm ukoll ħafna nies li jwettqu ħażen li ma tistax tiddeskrivih.
Il-Ħażen Qed Jiżdied
Mit-tmiem tat-tieni gwerra dinjija ’l hawn, kien hemm iktar minn 50 inċident dokumentat taʼ ġenoċidju u qtil taʼ folol kbar taʼ nies minħabba l-politika. Il-ġurnal American Political Science Review jgħid: “Dawn l-episodji swew il-ħajjiet taʼ mill-inqas 12-il miljun ruħ u ammont kbir taʼ 22 miljun ċittadin, iktar mill-vittmi kollha tal-gwerer ġol-pajjiżi jew gwerer internazzjonali mill-1945 ’l hawn.”
Matul l-aħħar nofs tas-seklu 20, xi 2.2 miljun ruħ inqatlu fil-Kambodja għal raġunijiet politiċi. Minħabba l-mibegħda etnika fl-Irwanda, inqatlu iktar minn 800,000 raġel, nisa, u tfal. Qtil minħabba r-reliġjon u l-politika fil-Bosnia ħa l-ħajja taʼ iktar minn 200,000 ruħ.
Meta identifika atti taʼ ħażen iktar reċenti, is-segretarju ġenerali tal-Ġnus Magħquda qal fl-2004: “Fl-Iraq, naraw in-nies ċivili massakrati bla ħniena, waqt li dawk li jipprovdu l-għajnuna, il-ġurnalisti, u nies ċivili oħra jittieħdu bħala ostaġġi u jinqatlu b’mod tassew krudili. Fl-istess ħin, rajna lill-ħabsin mill-Iraq jiġu abbużati bl-ikrah. F’Darfur, naraw popolazzjonijiet sħaħ li kellhom jaħarbu minn djarhom, u djarhom inqerdu, waqt li l-istupru huwa tattika li jużaw minn jeddhom. Fit-tramuntana taʼ l-Uganda, naraw tfal li jiġu mmankati u sforzati jieħdu sehem f’għemejjel taʼ kattiverija terribbli. F’Beslan, insibu tfal li jittieħdu bħala ostaġġi u jiġu massakrati brutalment.”
Anki f’pajjiżi li jissejħu żviluppati, il-kriminalità minħabba l-mibegħda qed tikber. Per eżempju, Independent News irrapportat li fl-2004 fil-Britannja kien hemm “żjieda taʼ ħdax-il darba iktar vittmi t’attakki jew t’abbuż minħabba r-razziżmu f’dawn l-aħħar għaxar snin.”
Il-bnedmin li huma tant kapaċi jagħmlu t-tajjeb għala jwettqu għemejjel ħżiena bħal dawn? Qatt se neħilsu mill-ħażen? Bħalma juri l-artiklu li jmiss, il-Bibbja tipprovdi tweġibiet sodisfaċenti għal dawn il-mistoqsijiet li jħabblu l-moħħ.
[Sors tal-Istampa f’paġna 2]
QOXRA: Mark Edwards/Still Pictures/Peter Arnold, Inc.