Kif it-​Tajjeb Se Jirbaħ lill-​Ħażin

Is-​Sultan David kien raġel tajjeb. Hu kellu mħabba kbira għal Alla, kien jixxennaq għall-​ġustizzja, u kien jieħu interess bi mħabba fl-​umli. Però, dan l-​istess sultan tajjeb għamel adulterju maʼ mart wieħed mill-​irġiel fdati li kellu. U meta David sar jaf li l-​mara, Batseba, inqabdet tqila minnu, hu mbagħad organizza l-​qtil taʼ żewġha. Imbagħad hu żżewweġ lil Batseba biex jipprova jgħatti d-​delitti tiegħu.—2 Samwel 11:​1-27.

JIDHER ċar li l-​bnedmin huma kapaċi jagħmlu ħafna tajjeb. Imma allura għala jwettqu daqshekk ħażen? Il-​Bibbja tidentifika diversi raġunijiet fundamentali. Din turi wkoll li Alla permezz taʼ Kristu Ġesù se jneħħi l-​ħażen darba għal dejjem.

Ġibda Lejn il-​Ħażen

Is-​Sultan David stess identifika wieħed mill-​kaġuni taʼ dan il-​ħażen. Wara li nkixfulu d-​delitti tiegħu, hu aċċetta r-​responsabbiltà kollha għall-​għemejjel tiegħu. Imbagħad hu kiteb b’sogħba: “Ara, jiena ssawwart fil-​ħtija, u fid-​dnub nisslitni ommi.” (Salm 51:7 [51:​5, NW]) Qatt ma kien l-​iskop t’Alla li l-​ommijiet jildu tfal li jidinbu. Madankollu, meta Eva u mbagħad Adam għażlu li jirribellaw kontra Alla, huma tilfu l-​abbiltà tagħhom li jkollhom tfal li jkunu bla dnub. (Rumani 5:12) Hekk kif ir-​razza taʼ bnedmin imperfetti bdiet tikber, beda jidher ċar li “qalb il-​bniedem miġbuda għall-​ħażen sa minn ċkunitu.”—Ġenesi 8:21.

Jekk ma tiġix kontrollata, din il-​ġibda lejn il-​ħażen twassal għaż-​“żína, . . . il-​mibegħda, il-​ġlied, l-​għira, l-​għadab, it-​tilwim, il-​firda, is-​setet, l-​invidja,” u mġiba qerrieda oħra li l-​Bibbja tiddeskriviha bħala “għemejjel tal-​laħam.” (Galatin 5:​19-21) Fil-​każ tas-​Sultan David, hu ċeda għad-​dgħjufija tal-​laħam u kkommetta ż-​żína, li wasslitu għal ġlied vjolenti. (2 Samwel 12:​1-12) Hu setaʼ rreżista l-​ġibda immorali tiegħu. Minflok, minħabba li qagħad jaħseb fuq ix-​xewqa tiegħu għal Batseba, David segwa l-​eżempju li ddeskriva d-​dixxiplu Ġakbu iktar tard: “Kull bniedem jiġġarrab billi jkun miġbud u mħajjar mix-​xewqa tiegħu stess. Imbagħad, meta x-​xewqa ssir fertili, tiled id-​dnub; u meta d-​dnub jitwettaq, iġib il-​mewt.”—Ġakbu 1:​14, 15.

Il-qtil taʼ folol kbar taʼ nies, l-​istupri, u s-​serq li semmejna fl-​artiklu taʼ qabel huma eżempji estremi taʼ dak li jiġri meta n-​nies iħallu x-​xewqat ħżiena jidderieġu l-​għemejjel tagħhom.

Il-​Ħażen Kaġunat mill-​Injoranza

L-​esperjenza taʼ l-​appostlu Pawlu tenfasizza t-​tieni raġuni għala n-​nies jagħmlu l-​ħażen. Sakemm miet, l-​appostlu Pawlu kiseb reputazzjoni taʼ raġel ġentili u kollu affezzjoni. Hu kien ta minnu nnifsu bla egoiżmu biex jaqdi lil ħutu l-​Kristjani rġiel u nisa. (1 Tessalonikin 2:​7-9) Però, iktar kmieni f’ħajtu, meta kien magħruf bl-​isem Sawl, hu kien ‘jhedded u kellu xewqa kbira li joqtol’ lil dan l-​istess grupp taʼ nies. (Atti 9:​1, 2) Pawlu għala aċċetta u pparteċipa fl-​għemejjel ħżiena li saru kontra l-​Kristjani tal-​bidu? “Għax kont fl-​injoranza,” jgħid hu. (1 Timotju 1:13) Iva, Pawlu qabel kellu “żelu għal Alla, imma mhux skond l-​għarfien eżatt.”—Rumani 10:2.

Bħal Pawlu, ħafna wħud sinċieri ħadu sehem f’għemejjel ħżiena minħabba li ma kellhomx għarfien eżatt tar-​rieda t’Alla. Per eżempju, Ġesù wissa lis-​segwaċi tiegħu: “Ġejja s-​siegħa meta kulmin joqtolkom jimmaġina li qed jagħti servizz sagru lil Alla.” (Ġwanni 16:2) Ix-​Xhieda taʼ Ġeħova llum jesperjenzaw kemm hu minnu l-​kliem taʼ Ġesù. F’ħafna pajjiżi, huma ġew persegwitati u saħansitra maqtulin minn nies li jgħidu li jaqdu lil Alla. Ovvjament, żelu żbaljat bħal dan ma jogħġobx lill-​Alla l-​veru.—1 Tessalonikin 1:6.

L-​Oriġinatur tal-​Ħażen

Ġesù identifika r-​raġuni prinċipali għala jeżisti l-​ħażen. Meta kien qed jindirizza lill-​mexxejja reliġjużi li kellhom il-​ħsieb li joqtluh, hu qal: “Intom minn missierkom ix-​Xitan, u tixtiequ tagħmlu x-​xewqat taʼ missierkom. Dan kien qattiel meta beda.” (Ġwanni 8:44) Kien Satana li għal raġunijiet egoistiċi ħajjar lil Adam u Eva biex jirribellaw kontra Alla. Dik ir-​ribelljoni ġabet id-​dnub—u għalhekk il-​mewt—fuq l-​umanità kollha.

L-attitudni qattiela taʼ Satana dehret iktar fil-​mod kif ittratta lil Ġob. Meta Ġeħova tah il-​permess biex iġarrab l-​integrità taʼ Ġob, Satana ma kienx kuntent għax sempliċement seraqlu kulma kellu. Hu kkaġuna wkoll il-​mewt taʼ l-​għaxar ulied li kellu. (Ġob 1:​9-19) Matul dan l-​aħħar seklu, l-​umanità esperjenzat żjieda taʼ min jinnotaha fil-​ħażen minħabba l-​imperfezzjoni umana u l-​injoranza u minħabba li Satana qed jindaħal dejjem iktar fl-​affarijiet tal-​bnedmin. Il-​Bibbja turi li x-​Xitan kien “twaddab ’l isfel lejn l-​art, u l-​anġli tiegħu twaddbu għal isfel miegħu.” Dik l-​istess profezija bassret b’eżattezza li minħabba li Satana ntefaʼ ’l barra hu kien se joħloq “gwaj għall-​art” li qatt ma kien hawn bħalu. Waqt li Satana ma jistax jisforza lin-​nies biex jagħmlu l-​ħażen, hu tas-​sengħa meta jiġi biex “iqarraq bl-​art abitata kollha.”—Rivelazzjoni 12:​9, 12.

Titneħħa l-​Ġibda Lejn il-​Ħażen

Jekk il-​ħażen irid jiġi eliminat għalkollox mis-​soċjetà umana, iridu jitneħħew il-​ġibda li l-​bniedem għandu minn ġewwa lejn il-​ħażen, in-​nuqqas t’għarfien eżatt li għandu, u l-​influwenza taʼ Satana. L-​ewwelnett, kif tistaʼ l-​ġibda li għandu l-​bniedem minn ġewwa lejn id-​dnub titneħħa minn qalbu?

Ebda tabib uman jew mediċina magħmula mill-​bniedem ma tistaʼ tagħmel din il-​biċċa xogħol. Però, Alla Ġeħova pprovda kura għad-​dnub li jintiret u l-​imperfezzjoni għal dawk kollha li huma lesti jaċċettawha. L-​appostlu Ġwanni kiteb: “Id-​demm taʼ Ġesù . . . jnaddafna minn kull dnub.” (1 Ġwanni 1:7) Meta r-​raġel perfett Ġesù offra ħajtu minn jeddu, hu “ġarr dnubietna f’ġismu stess fuq iz-​zokk, sabiex neħilsu mid-​dnubiet u ngħixu għall-​ġustizzja.” (1 Pietru 2:24) Il-​mewta taʼ sagrifiċċju taʼ Ġesù kellha tneħħi l-​effetti taʼ l-​għemejjel ħżiena taʼ Adam. Pawlu jgħid li Kristu Ġesù sar “għal kulħadd bħala fidwa ekwivalenti.” (1 Timotju 2:6) Iva, il-​mewt taʼ Ġesù fetħet it-​triq għall-​umanità kollha biex terġaʼ tikseb il-​perfezzjoni li tilef Adam.

Però, għandek mnejn tistaqsi, ‘Jekk il-​mewt taʼ Ġesù xi 2,000 sena ilu għamlitha possibbli għall-​umanità biex terġaʼ tikseb il-​perfezzjoni, il-​ħażen u l-​mewt għala għadhom jeżistu?’ Meta nsibu t-​tweġiba għal din il-​mistoqsija nistgħu niġu megħjunin inneħħu t-​tieni kaġun tal-​ħażen—il-​fatt li l-​bniedem ma jafx x’inhuma l-​iskopijiet t’Alla.

It-​Tjieba Tissaħħaħ bl-​Għarfien Eżatt

Meta individwu sinċier jikseb għarfien eżatt dwar dak li Ġeħova u Ġesù qed jagħmlu issa biex jeliminaw il-​ħażen, jistaʼ jiġi megħjun biex ma jmurx bl-​injoranza jaċċetta għemejjel ħżiena, jew agħar minn hekk, isir ġellied “fil-​fatt . . . kontra Alla.” (Atti 5:​38, 39) Alla Ġeħova lest li jagħlaq għajnejh għall-​iżbalji tal-​passat li saru fl-​injoranza. Meta kien qed jitkellem f’Ateni, l-​appostlu Pawlu qal: “Alla għalaq għajnejh għal żminijiet taʼ injoranza bħal din, iżda issa qed jgħid lill-​bnedmin kullimkien li għandhom jindmu lkoll. Għax hu stabbilixxa jum li fih bi ħsiebu jiġġudika l-​art abitata fis-​sewwa permezz taʼ bniedem li ħatar, u ta garanzija lill-​bnedmin kollha billi rxoxtah mill-​imwiet.”—Atti 17:​30, 31.

Pawlu kien jaf mill-​esperjenza persunali li Ġesù kien tqajjem mill-​mewt, għax Ġesù stess irxoxtat kellem lil Pawlu u waqqfu milli jippersegwita lill-​Kristjani tal-​bidu. (Atti 9:​3-7) Ladarba Pawlu rċieva l-​għarfien eżatt dwar l-​iskopijiet t’Alla, hu nbidel u sar individwu tajjeb ġenwinament meta imita lil Kristu. (1 Korintin 11:1; Kolossin 3:​9, 10) Iktar minn hekk, Pawlu biż-​żelu ppriedka “din l-​aħbar tajba tas-​Saltna.” (Mattew 24:14) Matul il-​kważi 2,000 sena wara li Ġesù miet u ġie rxoxtat, Kristu għażel mill-​umanità lil dawk li, bħal Pawlu, se jaħkmu miegħu fis-​Saltna tiegħu.—Rivelazzjoni 5:​9, 10.

Fis-seklu li għadda u sal-​ġurnata taʼ llum, ix-​Xhieda taʼ Ġeħova wettqu biż-​żelu l-​inkarigu taʼ Ġesù: “Għalhekk, morru u agħmlu dixxipli min-​nies tal-​ġnus kollha, għammduhom fl-​isem tal-​Missier u taʼ l-​Iben u taʼ l-​ispirtu qaddis, u għallmuhom josservaw dak kollu li ordnajtilkom.” (Mattew 28:​19, 20) Dawk li wieġbu għal dan il-​messaġġ għandhom il-​prospett li jgħixu għal dejjem f’art taħt il-​ħakma tal-​gvern tas-​sema taʼ Kristu. Ġesù qal: “Il-​ħajja taʼ dejjem tfisser dan: li jieħdu għarfien dwarek, l-​uniku Alla veru, u dwar Ġesù Kristu li int bgħatt.” (Ġwanni 17:3) L-​akbar ġid li jistaʼ jagħmel individwu lil ħaddieħor hu li jgħinu jikseb dan l-​għarfien.

Dawk li jħaddnu din l-​aħbar tajba tas-​Saltna juru kwalitajiet bħall-​“imħabba, il-​ferħ, il-​paċi, is-​sabar fit-​tul, il-​qalb tajba, it-​tjubija, il-​fidi, il-​ħlewwa, ir-​rażna,” minkejja l-​ħażen kollu li għandhom madwarhom. (Galatin 5:​22, 23) Biex jimitaw lil Kristu, huma ma ‘jroddu lil ħadd ħsara bi ħsara.’ (Rumani 12:17) B’mod individwali huma jistinkaw biex ‘dejjem jirbħu l-​ħażen bit-​tajjeb.’—Rumani 12:21; Mattew 5:44.

L-​Aħħar Rebħa fuq il-​Ħażen

Waħedhom, il-​bnedmin qatt ma se jirnexxilhom jegħlbu l-​kaġun primarju tal-​ħażen, Satana x-​Xitan. Però, Ġeħova dalwaqt se juża lil Ġesù biex jisħaq ras Satana. (Ġenesi 3:15; Rumani 16:20) Ukoll, dalwaqt Ġeħova se jidderieġi lil Kristu Ġesù biex ‘ifarrak u jtemm’ is-​sistemi politiċi kollha, li ħafna minnhom ikkaġunaw tant ħażen matul l-​istorja. (Danjel 2:44; Koħèlet 8:9) Matul dan il-​jum taʼ ġudizzju li ġej, dawk kollha li “ma jobdux l-​aħbar tajba dwar il-​Mulej tagħna Ġesù . . . jieħdu l-​kastig ġudizzjarju taʼ qerda għal dejjem.”—2 Tessalonikin 1:​8, 9; Sofonija 1:​14-18.

Ladarba jitneħħa Satana u dawk li jappoġġawh, Ġesù se jgħin mis-​sema lil dawk li jsalvaw biex jirrestawraw l-​art għall-​kundizzjoni oriġinali tagħha. Ukoll, Kristu se jirxoxta lil dawk li jistħoqqilhom l-​opportunità li jgħixu fuq l-​art restawrata. (Luqa 23:​32, 39-​43; Ġwanni 5:​26-​29) Meta jagħmel dan se jħassar xi ftit mill-​effetti tal-​ħażen li batiet l-​umanità.

Ġeħova mhux se jisforza lin-​nies biex jobdu l-​aħbar tajba dwar Ġesù. Madankollu, hu qed jagħti lin-​nies l-​opportunità biex jieħdu l-​għarfien li jwassal għall-​ħajja. Huwa vitali li int tieħu vantaġġ minn din l-​opportunità issa! (Sofonija 2:​2, 3) Jekk tagħmel dan, se titgħallem kif tkampa maʼ kull ħażen li issa qed iħassarlek ħajtek. Se tara wkoll kif Kristu se jmexxi r-​rebħa finali fuq il-​ħażen.—Rivelazzjoni 19:​11-​16; 20:​1-3, 10; 21:​3, 4.

[Stampa f’paġna 5]

Sawl ma qiesx l-​għemejjel bħala ħżiena minħabba li ma kellux għarfien eżatt

[Stampa f’paġna 7]

L-​akbar ġid li jistaʼ jagħmel individwu lil ħaddieħor hu li jgħinu jikseb l-​għarfien t’Alla