Il-​Ħarsa tal-​Bibbja

X’Jagħmilna Tajbin jew Ħżiena?

IL-​PAĠNI tal-​istorja huma mimlijin rakkonti taʼ mibegħda u tixrid taʼ demm. Però, minn ġrajjiet traġiċi spiss joħorġu atti straordinarji taʼ qalb tajba u sagrifiċċju persunali. Għala jiġri li individwu wieħed isir qattiel bla qalb u ieħor isir umanitarju ħanin? Għala kultant jidhru karatteristiki annimalistiċi fl-​imġiba umana?

L-​Imperfezzjoni u l-​Kuxjenza

Il-​Bibbja tgħid ċar u tond: “Qalb il-​bniedem miġbuda għall-​ħażen sa minn ċkunitu.” (Ġenesi 8:21, Għaqda Biblika Maltija) B’hekk, it-​tfal huma inklinati lejn il-​bluha. (Proverbji 22:15) Mit-​twelid, ilkoll kemm aħna inklinati biex nagħmlu l-​ħażen. (Salm 51:5) Li tagħmel it-​tajjeb jirrikjedi sforz, bħal li taqdef kontra l-​kurrent.

Minkejja dan, aħna ngħatajna wkoll kuxjenza. Dan is-​sens li nitwieldu bih taʼ x’inhu tajjeb u ħażin jinfluwenza lill-​biċċa l-​kbira minna biex naġixxu b’tali mod li l-​maġġuranza tan-​nies iqisuh bħala rett. Minħabba f’hekk, anki dawk li m’għandhom ebda taħriġ morali jistgħu jkunu magħrufin għall-​benevolenza tagħhom. (Rumani 2:14, 15) Madankollu, kif semmejna qabel, l-​inklinazzjoni tagħna lejn il-​ħażen tistaʼ toħloq konflitt ġewwa fina. X’hemm iktar li jistaʼ jinfluwenzana fit-​taqbida tagħna bejn it-​tajjeb u l-​ħażin?

Ambjent Imħassar

Il-​kamaleont ibiddel il-​kulur biex jaqbel mal-​ambjent li jkun fih. B’mod simili, hemm probabbiltà akbar li dawk li jissieħbu mal-​kriminali jadottaw karatteristiki kriminali. Il-​Bibbja twissi: “Tmurx wara l-​folla għal skopijiet ħżiena.” (Eżodu 23:2) Mill-​banda l-​oħra, sħubija regulari maʼ dawk li huma onesti, sewwa, u retti moralment tqanqal lil dak li jkun biex jagħmel it-​tajjeb.—Proverbji 13:20.

Madankollu, ma nistgħux inqisu lilna nfusna meħlusin mill-​influwenza tal-​ħażen sempliċement għax ma nissiħbux personalment maʼ dawk li huma involuti f’għemil ħażin. Minħabba l-​imperfezzjoni tagħna, ħsibijiet ħżiena jistgħu jkun moħbijin f’moħħna, jistennew opportunità biex ifiġġu. (Ġenesi 4:7) Iżjed minn hekk, il-​ħażen jistaʼ jidħol f’darna permezz tal-​mezzi tax-​xandir. Logħob tal-​kompjuter, programmi tat-​televixin, u films spiss jigglorifikaw il-​vjolenza u l-​atti taʼ vendetta. Anki jekk regolarment naraw l-​aħbarijiet taʼ madwar id-​dinja jew lokali nistgħu nsiru insensittivi għall-​ħażen tas-​sofferenza u d-​diqa umana.

X’inhu l-​kaġun ewlieni taʼ dan l-​ambjent imħassar? Il-​Bibbja twieġeb: “Id-​dinja kollha qiegħda taħt il-​qawwa tal-​Ħażin.” (1 Ġwanni 5:19) Fl-​Iskrittura, dan il-​“Ħażin,” Satana x-​Xitan, hu mikxuf bħala giddieb u qattiel. (Ġwanni 8:44) Hu jxerred il-​ħażen permezz tal-​influwenza tad-​dinja tiegħu.

Peress li dawn il-​fatturi kollha jsawru l-​attitudnijiet u l-​azzjonijiet tagħna, xi wħud għandhom mnejn jirraġunaw li m’għandhomx jingħataw tort għall-​atti ħżiena tagħhom. Iżda, x’inhi r-​realtà? Sewwasew bħalma steering jikkontrolla d-​direzzjoni taʼ karozza u tmun jikkontrolla d-​direzzjoni taʼ vapur, il-​moħħ jikkontrolla l-​ġisem.

Tajjeb jew Ħażin —L-​Għażla Hi Tiegħek

Qabel kull att apposta, tajjeb jew ħażin, ikun hemm ħsieb. Jekk dak li jkun jiżraʼ ħsibijiet pożittivi u virtużi se jaħsad frott tajjeb. Mill-​banda l-​oħra, jekk iħalli żrieragħ taʼ xewqa egoistika jibdew jikbru f’moħħu, x’aktarx li r-​riżultat se jkun ħsad kbir taʼ ħażen. (Luqa 6:43-​45; Ġakbu 1:14, 15) B’hekk, jistaʼ jingħad li l-​bniedem hu tajjeb jew ħażin daqskemm jagħżel li jkun.

B’ferħ, il-​Bibbja tindika li kulħadd jistaʼ jitgħallem jagħmel it-​tajjeb. (Isaija 1:16, 17) L-​imħabba hi l-​forza li tqanqal lil dak li jkun biex jagħmel it-​tajjeb, ladarba “l-​imħabba ma tagħmilx ħsara lill-​proxxmu.” (Rumani 13:10) Meta nikkultivaw l-​imħabba għan-​nies, lanqas jgħaddilna minn moħħna li nittrattaw lil xi ħadd b’mod ħażin.

Ray, minn Pennsylvania, l-​Istati Uniti, tgħallem dan. Peress li tgħallem jiġġieled minn età żgħira, ma damx ma ngħata l-​laqam Punch, li rrifletta kemm kien lest jiġġieled. Kellu wkoll il-​problema li jitlagħlu malajr. Madankollu, bl-​applikar tal-​prinċipji Bibliċi, bil-​mod il-​mod għamel xi bidliet. Imma dan ma kienx dejjem faċli. Kultant ħassu bħalma ħassu Pawlu, wieħed mill-​kittieba tal-​Bibbja: “Meta nixtieq nagħmel dak li hu sewwa, dak li hu ħażin ikolli fija.” (Rumani 7:21) Issa, wara snin taʼ sforz determinat, Ray hu kapaċi ‘jirbaħ il-​ħażen bit-​tajjeb.’—Rumani 12:21.

Għala hu taʼ min jagħmel l-​isforz biex ‘jimxi fit-​triq tat-​tajbin’? (Proverbji 2:20-​22) Għaliex fl-​aħħar mill-​aħħar it-​tajjeb se jirbaħ lill-​ħażen. Il-​Bibbja tgħid: “Dawk li jagħmlu l-​ħażen se jitqaċċtu ’l barra . . . Ftit ieħor biss, u l-​ħażin ma jkunx iktar . . . Imma l-​ġwejdin se jirtu l-​art, u bi sliem kotran jitgħaxxqu ferm.” (Salm 37:9-​11) Alla se jneħħi kull traċċa taʼ ħażen. X’futur glorjuż hemm jistenna lil dawk li jaħdmu b’mod diliġenti biex jipprattikaw it-​tajjeb!

QATT ĦSIBT DWAR DAN?

● Min hu responsabbli għall-​azzjonijiet tagħna?​—Ġakbu 1:14.

● Huwa possibbli li nbiddlu ħajjitna?​—Isaija 1:16, 17.

● Qatt se jintemm il-​ħażen?​—Salm 37:9, 10; Proverbji 2:20-​22.

[Stampi f’paġna 25]

Il-​bniedem hu tajjeb jew ħażin daqskemm jagħżel li jkun