1-3. Ġesù b’liema mod jidħol f’Ġerusalemm, u wħud mill-​folla li qed josservaw għala forsi jibqgħu mistagħġbin?

F’ĠERUSALEMM hemm għagħa kbira t’eċċitament. Ġej raġel importanti! ’Il barra mill-​belt, in-​nies qed jinġemgħu tul it-​triq. Jinsabu ħerqanin biex jilqgħu lil dan ir-​raġel, għax xi wħud qed jgħidu li hu werriet tas-​Sultan David u l-​Ħakkiem bi dritt taʼ Israel. Għadd minnhom iġibu xi friegħi tal-​palm biex ixejruhom huma u jilqgħuh; oħrajn jifirxu lbiesi u friegħi tas-​siġar fit-​triq biex iwittu l-​mogħdija quddiemu. (Mattew 21:7, 8; Ġwanni 12:12, 13) Ħafna x’aktarx qed jaħsbu dwar il-​mod li bih se jidħol il-​belt.

² Xi wħud għandhom mnejn qed jistennew li se jaraw wirja spettakolari. Huma żgur li jafu bi rġiel importanti li daħlu b’mod impressjonanti. Per eżempju, Absalom, bin David, għamel lilu nnifsu sultan; hu kellu 50 raġel jiġru quddiem il-​karru tiegħu. (2 Samwel 15:1, 10) Il-​ħakkiem Ruman Ġulju Ċesari ried saħansitra affarijiet iktar elaborati; darba minnhom hu mexxa purċissjoni trijonfali sal-​kapitolju Ruman, iċ-​ċentru politiku taʼ dak iż-​żmien, b’40 iljunfant iġorru l-​fanali fuq il-​lemin u fuq ix-​xellug tiegħu! Madankollu, issa n-​nies taʼ Ġerusalemm qed jistennew raġel ħafna iktar importanti. Jekk il-​folol jifhmux dan bis-​sħiħ jew le, dan hu l-​Messija, l-​aqwa bniedem li qatt għex. Però, meta jidħol il-​belt dak li fil-​futur kellu jkun Sultan, xi wħud għandhom mnejn jibqgħu mistagħġbin.

³ Huma ma jaraw ebda karru, ebda ġerrejja, ebda żwiemel—u ċertament ebda ljunfanti. Minflok, Ġesù daħal riekeb fuq ħmar, annimal komuni tat-​tagħbija.a La r-​rikkieb u lanqas il-​ħmar ma huma mżejnin bi lbies elaborat. Minflok sarġ li jiswa ħafna flus, hemm xi lbiesi li s-​segwaċi l-​iktar qrib taʼ Ġesù firxu fuq dahar l-​annimal. Ġesù għala jagħżel li jidħol Ġerusalemm b’daqstant umiltà, meta rġiel li kienu taʼ ħafna inqas importanza insistew li jkollhom ħafna iktar pompa u ċerimonja?

4. Il-​Bibbja x’bassret dwar il-​mod li bih is-​Sultan Messjaniku kellu jidħol Ġerusalemm?

⁴ Ġesù qed iwettaq profezija: “Kun ferħana ferm . . . Għajjat bil-​ferħ taʼ rebħa, O bint Ġerusalemm. Ara! Is-​sultan tiegħek jiġi għandek. Hu ġust, iva, salvat; umli, u riekeb fuq ħmar.” (Żakkarija 9:9) Din il-​profezija wriet li l-​Midluk t’Alla, il-​Messija, xi darba kellu jirrivela lilu nnifsu lin-​nies taʼ Ġerusalemm bħala s-​Sultan maħtur minn Alla. Iżjed minn hekk, il-​mod kif jagħmel dan, inkluż il-​fatt li jagħżel li jirkeb fuq ħmar, kellu jikxef kwalità sabiħa f’qalbu—l-​umiltà.

5. L-​umiltà taʼ Ġesù għala tqanqlilna qalbna meta naħsbu dwarha, u għala huwa vitali li nitgħallmu nimitaw lil Ġesù f’dan ir-​rigward?

⁵ L-​umiltà taʼ Ġesù hi fost l-​iktar kwalitajiet tiegħu li jiġbduk, waħda li tqanqlilna qalbna meta naħsbu dwarha. Bħalma ddiskutejna fil-​kapitlu taʼ qabel, Ġesù biss hu “t-​triq, il-​verità, u l-​ħajja.” (Ġwanni 14:6) B’mod ċar, ħadd mill-​ħafna biljuni taʼ nies li għexu fuq din l-​art ma kienu importanti daqs l-​Iben t’Alla. Madankollu, Ġesù qatt ma wera saħansitra traċċa tal-​kburija, is-​suppervja, jew l-​arroganza li juru għadd bla qjies taʼ bnedmin imperfetti. Sabiex inkunu segwaċi taʼ Kristu, irridu niġġieldu t-​tendenza li nċedu għall-​kburija. (Ġakbu 4:6) Ftakar, Ġeħova jobgħod is-​suppervja. Għalhekk, huwa vitali li nitgħallmu nimitaw l-​umiltà taʼ Ġesù.

Rekord Twil f’li Juri Umiltà

6. X’inhi l-​umiltà, u Ġeħova kif kien jaf li l-​Messija kien se jkun umli?

⁶ Attitudni t’umiltà hija meta dak li jkun ma jkunx supperv jew kburi. Hija kwalità li tibda fil-​qalb u li tintwera bil-​kliem, bil-​kondotta, u bil-​mod kif individwu jittratta m’oħrajn. Ġeħova kif kien jaf li l-​Messija kien se jkun umli? Kien jaf li Ibnu kien jirrifletti l-​eżempju perfett tiegħu stess t’umiltà. (Ġwanni 10:15) Ukoll, hu kien ra l-​umiltà taʼ l-​Iben fl-​azzjoni. Kif?

7-9. (a) Mikiel kif wera l-​umiltà fil-​konfrontazzjoni tiegħu maʼ Satana? (b) Il-​Kristjani kif jistgħu jimitaw lil Mikiel f’li juru l-​umiltà?

⁷ Il-​ktieb taʼ Ġuda jagħtina eżempju affaxxinanti: “Meta Mikiel l-​arkanġlu kellu tilwima max-​Xitan u kien qed jargumenta miegħu dwar il-​ġisem taʼ Mosè, ma ssograx jikkundannah bit-​tgħajjir, imma qallu: ‘Ħa jċanfrek Ġeħova.’” (Ġuda 9) Mikiel hu isem mogħti lil Ġesù—qabel u wara l-​ħajja tiegħu fuq l-​art—fl-​irwol tiegħu bħala arkanġlu, jew kap taʼ l-​armata t’anġli taʼ Ġeħova fis-​sema.b (1 Tessalonikin 4:16) Però, innota kif Mikiel ħa ħsieb din il-​konfrontazzjoni maʼ Satana.

⁸ Ir-​rakkont taʼ Ġuda ma jgħidilniex x’ried jagħmel Satana bil-​ġisem taʼ Mosè, imma nistgħu nkunu ċerti li x-​Xitan kellu xi skop mill-​agħar f’moħħu. Forsi ried jinkuraġġixxi l-​użu ħażin tal-​katavru taʼ dan ir-​raġel leali f’qima falza. Filwaqt li Mikiel irreżista l-​iskop mill-​agħar taʼ Satana, hu wera wkoll rażna taʼ l-​għaġeb. Satana żgur li kien ħaqqu ċanfira, imma Mikiel, li f’dak il-​waqt li kien qed jitlewwem maʼ Satana kien għadu ma ngħatax id-​dritt li “jiġġudika lil kulħadd,” ħass li ġudizzju bħal dan kellu jiġi biss mingħand Alla Ġeħova. (Ġwanni 5:22) Bħala l-​arkanġlu, Mikiel kellu awtorità kbira. Madankollu, hu b’umiltà ħalla l-​kwistjoni f’idejn Ġeħova minflok ma pprova jaħtaf iktar awtorità. Minbarra l-​umiltà, hu wera wkoll il-​modestja, jiġifieri, kien konxju tal-​limitazzjonijiet tiegħu.

⁹ Kien hemm raġuni għala Ġuda ġie ispirat biex jikteb dwar din il-​ġrajja. B’sogħba, xi Kristjani fi żmien Ġuda ma kinux umli. B’suppervja kienu qed “imaqdru dak kollu li fil-​fatt ma [kinux jafu] dwaru.” (Ġuda 10) Kemm hu faċli għalina bħala bnedmin imperfetti li nħallu l-​kburija tagħna tegħlibna! Meta ma nifhmux xi ħaġa li tkun saret fil-​kongregazzjoni Kristjana—forsi li tinvolvi deċiżjoni meħuda mill-​ġemgħa taʼ l-​anzjani—kif nirreaġixxu? Kieku kellna nieħdu sehem f’diskors negattiv u kritiku avolja ma nkunux nafu l-​fatturi kollha wara dawn id-​deċiżjonijiet, ma nkunux forsi qed nuru nuqqas t’umiltà? Minflok, ejja nimitaw lil Mikiel, jew Ġesù, billi nżommu lura milli niġġudikaw kwistjonijiet li fuqhom m’għandna l-​ebda awtorità mogħtija minn Alla.

10, 11. (a) X’inhu rimarkevoli dwar il-​fatt li l-​Iben t’Alla minn jeddu aċċetta l-​inkarigu li jinżel fuq l-​art? (b) Kif nistgħu nimitaw l-​umiltà taʼ Ġesù?

¹⁰ L-​Iben t’Alla wera l-​umiltà wkoll billi aċċetta l-​inkarigu biex jinżel fuq l-​art. Ikkunsidra dak li kellu jħalli warajh. Hu kien l-​arkanġlu. Kien ukoll “il-​Kelma”—il-​Kelliemi taʼ Ġeħova nnifsu. (Ġwanni 1:1-​3) Hu kien jgħammar fis-​sema, il-​“post eżaltat . . . taʼ qdusija u sbuħija” taʼ Ġeħova. (Isaija 63:15) Minkejja dan, l-​Iben “xejjen lilu nnifsu u ħa s-​sura taʼ lsir u sar jixbah lill-​bnedmin.” (Filippin 2:7) Aħseb ftit dwar x’kien jinvolvi dan l-​inkarigu fuq l-​art! Ħajtu tpoġġiet fil-​ġuf taʼ verġni Lhudija biex tiżviluppa għal disa’ xhur sabiex issir tarbija umana. Hu twieled f’familja taʼ mastrudaxxa fqir bħala tarbija li ma tista’ tagħmel xejn u mbagħad kiber biex sar tifel, tfajjel, u adoloxxenti. Għalkemm hu nnifsu kien perfett, matul żgħożitu baqa’ sottomess lejn ġenituri umani imperfetti. (Luqa 2:40, 51, 52) X’umiltà straordinarja din!

¹¹ Nistgħu aħna nimitaw l-​umiltà taʼ Ġesù billi minn jeddna naċċettaw inkarigi taʼ servizz li kultant jidhru li jnaqqsulna d-​dinjità? Per eżempju, l-​inkarigu tagħna biex nippridkaw l-​aħbar tajba tas-​Saltna t’Alla jista’ jidher li jnaqqas id-​dinjità tagħna meta n-​nies juru apatija, iwaqqgħuna għaċ-​ċajt, jew ikunu ħorox. (Mattew 28:19, 20) Però, jekk nissaportu f’dan ix-​xogħol, forsi nkunu nistgħu ngħinu biex insalvaw il-​ħajjiet. Kemm jekk insalvaw il-​ħajjiet u kemm jekk le, se nitgħallmu ħafna dwar l-​umiltà, u se nsegwu l-​passi taʼ Sidna, Ġesù Kristu.

L-​Umiltà taʼ Ġesù Bħala Bniedem

12-14. (a) Ġesù kif wera l-​umiltà meta n-​nies kienu jfaħħruh? (b) Ġesù kif wera l-​umiltà meta ttratta m’oħrajn? (ċ) X’juri li l-​umiltà taʼ Ġesù ma kinitx sempliċi kwistjoni taʼ formalità jew manjieri tajbin?

¹² Mill-​bidu sa l-​aħħar, fil-​ministeru taʼ Ġesù fuq l-​art, kienet tispikka l-​umiltà. Hu wrieha bil-​mod kif idderieġa t-​tifħir u l-​glorja kollha lejn Missieru. In-​nies kultant faħħru lil Ġesù minħabba l-​għerf taʼ kliemu, il-​qawwa tal-​mirakli tiegħu, saħansitra kemm kien twajjeb fil-​karattru tiegħu. Darba wara l-​oħra, Ġesù m’aċċettax il-​glorja għalih innifsu u minflok idderiġieha lejn Ġeħova.—Marku 10:17, 18; Ġwanni 7:15, 16.

¹³ Ġesù wera l-​umiltà fil-​mod kif ittratta lin-​nies. Fil-​fatt, għamilha ċara li hu ġie fuq l-​art biex jaqdi lil oħrajn, mhux biex ikun moqdi. (Mattew 20:28) Hu wera l-​umiltà bil-​kuntatt ġwejjed u raġunevoli li kellu man-​nies. Meta s-​segwaċi tiegħu ddiżappuntawh, hu ma kkritikahomx bl-​aħrax; hu baqa’ jipprova jilħqilhom qalbhom. (Mattew 26:39-​41) Meta l-​folol ma ħallewhx ifittex il-​kwiet, il-​mistrieħ, u l-​privatezza, hu ma bagħathomx ’l hemm imma baqa’ jagħti minnu nnifsu, billi ‘għallimhom ħafna affarijiet.’ (Marku 6:30-​34) Meta mara li ma kinitx Israelija baqgħet titolbu biex ifejjaq lil bintha, hu għall-​ewwel taha x’tifhem li ma kienx se jagħmel dan. Madankollu, ma rrifjutax b’rabja; hu ċeda għal dak li talbitu minħabba l-​fidi straordinarja tagħha, kif se niddiskutu f’Kapitlu 14.—Mattew 15:22-​28.

¹⁴ B’ħafna modi, Ġesù wettaq kliemu stess dwaru nnifsu: “Jien ġwejjed u umli f’qalbi.” (Mattew 11:29) L-​umiltà tiegħu ma kinitx superfiċjali, sempliċi kwistjoni taʼ formalità jew manjieri tajbin. Ġiet minn qalbu, mill-​ġewwieni tiegħu. Għalhekk, mhux taʼ b’xejn li Ġesù kien iqisha importanti ħafna li jgħallem lis-​segwaċi tiegħu biex ikunu umli!

Għallem lis-​Segwaċi Tiegħu Jkunu Umli

15, 16. Liema kuntrast għamel Ġesù rigward l-​attitudni tal-​ħakkiema dinjin u l-​attitudni li s-​segwaċi tiegħu kellhom bżonn jikkultivaw?

¹⁵ L-​appostli taʼ Ġesù damu ma kkultivaw l-​umiltà. Ġesù ġie mqanqal biex għal darba wara l-​oħra jipprova jgħallimhom ikunu umli. Per eżempju, darba minnhom Ġakbu u Ġwanni, permezz t’ommhom, talbu lil Ġesù jwegħedhom pożizzjonijiet għoljin fis-​Saltna t’Alla. B’modestja, Ġesù wieġeb: “Li toqogħdu bil-​qiegħda fuq il-​lemin u fuq ix-​xellug tiegħi ma nistax nagħtih jien, imma hu taʼ dawk li tħejja għalihom minn Missieri.” L-​għaxar appostli oħrajn “xejn ma ħadu pjaċir” b’Ġakbu u Ġwanni. (Mattew 20:20-​24) Ġesù kif ittrattaha din il-​problema?

¹⁶ Hu b’qalb tajba ċanfarhom ilkoll, billi qal: “Intom tafu li l-​ħakkiema tal-​ġnus jiddominawhom u l-​kbarat għandhom awtorità fuqhom. Dan m’għandux ikun fostkom; imma kulmin irid isir kbir fostkom irid ikun il-​qaddej tagħkom, u kulmin irid ikun l-​ewwel fostkom irid ikun l-​ilsir tagħkom.” (Mattew 20:25-​27) L-​appostli x’aktarx li kienu raw kemm setgħu jkunu kburin, ambizzjużi, u egoisti “l-​ħakkiema tal-​ġnus.” Ġesù wera li s-​segwaċi tiegħu kellhom ikunu differenti minn dawn it-​tiranni għatxana għall-​poter. Kellhom bżonn ikunu umli. Fehmuh il-​punt l-​appostli?

17-19. (a) F’lejliet il-​mewt tiegħu, Ġesù b’liema mod memorabbli għallem lill-​appostli tiegħu lezzjoni dwar l-​umiltà? (b) Liema kienet l-​iktar lezzjoni qawwija dwar l-​umiltà li Ġesù għallem bħala bniedem?

¹⁷ Ma kienx faċli għalihom. Din la kienet l-​ewwel u lanqas l-​aħħar darba li Ġesù għallem lezzjoni bħal din. Iktar kmieni, meta kienu argumentaw dwar min minnhom kien l-​akbar, hu kien poġġa tifel żgħir f’nofshom u qalilhom biex jixbhu iktar lit-​tfal, li għandhom it-​tendenza li ma jkunux kburin u ambizzjużi, u ma jaħsbux dwar pożizzjonijiet, affarijiet li huma tant komuni fost l-​adulti. (Mattew 18:1-​4) Minkejja dan, proprju lejliet il-​mewt tiegħu, hu ra li l-​appostli tiegħu kienu għadhom qed jissieltu mal-​kburija. Imbagħad għallimhom lezzjoni memorabbli ħafna. Hu ħażżem lilu nnifsu b’xugaman u wettaq dak li kien meqjus bħala l-​iktar xogħol li jnaqqas id-​dinjità, xogħol li l-​ilsiera lura f’dak iż-​żmien kienu jwettqu għall-​mistidnin. Ġesù ħasel saqajn kull wieħed mill-​appostli tiegħu—inkluż Ġuda, li kien se jittradih!—Ġwanni 13:1-​11.

¹⁸ Ġesù għenhom jifhmu l-​punt meta qalilhom: “Ħallejtilkom mudell.” (Ġwanni 13:15) Messitilhom qalbhom din il-​lezzjoni issa? Ikkunsidra dan, iktar tard dak il-​lejl stess kellhom argument ieħor dwar min kien l-​akbar fosthom! (Luqa 22:24-​27) Xorta waħda, Ġesù baqa’ juri l-​paċenzja magħhom u jgħallimhom bl-​umiltà. Imbagħad kompla billi ta l-​iktar lezzjoni qawwija: “Umilja ruħu u sar ubbidjenti sal-​mewt, iva, sal-​mewt fuq zokk tat-​tortura.” (Filippin 2:8) Ġesù minn jeddu ssottometta ruħu għal mewta umiljanti, billi ġie kundannat b’mod żbaljat bħala kriminal u midgħi. B’hekk, l-​Iben t’Alla wera li kien uniku, għaliex fost il-​ħlejjaq kollha ta’ Ġeħova, Ġesù wera l-​umiltà b’mod perfett u bis-​sħiħ.

¹⁹ Forsi kienet din—l-​aħħar lezzjoni dwar l-​umiltà li Ġesù għallem bħala bniedem—li naqqxet il-​kwalità taʼ l-​umiltà fi qlub l-​appostli leali tiegħu b’mod li ma jitħassarx. Il-​Bibbja tgħidilna li snin, saħansitra għaxriet taʼ snin wara, dawn l-​irġiel kienu għadhom għaddejjin b’xogħolhom bl-​umiltà. Xi ngħidu għalina?

Int Se Ssegwi l-​Eżempju li Ħalla Ġesù?

20. Kif nistgħu nkunu nafu jekk aħniex umli f’qalbna?

²⁰ Pawlu jwissina lkoll: “Żommu din l-​attitudni mentali fikom li kienet ukoll fi Kristu Ġesù.” (Filippin 2:5) Bħal Ġesù, irridu nkunu umli f’qalbna. Kif nistgħu nkunu nafu jekk aħniex umli f’qalbna? Ikkunsidra dan, Pawlu jfakkarna li m’għandna nagħmlu ‘xejn bi ġlied jew bi kburija, imma b’umiltà nqisu lill-​oħrajn superjuri għalina.’ (Filippin 2:3) Għalhekk, it-​tweġiba għal din il-​mistoqsija tiddependi minn kif inqisu lill-​oħrajn meta nqabbluhom magħna nfusna. Irridu nqisuhom bħala superjuri, bħala iktar importanti, minna nfusna. Int se tapplikah dan il-​parir?

21, 22. (a) L-​indokraturi Kristjani għala għandhom bżonn ikunu umli? (b) Kif nistgħu nuru li aħna mħażżmin bl-​umiltà?

²¹ Ħafna snin wara l-​mewt taʼ Ġesù, l-​appostlu Pietru kien għadu qed jaħseb dwar l-​importanza taʼ l-​umiltà. Pietru għallem lill-​indokraturi Kristjani biex iwettqu l-​obbligi tagħhom bl-​umiltà, billi qatt ma jiddominaw fuq in-​nagħaġ taʼ Ġeħova. (1 Pietru 5:2, 3) Ir-​responsabbiltà li wieħed jista’ jkollu ma tiġġustifikahx biex ikun kburi. Għall-​kuntrarju, ir-​responsabbiltà żżid il-​bżonn li jkun hemm umiltà ġenwina. (Luqa 12:48) M’għandniex xi ngħidu, din il-​kwalità m’hijiex vitali biss għall-​indokraturi imma għal kull Kristjan.

²² Pietru żgur qatt ma nesa dak il-​lejl meta Ġesù kien ħasillu saqajh—minkejja li Pietru nnifsu kien oġġezzjona! (Ġwanni 13:6-​10) Pietru kiteb lill-​Kristjani: “Ilkoll kemm intom tħażżmu bl-​umiltà lejn xulxin.” (1 Pietru 5:5) L-​espressjoni “tħażżmu” tagħti l-​idea taʼ l-​azzjoni li jieħu lsir biex jitħażżem b’fardal biex iwettaq xogħol li kien meqjus bħala li jnaqqas id-​dinjità. Il-​frażi tista’ tfakkarna fl-​okkażjoni meta Ġesù ħażżem lilu nnifsu b’xugaman qabel ma niżel għarkopptejh biex jaħsel saqajn l-​appostli. Jekk insegwu lil Ġesù, liema inkarigu mogħti minn Alla nistgħu qatt inqisuh bħala li jnaqqsilna d-​dinjità? L-​umiltà taʼ qalbna trid tkun viżibbli għal kulħadd, bħallikieku aħna mħażżmin biha.

23, 24. (a) Għala għandna nirreżistu kwalunkwe tendenza taʼ suppervja? (b) Il-​kapitlu li jmiss se jgħinna nikkoreġu liema idea żbaljata rigward l-​umiltà?

²³ Is-​suppervja hi bħall-​velenu. L-​effetti jistgħu jkunu devastanti. Hija kwalità li tista’ tagħmel l-​iktar bniedem intelliġenti jkun bla siwi għal Alla. Mill-​banda l-​oħra, l-​umiltà tista’ tagħmel lill-​inqas wieħed jiswa ħafna f’għajnejn Ġeħova. Jekk nikkultivaw din il-​kwalità prezzjuża kuljum billi nistinkaw biex nimxu bl-​umiltà wara l-​passi taʼ Kristu, il-​premju hu meraviljuż jekk naħsbu dwaru. Pietru kiteb: “Umiljaw ruħkom taħt l-​id setgħana t’Alla, sabiex jeżaltakom fiż-​żmien xieraq.” (1 Pietru 5:6) Ġeħova ċertament li eżalta lil Ġesù talli umilja lilu nnifsu għalkollox. Bl-​istess mod, Alla tagħna se jitgħaxxaq jippremjak għall-​umiltà tiegħek.

²⁴ B’dispjaċir, xi wħud jaħsbu li l-​umiltà hija sinjal taʼ dgħjufija. L-​eżempju taʼ Ġesù jgħinna naraw kemm din l-​idea hija żbaljata, għaliex l-​iktar raġel umli kien ukoll l-​iktar raġel kuraġġuż. Dan se jkun is-​suġġett tal-​kapitlu li jmiss.

1-3. Liema periklu jiffaċċja Ġesù, u kif jirreaġixxi?

MARMALJA qed tfittex lil Ġesù sabiex tarrestah. Armati bi sjuf u bsaten u b’suldati fosthom, l-​irġiel jifformaw folla kbira. Bħallikieku mmexxijin minn skop wieħed mill-​agħar, huma jgħaddu mit-​toroq mudlama taʼ Ġerusalemm u jaqsmu l-​Wied taʼ Kidron għall-​Muntanja taż-​Żebbuġ. Għalkemm il-​qamar kwinta, qed iġorru t-​torċi u l-​imsiebaħ. Huwa dan minħabba li s-​sħab qed jgħatti d-​dawl tal-​qamar? Jew qed jistennew li se jsibu lil dak li qed ifittxu mistoħbi fid-​dlam? Ħaġa waħda hija ċerta: Kulmin jistenna li Ġesù se jaħrab bil-​biża’ ma jaf xejn dwar il-​karattru tiegħu.

² Ġesù hu konxju tal-​periklu li riesaq. Minkejja dan, hu ma jipprovax jaħrab imma jibqa’ jistenna fejn hu. Il-​marmalja qed toqrob, immexxija minn Ġuda, li darba kien ħabib fdat taʼ Ġesù. Ġuda jittradixxi lil Ġesù b’mod sfaċċat, billi jidentifika lil dak li qabel kien sidu b’tislima kollha ipokrisija u b’bewsa. Xorta waħda, Ġesù jibqa’ kalm. Imbagħad jersaq quddiem il-​marmalja. “Lil min qed tfittxu?” jistaqsi hu. “Lil Ġesù n-​Nazzarenu,” iwieġbu huma.

³ Il-​biċċa l-​kbira min-​nies kieku jitriegħdu bil-​biża’ quddiem marmalja armata bħal din. Forsi l-​folla hekk qed tistenna li se jagħmel dan ir-​raġel li qiegħed quddiemhom. Imma Ġesù ma jibżax, ma jaħrabx, u lanqas ma taħrablu xi gidba. Minflok, hu sempliċement jgħid: “Jien hu.” Tant hu kalm, tant hu qalbieni, li l-​irġiel jibqgħu mbellhin. Huma jersqu lura u jaqgħu maʼ l-​art!—Ġwanni 18:1-​6; Mattew 26:45-​50; Marku 14:41-​46.

4-6. (a) L-​Iben t’Alla maʼ xiex jiġi mxebbah, u għala? (b) Liema huma tliet modi li bihom Ġesù wera l-​kuraġġ?

⁴ Ġesù kif seta’ jiffaċċja dan il-​periklu kbir b’tant rażna u kontroll fuqu nnifsu? It-​tweġiba, f’kelma waħda, hi l-​kuraġġ. Il-​kuraġġ huwa waħda mill-​iktar kwalitajiet ammirati u bżonnjużi f’mexxej, u ebda bniedem ma qatt kien daqs Ġesù, aħseb u ara kemm kien aħjar minnu, f’dan ir-​rigward. Fil-​kapitlu taʼ qabel, tgħallimna kemm Ġesù kien umli u ġwejjed. Hu bix-​xieraq issejjaħ “il-​Ħaruf.” (Ġwanni 1:29) Madankollu, il-​kuraġġ taʼ Ġesù huwa r-​raġuni għala ngħata deskrizzjoni oħra differenti ħafna. Il-​Bibbja tgħid hekk dwar l-​Iben t’Alla: “Ara! L-​Iljun tat-​tribù taʼ Ġuda.”—Rivelazzjoni 5:5.

⁵ L-​iljun spiss jiġi assoċjat mal-​kuraġġ. Qatt kont bil-​wieqfa wiċċ imbwiċċ maʼ ljun kbir? Jekk iva, x’aktarx li kont fis-​sigurtà, mifrud minnu permezz taʼ xi lqugħ ħdejn il-​post fejn jinżamm fiż-​żu. Xorta waħda, esperjenza bħal din tista’ tkun tal-​biża’. Hekk kif tħares fiss lejn wiċċ dan l-​annimal kbir u b’saħħtu u hu jħares fiss lejk, żgur ma jgħaddilekx minn moħħok li l-​iljun qatt se jaħrab bil-​biża’ minn xi ħaġa. Il-​Bibbja titkellem dwar “l-​iljun, l-​iktar setgħan fost il-​bhejjem u li ma jerġa’ lura minn quddiem ħadd.” (Proverbji 30:30) Il-​kuraġġ taʼ Kristu hu eżatt bħal taʼ l-​iljun.

⁶ Ejja niddiskutu kif Ġesù wera kuraġġ bħal taʼ ljun bi tliet modi: billi ddefenda l-​verità, billi wera l-​ġustizzja, u billi ffaċċja l-​oppożizzjoni. Se naraw ukoll li lkoll kemm aħna—kemm jekk aħna qalbenin minna nfusna u kemm jekk le—nistgħu nimitaw lil Ġesù f’li nuru l-​kuraġġ.

Hu Ddefenda l-​Verità bil-​Kuraġġ

7-9. (a) X’ġara meta Ġesù kellu 12-​il sena, u għala tħoss li din is-​sitwazzjoni kienet xi ftit tal-​biża’? (b) Ġesù kif wera l-​kuraġġ bil-​mod kif ittratta lill-​għalliema fit-​tempju?

⁷ F’dinja maħkuma minn Satana, “missier il-​gidba,” spiss jirrikjedi l-​kuraġġ biex niddefendu l-​verità. (Ġwanni 8:44; 14:30) Ġesù ma stenniex sakemm isir adult biex jieħu din il-​waqfa. Meta kellu 12-​il sena, Ġesù ntilef minn mal-​ġenituri tiegħu wara l-​festa tal-​Qbiż f’Ġerusalemm. Għal tlett ijiem, Marija u Ġużeppi fittxewh bla heda. Fl-​aħħar sabuh fit-​tempju. U x’kien qed jagħmel hemm? Kien “bil-​qiegħda f’nofs l-​għalliema, jismagħhom u jistaqsihom.” (Luqa 2:41-​50) Ikkunsidra l-​isfond taʼ din id-​diskussjoni.

⁸ L-​istorjografi jgħidu li wħud mill-​mexxejja reliġjużi prominenti kellhom id-​drawwa li jibqgħu fit-​tempju wara l-​festi u jgħallmu f’wieħed mill-​portiċi spazjużi li kien hemm. In-​nies kienu joqogħdu bil-​qiegħda maʼ l-​art u jistaqsuhom mistoqsijiet. Dawn l-​għalliema kienu rġiel t’edukazzjoni għolja. Kienu jafu tajjeb x’tgħid il-​Liġi Mosajka u wkoll il-​liġijiet u t-​tradizzjonijiet bla tarf u kumplessi li għamlu l-​bnedmin u li kienu żdiedu tul is-​snin. Kif stajt ħassejtek bil-​qiegħda f’nofshom? Xi ftit beżgħan? U bir-​raġun. U xi ngħidu kieku kellek biss 12-​il sena? Ħafna adoloxxenti huma mistħijin. (Ġeremija 1:6) Xi wħud jipprovaw jagħmlu minn kollox biex ma jiġbdux l-​attenzjoni taʼ l-​għalliema tagħhom fl-​iskola; dawn l-​adoloxxenti jibżgħu li jiġu mitlubin jagħmlu jew jgħidu xi ħaġa, jibżgħu li jingħataw attenzjoni speċjali, jibżgħu li forsi se jiġu imbarazzati jew imwaqqgħin għaċ-​ċajt.

⁹ Madankollu, hawnhekk insibu lil Ġesù, bil-​qiegħda f’nofs dawn l-​irġiel għorrief, bla biża’ jistaqsihom mistoqsijiet li jolqtuhom fil-​laħam il-​ħaj. U għamel saħansitra iktar minn hekk. Ir-​rakkont jgħidilna: “Dawk kollha li kienu qed jisimgħuh baqgħu mistagħġbin b’kemm kien jifhem u bit-​tweġibiet tiegħu.” (Luqa 2:47) Il-​Bibbja ma tgħidilniex x’qal f’din l-​okkażjoni, imma nistgħu nkunu fiduċjużi li hu ma qagħadx jirripeti t-​tagħlim falz li tant kien jogħġob lil dawn l-​għalliema reliġjużi. (1 Pietru 2:22) Le, hu żamm mal-​verità tal-​Kelma t’Alla, u s-​semmiegħa tiegħu żgur baqgħu mbellhin b’tifel taʼ 12-​il sena li seta’ jesprimi lilu nnifsu b’daqshekk dehen u kuraġġ.

10. Kristjani żgħażagħ illum kif jimitaw il-​kuraġġ taʼ Ġesù?

¹⁰ Illum, għadd kbir taʼ Kristjani żgħażagħ qed isegwu l-​passi taʼ Ġesù. M’għandniex xi ngħidu, m’humiex perfetti bħal ma kien iż-​żagħżugħ Ġesù. Però, bħalu ma jistennewx li jkunu adulti biex jieħdu waqfa għall-​verità. Fl-​iskola jew fil-​komunitajiet fejn joqogħdu, huma b’tattika jistaqsu lin-​nies mistoqsijiet, jisimgħu, u b’rispett jaqsmu l-​verità magħhom. (1 Pietru 3:15) Bħala grupp, dawn iż-​żgħażagħ għenu lil sħabhom tal-​klassi, lill-​għalliema, u lill-​ġirien isiru segwaċi taʼ Kristu. Min jaf kemm il-​kuraġġ tagħhom iferraħ lil Ġeħova! Il-​Kelma tiegħu xxebbah lil dawn iż-​żgħażagħ maʼ qtar tan-​nida—rifreskanti, pjaċevoli, u numerużi.—Salm 110:3.

11, 12. Bħala adult, Ġesù kif wera l-​kuraġġ f’li jiddefendi l-​verità?

¹¹ Bħala raġel, Ġesù wera l-​kuraġġ darba wara l-​oħra f’li jiddefendi l-​verità. Fil-​fatt, il-​ministeru tiegħu beda b’konfrontazzjoni li ħafna jqisuha tal-​biża’. Bħala sempliċi bniedem tad-​demm u l-​laħam, u mhux bħala l-​arkanġlu setgħan, Ġesù kellu jiffaċċja lil Satana, l-​iktar għadu setgħan u perikoluż taʼ Ġeħova. Ġesù ċaħad lil Satana u ta prova li dan kien applika ħażin l-​Iskrittura ispirata. Ġesù temm il-​konversazzjoni billi bil-​qlubija kkmanda: “Mur ’l hemm, Satana!”—Mattew 4:2-​11.

¹² B’hekk, Ġesù sejjes il-​pedament għall-​ministeru tiegħu, billi bil-​qlubija ddefenda l-​Kelma taʼ Missieru mill-​isforzi biex jgħawġuha jew jużawha ħażin. Dak iż-​żmien, bħal-​lum, diżonestà bħal din fi kwistjonijiet reliġjużi kienet komuni ħafna. Lill-​mexxejja reliġjużi taʼ żmienu, Ġesù qalilhom: “Iġġibu l-​kelma t’Alla fix-​xejn bit-​tradizzjoni tagħkom li intom għaddejtu lil oħrajn.” (Marku 7:13) Dawn l-​irġiel kienu onorati bil-​kbir min-​nies in ġenerali, imma Ġesù bla biża’ akkużahom bħala gwidi għomja u ipokriti.a (Mattew 23:13, 16) Kif nistgħu nimitaw dan l-​aspett taʼ l-​eżempju kuraġġuż taʼ Ġesù?

13. Xi rridu niftakru meta nimitaw lil Ġesù, madankollu xi privileġġ għandna?

¹³ M’għandniex xi ngħidu, aħna niftakru li la għandna l-​abbiltà taʼ Ġesù li naqraw il-​qlub u lanqas l-​awtorità tiegħu li niġġudikaw. Madankollu, nistgħu nimitaw il-​mod kif iddefenda l-​verità bil-​qlubija. Per eżempju, billi nikxfu t-​tagħlim reliġjuż falz—il-​gideb li spiss jiġi mgħallem dwar Alla, l-​iskopijiet tiegħu, u l-​Kelma tiegħu—aħna nitfgħu dawl f’dinja mudlama minħabba l-​propaganda taʼ Satana. (Mattew 5:14; Rivelazzjoni 12:9, 10) Aħna ngħinu lin-​nies biex jinħelsu mill-​jasar tat-​tagħlim falz li jimla lil qalbhom b’biża’ kbir u li jħassar ir-​relazzjoni tagħhom m’Alla. Xi privileġġ għandna li naraw it-​twettiq tal-​wegħda taʼ Ġesù: “Il-​verità teħliskom”!—Ġwanni 8:32.

Hu Wera l-​Ġustizzja bil-​Kuraġġ

14, 15. (a) Liema hu mod wieħed kif Ġesù għamel ċar “x’inhi l-​ġustizzja”? (b) Meta tkellem maʼ mara Samaritana, Ġesù injora liema preġudizzji?

¹⁴ Il-​profezija Biblika bassret li l-​Messija kellu juri lill-​ġnus b’mod ċar “x’inhi l-​ġustizzja.” (Mattew 12:18; Isaija 42:1) Ġesù żgur li beda jagħmel dan meta kien fuq l-​art. B’kuraġġ kbir, hu wera li dejjem kien ġust u imparzjali fil-​mod kif ittratta lin-​nies. Per eżempju, hu rrifjuta li jaċċetta l-​preġudizzji u l-​intolleranza mhux Skritturali li kienu komuni fid-​dinja ta’ madwaru.

¹⁵ Meta Ġesù tkellem maʼ mara Samaritana ħdejn il-​bir taʼ Sikar, id-​dixxipli tiegħu baqgħu mbellhin. Għala? Dak iż-​żmien, il-​biċċa l-​kbira mil-​Lhud kienu jobogħdu lis-​Samaritani; din il-​mibegħda kienet ilha għaddejja s-​snin. (Esdra 4:4) Barra minn hekk, xi wħud mir-​rabbini kienu jħarsu lejn in-​nisa bi stmerrija. Ir-​regoli rabbiniċi, li iktar tard tniżżlu bil-​miktub, kienu jiskuraġġixxu lill-​irġiel milli jkellmu lin-​nisa; saħansitra kienu jindikaw li n-​nisa ma kienx jistħoqqilhom jiġu mgħallmin il-​Liġi t’Alla. B’mod partikulari, in-​nisa Samaritani kienu jitqiesu bħala li m’humiex nodfa. Ġesù injora dawn il-​preġudizzji mhux ġusti u fil-​beraħ għallem lill-​mara Samaritana (li kienet qed tgħix ħajja immorali), saħansitra rrivelalha l-​identità tiegħu bħala l-​Messija.—Ġwanni 4:5-​27.

16. Il-​Kristjani għala għandhom bżonn il-​kuraġġ biex ikunu differenti fejn jidħol il-​preġudizzju?

¹⁶ Ġieli sibt ruħek fost uħud li kellhom preġudizzji xejn sbieħ? Forsi wħud li bi tmaqdir jiċċajtaw b’nies taʼ razza jew ġens ieħor, jitkellmu b’disprezz dwar membri tas-​sess oppost, jew iħarsu lejn dawk taʼ livell soċjali jew ekonomiku differenti bħala li huma inferjuri. Is-​segwaċi taʼ Kristu ma japprovawx ideat bħal dawn, u jaħdmu iebes biex jeliminaw kwalunkwe traċċa taʼ preġudizzju li jista’ jkun hemm f’qalbhom. (Atti 10:34) Ilkoll kemm aħna għandna bżonn nikkultivaw il-​kuraġġ biex inkunu imparzjali f’dan ir-​rigward.

17. Ġesù liema azzjoni ħa fit-​tempju, u għala?

¹⁷ Ukoll, il-​kuraġġ wassal lil Ġesù biex jiġġieled għall-​indafa tal-​poplu t’Alla u għall-​arranġament tal-​qima pura. Kmieni fil-​ministeru tiegħu, hu daħal fil-​post fejn kien hemm it-​tempju f’Ġerusalemm u ħassu diżgustat x’ħin ra l-​merkanti u s-​sarrafa tal-​flus jinnegozjaw hemmhekk. Mimli rabja ġusta, Ġesù keċċa lil dawn l-​irġiel rgħiba u l-​merkanzija tagħhom ’il barra. (Ġwanni 2:13-​17) Hu għamel xi ħaġa simili iktar tard, lejn tmiem il-​ministeru tiegħu. (Marku 11:15-​18) Dawn l-​għemejjel żgur wassluh biex ikollu għedewwa setgħana, madankollu ma qagħadx jaħsibha. Għala? Sa minn ċkunitu, hu sejjaħ dan it-​tempju dar Missieru—u verament qiesu b’dan il-​mod. (Luqa 2:49) Ġesù qatt ma seta’ jagħlaq għajnejh għall-​inġustizzja li kienet qed isseħħ fit-​tempju, jiġifieri li titħammeġ il-​qima pura. Iż-​żelu tiegħu tah il-​kuraġġ biex jagħmel dak li kien meħtieġ.

18. Il-​Kristjani llum kif jistgħu juru l-​kuraġġ b’konnessjoni maʼ l-​indafa tal-​kongregazzjoni?

¹⁸ Illum, is-​segwaċi taʼ Kristu bl-​istess mod jinteressahom ħafna mill-​indafa tal-​poplu t’Alla u mill-​arranġament għall-​qima pura. Jekk jaraw li Kristjan ieħor qed jinvolvi ruħu fi dnub serju, ma jaqbdux u jagħlqu għajnejhom għall-​ħażen. Bil-​kuraġġ huma jkellmu lill-​persuna jew lill-​anzjani. (1 Korintin 1:11) Huma jagħmlu ċert li l-​anzjani tal-​kongregazzjoni jkunu informati. L-​anzjani jistgħu jgħinu lil dawk li jkunu morda spiritwalment u wkoll jistgħu jieħdu azzjoni biex in-​nagħaġ taʼ Ġeħova jibqgħu nodfa f’għajnejh.—Ġakbu 5:14, 15.

19, 20. (a) Liema inġustizzji kienu komuni fi żmien Ġesù, u liema pressjoni ffaċċja Ġesù? (b) Is-​segwaċi taʼ Kristu għala jirrifjutaw li jinvolvu ruħhom fil-​politika u fil-​vjolenza, u liema hu premju wieħed għall-​waqfa tagħhom?

¹⁹ Però, għandna nikkonkludu li Ġesù ġġieled kontra l-​inġustizzja soċjali fid-​dinja b’mod ġenerali? Ċertament li kien hemm inġustizzji kullimkien. Art twelidu kienet maħkuma minn potenza barranija. Ir-​Rumani ħaqru lil-​Lhud bi preżenza militari qawwija, għamlulhom taxxi ebsin, u saħansitra ndaħlu fid-​drawwiet reliġjużi tagħhom. Mhux taʼ b’xejn li ħafna riedu lil Ġesù jinvolvi ruħu fil-​politika taʼ żmienu. (Ġwanni 6:14, 15) Għal darb’oħra, Ġesù kellu juri l-​kuraġġ.

²⁰ Ġesù spjega li s-​Saltna tiegħu ma kinitx parti mid-​dinja. Bl-​eżempju tiegħu, hu ħarreġ lis-​segwaċi tiegħu biex ma jinvolvux ruħhom fit-​taqbid politiku taʼ dak iż-​żmien, u biex minflok jiffokaw fuq l-​ippridkar taʼ l-​aħbar tajba tas-​Saltna t’Alla. (Ġwanni 17:16; 18:36) Hu għallem lezzjoni qawwija rigward in-​newtralità meta l-​marmalja marret biex tarrestah. Pietru mill-​ewwel ħa azzjoni, billi bla ma ħasibha xejjer is-​sejf tiegħu u weġġa’ lil wieħed raġel. Huwa faċli li nifhmu lil Pietru. Jekk il-​vjolenza qatt setgħet tidher li hi ġustifikata, kien f’dan il-​lejl, meta l-​Iben innoċenti t’Alla ġie attakkat. Madankollu, Ġesù f’dak il-​mument ħalla l-​eżempju għas-​segwaċi tiegħu fuq l-​art sa żmienna: “Erġa’ daħħal sejfek f’postu, għax kulmin jaqbad is-​sejf, bis-​sejf jinqered.” (Mattew 26:51-​54) Żgur li biex jieħdu din il-​waqfa paċifika, is-​segwaċi taʼ Kristu kellhom bżonn il-​kuraġġ, bħalma jeħtieġ li jkollna aħna llum. Minħabba n-​newtralità Kristjana tagħhom, in-​nies t’Alla llum għandhom rekord nadif b’konnessjoni man-​numru bla għadd taʼ gwerer, olokawsti, rewwixti, u atti simili taʼ vjolenza. Dan ir-​rekord eċċellenti huwa premju wieħed għall-​kuraġġ tagħhom.

Hu Ffaċċja l-​Oppożizzjoni bil-​Kuraġġ

21, 22. (a) Ġesù liema għajnuna rċieva qabel ma ffaċċja l-​iktar prova diffiċli tiegħu? (b) Ġesù kif wera li kien kuraġġuż sat-​tmiem?

²¹ L-​Iben taʼ Ġeħova kien jaf sew bil-​quddiem li kien se jiffaċċja oppożizzjoni ħarxa hawn fuq l-​art. (Isaija 50:4-​7) Hu ffaċċja ħafna theddid taʼ mewt, li wasslu għal dak li ddeskrivejna fil-​bidu taʼ dan il-​kapitlu. Ġesù kif baqa’ kuraġġuż meta ffaċċja dawn il-​perikli? Mela, Ġesù x’kien qed jagħmel qabel ma l-​marmalja marret biex tarrestah? Kien qed jitlob bil-​ħrara lil Ġeħova. U Ġeħova x’għamel? Il-​Bibbja tgħidilna li t-​talb taʼ Ġesù “ntlaqa’.” (Ebrej 5:7) Ġeħova bagħat anġlu mis-​sema biex isaħħaħ lill-​Iben qalbieni tiegħu.—Luqa 22:42, 43.

²² Ftit wara li ġie msaħħaħ, Ġesù qal lill-​appostli tiegħu: “Qumu, ejja mmorru.” (Mattew 26:46) Aħseb ftit dwar il-​qlubija li wera f’dan il-​kliem. “Ejja mmorru,” qal hu, avolja kien jaf li kien se jitlob lill-​marmalja biex teħles lil sħabu, avolja kien jaf li dawn il-​ħbieb kienu se jabbandunawh u jaħarbu, u avolja kien jaf li kien se jkompli waħdu biex jiffaċċja l-​iktar prova diffiċli taʼ ħajtu. Waħdu, hu ffaċċja ġuri illegali u inġust, twaqqigħ għaċ-​ċajt, tortura, u mewta agonizzanti. Matul dan kollu, il-​kuraġġ qatt ma naqsu.

23. Spjega għala Ġesù ma kienx qed juri nuqqas taʼ responsabbiltà fil-​mod kif iffaċċja l-​periklu u t-​theddid taʼ mewt.

²³ Kien Ġesù qed juri nuqqas taʼ responsabbiltà? Le; in-​nuqqas taʼ responsabbiltà m’għandux x’jaqsam mal-​kuraġġ veru. Fil-​fatt, Ġesù għallem lis-​segwaċi tiegħu biex ikunu attenti, biex iwarrbu b’mod għaqli mill-​periklu ħalli jkomplu jagħmlu r-​rieda t’Alla. (Mattew 4:12; 10:16) Però, f’dan il-​każ, Ġesù kien jaf li ma setax iwarrab. Hu kien jaf x’kienet tinvolvi r-​rieda t’Alla. Ġesù kien determinat li jżomm l-​integrità tiegħu, u għalhekk l-​unika ħaġa li seta’ jagħmel kienet li jibqa’ miexi ’l quddiem, billi jiffaċċja l-​prova direttament.

24. Għala nistgħu nkunu ċerti li nistgħu nuru l-​kuraġġ meta niffaċċjaw kwalunkwe prova li tista’ tqum?

²⁴ Kienu bosta d-​drabi li s-​segwaċi taʼ Ġesù mxew bil-​kuraġġ fil-​passi taʼ Sidhom! Ħafna ħadu waqfa soda meta ffaċċjaw twaqqigħ għaċ-​ċajt, persekuzzjoni, arrest, ħabs, tortura, u saħansitra mewt. Bnedmin imperfetti minfejn isibu dan il-​kuraġġ? M’huwiex fin-​natura tagħna. Sewwasew bħalma Ġesù rċieva għajnuna mingħand Alla, hekk ukoll is-​segwaċi tiegħu. (Filippin 4:13) Għalhekk, tibżax minn dak li se jġib miegħu l-​futur. Kun determinat li żżomm l-​integrità tiegħek, u Ġeħova jagħtik il-​kuraġġ li għandek bżonn. Ibqa’ ssaħħaħ bl-​eżempju tal-​Mexxej tagħna, Ġesù, li qal: “Agħmlu kuraġġ! Jien irbaħt lid-​dinja.”—Ġwanni 16:33.

1-3. F’ġurnata tar-​rebbiegħa fis-​sena 31 E.K., Ġesù f’liema sfond jagħmel il-​priedka tiegħu, u s-​semmiegħa għala jibqgħu mistagħġbin?

HIJA ġurnata tar-​rebbiegħa fis-​sena 31 E.K. Ġesù Kristu jinsab viċin Kafarnahum, belt mimlija attività fuq ix-​xtut tal-​majjistral tal-​Baħar tal-​Galilija. Fuq muntanja fil-​qrib, Ġesù talab waħdu l-​lejl kollu. Hekk kif jibda jbexbex, hu jsejjaħ lid-​dixxipli tiegħu, u minn fosthom jagħżel 12, li jsejħilhom appostli. Sadanittant, folol kbar taʼ nies—uħud minnhom ġejjin mill-​bogħod—segwew lil Ġesù f’dan il-​post u jinsabu miġburin f’wita fuq il-​muntanja. Huma ħerqanin biex jisimgħu x’għandu x’jgħid u biex jiġu mfejqin mill-​mard tagħhom. Ġesù ma jiddiżappuntahomx.—Luqa 6:12-​19.

² Ġesù javviċina lill-​folol u jfejjaq lil dawk kollha li huma morda. Fl-​aħħar, meta ħadd minnhom ma jħoss l-​uġigħ taʼ mard serju, hu joqgħod bil-​qiegħda u jibda jgħallem.a Dak li jgħid f’dik il-​ġurnata mimlija arja friska tar-​rebbiegħa żgur li jaħsad lis-​semmiegħa tiegħu. Wara kollox, qatt ma semgħu lil xi ħadd jgħallem bħalu. Sabiex jagħti importanza lit-​tagħlim tiegħu, hu la jikkwota mit-​tradizzjonijiet orali u lanqas lir-​rabbini Lhud li kienu magħrufin sew. Minflok, hu għal darba wara l-​oħra jikkwota mill-​Iskrittura Ebrajka ispirata. Il-​messaġġ tiegħu huwa dirett, il-​kliem tiegħu sempliċi, it-​tifsir tiegħu ċar. Meta jispiċċa, il-​folol jibqgħu mistagħġbin. U mhux taʼ b’xejn. Għadhom kif semgħu l-​iktar raġel għaref li qatt għex!—Mattew 7:28, 29.

³ Din il-​priedka, flimkien maʼ ħafna affarijiet oħrajn li Ġesù qal u għamel, hija mniżżla fil-​Kelma t’Alla. Nagħmlu tajjeb jekk inħaffru fil-​fond f’dak li tgħid il-​Bibbja dwar Ġesù, għax fih hemm “it-​teżori kollha taʼ l-​għerf.” (Kolossin 2:3) Minfejn ġab dan l-​għerf—l-​abbiltà li juża l-​għarfien u l-​fehma b’mod prattiku? Kif wera l-​għerf, u kif nistgħu nsegwu l-​eżempju tiegħu?

“Dan ir-​Raġel Minfejn Ġab Dan l-​Għerf?”

4. Is-​semmiegħa taʼ Ġesù f’Nazaret qajmu liema mistoqsija, u għala?

⁴ Matul wieħed mill-​vjaġġi taʼ l-​ippridkar tiegħu, Ġesù mar Nazaret, ir-​raħal fejn kien trabba, u beda jgħallem fis-​sinagoga t’hemmhekk. Ħafna mis-​semmiegħa tiegħu stagħġbu u staqsew: “Dan ir-​raġel minfejn ġab dan l-​għerf?” Kienu jafu lil familtu—il-​ġenituri tiegħu u ħutu—u kienu jafu li kien ġej minn familja fqira. (Mattew 13:54-​56; Marku 6:1-​3) Bla dubju kienu jafu wkoll li dan il-​mastrudaxxa fluwenti fi kliemu ma kienx attenda xi waħda mill-​iskejjel famużi tar-​rabbini. (Ġwanni 7:15) Għalhekk, il-​mistoqsija tagħhom dehret loġika.

5. Ġesù minn liema sors wera li kien ġej l-​għerf tiegħu?

⁵ L-​għerf li wera Ġesù ma kienx sempliċement riżultat tal-​ħsibijiet perfetti tiegħu. Iktar tard fil-​ministeru tiegħu, meta kien qed jgħallem bil-​miftuħ fit-​tempju, Ġesù wera li l-​għerf tiegħu kien ġej minn xi ħadd ħafna iktar superjuri. “Dak li ngħallem m’huwiex tiegħi,” qal hu, “imma taʼ dak li bagħatni.” (Ġwanni 7:16) Iva, il-​Missier, li bagħat lill-​Iben, kien is-​sors veru taʼ l-​għerf taʼ Ġesù. (Ġwanni 12:49) Però, Ġesù kif irċieva l-​għerf mingħand Ġeħova?

6, 7. Ġesù b’liema modi kiseb l-​għerf mingħand Missieru?

⁶ L-​ispirtu qaddis taʼ Ġeħova kien qed jaħdem f’qalb u f’moħħ Ġesù. Rigward Ġesù bħala l-​Messija mwiegħed, Isaija bassar: “Fuqu jrid jistrieħ l-​ispirtu taʼ Ġeħova, l-​ispirtu taʼ l-​għerf u taʼ l-​abbiltà li jifhem, l-​ispirtu taʼ l-​għoti taʼ pariri u tas-​setgħa, l-​ispirtu taʼ l-​għarfien u tal-​biża’ taʼ Ġeħova.” (Isaija 11:2) Meta nqisu li l-​ispirtu taʼ Ġeħova kien fuqu u ggwida l-​ħsibijiet u d-​deċiżjonijiet tiegħu, għandna għalxiex nistagħġbu li l-​kliem u l-​azzjonijiet taʼ Ġesù rriflettew l-​ogħla għerf?

⁷ Ġesù kiseb l-​għerf mingħand Missieru b’mod profond ieħor. Bħalma rajna f’Kapitlu 2, matul l-​eżistenza tiegħu qabel ma sar bniedem, li damet snin bla għadd, Ġesù kellu l-​opportunità li jassorbi l-​mod kif jaħsibha Missieru dwar l-​affarijiet. Bilkemm nistgħu nimmaġinaw l-​ammont t’għerf li kiseb l-​Iben meta kien maġenb Missieru, jaħdem bħala l-​“ħaddiem tas-​sengħa” t’Alla fil-​ħolqien taʼ l-​affarijiet l-​oħrajn kollha, dawk ħajjin u dawk bla ħajja. Mhux taʼ b’xejn mela li l-​Iben, qabel ma sar bniedem, hu deskritt bħala l-​għerf personifikat. (Proverbji 8:22-​31; Kolossin 1:15, 16) Matul il-​ministeru tiegħu, Ġesù seta’ jagħmel użu mill-​għerf li kiseb meta kien maġenb Missieru fis-​sema.b (Ġwanni 8:26, 28, 38) Għalhekk, m’għandniex għalfejn nibqgħu skantati bil-​wisa’ taʼ l-​għarfien u l-​fond tal-​fehma li dehru fil-​kliem taʼ Ġesù jew fil-​ġudizzju f’loku li kien evidenti fl-​għemejjel kollha tiegħu.

8. Bħala segwaċi taʼ Ġesù, kif nistgħu niksbu l-​għerf?

⁸ Bħala segwaċi taʼ Ġesù, aħna wkoll jeħtieġ li nħarsu lejn Ġeħova bħala s-​sors taʼ l-​għerf. (Proverbji 2:6) M’għandniex xi ngħidu, Ġeħova ma jagħtiniex l-​għerf b’mod mirakoluż. Madankollu, hu jwieġeb it-​talb kollu ħeġġa tagħna għall-​għerf li għandna bżonn biex jirnexxilna niffaċċjaw l-​isfidi fil-​ħajja. (Ġakbu 1:5) Sabiex niksbu dan l-​għerf jirrikjedi ħafna sforz min-​naħa tagħna. Irridu nibqgħu nfittxuh “bħal teżori moħbijin.” (Proverbji 2:1-​6) Iva, irridu nkomplu nħaffru fil-​fond fil-​Kelma t’Alla, fejn insibu l-​għerf tiegħu, u nġibu ħajjitna fi qbil maʼ dak li nitgħallmu. L-​eżempju taʼ l-​Iben taʼ Ġeħova huwa speċjalment taʼ valur f’li jgħinna niksbu l-​għerf. Ejja neżaminaw diversi oqsma fejn Ġesù wera l-​għerf u nitgħallmu kif nistgħu nimitawh.

Kliem t’Għerf

9. X’kien li għamel it-​tagħlim taʼ Ġesù wieħed mimli għerf?

⁹ In-​nies inġabru bi ħġarhom proprju biex jisimgħu lil Ġesù jitkellem. (Marku 6:31-​34; Luqa 5:1-​3) U mhux taʼ b’xejn, għax meta Ġesù fetaħ fommu, hu tkellem kliem t’għerf kbir! It-​tagħlim tiegħu rrifletta għarfien profond tal-​Kelma t’Alla u abbiltà li ma bħalha biex jilħaq l-​għerq tal-​kwistjoni. It-​tagħlim tiegħu jiġbed lin-​nies minn mad-​dinja kollha u hu dejjem validu. Ikkunsidra ftit eżempji taʼ l-​għerf li nsibu fil-​kliem taʼ Ġesù, il-​“Kunsillier taʼ l-​Għaġeb” imbassar.—Isaija 9:6.

10. Liema kwalitajiet pożittivi jħeġġiġna nikkultivaw Ġesù, u għala?

¹⁰ Il-​Priedka taʼ fuq il-​Muntanja, li semmejna fil-​bidu tal-​kapitlu, hija l-​akbar ġabra taʼ tagħlim taʼ Ġesù li ma fihiex narrattiv jew kliem taʼ xi ħadd ieħor. F’din il-​priedka, Ġesù ma jwissiniex sempliċement biex nitkellmu u naġixxu b’mod xieraq. Il-​pariri tiegħu jinvolvu ħafna iktar minn hekk. Peress li jaf sew li l-​ħsibijiet u s-​sentimenti jwasslu għall-​kliem u l-​azzjoni, Ġesù jħeġġiġna biex nikkultivaw kwalitajiet pożittivi f’moħħna u f’qalbna, bħal temperament ġwejjed, xewqa għal ġustizzja, inklinazzjoni biex nuru ħniena u nkunu paċifiċi, u mħabba għal oħrajn. (Mattew 5:5-​9, 43-​48) Hekk kif niżviluppaw dawn il-​kwalitajiet f’qalbna, ir-​riżultat se jkun kliem u kondotta xierqa li mhux biss jogħġbu lil Ġeħova imma wkoll jippromwovu relazzjonijiet tajbin mal-​bnedmin taʼ madwarna.—Mattew 5:16.

11. Meta jagħti pariri dwar imġiba midinba, Ġesù kif imur fl-​għerq tal-​problema?

¹¹ Meta jagħti pariri dwar imġiba midinba, Ġesù jmur fl-​għerq tal-​problema. Hu ma jgħidilniex sempliċement biex inżommu lura milli nagħmlu atti vjolenti. Minflok, hu jwissina biex ma nħallux ir-​rabja tbejjet f’qalbna. (Mattew 5:21, 22; 1 Ġwanni 3:15) Hu mhux biss jipprojbixxi l-​att taʼ l-​adulterju. Minflok, hu jwissi dwar il-​passjoni li tibda fil-​qalb u twassal għal dan it-​tradiment. Hu jwissina biex ma nħallux lil għajnejna jqanqlu xewqat mhux xierqa u jistimulaw xenqiet. (Mattew 5:27-​30) Ġesù jitfa’ l-​attenzjoni lejn il-​kaġuni, mhux biss lejn is-​sintomi. Hu jiffoka fuq l-​attitudnijiet u x-​xewqat li jwasslu għal għemejjel midinba.—Salm 7:14.

12. Is-​segwaċi taʼ Kristu kif iqisu l-​pariri tiegħu, u għala?

¹² X’għerf fih kliem Ġesù! Mhux taʼ b’xejn li “l-​folol baqgħu mistagħġbin bil-​mod kif għallimhom.” (Mattew 7:28) Bħala s-​segwaċi tiegħu, aħna nqisu l-​pariri għaqlin tiegħu bħala gwida għal ħajjitna. Nipprovaw nikkultivaw il-​kwalitajiet pożittivi li hu inkuraġġixxa—inkluż il-​ħniena, il-​paċi, u l-​imħabba—u b’hekk inkunu nafu li qed inpoġġu pedament għal kondotta li togħġob lil Ġeħova. Aħna nistinkaw biex inneħħu minn qalbna s-​sentimenti u x-​xewqat negattivi li hu wissiena kontrihom, bħal rabja ħarxa u xewqat immorali, billi nafu li jekk nagħmlu dan se niġu megħjunin nevitaw kondotta midinba.—Ġakbu 1:14, 15.

Għex Ħajja Mmexxija mill-​Għerf

13, 14. X’juri li Ġesù uża rraġunar f’loku meta ġie biex jagħżel kif jgħix ħajtu?

¹³ Ġesù wera l-​għerf mhux biss bil-​kliem imma wkoll bl-​għemil. Il-​ħajja kollha tiegħu—id-​deċiżjonijiet tiegħu, il-​mod kif qies lilu nnifsu, u l-​mod kif ittratta m’oħrajn—uriet il-​ħafna aspetti sbieħ taʼ l-​għerf. Ikkunsidra xi eżempji li juru li Ġesù kien immexxi mill-​‘għaqal u l-​abbiltà li jaħseb.’—Proverbji 3:21.

¹⁴ L-​għerf jinkludi ġudizzju f’loku. Ġesù uża rraġunar f’loku meta ġie biex jagħżel kif jgħix ħajtu. Tista’ timmaġina l-​ħajja li seta’ għex—id-​dar li seta’ bena, in-​negozju li seta’ stabbilixxa, jew il-​prominenza dinjija li seta’ kiseb? Ġesù kien jaf li ħajja dedikata għal dawn l-​affarijiet hija “frugħa u ġiri wara r-​riħ.” (Ekkleżjasti 4:4; 5:10) Ħajja bħal din tkun bluha, l-​oppost taʼ l-​għerf. Ġesù għażel li jżomm ħajtu sempliċi. Ma kienx interessat f’li jaqla’ l-​flus jew li jiġma’ ħafna ġid materjali. (Mattew 8:20) Fi qbil maʼ dak li għallem, hu żamm għajnejh iffokati fuq skop wieħed—li jagħmel ir-​rieda t’Alla. (Mattew 6:22) Ġesù b’mod għaqli ddedika l-​ħin u l-​enerġija tiegħu għall-​interessi tas-​Saltna, li huma ħafna iktar importanti u premjanti minn affarijiet materjali. (Mattew 6:19-​21) Hu b’hekk ħalla eżempju taʼ min jimitah.

15. Is-​segwaċi taʼ Ġesù kif jistgħu juru li qed iżommu għajnejhom sempliċi, u dan għala hu għaqli?

¹⁵ Is-​segwaċi taʼ Ġesù llum jaraw kemm hu għaqli li jżommu għajnejn sempliċi. Għalhekk, jevitaw li jtaqqlu lilhom infushom b’dejn mhux neċessarju u b’xogħlijiet dinjin li jieħdu wisq attenzjoni u enerġija. (1 Timotju 6:9, 10) Ħafna ħadu passi biex jissimplifikaw ħajjithom sabiex ikunu jistgħu jqattgħu iktar ħin fil-​ministeru Kristjan, forsi anki billi jaqdu bħala proklamaturi tas-​Saltna full-​time. Ma jistgħux jagħżlu triq aħjar, għaliex meta nżommu l-​interessi tas-​Saltna fil-​post xieraq tagħhom, ikollna l-​akbar ferħ u sodisfazzjon.—Mattew 6:33.

16, 17. (a) Ġesù b’liema modi wera li kien modest u realistiku f’dak li stenna minnu nnifsu? (b) Kif nistgħu nuru li aħna modesti u realistiċi f’dak li nistennew minna nfusna?

¹⁶ Il-​Bibbja torbot l-​għerf mal-​modestja, li tinkludi li nkunu konxji tal-​limitazzjonijiet tagħna. (Proverbji 11:2) Ġesù kien modest u realistiku f’dak li stenna minnu nnifsu. Hu kien jaf li ma kienx se jikkonverti lil dawk kollha li semgħu l-​messaġġ tiegħu. (Mattew 10:32-​39) Hu rrealizza wkoll li kien hemm limitu għall-​għadd taʼ nies li seta’ jilħaq personalment. Għalhekk, b’mod għaqli lis-​segwaċi tiegħu fdalhom ix-​xogħol taʼ li jagħmlu dixxipli. (Mattew 28:18-​20) Hu b’modestja għaraf li huma kienu se ‘jagħmlu għemejjel akbar’ minn tiegħu, għax huma kienu se jilħqu iktar nies fuq medda akbar t’art u għal perijodu itwal taʼ żmien. (Ġwanni 14:12) Ġesù għaraf ukoll li kellu bżonn l-​għajnuna. Hu aċċetta l-​għajnuna taʼ l-​anġli li marru jassistuh fix-​xagħri u taʼ l-​anġlu li mar isaħħu fil-​Ġetsemani. Fl-​iktar mument li kellu bżonn, l-​Iben t’Alla għajjat għall-​għajnuna.—Mattew 4:11; Luqa 22:43; Ebrej 5:7.

¹⁷ Aħna wkoll irridu nkunu modesti u realistiċi f’dak li nistennew minna nfusna. Ċertament li rridu naħdmu b’ruħna kollha u nistinkaw kemm nifilħu fl-​ippridkar u fix-​xogħol taʼ li nagħmlu dixxipli. (Luqa 13:24; Kolossin 3:23) Fl-​istess ħin, irridu niftakru li Ġeħova ma jqabbilniex maʼ xulxin, u lanqas aħna m’għandna nagħmlu hekk. (Galatin 6:4) L-​għerf prattiku se jgħinna nagħmlu miri realistiċi fi qbil maʼ l-​abbiltajiet u ċ-​ċirkustanzi tagħna. Flimkien maʼ dan, l-​għerf se jiggwida lil dawk li għandhom xi pożizzjoni taʼ responsabbiltà biex jagħrfu li għandhom il-​limitazzjonijiet u li minn żmien għal żmien ikollhom bżonn l-​għajnuna u l-​appoġġ. Il-​modestja se tgħin lil dawn l-​uħud jaċċettaw l-​għajnuna bi gratitudni, billi jagħrfu li Ġeħova jista’ juża sieħeb fit-​twemmin biex isir ‘għajnuna li ssaħħaħ’ għalihom.—Kolossin 4:11.

18, 19. (a) X’juri li Ġesù kien raġunevoli u pożittiv fil-​mod kif ittratta mad-​dixxipli tiegħu? (b) Għala għandna raġuni tajba biex inkunu pożittivi u raġunevoli hekk kif nittrattaw maʼ xulxin, u kif nistgħu nagħmlu dan?

¹⁸ Ġakbu 3:17 jgħid: “L-​għerf li ġej minn fuq hu . . . raġunevoli.” Ġesù kien raġunevoli u pożittiv fil-​mod kif ittratta mad-​dixxipli tiegħu. Hu kien konxju sew tan-​nuqqasijiet tagħhom, però fittex it-​tajjeb tagħhom. (Ġwanni 1:47) Hu kien jaf li kienu se jabbandunawh fil-​lejl taʼ l-​arrest tiegħu, imma ma ddubitax il-​lealtà tagħhom. (Mattew 26:31-​35; Luqa 22:28-​30) Pietru tliet darbiet ċaħad li saħansitra kien jaf lil Ġesù. Xorta waħda, Ġesù talab għal Pietru u wera fiduċja fil-​fedeltà tiegħu. (Luqa 22:31-​34) Fl-​aħħar lejl taʼ ħajtu fuq l-​art, Ġesù fit-​talb tiegħu lil Missieru ma ffokax fuq l-​iżbalji li kienu għamlu d-​dixxipli tiegħu. Minflok, hu tkellem b’mod pożittiv dwar it-​triq li għażlu sa dak il-​lejl, billi qal: “Huma osservaw kelmtek.” (Ġwanni 17:6) Minkejja l-​imperfezzjonijiet tagħhom, hu poġġa f’idejhom ix-​xogħol tal-​ippritkar tas-​Saltna u taʼ li jagħmlu dixxipli. (Mattew 28:19, 20) Il-​fiduċja u l-​fidi li hu wera fihom bla dubju saħħewhom biex iwettqu x-​xogħol li kkmandahom jagħmlu.

¹⁹ Is-​segwaċi taʼ Ġesù għandhom raġuni tajba biex jimitaw l-​eżempju tiegħu f’dan ir-​rigward. Jekk l-​Iben perfett t’Alla kien paċenzjuż fil-​mod kif ittratta mad-​dixxipli imperfetti tiegħu, kemm iktar aħna bħala bnedmin midinbin għandna nkunu raġunevoli fil-​mod kif nittrattaw maʼ xulxin! (Filippin 4:5) Minflok ma niffokaw fuq in-​nuqqasijiet taʼ sħabna fit-​twemmin, nagħmlu tajjeb jekk infittxu t-​tajjeb tagħhom. Inkunu għaqlin jekk niftakru li Ġeħova ġibidhom lejh. (Ġwanni 6:44) Għalhekk, żgur li hu jara xi ħaġa tajba fihom, u aħna għandna nagħmlu l-​istess. Attitudni pożittiva se tgħinna mhux biss biex ‘nagħlqu għajnejna għall-​offiża’ imma wkoll biex infittxu modi kif nistgħu nfaħħru lil oħrajn. (Proverbji 19:11, Il-​Bibbja taʼ l-​Għaqda Biblika Maltija, It-​Tieni Edizzjoni [1996]) Meta nuru fiduċja f’ħutna l-​Kristjani, inkunu qed ngħinuhom jagħmlu l-​almu tagħhom biex jaqdu lil Ġeħova u biex isibu l-​ferħ f’dan is-​servizz.—1 Tessalonikin 5:11.

20. X’għandna nagħmlu bit-​teżor prezzjuż t’għerf li jinsab fir-​rakkonti taʼ l-​Evanġelju, u għala?

²⁰ Ir-​rakkonti tal-​ħajja u l-​ministeru taʼ Ġesù fl-​Evanġelju verament huma teżor prezzjuż t’għerf! X’għandna nagħmlu b’din l-​għotja imprezzabbli? Fil-​konklużjoni tal-​Priedka taʼ fuq il-​Muntanja, Ġesù ħeġġeġ lill-​udjenza tiegħu mhux biss biex jisimgħu l-​kliem t’għerf tiegħu imma wkoll biex jagħmluh, jew japplikawh. (Mattew 7:24-​27) Jekk insawru l-​ħsibijiet, il-​motivazzjonijiet, u l-​azzjonijiet tagħna fi qbil mal-​kliem u l-​għemil t’għerf taʼ Ġesù se niġu megħjunin biex insibu l-​aqwa ħajja possibbli issa u biex nibqgħu fit-​triq li twassal għall-​ħajja taʼ dejjem. (Mattew 7:13, 14) Żgur li m’hemmx triq aħjar jew iktar għaqlija li nistgħu naqbdu!

1, 2. Missier li jħobb għala jieħu pjaċir jara lil ibnu jobdih, u s-​sentimenti tiegħu kif jirriflettu s-​sentimenti taʼ Ġeħova?

MISSIER jittawwal mit-​tieqa, qed jara lit-​tifel ċkejken tiegħu jilgħab maʼ xi ħbieb. Il-​ballun tagħhom jaqbeż ’il barra mill-​bitħa u jiġi fit-​triq. Għajnejn it-​tifel isegwu l-​ballun għax jixtieq imur għalih. Wieħed minn sħabu jħeġġu biex joħroġ fit-​triq u jġibu, imma t-​tifel ixengel rasu. “Ma nistax nagħmel hekk,” jgħid hu. Il-​missier jitbissem b’sodisfazzjon.

² Il-​missier għala hu daqshekk ferħan? Għaliex hu għallem lil ibnu biex ma joħroġx fit-​triq meta jkun waħdu. Meta t-​tifel jobdi—avolja ma jafx li missieru qed jarah—il-​missier jaf li ibnu qed jitgħallem l-​ubbidjenza, u b’hekk jinsab iktar fis-​sigurtà. Dan il-​missier iħossu bħalma jħossu Missierna tas-​sema, Ġeħova. Alla jaf li jekk aħna rridu nibqgħu leali u ngħixu biex naraw il-​futur meraviljuż li għandu maħżun għalina, irridu nitgħallmu nafdawh u nobduh. (Proverbji 3:5, 6) Għaldaqstant, hu bagħtilna l-​aħjar wieħed mill-​għalliema umani kollha.

3, 4. Ġesù kif “tgħallem l-​ubbidjenza” u ‘ntgħamel perfett’? Agħti tixbiha.

³ Il-​Bibbja tgħid xi ħaġa taʼ l-​għaġeb dwar Ġesù: “Għalkemm kien Iben, tgħallem l-​ubbidjenza minn dak li sofra; u wara li kien magħmul perfett sar responsabbli mis-​salvazzjoni taʼ dejjem taʼ dawk kollha li jobduh.” (Ebrej 5:8, 9) Dan l-​Iben kien eżista għal snin bla għadd fis-​sema. Hu ra lil Satana u lil sħabu l-​anġli ribellużi juru diżubbidjenza, imma l-​ewwel Iben imwieled qatt ma ngħaqad magħhom. Il-​profezija mnebbħa applikat dan il-​kliem għalih: “Jien . . . ma kontx ribelluż.” (Isaija 50:5) Għalhekk, il-​kliem “tgħallem l-​ubbidjenza” kif seta’ japplika għal dan l-​Iben ubbidjenti b’mod perfett? Ġesù, li kien ħliqa perfetta, kif seta’ ‘jintgħamel perfett’?

⁴ Ikkunsidra tixbiha. Suldat għandu sejf tal-​ħadid. Għalkemm dan is-​sejf qatt ma ġie provat f’xi battalja, huwa perfett għal dak li se jintuża għalih u ġie disinjat bis-​sengħa. Madankollu, hu jibdel dan is-​sejf maʼ wieħed magħmul minn metall iktar b’saħħtu, azzar temprat. Dan is-​sejf il-​ġdid diġà ġie użat b’mod effettiv f’battalja. M’hijiex din bidla għaqlija? B’mod simili, l-​ubbidjenza li wera Ġesù qabel ma ġie fuq l-​art kienet bla difett. Imma wara ż-​żmien li għamel hawn fuq l-​art, l-​ubbidjenza tiegħu kienet taʼ kwalità differenti għalkollox. Issa kienet imġarrba, temprata, biex ngħidu hekk, u testjata bi provi li Ġesù qatt ma seta’ jgħaddi minnhom fis-​sema.

5. X’kien li għamel l-​ubbidjenza taʼ Ġesù daqshekk importanti, u x’se nikkunsidraw f’dan il-​kapitlu?

⁵ L-​ubbidjenza kienet vitali għall-​inkarigu li kellu Ġesù meta ġie fuq l-​art. Bħala “l-​aħħar Adam,” Ġesù ġie hawn biex jagħmel dak li l-​ewwel ġenitur tagħna naqas li jagħmel—jibqa’ ubbidjenti lejn Alla Ġeħova, anki fil-​provi. (1 Korintin 15:45) Madankollu, l-​ubbidjenza taʼ Ġesù ma kinitx xi ħaġa mekkanika. Ġesù obda b’moħħu, b’qalbu, u b’ruħu kollha. U għamel dan bil-​ferħ. Kien iktar importanti għalih li jagħmel ir-​rieda taʼ Missieru milli jiekol! (Ġwanni 4:34) X’se jgħinna nimitaw l-​ubbidjenza taʼ Ġesù? Ejja l-​ewwel nikkunsidraw il-​motivi tiegħu. Jekk nikkultivaw motivi bħal tiegħu se niġu megħjunin biex nirreżistu t-​tentazzjoni u biex inwettqu r-​rieda t’Alla. Imbagħad se nirrivedu xi premjijiet li jiġu meta nuru ubbidjenza bħal taʼ Kristu.

Il-​Motivi Wara l-​Ubbidjenza taʼ Ġesù

6, 7. X’kienu xi ftit mill-​motivi taʼ Ġesù għall-​ubbidjenza tiegħu?

⁶ L-​ubbidjenza taʼ Ġesù ġiet minn dak li kellu f’qalbu. Bħalma rajna f’Kapitlu 3, Kristu kien umli f’qalbu. Is-​suppervja tagħmel lin-​nies jistmerru l-​ubbidjenza, filwaqt li l-​umiltà tgħinna nobdu lil Ġeħova għax irridu aħna. (Eżodu 5:1, 2; 1 Pietru 5:5, 6) Iżjed minn hekk, l-​ubbidjenza taʼ Ġesù ġiet minn dak li kien iħobb u minn dak li kien jobgħod.

⁷ Fuq kollox, Ġesù kien iħobb lil Missieru tas-​sema, Ġeħova. Din l-​imħabba se tiġi diskussa f’iktar dettall f’Kapitlu 13. Imħabba bħal din qanqlet lil Ġesù biex juri l-​biża’ minn Alla. Tant kienet b’saħħitha l-​imħabba tiegħu għal Ġeħova, tant kien profond ir-​rispett tiegħu, li beża’ li jnikket lil Missieru. Il-​biża’ minn Alla kien raġuni waħda għala t-​talb taʼ Ġesù ntlaqa’. (Ebrej 5:7) Il-​biża’ minn Ġeħova huwa wkoll aspett li jispikka tal-​ħakma taʼ Ġesù bħala s-​Sultan Messjaniku.—Isaija 11:3.

8, 9. Bħalma kien profetizzat, Ġesù kif ħassu dwar is-​sewwa u l-​ħażen, u kif wera dawn is-​sentimenti biċ-​ċar?

⁸ L-​imħabba għal Ġeħova tinvolvi wkoll mibegħda għal dak li jobgħod Ġeħova. Per eżempju, innota din il-​profezija indirizzata lis-​Sultan Messjaniku: “Int tħobb il-​ġustizzja u tobgħod il-​ħażen. Huwa għalhekk li Alla, Alla tiegħek, dilkek biż-​żejt tal-​ferħ iktar minn sħabek.” (Salm 45:7) ‘Sħab’ Ġesù kienu s-​slaten l-​oħrajn min-​nisel tal-​familja tas-​Sultan David. Iktar minn kwalunkwe wieħed minnhom, Ġesù għandu għalfejn jifraħ, jew jithenna bil-​kbir, meta jiġi midluk. Għala? Il-​premju tiegħu huwa ħafna akbar minn tagħhom, il-​ħakma tiegħu hija taʼ benefiċċju ħafna akbar. Hu jiġi premjat għaliex l-​imħabba tiegħu għas-​sewwa, jew ġustizzja, u l-​mibegħda tiegħu għall-​ħażen qanqluh biex jobdi lil Alla f’kollox.

⁹ Ġesù kif wera b’mod ċar kif iħossu dwar is-​sewwa u l-​ħażen? Per eżempju, meta s-​segwaċi tiegħu obdew id-​direzzjoni tiegħu fix-​xogħol taʼ l-​ippridkar u minħabba f’hekk ġew imberkin, Ġesù kif irreaġixxa? Hu kien ferħan ħafna. (Luqa 10:1, 17, 21) U meta n-​nies taʼ Ġerusalemm għal darba wara l-​oħra wrew spirtu diżubbidjenti, billi ċaħdu l-​isforzi kollha mħabba tiegħu biex jgħinhom, Ġesù kif ħassu? Hu beka minħabba l-​attitudni ribelluża taʼ din il-​belt. (Luqa 19:41, 42) Ġesù kien konċernat ħafna kemm dwar kondotta tajba kif ukoll dwar kondotta ħażina.

10. Liema sentimenti rridu nikkultivaw fejn jidħlu għemejjel sewwa u għemejjel ħżiena, u x’se jgħinna nagħmlu dan?

¹⁰ Meditazzjoni fuq is-​sentimenti taʼ Ġesù tgħinna neżaminaw il-​motivi tagħna għala nobdu lil Ġeħova. Minkejja li aħna imperfetti, nistgħu nikkultivaw imħabba mill-​qalb għal għemejjel tajbin u mibegħda soda għal kondotta ħażina. Jeħtieġ li nitolbu lil Ġeħova jgħinna nikkultivaw sentimenti bħal tiegħu u dawk taʼ Ibnu. (Salm 51:10) Fl-​istess ħin, irridu nevitaw influwenzi li jmewtu dawn is-​sentimenti. Huwa essenzjali li nagħżlu d-​divertiment u s-​sħubija tagħna b’mod għaqli. (Proverbji 13:20; Filippin 4:8) Jekk nikkultivaw motivi bħal taʼ Kristu, l-​ubbidjenza tagħna mhix se tkun sempliċement formalità. Se nagħmlu dak li huwa sewwa għax inħobbu nagħmluh. Se nevitaw għemejjel ħżiena, mhux għax nibżgħu li ninqabdu, imma għax nobogħdu kondotta bħal din.

“Hu M’Għamel Ebda Dnub”

11, 12. (a) Xi ġralu Ġesù kmieni fil-​ministeru tiegħu? (b) Satana kif ittanta lil Ġesù l-​ewwel darba, u liema tattiki makakki uża?

¹¹ Kmieni fil-​ministeru tiegħu, Ġesù ġie mġarrab rigward il-​mibegħda li kellu għad-​dnub. Wara l-​magħmudija tiegħu, hu għadda 40 jum u lejl fix-​xagħri mingħajr ikel. Fi tmiem dan il-​perijodu, Satana mar biex jittantah. Innota kemm kien makakk ix-​Xitan.—Mattew 4:1-​11.

¹² L-​ewwel, Satana qal: “Jekk int bin Alla, għid lil dan il-​ġebel isir ħobż.” (Mattew 4:3) Ġesù kif ħassu wara li kien ilu sajjem? Il-​Bibbja tgħid ċar u tond: “Qabdu l-​ġuħ.” (Mattew 4:2) Għalhekk, Satana ħa vantaġġ mix-​xewqa naturali għall-​ikel u bla dubju stenna apposta sakemm Ġesù kien dgħajjef fiżikament. Innota wkoll il-​frażi kollha tkasbir taʼ Satana: “Jekk int bin Alla.” Satana kien jaf li Ġesù kien “l-​ewwel imwieled mill-​ħolqien kollu.” (Kolossin 1:15) Xorta waħda, Ġesù ma ħalliex lil Satana jġiegħlu jkun diżubbidjenti. Ġesù kien jaf li ma kinitx ir-​rieda t’Alla li juża l-​qawwa tiegħu għal skopijiet egoistiċi. Hu rrifjuta li jagħmel dan, billi wera li straħ bl-​umiltà fuq Ġeħova għall-​ikel u d-​direzzjoni.—Mattew 4:4.

13-15. (a) Satana kif ittanta lil Ġesù t-​tieni u t-​tielet darba, u Ġesù kif wieġeb? (b) Kif nafu li Ġesù qatt ma seta’ jieqaf milli jibqa’ għassa għal Satana?

¹³ Għat-​tieni tentazzjoni tiegħu, Satana ħa lil Ġesù fuq l-​ogħla ħajt tat-​tempju. B’sengħa, Satana għawweġ il-​Kelma t’Alla u ttanta lil Ġesù biex jagħmel wirja spettakolari billi jintefa’ għal isfel minn dak l-​għoli sabiex l-​anġli jkollhom isalvawh. Kieku l-​folol fit-​tempju raw miraklu bħal dan, kien xi ħadd se jażżarda jiddubita li Ġesù kien il-​Messija mwiegħed? U jekk il-​folol aċċettaw lil Ġesù bħala l-​Messija fuq il-​bażi taʼ din it-​turija spettakolari, ma setax Ġesù forsi jevita ħafna tbatija u inkwiet? Jista’ jkun. Imma Ġesù kien jaf li r-​rieda taʼ Ġeħova kienet li l-​Messija jwettaq ix-​xogħol tiegħu b’mod umli, mhux li jinfluwenza lin-​nies biex jemmnu fih minħabba turijiet spettakolari. (Isaija 42:1, 2) Għal darb’oħra, Ġesù rrifjuta li jkun diżubbidjenti lejn Ġeħova. Il-​fama ma ħajritux.

¹⁴ Però, xi ngħidu dwar il-​ġibda għall-​poter? Fit-​tielet attentat tiegħu, Satana offra lil Ġesù s-​saltniet kollha tad-​dinja jekk Ġesù jwettaq att wieħed taʼ qima lil Satana. Ħaseb bis-​serjetà dwar l-​offerta taʼ Satana? “Mur ’l hemm, Satana!” kienet ir-​risposta tiegħu. Hu kompla jgħid: “Għax hu miktub, ‘Qim lil Ġeħova Alla tiegħek, u lilu biss agħti servizz sagru.’” (Mattew 4:10) Qatt ma kien se jkun hemm xi ħaġa li tħajjar lil Ġesù jqim alla ieħor. Ebda offerta taʼ poter jew influwenza f’din id-​dinja ma setgħet iċċaqalqu biex jikkommetti kwalunkwe att taʼ diżubbidjenza.

¹⁵ Qata’ qalbu Satana? Huwa minnu li telaq mal-​kmand taʼ Ġesù. Madankollu, l-​Evanġelju taʼ Luqa jgħid li x-​Xitan “telaq minn ħdejh sakemm isib ħin konvenjenti ieħor.” (Luqa 4:13) Tabilħaqq, Satana, sat-​tmiem, kien se jibqa’ jfittex drabi oħrajn biex jgħaddi lil Ġesù minn prova u jittantah. Il-​Bibbja tgħidilna li Ġesù “ġie provat fl-​aspetti kollha.” (Ebrej 4:15) Għalhekk, Ġesù qatt ma seta’ jieqaf milli jibqa’ għassa; u lanqas aħna ma nistgħu.

16. Satana kif jittanta lill-​qaddejja t’Alla llum, u kif nistgħu niċħdu l-​isforzi tiegħu?

¹⁶ Satana jkompli jittanta lill-​qaddejja t’Alla llum. B’dispjaċir, l-​imperfezzjonijiet tagħna spiss jagħmluna miri faċli. Satana b’makakkerija jappella għall-​egoiżmu, il-​kburija, u r-​regħba għall-​poter. Permezz tal-​ġibda għall-​materjaliżmu, Satana jista’ saħansitra jappella għal dawn kollha f’daqqa! Huwa vitali li kultant nieqfu u neżaminaw lilna nfusna b’mod onest. Nagħmlu tajjeb jekk nimmeditaw fuq il-​kliem taʼ l-​1 Ġwanni 2:15-​17. Hekk kif nagħmlu dan, nistgħu nistaqsu lilna nfusna jekk ix-​xewqat tal-​laħam taʼ din is-​sistema, ix-​xenqa għall-​ġid materjali, u x-​xewqa li nimpressjonaw lil oħrajn dgħajfux xi ftit jew wisq l-​imħabba tagħna għal Missierna tas-​sema. Irridu niftakru li din id-​dinja qed tgħaddi, eżatt bħall-​ħakkiem tagħha, Satana. Ejja niċħdu l-​isforzi makakki tiegħu biex iħajjarna naqgħu fid-​dnub! Jalla niġu mqanqlin minn Sidna, għaliex “hu m’għamel ebda dnub.”—1 Pietru 2:22.

“Dejjem Nagħmel Dak li Jogħġob Lilu”

17. Ġesù kif ħassu dwar li jobdi lil Missieru, però liema oġġezzjoni jistgħu jqajmu xi wħud?

¹⁷ L-​ubbidjenza tinvolvi ħafna iktar milli sempliċement inżommu lura milli nidinbu; Kristu wettaq b’mod attiv kull kmand taʼ Missieru. Hu stqarr: “Dejjem nagħmel dak li jogħġob lilu.” (Ġwanni 8:29) Din l-​ubbidjenza ġabitlu ferħ kbir lil Ġesù. M’għandniex xi ngħidu, xi wħud forsi joġġezzjonaw li l-​ubbidjenza kienet xi ħaġa iktar faċli għal Ġesù. Forsi jirraġunaw li hu kellu jobdi lil Ġeħova biss, li Hu perfett, filwaqt li aħna spiss ikollna nobdu lil bnedmin imperfetti li għandhom pożizzjonijiet t’awtorità. Però, il-​verità hi li Ġesù kien ubbidjenti lejn bnedmin imperfetti li kellhom pożizzjonijiet t’awtorità.

18. Bħala żagħżugħ, liema eżempju t’ubbidjenza ħalla Ġesù?

¹⁸ Waqt it-​trobbija tiegħu, Ġesù kien taħt l-​awtorità taʼ Ġużeppi u Marija, il-​ġenituri umani imperfetti tiegħu. X’aktarx li iktar minn tfal oħrajn, hu seta’ jara n-​nuqqasijiet tal-​ġenituri tiegħu. Irribella hu, billi qabeż l-​irwol tiegħu bħala tifel fil-​familja u qalilhom kif għandhom jieħdu ħsieb il-​familja? Innota dak li jgħid Luqa 2:51 dwar Ġesù meta kellu 12-​il sena: “Baqa’ sottomess lejhom.” B’din l-​ubbidjenza, hu ħalla eżempju eċċellenti għaż-​żgħażagħ Kristjani li jistinkaw biex jobdu lill-​ġenituri tagħhom u juruhom rispett xieraq.—Efesin 6:1, 2.

19, 20. (a) Ġesù liema sfidi uniċi ffaċċja rigward l-​ubbidjenza lejn bnedmin imperfetti? (b) Il-​Kristjani veri llum għala għandhom ikunu ubbidjenti lejn dawk li jieħdu t-​tmexxija fosthom?

¹⁹ Rigward l-​ubbidjenza lejn bnedmin imperfetti, Ġesù ffaċċja sfidi li l-​Kristjani veri llum qatt ma se jkollhom jiffaċċjaw. Ikkunsidra ż-​żmien uniku li kien jgħix fih. Is-​sistema reliġjuża Lhudija, bit-​tempju tagħha f’Ġerusalemm u s-​saċerdozju tagħha, kienet ilha approvata minn Ġeħova imma kienet waslet biex tiġi miċħuda u minflokha kellu jkun hemm l-​arranġament tal-​kongregazzjoni Kristjana. (Mattew 23:33-​38) Sadanittant, ħafna mill-​mexxejja reliġjużi kienu qed jgħallmu tagħlim falz meħud mill-​filosofija Griega. Fit-​tempju, il-​korruzzjoni tant kienet mifruxa li Ġesù sejjaħlu “għar tal-​ħallelin.” (Marku 11:17) Żamm ’il bogħod Ġesù minn dan it-​tempju u mis-​sinagogi? Le! Ġeħova kien għadu qed juża dawn l-​arranġamenti. Sakemm Alla ħa azzjoni u għamel bidliet, Ġesù b’ubbidjenza mar għall-​festi fit-​tempju u s-​sinagoga.—Luqa 4:16; Ġwanni 5:1.

²⁰ Jekk Ġesù kien ubbidjenti f’dawn iċ-​ċirkustanzi, kemm iktar għandhom il-​Kristjani veri jibqgħu ubbidjenti llum! Wara kollox, aħna ngħixu fi żminijiet differenti ferm, iż-​żmien tat-​tiġdid tal-​qima pura li ilu tant imbassar. Alla jassigurana li hu qatt m’hu se jħalli lil Satana jikkorrompi lill-​poplu mġedded tiegħu. (Isaija 2:1, 2; 54:17) Huwa minnu li aħna niffaċċjaw id-​dnub u l-​imperfezzjoni fil-​kongregazzjoni Kristjana. Imma għandna nużaw in-​nuqqasijiet t’oħrajn bħala skuża biex ma nobdux lil Ġeħova, forsi billi ma nattendux il-​laqgħat Kristjani jew billi nikkritikaw lill-​anzjani? Qatt! Minflok, aħna minn qalbna nappoġġaw lil dawk li qed jieħdu t-​tmexxija fil-​kongregazzjoni. B’ubbidjenza, aħna nattendu l-​laqgħat Kristjani u l-​assembleat u napplikaw il-​pariri Skritturali li nirċievu hemmhekk.—Ebrej 10:24, 25; 13:17.

21. Ġesù kif wieġeb għall-​pressjoni mill-​bnedmin biex ma jibqax ubbidjenti lejn Alla, u b’hekk liema eżempju ħalla għalina?

²¹ Ġesù qatt ma ħalla lin-​nies, anki ħbieb b’intenzjonijiet tajbin, iwaqqfuh milli jobdi lil Ġeħova. Per eżempju, l-​appostlu Pietru pprova jipperswadi lil Sidu li ma kellux għalfejn ibati u jmut. Ġesù b’mod sod ċaħad il-​parir taʼ Pietru, li għalkemm b’intenzjoni tajba ma kienx f’loku biex Ġesù jkun ħanin miegħu nnifsu. (Mattew 16:21-​23) Illum, is-​segwaċi taʼ Ġesù spiss ikampaw maʼ qraba li għandhom intenzjonijiet tajbin u li jistgħu jipprovaw iħajruhom ma jobdux il-​liġijiet u l-​prinċipji t’Alla. Bħas-​segwaċi taʼ Ġesù fl-​ewwel seklu, aħna nżommu l-​waqfa tagħna li “nobdu lil Alla bħala ħakkiem u mhux lill-​bnedmin.”—Atti 5:29.

Premjijiet taʼ li Nuru Ubbidjenza bħal taʼ Kristu

22. Ġesù ta t-​tweġiba għal liema mistoqsija, u kif?

²² Meta Ġesù ffaċċja l-​mewt, l-​ubbidjenza tiegħu għaddiet minn prova l-​iktar ħarxa. Matul dak il-​jum mudlam, “hu tgħallem l-​ubbidjenza” fl-​iktar sens sħiħ. Hu għamel ir-​rieda taʼ Missieru u mhux tiegħu. (Luqa 22:42) Matul dan iż-​żmien, hu stabbilixxa rekord perfett taʼ integrità. (1 Timotju 3:16) Hu wieġeb il-​mistoqsija pendenti: Jista’ bniedem perfett jibqa’ ubbidjenti lejn Ġeħova saħansitra fil-​prova? Adam u Eva kienu fallew. Imbagħad Ġesù ġie, għex, miet, u pprovda t-​tweġiba. L-​akbar mill-​ħlejjaq kollha taʼ Ġeħova ta l-​iktar tweġiba b’saħħitha possibbli. Hu obda anki meta l-​ubbidjenza swietlu ħafna.

23-25. (a) L-​ubbidjenza kif inhi relatata maʼ l-​integrità? Agħti tixbiha. (b) X’inhu s-​suġġett tal-​kapitlu li jmiss?

²³ L-​integrità, jew id-​devozzjoni lejn Ġeħova b’qalb sħiħa, tintwera bl-​ubbidjenza. Minħabba li Ġesù obda, hu żamm l-​integrità tiegħu u l-​umanità kollha bbenefikat. (Rumani 5:19) Ġeħova ppremjah bil-​kbir lil Ġesù. Jekk nobdu lil Sidna, Kristu, Ġeħova se jippremjana wkoll. L-​ubbidjenza lejn Kristu twassal għal “salvazzjoni taʼ dejjem”!—Ebrej 5:9.

²⁴ Iżjed minn hekk, l-​integrità hija premju fiha nfisha. Proverbji 10:9 jgħid: “Dak li qed jimxi bl-​integrità se jimxi fis-​sigurtà.” Jekk l-​integrità titqabbel maʼ villa magħmula bi briks taʼ kwalità, kull att t’ubbidjenza jista’ jitqabbel maʼ briksa individwali. Briksa tista’ tidher insinifikanti, imma kull waħda għandha postha, il-​valur tagħha. U meta ħafna jingħaqdu flimkien, tinbena xi ħaġa ħafna iktar taʼ valur. Meta atti t’ubbidjenza jingħaqdu flimkien, wieħed maʼ l-​ieħor, jum wara jum u sena wara sena, aħna nibnu d-​dar sabiħa taʼ l-​integrità tagħna.

²⁵ Ħajja t’ubbidjenza fuq tul taʼ żmien iġġibilna f’moħħna kwalità oħra—is-​sabar. Dan l-​aspett taʼ l-​eżempju taʼ Ġesù huwa s-​suġġett tal-​kapitlu li jmiss.