Għalfejn Tistudjaha l-​Bibbja?

BILL kien żagħżugħ, atletiku, edukat, u kien tat-​tajjeb. Però, xorta ma kienx kuntent. Ħajtu ma kien fiha ebda skop, u dan kien jinkwetah ferm. Hu beda jistudja dwar reliġjonijiet differenti biex jipprova jsib x’inhu l-​iskop tal-​ħajja, imma kollu għalxejn. Fl-​1991 iltaqaʼ maʼ wieħed mix-​Xhieda taʼ Jehovah li ħallielu ktieb li kien jiddiskuti dak li tgħid il-​Bibbja dwar l-​iskop tal-​ħajja. Saru arranġamenti biex jinbeda studju tal-​Bibbja ħalli Bill ikun jistaʼ jiddiskuti dan is-​suġġett u suġġetti oħra.

Bill jiftakar: “Għamilna l-​ewwel studju u minħabba li rreferejna l-​ħin kollu għall-​Bibbja, irrealizzajt li sibt dak li kont qed infittex. It-​tweġibiet mill-​Bibbja tant kienu eċċitanti! Wara dak l-​istudju, soqt sa fuq il-​muntanji, u ħriġt mit-​trakk tiegħi, u bdejt ngħajjat bil-​ferħ li kelli. Ħassejtni ntir bil-​ferħ li sa fl-​aħħar kont sibt it-​tweġibiet għall-​mistoqsijiet tiegħi.”

M’għandniex xi ngħidu, mhux kulmin isib il-​verità tal-​Bibbja jibda jgħajjat letteralment bil-​ferħ. Però ħafna jsibu li meta jsiru jafu t-​tweġibiet għall-​mistoqsijiet importanti tal-​ħajja, għalihom din tkun verament esperjenza taʼ ferħ. Iħossuhom bħal dak ir-​raġel fil-​parabbola taʼ Ġesù li skopra teżor moħbi f’għalqa. Ġesù qal: “[Hu] kollu ferħan imur ibigħ kull ma jkollu u jixtri dik l-​għalqa.”—Mattew 13:44.

Il-​Qofol għal Ħajja Mimlija Skop

Bill kien ilu moħħu jberren dwar mistoqsija bażika, X’inhu l-​iskop tal-​ħajja? Il-​filosfi, it-​teoloġi, u x-​xjenzati ilhom millennji sħaħ jissieltu biex jipprovaw iwieġbu din il-​mistoqsija. Individwi kitbu volumi sħaħ biex jipprovaw iwiġbuha. L-​isforzi tagħhom kienu għalxejn, u ħafna waslu għall-​konklużjoni li m’hemmx tweġiba għal din il-​mistoqsija. Iżda, tweġiba hemm! Għalkemm hija profonda, m’hijiex komplikata. Din tiġi spjegata fil-​Bibbja. Il-​qofol taʼ ħajja ferħana u mimlija skop hu dan: Irid ikollna relazzjoni tajba maʼ Jehovah, il-​Ħallieq tagħna u Missierna tas-​sema. Din kif nistgħu niksbuha?

Hemm żewġ aspetti kif nistgħu nersqu qrib lejn Alla, li forsi mad-​daqqa t’għajn jidhru li huma kontradittorji. Dawk li jersqu qrib lejh iridu jibżgħu minnu u fl-​istess ħin iħobbuh. Ejja nikkunsidraw żewġ skritturi li jappoġġaw din l-​istqarrija. Żmien twil ilu, l-​għaref Sultan Salamun għamel studju bir-​reqqa dwar il-​bniedem u dak li skopra niżżlu bil-​miktub fil-​ktieb Bibliku taʼ Koħèlet, jew Ekkleżjasti. Hu ġabar fil-​qosor dak li osserva u kiteb: “Il-​konklużjoni, wara li kollox instamaʼ, hi: Ibżaʼ minn Alla u ħares il-​kmandamenti tiegħu: għax dan hu d-​dmir taʼ kull bniedem.” (Ekkleżjasti 12:​13, Karm Żammit, korsiv tagħna.) Sekli wara, meta lil Ġesù staqsewh liema kien l-​akbar kmandament fil-​Liġi li ngħatat lil Mosè, hu weġibhom: “Ħobb lill-​Mulej, Alla tiegħek, b’qalbek kollha, b’ruħek kollha, u b’moħħok kollu.” (Mattew 22:​37, korsiv tagħna.) Tinstemaʼ daqsxejn stramba li trid tibżaʼ minn Alla u fl-​istess ħin trid tħobbu? Ejja naraw x’importanza għandhom il-​biżaʼ u l-​imħabba u kif dawn jaħdmu id f’id biex wieħed jistaʼ jkollu relazzjoni sodisfaċenti m’Alla.

Xi Jfisser li Jkollok il-​Biżaʼ minn Alla

Biżaʼ muri b’rispett kbir huwa essenzjali jekk irridu nqimu lil Alla kif jogħġob lilu. Il-​Bibbja tgħid: “Il-​bidu taʼ l-​għerf hu l-​biżaʼ tal-​Mulej.” (Salm 111:10) L-​appostlu Pawlu kiteb: “Ejjew inkomplu jkollna qalb tajba mhix mistħoqqa, li permezz tagħha nistgħu b’mod aċċettabbli nagħtu lil Alla servizz sagru bil-​biżaʼ minn Alla u riverenza profonda.” (Lhud 12:​28, NW) Bl-​istess mod, anġlu jittajjar fl-​għoli tas-​sema, li l-​appostlu Ġwanni ra fil-​viżjoni, beda l-​proklama tiegħu taʼ l-​aħbar tajba bil-​kelmiet: “Ibżgħu minn Alla u agħtuh glorja.”—Apokalissi 14:​6, 7.

Dan il-​biżaʼ minn Alla, li tant hu essenzjali biex wieħed ikollu ħajja mimlija skop, m’huwiex l-​istess bħal dak il-​biżaʼ li jġagħalna nħossuna mwerwrin u mdejqin. Dan jiġri meta niġu mheddin minn xi kriminal perikoluż! Imma l-​biżaʼ minn Alla hu riverenza profonda lejn il-​Ħallieq. Jinvolvi wkoll biżaʼ bnin li jġagħalna noqogħdu attenti li ma noffendux lil Alla għaliex hu l-​Imħallef Suprem u Dak li jistaʼ kollox, li għandu kemm il-​qawwa u kemm l-​awtorità li jikkastiga lil dawk li ma jobdux.

Il-​Biżaʼ u l-​Imħabba Jimxu Id f’Id

Madankollu, Jehovah ma jridx li n-​nies jaqduh biss għax iħossu riverenza profonda lejh. Jehovah jispikka l-​iktar bħala Alla taʼ mħabba. L-​appostlu Ġwanni ġie mqanqal biex jikteb: “Alla hu mħabba.” (1 Ġwann 4:8) Alla Jehovah ttratta b’imħabba kbira mal-​bnedmin, u jrid li n-​nies iwieġbu għal imħabbtu billi jħobbuh huma wkoll. Iżda, din l-​imħabba kif timxi id f’id mal-​biżaʼ minn Alla? Fil-​fatt waħda tikkomplimenta lill-​oħra. Is-​salmista kiteb: “Midħla l-​Mulej taʼ dawk li jibżgħu minnu.”—Salm 25:14.

Immaġina r-​rispett u r-​riverenza profonda li tifel żgħir ikollu għal missieru li f’għajnejh ikun jidher tant b’saħħtu u għaref. Fl-​istess ħin, dan it-​tifel jaf kemm iħobbu missieru u hu jħobbu wkoll. It-​tifel jafdah lil missieru u jmur għandu għall-​pariri, għax jaf li l-​gwida tiegħu hija taʼ ġid għalih. Bl-​istess mod, jekk inħobbu lil Jehovah u jkollna l-​biżaʼ tiegħu, aħna se nobdu d-​direzzjonijiet li jagħtina u dan se jkun taʼ ġid għalina. Innota Jehovah xi jgħid dwar l-​Iżraelin: “M’hux li kien ikollhom dan il-​ħsieb, li jibżgħu minni, u jħarsu kull ma nordnalhom għal ħajjithom kollha, [sabiex] ikollhom ir-​riżq, huma u wliedhom, għal dejjem.”—Dewteronomju 5:29.

Iva, il-​biżaʼ minn Alla mhux se jwassalna għall-​jasar imma għall-​ħelsien, mhux għan-​niket imma għall-​ferħ. Isaija pprofetizza dan dwar Ġesù: “L-​għaxqa tiegħu fil-​biżaʼ tal-​Mulej.” (Isaija 11:3) U s-​salmista kiteb: “Hieni l-​bniedem li jibżaʼ mill-​Mulej, li jitgħaxxaq ħafna bil-​kmandamenti tiegħu.”—Salm 112:1.

Ovvjament, jekk ma nkunux nafuh lil Alla la nistgħu nibżgħu minnu u lanqas inħobbuh. Din hi r-​raġuni għala l-​istudju tal-​Bibbja hu daqshekk importanti. Studju bħal dan se jgħinna nifhmu l-​personalità t’Alla u napprezzaw kemm hu għaqli li nsegwu d-​direzzjonijiet tiegħu. Hekk kif nersqu eqreb lejn Alla, inkunu rridu nagħmlu r-​rieda tiegħu u niġu motivati biex nobdu l-​kmandamenti tiegħu, għax nafu li dan se jkun taʼ ġid għalina.—1 Ġwann 5:3.

Kemm tħossok kuntent meta tkun taf li qiegħed fit-​triq it-​tajba! Hekk iħossu Bill, li ssemma fil-​bidu taʼ l-​artiklu. M’ilux wisq hu qal: “Fid-​disaʼ snin li għaddew mindu kelli l-​ewwel studju tal-​Bibbja, ir-​relazzjoni tiegħi maʼ Jehovah tant kibret. Dik l-​għajta taʼ ferħ li għajjatt fil-​bidu saret verament ħajja mimlija ferħ. Issa sirt inħares lejn il-​ħajja b’mod ottimist. Jien ninsab medhi f’attività sinifikanti, u mhux fil-​ġiri bla skop wara l-​pjaċiri. Jehovah sar persuna reali għalija, u naf li hu jħobbni u jixtieqli l-​ġid.”

Fl-artiklu li jmiss, se nkomplu naraw kif l-​għarfien dwar Jehovah jġib ferħ u benefiċċji lil dawk li japplikawh f’ħajjithom.

[Kumment f’paġna 5]

Min jersaq lejn Alla mhux iħobbu biss irid imma wkoll jibżaʼ minnu

[Stampa f’paġna 6]

Ġesù kien hieni li jibżaʼ minn Jehovah