Fittex it-​Tajjeb f’Kulħadd

“Ftakar fija, Alla tiegħi, biex ikunli taʼ ġid.”—NEĦEMIJA 13:31.

1. Jehovah kif jaġixxi bit-​tjieba maʼ kulħadd?

WARA ħafna ġranet b’temp imsaħħab u mudlam, ix-​xemx iġġib bidla li kulħadd jieħu pjaċir biha. In-​nies ikollhom burdata aħjar u jħossuhom tajjeb. Bl-​istess mod, wara żmien twil taʼ xemx tikwi u nixfa, ħalba xita—anki waħda qawwija—tiffriska u sserraħ lil dak li jkun. Il-​Ħallieq tagħna kollu mħabba, Jehovah, bena fl-​atmosfera taʼ l-​art dan ir-​rigal meraviljuż tat-​temp. Ġesù ġibed l-​attenzjoni lejn il-​ġenerożità t’Alla meta għallem: “Ħobbu lill-​għedewwa tagħkom, u itolbu għal dawk li jippersegwitawkom, biex tkunu wlied Missierkom li hu fis-​smewwiet; għax hu jtallaʼ x-​xemx tiegħu sew fuq il-​ħżiena u sew fuq it-​tajbin, u jniżżel ix-​xita sew fuq min hu tajjeb u sew fuq min m’huwiex.” (Mattew 5:​43-45) Iva, Jehovah jaġixxi bit-​tjieba maʼ kulħadd. Il-​qaddejja tiegħu għandhom jistinkaw biex jimitawh billi jfittxu t-​tajjeb fl-​oħrajn.

2. (a) Jehovah fuq liema bażi jaġixxi bit-​tjieba? (b) Jehovah x’jinnota fil-​mod kif aħna nwieġbu għat-​tjieba tiegħu?

² Jehovah fuq liema bażi jaġixxi bit-​tjieba? Minn meta Adam waqaʼ fid-​dnub, Jehovah ma waqafx ifittex it-​tajjeb fil-​bnedmin. (Salm 130:​3, 4) L-​iskop tiegħu hu li jirrestawra lill-​bnedmin ubbidjenti għal ħajja f’Ġenna taʼ l-​art. (Efesin 1:​9, 10) Il-​qalb tajba mhix mistħoqqa tiegħu tatna l-​prospett tal-​ħelsien mid-​dnub u l-​imperfezzjoni permezz taż-​Żerriegħa mwiegħda. (Ġenesi 3:15; Rumani 5:​12, 15) Jekk dak li jkun jaċċetta l-​arranġament tal-​fidwa se jkun possibbli għalih li maż-​żmien jerġaʼ jsir perfett. Jehovah issa qed josserva lil kull wieħed u waħda minna biex jara, fost affarijiet oħra, kif nirreaġixxu għall-​ġenerożità tiegħu. (1 Ġwann 3:16) Hu jinnota kulma nagħmlu biex nuru kemm napprezzaw it-​tjieba tiegħu. L-​appostlu Pawlu kiteb: “Għax Alla m’hux se jkun hekk inġust li jinsa dak li intom għamiltu u l-​imħabba li wrejtu lejn ismu meta qdejtu u għadkom taqdu lill-​qaddisin.”—Lhud 6:10.

3. Liema mistoqsija huwa xieraq li nikkunsidraw?

³ Allura, kif nistgħu nimitaw lil Jehovah f’li nfittxu t-​tajjeb fl-​oħrajn? Ejja nikkunsidraw it-​tweġibiet għal din il-​mistoqsija f’erbaʼ aspetti taʼ ħajjitna: (1) fil-​ministeru Kristjan, (2) fil-​familja, (3) fil-​kongregazzjoni, u (4) fir-​relazzjonijiet tagħna m’oħrajn.

Meta Nippridkaw u Nagħmlu Dixxipli

4. Meta nieħdu sehem fil-​ministeru Kristjan kif inkunu qed nuru li nfittxu t-​tajjeb fl-​oħrajn?

⁴ “L-​għalqa hija d-​dinja,” spjega Ġesù biex iwieġeb il-​mistoqsijiet tad-​dixxipli tiegħu dwar it-​tifsira tal-​parabbola tal-​qamħ u s-​sikrana. Aħna, bħala d-​dixxipli taʼ Ġesù f’dan iż-​żmien, nagħrfu kemm dan huwa minnu meta nieħdu sehem fil-​ministeru tagħna. (Mattew 13:​36-38; 28:​19, 20) Il-​ministeru taʼ l-​għalqa tagħna jinvolvi d-​dikjarazzjoni pubblika tal-​fidi tagħna. Il-​fatt li x-​Xhieda taʼ Jehovah issa huma magħrufin sew għall-​ministeru tagħhom minn dar għal dar u fit-​toroq huwa xiehda fih innifsu taʼ kemm aħna nħabirku biex infittxu lil dawk li jixirqilhom il-​messaġġ tas-​Saltna. Tabilħaqq, Ġesù ta l-​istruzzjoni: “Fil-​belt jew raħal fejn tidħlu, araw ikunx hemm min jixraqlu tmorru għandu.”—Mattew 10:11; Atti 17:17; 20:20.

5, 6. Għala nipperseveraw f’li nżuru lin-​nies b’mod ripetut fi djarhom?

⁵ Meta mmorru nżuru lin-​nies mingħajr ma niġu mistiedna minnhom, aħna nosservaw ir-​reazzjoni tagħhom għall-​messaġġ tagħna. Kultant insibu inkwilin li jismagħna waqt li xi ħadd mill-​istess dar jgħajjat, “M’aħniex interessati,” u ż-​żjara tintemm ħesrem. Kemm jiddispjaċina meta l-​oppożizzjoni jew in-​nuqqas taʼ interess taʼ individwu wieħed jeffettwa l-​mod kif iwieġeb l-​ieħor! Allura, x’nistgħu nagħmlu biex nipperseveraw ħalli nfittxu t-​tajjeb f’kulħadd?

⁶ Iż-​żjara li jmiss f’dik l-​istess dar meta mmorru nippridkaw fl-​istess inħawi tistaʼ tagħtina l-​opportunità biex inkellmu direttament lil min ikun qatgħalna kliemna fiż-​żjara taʼ qabel. Jekk niftakru x’ġara f’dik id-​darba, dan se jkun t’għajnuna biex inkunu preparati. Jistaʼ jkun li dak li oppona aġixxa b’motiv tajjeb, għax jemmen li hu għandu jwaqqaf lil dak li beda jismaʼ milli jwieġeb għall-​messaġġ tas-​Saltna. Forsi l-​ħarsa tiegħu ġiet effettwata minn xi informazzjoni falza dwar l-​intenzjonijiet tagħna. Iżda dan ma jtellifniex milli nippersistu fl-​ippridkar taʼ l-​aħbar tajba tas-​Saltna f’dik id-​dar, waqt li bit-​tattika nipprovaw nikkoreġu xi impressjoni ħażina li setaʼ kien hemm. L-​iskop tagħna hu li ngħinu lil kulħadd jikseb għarfien eżatt dwar Alla. Imbagħad Jehovah għandu mnejn jiġbed lil dak l-​individwu lejh.—Ġwann 6:44; 1 Timotju 2:4.

7. X’jistaʼ jgħinna nkunu pożittivi meta mmorru fuq in-​nies biex inkellmuhom?

⁷ L-​istruzzjonijiet li Ġesù ta lid-​dixxipli tiegħu kienu jinkludu wkoll l-​oppożizzjoni mill-​familja. Mhux hu stess stqarr: “Ġejt nifred lill-​bniedem minn missieru, lill-​bint minn ommha, u lil mara minn omm żewġha”? Ġesù żied: “Il-​bniedem ikollu n-​nies taʼ daru stess għedewwa tiegħu.” (Mattew 10:​35, 36) Madankollu, iċ-​ċirkustanzi u l-​attitudnijiet jinbidlu. Marda li tiġi ħabta u sabta, il-​mewt taʼ xi qarib, diżastri, kriżi emozzjonali, u numru bla għadd taʼ fatturi oħra jinfluwenzaw ir-​reazzjoni tan-​nies fl-​ippridkar tagħna. Jekk għandna ħarsa negattiva—li n-​nies li nippridkawlhom se jibqgħu ma jwiġbux—inkunu aħna verament qed infittxu t-​tajjeb fihom? Għala ma nerġgħux inżuruhom bil-​ferħ f’darhom f’okkażjoni oħra? Għandna mnejn insibu reazzjoni differenti. Kultant ma jkunx dak li ngħidu iżda kif ngħiduh li jqanqal bidla fil-​mod taʼ kif iwiġbuna. Talb bil-​ħrara lil Jehovah qabel ma nibdew l-​ippridkar żgur li se jgħinna nkunu pożittivi u nkunu nistgħu nippreżentaw il-​messaġġ tas-​Saltna b’mod li jiġbed lil kulħadd.—Kolossin 4:6; 1 Tessalonikin 5:17.

8. X’jistaʼ jirriżulta meta l-​Kristjani jfittxu t-​tajjeb fil-​qraba tagħhom li ma jemmnux?

⁸ F’bosta kongregazzjonijiet ħafna membri li jiġu mill-​istess familja jaqdu lil Jehovah. Iż-​żgħażagħ jammiraw u jirrispettaw il-​perseveranza taʼ qarib akbar fl-​età li jkollu relazzjonijiet tajbin fil-​familja u fir-​rabta taż-​żwieġ u spiss dan jgħin biex titqanqal qalb iż-​żgħażagħ. Ħafna nisa Kristjani ġew megħjuna billi taw każ il-​parir taʼ l-​appostlu Pietru biex lil żwieġhom jirbħuhom mingħajr kliem.—1 Pietru 3:​1, 2.

Fil-​Familja

9, 10. Ġakobb u Ġużeppi kif fittxew it-​tajjeb fil-​familja tagħhom?

⁹ Ir-​rabta mill-​qrib li tgħaqqad lill-​membri taʼ familja tipprovdi post ieħor fejn nistgħu nfittxu t-​tajjeb fl-​oħrajn. Ikkunsidra lezzjoni mill-​mod kif Ġakobb ittratta maʼ wliedu. F’Ġenesi kapitlu 37, versi 3 u 4, il-​Bibbja tindika li Ġakobb kien iħobbu b’mod speċjali lil Ġużeppi. Ħut Ġużeppi bdew jgħiru, saħansitra waslu biex bdew jippjanaw li joqtluh. Madankollu, innota l-​attitudnijiet taʼ Ġakobb u Ġużeppi iktar tard f’ħajjithom. It-​tnejn li huma fittxew it-​tajjeb fil-​familja tagħhom.

¹⁰ Meta Ġużeppi kien qed jaqdi bħala l-​kap fuq it-​tqassim taʼ l-​ikel fi żmien taʼ ġuħ kbir fl-​Eġittu, hu laqaʼ lil ħutu. Għalkemm mhux mill-​ewwel uriehom min kien, hu mexxa l-​affarijiet sabiex jiżgura ruħu li jieħdu ħsiebhom u li jkollhom l-​ikel x’jieħdu lura lil missierhom li kien imdaħħal sew fiż-​żmien. Iva, minkejja li safa vittma tal-​mibegħda tagħhom, Ġużeppi aġixxa għall-​ġid tagħhom. (Ġenesi 41:​53–42:8; 45:23) Bl-​istess mod, meta kien qed imut, Ġakobb bierek b’mod profetiku lil uliedu kollha. Għalkemm l-​aġir ħażin tagħhom wassal biex ġew miċħuda minn xi privileġġi, ħadd minnhom ma nqataʼ barra milli jirċievi wirt fl-​art. (Ġenesi 49:​3-28) Hawnhekk Ġakobb tabilħaqq wera mħabba meraviljuża li kienet lesta tissaporti!

11, 12. (a) Liema eżempju profetiku jenfasizza l-​importanza li nfittxu t-​tajjeb ġewwa l-​familja? (b) Liema lezzjoni nitgħallmu mill-​eżempju tal-​missier fit-​tixbiha taʼ Ġesù taʼ l-​iben il-​ħali?

¹¹ Is-​sabar taʼ Jehovah fil-​mod kif ittratta lil ġens bla fidi taʼ Iżrael jagħtina iktar dehen dwar il-​mod kif hu jfittex it-​tajjeb fil-​poplu tiegħu. Billi uża ċ-​ċirkustanzi tal-​familja tal-​profeta Ħosegħa, Jehovah wera kemm hu lest jissaporti sforz l-​imħabba tiegħu. Gomer, mart Ħosegħa, għamlet adulterju kemm-il darba. Minkejja dan, Jehovah idderieġa lil Ħosegħa: “Erġaʼ mur, u ħobb il-​mara, maħbuba minn żewġha, li ħallietu biex tingħaqad maʼ rġiel oħra; l-​istess kif il-​Mulej iħobb ’l ulied Iżrael, għalkemm huma jduru lejn allat oħra u jħobbu l-​ftajjar taż-​żbib.” (Ħosegħa 3:1) Għala tah dawn l-​istruzzjonijiet? Jehovah kien jaf li fost il-​ġens li abbanduna triqatu, kien hemm individwi li se jwieġbu għall-​paċenzja tiegħu. Ħosegħa ddikjara: “Mbagħad ulied Iżrael jerġgħu lura jfittxu lill-​Mulej, Alla tagħhom, u lil David, is-​sultan tagħhom; jersqu jitriegħdu quddiem il-​Mulej, jersqu biex jieħdu l-​ġid tal-​Mulej fil-​jiem li għad iridu jiġu.” (Ħosegħa 3:5) Żgur li dan huwa eżempju mill-​aqwa li nistgħu nirriflettu fuqu meta niffaċċjaw diffikultajiet fil-​familja. Jekk tibqaʼ tfittex it-​tajjeb f’membri oħrajn tal-​familja għallinqas tkun qed tagħti eżempju mill-​aqwa fil-​paċenzja.

¹² Il-​parabbola taʼ Ġesù taʼ l-​iben il-​ħali tagħtina saħansitra iktar dehen dwar kif nistgħu nfittxu t-​tajjeb fejn tidħol il-​familja tagħna stess. L-​iben iż-​żgħir mar lura d-​dar wara li abbanduna l-​ħajja xellerata li kien qed jgħix. Il-​missier ittrattah bil-​ħniena. Il-​missier kif irreaġixxa għall-​ilmenti taʼ l-​iben il-​kbir li qatt ma kien telaq lill-​familja tiegħu? Waqt li kellem lill-​ibnu l-​kbir, il-​missier iddikjara: “Ibni, . . . inti dejjem miegħi, u kull ma hu tiegħi huwa tiegħek.” Hawnhekk ma kienx jiksru iżda sempliċement kien qed jikkonfermalu l-​imħabba tiegħu bħala missier. Hu kompla: “Kien meħtieġ li nagħmlu festa u nifirħu, għax dan ħuk kien mejjet u raġaʼ qam, kien mitluf u nstab.” Aħna nistgħu bl-​istess mod nibqgħu nfittxu t-​tajjeb fl-​oħrajn.—Luqa 15:​11-32.

Fil-​Kongregazzjoni Kristjana

13, 14. Liema hu mod wieħed kif nistgħu napplikaw l-​aqwa liġi taʼ l-​imħabba fil-​kongregazzjoni Kristjana?

¹³ Bħala Kristjani, aħna nipprovaw napplikaw l-​aqwa liġi taʼ l-​imħabba. (Ġakbu 2:​1-9) Jistaʼ jkun li fil-​kongregazzjoni tagħna naċċettaw lil oħrajn li l-​qagħda materjali tagħhom hija differenti minn tagħna. Iżda għandna xi preġudizzju rigward ir-​razza, il-​kultura, jew saħansitra l-​isfond reliġjuż? Jekk inhu hekk, kif nistgħu nagħtu kas il-​parir taʼ Ġakbu?

¹⁴ Meta nilqgħu lil kulmin jattendi l-​laqgħat tagħna nkunu qed nuru kemm aħna ospitabbli. Meta nieħdu l-​inizjattiva biex inkellmu lil uħud ġodda li jiġu s-​Sala tas-​Saltna, x’aktarx li kull biżaʼ u mistħija li jistaʼ jkollhom għall-​ewwel jgħibu. Tabilħaqq, xi wħud li jattendu laqgħa Kristjana għall-​ewwel darba, jgħidu: “Kulħadd kien verament dħuli. Qisu kulħadd kien diġà jafni. Ħassejtni komdu.”

15. Iż-​żgħażagħ fil-​kongregazzjoni kif jistgħu jiġu megħjuna biex juru interess f’dawk li huma akbar fl-​età?

¹⁵ F’xi kongregazzjonijiet, xi żgħażagħ għandhom mnejn jinġabru flimkien ġewwa jew barra s-​Sala tas-​Saltna fl-​aħħar tal-​laqgħa, u ma tantx jassoċjaw maʼ wħud akbar fl-​età. Kif tistaʼ ssir xi ħaġa pożittiva biex din id-​drawwa tinqataʼ? M’għandniex xi ngħidu, l-​ewwel pass hu li l-​ġenituri jħarrġu lil uliedhom mid-​dar, waqt li jippreparawhom għal-​laqgħat. (Proverbji 22:6) Jistgħu jingħataw l-​inkarigu li jlestu diversi pubblikazzjonijiet biex kulħadd jieħu miegħu dak li għandu bżonn għal-​laqgħat. Il-​ġenituri jistgħu wkoll jinkuraġġixxu ’l uliedhom biex jgħidu żewġ kelmiet lix-​xjuħ u lil dawk batuti mis-​saħħa fis-​Sala tas-​Saltna. It-​tfal se jħossuhom sodisfatti għax ikollhom xi ħaġa inkuraġġanti x’jgħidu lil uħud bħal dawn.

16, 17. Il-​kbar kif jistgħu jfittxu t-​tajjeb fiż-​żgħażagħ tal-​kongregazzjoni?

¹⁶ L-​aħwa rġiel u nisa li huma akbar fl-​età għandhom jieħdu interess fiż-​żgħażagħ tal-​kongregazzjoni. (Filippin 2:4) Jistgħu jieħdu l-​inizjattiva biex ikellmu liż-​żgħażagħ b’mod li jinkuraġġihom. Ġeneralment ikun hemm punti li jkunu spikkaw waqt il-​laqgħa. Forsi tistaʼ tistaqsi liż-​żgħażagħ jekk ħadux pjaċir bil-​laqgħa u jekk kienx hemm xi punti li verament laqtuhom u li jistgħu japplikawhom. Bħala parti importanti mill-​kongregazzjoni, iż-​żgħażagħ iridu jiġu mfaħħrin talli joqogħdu attenti u taʼ kull kumment li jagħmlu waqt il-​laqgħa jew għal xi sehem li jkollhom f’partijiet tal-​programm. Il-​mod kif iż-​żgħażagħ jingwalawha maʼ min hu akbar minnhom fil-​kongregazzjoni u l-​mod kif jieħdu ħsieb taʼ xogħlijiet sempliċi fid-​dar se jindikaw li wisq probabbli huma se jkunu kapaċi jieħdu ħsieb responsabbiltajiet akbar iktar tard f’ħajjithom.—Luqa 16:10.

¹⁷ Xi żgħażagħ jaċċettaw ir-​responsabbiltà, u b’hekk jimxu ’l quddiem sal-​punt li minħabba l-​kwalitajiet spiritwali tagħhom jingħataw inkarigi iktar importanti. Il-​fatt li jkollhom x’jagħmlu se jżommhom lura milli jġibu ruħhom ħażin. (2 Timotju 2:22) Inkarigi bħal dawn jistgħu jkunu bħal “prova” għall-​aħwa rġiel li l-​mira tagħhom hi li jaqdu bħala qaddejja ministerjali. (1 Timotju 3:10) Il-​parteċipazzjoni preparata tagħhom fil-​laqgħat u ż-​żelu tagħhom fil-​ministeru, kif ukoll l-​interess li juru lejn kulħadd fil-​kongregazzjoni, se jgħinu lill-​anzjani biex jaraw humiex kapaċi meta jikkunsidrawhom għal iktar inkarigi.

Infittxu t-​Tajjeb f’Kulħadd

18. Liema periklu għandu jiġi evitat meta jsir ġudizzju, u għala?

¹⁸ “M’hux sewwa żżomm maʼ dak u maʼ l-​ieħor fil-​ħaqq,” jgħid Proverbji 24:23. L-​għerf tas-​sema jitlob li l-​anzjani ma jkunux parzjali meta jiġġudikaw il-​kwistjonijiet fil-​kongregazzjoni. Ġakbu qal: “L-​għerf li ġej mis-​sema, qabel kollox hu għerf safi, imbagħad hu għerf li jfittex is-​sliem, it-​tjubija u l-​ħlewwa, huwa kollu ħniena u frott tajjeb, bla ma jħares lejn l-​uċuħ u bla qerq.” (Ġakbu 3:​17, Edizzjoni taʼ l-​1998) M’għandniex xi ngħidu, waqt li jfittxu t-​tajjeb fl-​oħrajn, l-​anzjani jridu jkunu ċerti li l-​ġudizzju tagħhom ma jkunx preġudikat minħabba r-​relazzjonijiet persunali jew l-​emozzjonijiet tagħhom. “Alla joqgħod fil-​laqgħa [tal-“Wieħed Divin,” NW],” kiteb is-​salmista Asaf. “F’nofs l-​allat [jew inkella “wħud bħal allat,” li jirreferi għall-​imħallfin umani] jaqtaʼ s-​sentenza: ‘Kemm se ddumu taqtgħu l-​ħaqq bil-​ħażen, u tħarsu lejn wiċċ il-​ħżiena?’” (Salm 82:​1, 2) Minħabba f’hekk, l-​anzjani jwarrbu kull traċċa taʼ preferenzi meta jkun hemm xi ħabib jew qarib involut fil-​kwistjoni. B’dan il-​mod huma jippreservaw l-​għaqda tal-​kongregazzjoni u jħallu l-​ispirtu taʼ Jehovah jopera bla xkiel.—1 Tessalonikin 5:23.

19. B’liema modi nistgħu nfittxu t-​tajjeb fl-​oħrajn?

¹⁹ Meta nfittxu t-​tajjeb f’ħutna, aħna nkunu qed nirriflettu l-​attitudni taʼ Pawlu meta indirizza lill-​kongregazzjoni tat-​Tessalonikin. Hu qal: “Aħna żguri minnkom fil-​Mulej, jiġifieri, li intom qegħdin tagħmlu u għad tagħmlu dak li ordnajnielkom.” (2 Tessalonikin 3:4) Se nkunu iktar lesti ninjoraw id-​dgħjufijiet taʼ l-​oħrajn meta nfittxu t-​tajjeb tagħhom. Se nfittxu raġunijiet għalxiex nistgħu nfaħħru lil ħutna, u żgur nevitaw spirtu taʼ kritika. Pawlu kiteb: “L-​amministraturi wieħed jistenniehom li jkunu fidili.” (1 Korintin 4:2) Il-​fedeltà, mhux biss taʼ dawk li għandhom l-​inkarigi fil-​kongregazzjoni iżda taʼ ħutna l-​Kristjani kollha, se ġġagħalna nħobbuhom iktar. Għaldaqstant, se nsiru iktar qrib tagħhom u se nsaħħu r-​rabta tas-​sħubija Kristjana. Se jkollna l-​istess opinjoni li Pawlu kellu taʼ ħutu taʼ żmienu. Huma ‘jaħdmu magħna għas-​Saltna taʼ Alla’ u “huma taʼ faraġ kbir,” jew għajnuna li ssaħħaħ, għalina. (Kolossin 4:11) B’hekk nuru l-​istess attitudni li juri Jehovah.

20. Liema barkiet se jiġu fuq dawk li jfittxu t-​tajjeb f’kulħadd?

²⁰ Żgur li aħna nidwu l-​kliem tat-​talba taʼ Neħemija: “Ftakar fija, Alla tiegħi, biex ikunli taʼ ġid.” (Neħemija 13:31) Kemm aħna kuntenti li Jehovah ifittex it-​tajjeb fin-​nies! (1 Slaten 14:13) Jalla nimitawh fil-​mod kif nittrattaw m’oħrajn. Jekk nagħmlu dan se jkollna l-​prospett tal-​fidwa u taʼ ħajja taʼ dejjem f’dinja ġdida li issa tant tinsab fil-​qrib.—Salm 130:​3-8.

Int Kif Twieġeb?

• Jehovah fuq liema bażi jaġixxi bit-​tjieba maʼ kulħadd?

• Kif nistgħu nfittxu t-​tajjeb fl-​oħrajn

• fil-​ministeru tagħna?

• fil-​familja tagħna?

• fil-​kongregazzjoni tagħna?

• fir-​relazzjonijiet kollha tagħna?

[Stampa f’paġna 18]

Minkejja l-​mibegħda li qabel kellhom ħutu lejh, Ġużeppi fittex it-​tajjeb tagħhom

[Stampa f’paġna 19]

L-​oppożizzjoni ma ttellifniex milli nipprovaw ngħinu lil kulħadd

[Stampa f’paġna 20]

Minkejja l-​passat tagħhom, ħadd minn ulied Ġakobb ma nqataʼ barra mill-​barkiet tiegħu

[Stampa f’paġna 21]

Ilqaʼ lil kulħadd fil-​laqgħat Kristjani